Matáyɔ 19
19
Ɓɔphɛi ndea Yéso gǔ á keye
(Ɔna phɔtɔ Mkɔ 10.1-12)
1Ɓî Yéso agɔɓi ye ɓɔphɛi ndɔ, áɔmɛa ka Galiláya, áoga na Yudɛ́a, kubi a Yɔɔdáni. 2Usɛsɛ ángbó á ɓakpa ɓáomɓea, â kǒamisa ɓasambi kó.
3Ɓaphaisáyɔ ɓuangbo ɓáombikia ka tombaga akɛ, ɓáomúsia gea: «Ɛɔphi nɛsu asosi gea, mǒko án'yɛ tɔ nkakɛ ka nyɔngɔ bui?» 4Yéso áǒsikisia: «Ɓókótangimbɛ nyɔngɔ nde suɓi á Ɓuku á Mokonga: ‹Ka nkpangeɔ, Ababisa ɗáncɔnji mǒko na nke, 5mpɔ, Mokonga áogea: Ka nyɔngɔ índɔ unge, mǒko anɗeketande abakɛ n'amakɛ, ɓáojúkana na nkakɛ, ɓɔbu ɓaɓɛ ɓáɓande nkpa mo#Ɔna Nkp 2.24.› 6Kaɓondɔ, ɓáká ye ɓakpa ɓaɓɛ, ɓá ndiu nkpa mo. Cɔ, nkpa kakatanisɛmbɛ kema nde Mokonga ajúki.» 7Ɓaphaisáyɔ ɓâ goto omúsia: «Cɔ, ka nyɔngɔ sina nde Mósa ɗásosi gǎkɛ gea, akeni mǒko ámophɛ nkakɛ ɓaoɓa á keyé mbenɔ á ya akɛ#Ɔna Tɔl 24.1?» 8Yéso áǒsikisia: «Mósa ɗánososi yá á ɓake ɓanu ka nyɔngɔ á gbaga á měma anu. Ɗákákpangi gǎkɛ ɓó. 9Nenóngoɗi gea, aoɓá nkpa n'an'yé nkakɛ na nna tɔ ka nyɔngɔ á gua n'etoa, áomɓoa nke ɓaangbo, nkpa ndɔ, a ye tɔ nto á otungɔ.»
10Mpɔ ɓagoigi nɛkɛ ɓáongea te: «Nyɔngɔ á nke na mǒko a ye oɓá ɓondɔ, kákeni ye pɛ mǒko ndɔ ámukɛ nke.» 11Yéso áǒsikisia te: «Nna ɓakpa ɓɔbu ɓáunge ɓáɔtɔka na ɓáɓeeki nyɔngɔ ndee, tɔndɔ ɓundɔ Mokonga aeɓophi gǎkɛ ɓukpɛkpɛ á ɓeekea í. 12Ana nyɔngɔ ɗanga-ɗanga nde aǒimisia ɓǒko uká á ɓake. Nga, ɓuangbo ɓáɓɔkɔtɛani kángá á ɓukpɛkpɛ á uká á nke, ɓǒko ɓuangbo ɓáunge ɓétǒngu, ɓuangbo ɓákáǒɓuka ɓake ka nyɔngɔ á bɛɗaneaga á Mokonga ka koɓoamɛ á na koba. Nkpa nde aɔtɔka ɓeekea á ɓukpɛkpɛ á ɓɔphɛi nde, áɓeekeɛ ú.»
Yéso abisi njaga gǔ á ɓaniki
(Ɔna phɔtɔ Mkɔ 10.13-16; Lók 18.15-17)
13Ɓakpa ɓáǒbika na ɓaniki ka gea Yéso áebisiɛ njaga na mɛma ka phɔaɓɔ, ɓagoigi ɓâ gǎkɛ ǒphekeaga ɓakpa ndɔɔ. 14Yéso â gǎkɛ ogea: «Óɗoani ɓaniki ɓásɛkɛɗɛ bíbí ani, ɓókǒimisiɛmbɛ nga, koɓoamɛ ndea na koba a ka ɓunde ɓá ɓea ɓaniki.» 15Mpɔ, áobisa njaga gǔ aɓɔ, áotóka wa.
