Omochakano 16

Hagari na Isumaeli

1Bono Sarai, moka Aburamu, tamoiborerete bana. Sarai nareenge nomoiseke omosomba Omomisiri, ore korokwa Hagari. 2Sarai agateebia Aburamu: “Norooche bono ng’a Omonene ontangire tinyora abana, menyana nomoiseke oyo one omosomba; aande nabo ndanyore abana korwa asare.” Aburamu akaigwera ogokwana gwa Sarai. 3Ase igo, magega Aburamu kamenyire ense ya Kaanani ase emiaka ikomi, Sarai akaimokia Hagari, omosomba oye Omomisiri, akamomoa Aburamu, omosacha oye, ng’a abe buna mokaye. 4Erio bakamenyana na Hagari, na ere akaba morito. Ekero Hagari achia korora ng’a obeire morito, agachaaka gochaaya Sarai moibori omwabo.

5Sarai agateebia Aburamu: “Obobe obo bwanyorete, tiga naye bokonyore! Inakoa omoiseke one omosomba koboko kwao; ere, ekero achia korora ng’a obeire morito, onchayire. Tiga Omonene atwatanane inche naye!”

6Aburamu nere agateebia Sarai: “Rora, omosomba oo oyio nase amaboko ao are; moonchie buna oranche.” Erio Sarai akamochanda bobe, na ere agatama korwa asare.

7Omomalaika Omonene akarora Hagari ase erooro ase ensoko y’amaache yareenge ase enchera ekogenda Suri. 8Akamobooria: “Aye omosomba o Sarai, ng’ai okorwa, naende ng’ai okogenda?”

Akamoiraneria: “Nigo ngotama korwa ase moibori ominto Sarai.”

9Erio omomalaika Omonene akamoteebia: “Irana gochia ase moibori omino, na bwekeyie asare.” 10Naende omomalaika Omonene akamoteebia: “Nimentekanie ororeeria rwao, na omobaro obo tokonyara kobareka, ekiagera nigo barabe abange mono.” 11Naende Omomalaika Omonene akamoteebia,

“Rora, morito ore, noibore omwana omoisia;

nomooroke Isumaeli,#16:11 Isumaeli: engencho yaye: Nyasae okoigwa

ekiagera Omonene oigure ekerero ki’emechando yao.

12Ere nigo arabe buna etigere y’orosana ase egati y’abanto,

na okoboko kwaye nigo korabe igoro y’abanto bonsi,

na amaboko ’abaanto bonsi nigo arabe igoro yaye;

ere nigo aramenye bosio bw’abamwabo bonsi.”

13Ase ayio Hagari Akaroka Omonene oyo okwanete nere Eli‐Roi, engencho yaye “Aye naye Nyasae bw’okorora”; naki akebooria: “Inee! Amaene, narorire Nyasae, na ere ontiga inde moyo magega konamororire?” 14Ase ayio ensoko eria ekarokwa Beeri‐Lahai‐Roi#16:14 Beeri‐Lahai‐Roi: engencho yaye; Nyasae okorora; ero nigo ere egati ya Kadeshi na Beredi.

15 # Abagl 4:22 Erio Hagari akaiborera Aburamu omwana omoisia; nere Akaroka omwana oria oye, Isumaeli. 16Aburamu konya obeire nemiaka emerongo etano na etato, na etano nomo (86), ekero Hagari amoiborerete Isumaeli.

Sélection en cours:

Omochakano 16: EKGE

Surbrillance

Copier