Mataayo 11

1Hano Yesu amariri kobharaghereri abhaanabheegha bhaache ikomi na bhabhere, akaru hayo. Aghaye mo‑meghya ghe Ghariraaya kuraghani na kobheeghi abhaato angʼana e Ryobha.

Yohana Omubhatisaachi na Yesu

(Ruuka 7:18–35)

2Eriibhagha riyo Yohana Omubhatisaachi are abhöhuru mwighërëcha. Hano oghwire ghano Kirisito are araköra, akabhatoma abhaanabheegha bhaache abhamu, 3bhamobhoori Yesu kubha, “Kana, iye niiye Kirisito wuure akuucha, ghasi tughanye owonde?”

4Yesu akabhagharokeri akabhugha, “Mughëndë momobhoorere Yohana ghoose ghano morooche na ghoghooghu. 5Kubha, abhahuku ˆbhakarighi, na abhabhëëru ˆbhaghaghënda, na abhabhabharu bha mbiti ˆbhakahöra, na abhakiro bhakooghu, na abhaku ˆbhakaryoka. Wiiki, abhahabhe ˆbhakaraghaneru Angʼana Anchömu e Ryobha.#11:5 Mööhi Isaaya 35:5–6, 61:1. 6Ngʼoni omooto wowoose uno ataanyi na kemboori ighoro yaane.”

7Hano abhaanabheegha bha Yohana ꞉bhaatanwire, Yesu aghasëëma ghoghabhoorera makinda gha bhaato ighoro e Yohana akabhugha, “꞉Mooghiire kumööhi ke iyo mwibhara? Obhunyaaki bhuno bhoghosingisu no obhukama? Tiyaanyi. 8Mbe, ꞉mooghiire kumööhi ke? Kana, ꞉mooghiire kumumööhërëri omooto uno abheekiri amaghööti machömu? Tiyaanyi, abhaato bhano bhahaabheeka amaghööti amachömu, mbahiikara mo‑chanyumba che ghitëmi. 9Mbe, ꞉mooghiire kumööhi ke? Kana, ꞉mooghiire kumumööhërëri omurööti? Hee! Amare ˆnekabhabhoorera kubha Yohana naghokera omurööti. 10Uno niwe amangʼana ghaache ghaandëkuru mo‑Mandëkö Amatööbhiyu kubha,

‘Mööhi, ˆnekamotoma omutamishi waane

aghukangate ambërë yaacho,

kubha aghukörërë anchëra.’#11:10 Mööhi Maraaki 3:1.

11“Mahëënë ˆnekabhabhoorera kubha mo‑bhaato bhoose bhano bhiibhwiru na abhakari, taanyi‑ho uno anyi mokoro ghokera Yohana. Amare, omooto uno akorighibhu m‑mosuuhu mo‑bhutëmi bho Mwishaaro, iwe m‑mokoro komokera. 12Korwera mo‑chaasiko chino Yohana Omubhatisaachi are araraghani mbagha reero, obhutëmi bho Mwishaaro mbabhusöhëriire gho changuru. Nabho bhano bhaanyi na changuru, mbaghusaki kobhusara gho changuru. 13Ameeghi ghoose mo-bhitabhu bhe meghiro na gha bharööti abhande ꞉ngaaruusiri obhurööti mbagha eriibhagha rino Yohana ꞉arighiibhu. 14Mbe, aribha moghokumi obhurööti bhoobho, Yohana niwe Eriya uno ꞉aghamburu kubha nakuucha.#11:14 Mööhi Maraaki 4:5. 15Omooto wowoose uno anyi na amatu gha kooghu, no oghu.

16“Kana, abhaato bha rwibhoro runo nebhatuubhaani na ke? Mbatuubhiine na abhaana bhano bhiikeere mo‑mitëëra na kobhabherekera abhaghëndi bharabhugha,

17‘Ntobhatëmiire ebherereesi mwikwirëra,

amare motaabhiniri,

tokabheembera emyembo ghe macheeche,

amare motiihinyeriire!’

