KEJADIAN 31
31
Yakub ino Laban embeselug libag ane
1Welatfareg Yakub inowen hol haruk lit Laban umalikisiyen enele uruk lit, ”Yakub inowen nit ninikni anggengge obog toho hilarisireg ninikniyen tohon famen tung atisi,” ulug abug urukon hol hibag. 2Hol hibareg wenggel haruk lit Laban orohole tam seleg toho yet niyaruk latisi angge famen ketiya orohole amu roho yet niyaruk peruk latfag. 3Ari perukmu Ninikni Allahn Yakub ubam ele uruk lit, ”Hat hikni angginangma hori wereg ambeg suhuloho lamihin. Lamihinmu An men ambiyeg lul,” ulug hiyag itfag. 4Hiyag itfagma Yakub inowen ot eke fam, ”Rahel men Lea men an wam foroho lahi ambeg wamusan hondog enebik lamihin,” ulug hiyag itfagma hondog eneplug watfag. 5Watfagma Yakuben enele unubam uruk lit, ”Hinikni orohole tam seleg toho yet niyaruk latisi angge famen ketiya orohole amu roho yet niyarukmu yet haruk lahi. Ari reg famen Allah an nikniyen wel turukon ino an men wereg. 6Anden hinikni iyabuk nine anggolo roho wituk latikik ane hit honoluk angge famen 7hinikniyen an nele ying naptuk lit yabuk wituk latikikon onggo imbik lahuk imbik wambuk turukmu eneg numenam atisi. Ari turuk latisi angge famen Allahn siyag ane nubam tuhu rohon ulug at olohotman sok latisi. 8Hinikniyen misihim sambil an nubam ele uruk lit, ’Wam panduhabon onggo hilahun irisi halug wam domba arimanowen unumalik obog toho onoruk panduhabon eneg ondoko laruk latisi. Eke sambil wam suhalorukon onggo hilahun irisimu wam arimanowen unumalik onoruk suhalorukon eneg ondoko laruk latisi. 9Ari roho turuk lit Allahn hinikni ambohom obog toho waruk lit an og nutuk latisi. 10Misihim sambil wam arimano uwali fiyag lahap-lahap atuk li anden nei og harukmen wam hunon suhalorukon panduhabon sehen hobohon arimanowen eneg uwali lahap-lahap atukmu yet harikik. 11Yet harukmen Allah ot malaikat inowen an nubam, ’Yakub’, irisimu anden, ’Woh, an tu welahi,’ irikik. 12Irikikmu Aren hiyag nutuk lit, ’Horohole leko yet himin. Wam hunon onoruk suhalorukon panduhabon sehen hobohon arimanowen eneg lahap atukmu yet isimin. Labanen siyag ane hubam turuk ane obog toho Anden yet harikikteg alem ari hubam turuk lahi. 13#Kej 28:18-22O Betelen haren An nolohotman, ’Hat hubam eneg wenggel haruk laruhuk,’ ulug hele tem toho uruk lit enehangge helep yaho ferikin ambeg inowen hat halukeman inam atikikonen nele uruk lahi. Ari fahet ketiya in atug hori wereg ambeg hibam lamihin,’ ulug hiyag nitisi,” ibag. 14Ibagma Rahel men Lea menen Yakub fam enele uruk lit, ”Ninikni anggengge at oluk weregma oho war aruhumu oho tor angge oho hilahuk fug. 15Aren nit fahet pohon peruk lit ayeg watisi. Ayeg waroho warisi angge abirangge aren oho narisi. 16Narisimu ninikni anggengge Allahn warisiyon obog toho nit nunumalikisi menen ngi atukuk. Ari fahet ketiya Allahn hiyag hitisi ane hikit toho timihin,” ulug hiyag itfag.
17Ari ulug hiyag itfagma Yakub ino in atfareg uhesi umalikisi men wam unta fam lahap enepfareg 18ambohom men o Padan-Aram kinangma inggikmu atfag angge obog toho og eneplug nikni Ishak ambeg Kanaan kinangma lul ulug libag.
19Libag sambil ino Laban inowen nambohom oruk palmin ulug libagma Rahel inowen wam anum ikniyen ibam inditmu foroho latfag angge hirako hilibag. 20Hilibagma Yakuben Aram ahun Laban hiyag um fug angge hirag-hirag laruk lit 21anggengge obog toho og eneplug ik Efrat paloho tom Gilead fil libag.