Ntɔi moci
(Ɔna phɔtɔ Mkɔ 10.17-31; Lók 18.18-30)
16Nkpa moci áombikia Yéso, áomúsia: «Ngoisigi, kema ánjá sina nde négeɛ ka gea, néɓɛ na enda á mɛyɔ?» 17Yéso áonsikisia ɓe: «Ka nyɔngɔ éke nde oomúsia ka phɔa á kema ánjá? Nto anjánjá a tɔ mo. Aoɓá n'okondi ngia ka enda á mɛyɔ, cɔ, ámbá ɛɔphi.» 18Nkpa ndɔ â goto oúsia: «Ɛɔphi sina?» Yéso áonsikisia: «Kómmowɛ mɔnɔ nkpa, kótunganɛ mɔnɔ, kóúɓɛ mɔnɔ, kóɗigimisɛ mɔnɔ nyɔngɔ á mbɛa ka nkpa, 19nɗokomisa abakɔ n'amakɔ, nkonda dakɔ ɓíndɔ ǒkondi oɓɛ sasakɔ#Ɔna Jua 20.12-16; Tɔl 5.16-20; Ɓlw 19.18.» 20Moganda ndɔ áongoɗea: «Ɗékpangi ámbá ɛɔphi ndɔ bui. Cɔ, kema sina nde amojiganei goto?» 21Yéso áongea te: «Aoɓá n'okondi ɓá nto anjánjá phɛɛ, gǎ ósombisɛ nkumba nɛkɔ bubui, óɓophɛ ɓato á ɓuyɛnɛ imɔna í, na oɓande n'ɛtɔi na koba. Mpɔ, bika ómoɓeɛ.» 22Nkpa ndɔ aɔ́ki ye nyɔngɔ ndɔ, áoga n'aɓɛí, ka nyɔngɔ nde ɗátú ntɔi phɛɛ.
23Mpɔ Yéso áǒngoɗea ɓagoigi nɛkɛ: «Amɔ̂ tɔ akpɛ ka ɓatɔi ngia ka koɓoamɛ ndea Mokonga. 24Nenóngoɗi goto gea, aáphǒ ka ngamia ngia suɓi á kubu á mǔphe, a ndiu gǎkɛ akpɛ phɛɛ ka ntɔi ngia ka koɓoamɛ ndea Mokonga.» 25Ɓî ɓagoigi ɓáɔ́ki ye ɓó, ɓáoyayama phɛɛ, ɓáɔyɔngaga gea: «Ani mmbé aɔtɔka n'aami ka měma?» 26Yéso áǒenga jaa! Áǒgea: «Kema bui nde nkpa nna ɔtɔtɔkisa, Mokonga aámbé aɔtɔtɔkisa.»
27Mpɔ, Pɛ́tɛɛ áongoɗea Yéso: «Ɔ́na phɔ́, ɓesu ɓeɗeketi kema bui ka nyɔngɔ á ɓeá akɔ. Cɔ, ɓɛtɔande kema sina?» 28Yéso áǒngoɗea: «Nenóngoɗi ɗoni gea, mbenɔ nde Muna-Nkpa aikande ka kankaanga á ɓoombia ka mokonda nde abikande, ɓenu íɓunde ɗóɓomoɓǐ, ɓoikande phɔtɔ ka kankaanga nkama na iɓɛ (12) ka tena á nyɔngɔ á ekuna nkama na iɓɛ (12) ndea Isilaɛ́li. 29Na nkpa buakɛ mmbé ɗáɗeketi endu nɛɓɔ, ɓana-amakɛ, ɓ'áwákɛ, abakɛ, amakɛ, ɓaniki nɛkɛ, na ciko nɛkɛ ka nyɔngɔ ani, ɓátɔande ú kɔnyɛ́nya mɔngɔ mia moci (100), na tɔá phɔtɔ enda á mɛyɔ. 30Cɔ, ɓakpa ɓásii nde ɓá gǎkɛ kɛ̌kɛnde ɓato á k'ama mosá-mosá ɓáɓande ɓato á mbusa, na ɓato á mbusa, ɓáɓande ɓato á k'ama mosá-mosá.»
Sélection en cours:
Matáyɔ 19: KMW
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2021, Wycliffe Bible Translators, Inc.