18“Hangʼu hangʼu hano Yohana ichiri, taare araraaghëra ebhiinyakurë bhino tunariri na taare aranyo adivaayi, abhaato bhakabhugha, ‘Naghööturu ne emisambu.’ 19Eriibhagha rino eni Omoona o Mooto ꞉niichiri, neraraaghëra ebhiinyakurë bhino tunariri na kunyo adivaayi, abhaato bhakabhugha, ‘Mööhi! Uno mohobhaaru wiiki murëëbhi, n‑omusaani o bhatöbhi bha righööti na bha masari!’ Amare amangʼiini gha Ryobha ngahaarighibhu kubha n‑gha hëënë gho nchëra e maköri ghaache.”

Anchagho e meghya ghino ꞉gheemwangiri Yesu

(Ruuka 10:13–15)

20Mbe, Yesu aghasëëma kobhatëma amasörö abhaato bha meghya ghino aköriri ebheroghooro bhyaru gho kubha mbaangiri ghotuukuunera amasari ghaabho, akabhugha, 21“Horeera mokorighi inyu abhaato bha moghya o Korasiini! Horeera mokorighi inyu abhaato bha moghya o Bhetisaayita! Gho kubha ebheroghooro bhino ꞉niiköriri ghokoonyu, aribha nengabhiköriri mo-Tiiro na Sitooni,#11:21 Tiiro na Sitooni. Abhaato bha meghya ghiyo mbaare abhaato bha matöngö, na ꞉mbaamënyuru chwee na Abhayahuuti kubha na abhaato bhabhe chwee. abhaato bha meghya ghiyo mbangatuukuuniire amasari ghaabho chaasiko chaaru. Mbangëërëkiri ghotuukuuna koobho gho kobheeka amaghööti gha maghönëra, na kwihaka eriibhu. 22Amare, ˆnekabhabhoorera kubha orosiko ro ghoteneru ekiina inyu moghoteneru ekiina kwo bhororo ghokera ghoteneru ekiina abhaato bha meghya ghe Tiiro na Sitooni.#11:22 Mööhi Amoosi 1:9–10; Yoweri 3:4. 23Inyu abhaato bha moghya o Kabherenawumu, kana, mokwihëëbha kubha Eryobha ndekobhatiiri mbagha Mwishaaro? Tiyaanyi! Eryobha ndekobhiiki mbagha nyaari, gho kubha aribha ebheroghooro bhino ꞉bhiiköruru ghokoonyu, mbengaköruru na mo‑moghya o Sotoma,#11:23 Sotoma n‑omoghya uno Eryobha ꞉reesirekeriiri gho ghiri e amasari gha bhaato bhaache. Mööhi Simoka 19:24–29. omoghya uyo nongabheere‑ho mbagha reero. 24Amare ˆnekabhabhoorera kubha orosiko ro ghoteneru ekiina inyu moghoteneru ekiina kwo bhororo ghokera ase e Sotoma.”

Kwo Yesu nkoonyi‑ho koweera

(Ruuka 10:21–22)

25Eriibhagha riyo Yesu aghasabha, “Oo Taata, ˆoghachömi, iye Omutëmi o Mwishaaro na ase yoose, gho kubha, amangʼana ghano, nobhabhisiri bhano bhaanyi na amangʼiini na abhasömi, amare okabhahunyurera abhaato bhano bhakwinyööhi ghokoocho kinya abhaana abhasuuhu. 26Oo Taata, ghano ghoose n‑kurëngʼaana na amënda ghaacho.”

27Yesu akëëndërëra kweghi abhaato bhayo arabhugha, “Taata waane, namariri ghotoora ghoose mo‑mabhökö ghaane. Wiiki taanyi‑ho uno amweche Omoona, n‑Ishe omwene. Koru taanyi‑ho uno amweche Ishe, n‑Omoona omwene, na wowoose uno Omoona akwënda komohunyurera.

28“Muuche ghokoone bhoose bhano mokunyaakibhu na ghokeyu ne emerigho emerito, na neeni nekobhaweeri. 29Mwibhöhërë achooki yaane,#11:29 Mööhi Amaköri gha Bhatomu 15:10; Abhagharatiya 5:1. mweghe ghokoone mbagha hano nekobhasakeri kubha no omurëmbë mo‑metema gheenyu, gho kubha eni m‑muhörëëru wiiki m‑munyööhu neenyi mo‑körö. 30Achooki yaane n‑ihoho ghughëgha no omorigho waane woose m‑mohoho.”

Sélection en cours:

Mataayo 11: ntk

Surbrillance

Copier