Laban inowen Yakub muko libag ane
22Libareg nohorukmen hup piren atfagma ap ekeyen Laban hiyag utuk lit, ”Yakub hirag-hirag larisi,” ulug hiyag itfag. 23Hiyag itfagma Laban ori menen Yakub muko larukmen eneg hup falfaliken atfagma Yakub tom Gilead fam larukmu mug isa libag. 24Libagma Aram ahun Laban inowen hubanggo nei og harukmen Allah at ambeg watfareg ele ubam uruk lit, ”Yakub fam hele holok toho uhun tohon hindi anggat toho welamin,” ibag. 25Ibagma Laban ino Yakub o sabo wiroho welatfag ambeg libareg Laban ori menen oho o sabo wiroho welatfag. 26Wereg lit Labanen Yakub fam, ”Nungge fahet an hiyag num fug angge naholani ininggik hele waroho imbisik laruk hag toho og eneplug waharikin? 27Lamin ulug hiyag netlenma nahiyeg toho waruk teltil pinggong kong til laruk lit sini yiko mon henepte angge famen hele nubam uk fug angge hirag-hirag waharikin. 28Waharikinmu an numbusagsi men naholani men mako pug toho hi eneptikik fug. We tem, ap sohuwonen turuk ane tirikin. 29Hit an ninggikmu atikip angge re hit hunubam siyag ane tele angge famen o yoho hubanggo Allah hikniyen wel turukon inowen an nubam ele uruk lit, ”Yakub fam hele holok toho uhun tohon hindi anggat toho welamin,” irisi. 30Irisimu ketiya nikni ibam lamin ulug hindimu sehet toho waharikin ane fahet anden oho fano pele angge famen nungge fahet wam anum anden tohon hirahalug waharikin?” ulug hiyag itfag. 31Hiyag itfagma Yakub inowen Laban fam ele uruk lit, ”Anden lamin ulug hiyag hetlema haholani an ninggikmuwen lalihip fug ulug tel nabik oho reg perikikteg nakolen hiyag hitikik fug. 32Haren wam anum haren tohon yami rurukmen sa asum fam welatmisi halug at ino war aruhu. Ari fahet mun angge man angge niren walug waharukon arimano obog toho nonori tiya onolohotman pen hamihinteg wereg halug wamihin,” ibag. Ibag ane ari Rahelen wam anum ino hirahibahon Yakub apeleg teg lit ibag. 33Ari ibagma Laban o sabo Yakuben tohon, Lea inowen tohon, hiyap amingmingangge piren itanowen tohon men kibareg yami rurukmen wam anum ino hiyahibag fug. Hiyahibag fureg o sabo Lea inowen tohon famen wilip atug o sabo Rahelen tohon fam kibag. 34Rahel inowen wam anum ino walug wam unta palimu onolombik iyangge tuwalehon apma kila fibareg palimu hur arik lahibag. Hur arik lahibareg weregma Laban inowen o indit ke fatil larukmen wam anum ino hiyahibag fug. 35Hiyahibag fugmu Rahel inowen ikni fam ele uruk lit, ”Nikni, an pikalem sap turuk lahireg hat holohotman in am fug teg lahi angge re an pet nabuk fug,” ibagma Laban inowen hebel-pebel toho yami ribag angge famen wam anum ino hiyahibag fug.
36Ari tibagma Yakub indi inahan turuken Laban men yik abul ulug turuk lit Laban fam, ”Anden hat hubam siyag ane men nolok ane men tirikik fug angge famen nungge fahet hahako roho mug naplug wahen? 37Mun angge man angge anden tohon haren hibil-hebel toho yami ruruk lit hat hanggengge eke hiyahaken? Hiyahaken halug hat hori men an nori men nonolohotman imbik watmihinmu iren nit piren hal nenebusa. 38An hat men weregman eneg mo likin fuman larisi. Wereg lit anden hambohom domba men kambing men forohoman unumalik wareg angge indag atuk latisi fug. Wam yuhambukon oho anden narikik fug. 39Wam olomeneyen ware feserisiyon oho hambeg walug wam fug angge ubalma wam eke emberuk latikik. Ap ekeyen hubanggo ano ilingge ano hirahalug larisi halug ubalmangge og nitmihin ulug heng naptuk latikinmu og hutuk latikik. 40An unukoho inahanen war am hag ane turuk latikik, hubanggo sun anggolo roho nubam atukmu nohonil angge famen nil ili regman eneg welatikik. 41Ari roho an hat hibam weregman eneg mo likin fuman larisi. Anden hat hiyabuk witukmen eneg mo nunggul hiriken larisimu onggo haholani piren og nitikin. Nin ariyen hiyabuk warukmen eneg mo falfaliken atisimu wam og nitikin. Ari roho turuk lit onggo anden hubam heng haptuk latikikon haren imbik lahuk imbik wambuk turukmen eneg numenam atisi. 42Allah Abraham inowen wel turuk latfahon nikni Ishak inowen oho akol toho fok turukon an men welalep fug halug nungge-nungge an ninggikmu eleg angge lamihin ulug hiyag netlenma lele angge famen an asengseng-pasengseng toho turukmu Allahn yet niyarisireg hubanggo hiyag nutuk lit, ’Hibam lamihin,’ ulug kong toho hiyag nitisi,” ibag.
Yakub men Laban menen sali imbibag ane
43Ari ibagma Labanen Yakub fam ele uruk lit, ”Hiyap ariya an naholani, malik ariya an numbusagsi, wam ariya oho an nambohom. Mun angge man angge haren yet haruk lahenon aruma anden tohon angge famen haren hilarikin angge re anden naholani unumalikisi iren endetuson men unubam nungge ane tihi ha reg? 44Ari fahet an men hat men ninindi misig toho welamuhuk ulug sali emberuk lit enehangge misig umbul,” ibag. 45Ibagma Yakub inowen helep eke wibareg enehangge welaruhu ulug hutuk tibibag.
46Hutuk tibibareg Yakuben ori fam ele uruk lit, ”Helep misigmu andog tik maniyek,” ulug hiyag isibagma helep wak libareg palu ribik watfag. Palu ribik watfag ambeg ino irahamen hur atfareg suburu nibag. 47Nibareg helep palu ribag ambeg ino Labanen at ele uruk ane hikit toho unuk Yegar-Sahaduta suwalfagma Yakuben oho at ele urukon hikit toho unuk Galed suwale fibag.#Yegar-Sahaduta urukon men Galed urukon men helep misig famen enele enemu-enemu uruk latfag ane hikit toho helep tu enehangge wereg ulug unuk piren suwalfag. 48Suwale fibareg Laban inowen, ”Helep aruma sali embeheyon fahet enehangge welaruhu,” ibag ane hikit toho helep palu ribag ambeg ino unuk Galed suwaleg. 49Nin eke Labanen ele uruk lit, ”Fobik an oho har oho nenemu-nenemu lulteg ambi amuhuk fug angge re Ninikni Allahn haret andet kim nisaruk laruhu,” ulug helep unuk eke Mizpa#Mizpa: Unuk ari nit nenele fam Kim Nisaruk Ambeg uruk. 50Suwalfareg Labanen Yakub fam ele uruk lit, ”Haren an naholani enele ying eneptuk laruhun fug, hiyap eke hilahun fug ulug ap eleg ambeg tuman ihi angge famen an men hat men niniraham Allah weregma ihi ulug holuk toho welaruhun,” ibag.
51-52Nin eke Labanen Yakub fam ele uruk lit, ”Haren oho anden oho nolok ane tik lamin ulug helep tu pisan tuhuk fuhen hat welaruhun ambeg men an welaruhuk ambeg men honggolegma helep aruma enehangge palu tebehe. 53Allah Abraham Nahor inikni menen wel turuk latfahonen nit haloho nunumbahaku,” ibagma Yakuben Allah ikni Ishaken akol toho wel turuk latfahon unuk fam, ”Haren ehenon hikit toho turuk laruhuken nele tem toho uruk lahi,” ibag. 54Ari ibareg Yakub inowen tom ino fam wam waroho Allah fahet hubu lahapfareg seni nul ulug ori wol eneplug ambiyeg nibag. Nibareg tom ino fam nohibag. 55Nohibareg likiyamon hubet Laban inowen aholani men umbusagsi men unubam Allahn fet henesug laruhu ulug mako pug toho hi enepfareg ibam suhuloho libag.
Sélection en cours:
KEJADIAN 31: YLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
@ LAI 2018
