KEJADIAN 29

Yakub ino ami Laban ambeg libag ane

1Ari ibareg Yakub ino Kanaan kinang embeselug yali fil libag. 2-3Laruk lit yet harukmen anggenma ik fahet habulig ambeg misig iraham wam domba palu hinahan luhaloho weregma yet isibag. Winasul oho wam foroho inap arimano obog tohowen enembohom ik ino iraham og eneplug waharuk halug eneg ik fahet habulig ambeg helep lare ferukon ino imbiloho ilanma imbil laruk lit enembohom ik hinang isalug helep ino imbiloho lare feruk latfag.

4Yakub ik ino iraham libareg wam foroho inap arimano kapal isaruk lit, ”Nori, hit kema hinap?” ibagma iren te, ”Nit o Haran ninap,” ibag.

5Ibagma Yakub inowen, ”Hun Nahor amloho Laban ino haruk lahep ano?” ibagma iren, ”Haruk lahe,” ibag.

6Ibagma Yakuben, ”At nangginoho wereg?” ulug kapal isibagma iren, ”Fano wereg,” ibareg, ”Ahaloho unuk Rahel wam domba kambing ikniyen tohon og eneplug waharukon ari yet himin,” ibag.

7Ibagma Yakub inowen, ”Nori, o hup am fugmu unukoho welahe angge famen nungge fahet henembohom palu enebik wahep? Ik eneg hinang isalihipteg nin hoholangge nawag ulug hondog eneplug lalihip,” ulug hiyag isibag.

8Hiyag isibagma iren te, ”Wam domba foroho inap arimano winonen oho enembohom og eneplug waharuk isalug eneg helep ik larehon miyaloho imbik lulteg wam arimano ik hinang usulen yet enesug lahe,” ulug hiyag itfag.

9Yakub inowen it men enele uruk lit weregma Rahel ino wam ikniyen tohon og eneplug waharuk latfag. 10An nisinga owe ahaloho waharuk ulug yet hibareg Yakub ino ik ambilikmu libareg helep ik larehon ino miyaloho imbik libareg Laban ambohom arimano ik hinang isibag. 11Hinang isibareg Rahel mako pug toho hi ruruk lit nami ahaloho men ambi ahe ulug uba yatuk latfag. 12Uba yatuk lit, ”An hat hikni ot Ribka amloho wahi,” ulug hiyag itfag.

Hiyag itfagma Rahel ino ikni ambeg pupu angge libareg hot Ribka amloho waha ulug hiyag itfag. 13Hiyag itfagma hol hibareg Laban ino folo-folo Yakub ambeg libareg mako pug toho hi ribareg ibam hondoholug watfag. Olma kibareg Yakub inowen at ubam teko libag ane fahet Laban hiyag itfagma 14Laban inowen, ”Hat we tem toho an nameben tohon wahen,” ibag.

Yakub inowen Lea men Rahel men hilibag ane

Yakub ino pikalem misig hunduko Laban men welatfagma 15Laban inowen Yakub fam ele uruk lit, ”Hat an nameben tohon welahen angge re nungge fahet an niyabuk saplangge wit nutuk laruhun? Onggo maren og netep peruk lahen?” ulug hiyag itfag. 16Laban ino aholani piren wandabon ino unuk Lea weregma fobikon Rahel indag tibahon welatfag. 17Lea il homanggen tegma Rahel ino ebe tuhum anggolo wereg lit orohole fano anggolo welatfag.

18Ari reg latfagma Yakub inowen Rahel fahet indi haruk lit, ”Nami, hat hahaloho fobikon Rahel ino hilahuken anden hat hiyabuk witukmen eneg mo ilig am wirig am turukmu mo sabiren aruhu,” ulug hiyag itfag.

19Hiyag itfagma Laban inowen, ”Nahaloho aru ap winonen hilahup tohon hat og huruhuken an men tuma welaruhun,” ibag. 20Ibagma Yakub inowen Rahel hilahuk ulug mo ilig am wirig am turukmu mo sabiren fam Laban iyabuk wituk latfag. Amusun toho wituk latfag angge famen Rahel fahet indi haruk lit welatfag ane ariyen we hup pirenam hinahanam wereg hag toho welatikik peruk latfag.

21Ari pibareg Yakub inowen Laban hiyag utuk lit, ”Niren urukuk ane hikit toho mo sabiren fam hiyabuk arat witikikteg hahaloho hilahuken og nitmihin,” ulug heng tibag. 22Heng tibagma Laban inowen nahaloho Yakuben hilamisiyon fahet seni esetmin ulug ap obog toho o pumbuk ino welatfahon wol enepfareg seni esetfagma nibag. 23Nibareg hup atfagma Laban inowen ahaloho Lea hondoko Yakub og irik libagma Yakub men nohibag. (24Ari tibag sambil ino Laban inowen amingmingangge Zilpa fam Lea amingmingangge welaruhun ulug hiyag itfag.) 25Likiya Yakub in atfareg yet harukmen Lea men nohoki ulug oluk atfag. Oluk atfareg Laban ambeg libareg hiyag utuk lit, ”Nungge fahet an nubam tu hag toho tehen? Haren Rahel og huruhuk irikinmu hiyabuk wituk latikik angge famen nungge fahet nele yong naptikin?” ulug hiyag itfag.

26Hiyag itfagma Laban inowen hiyag utuk lit, ”O aruma inaben turuk ane hikit toho eneholani wandabon tam aben hilaruk halug eneg onombolimon fobik aben hilaruk. 27Ari fahet Lea hilarikinon fahet nenehiyeg toho yunggultukmen eneg hup sabirenam welamuhukteg nahaloho Rahel oho og huruhuk. Og huruhukmu at fahet onggo nin mo sabirenam niyabuk wituk laruhun,” ulug hiyag itfag.

28Hiyag itfag ane ino fahet Yakuben fano ehek pibareg hup sabirenam yunggultukmen eneg welatfagma Labanen ahaloho Rahel og itfag. (29Ari tibag sambil ino Laban inowen amingmingangge unuk Bilha ino Rahel amingmingangge welaruhun ulug hiyag itfag.) 30Yakub inowen Rahel men oho ambiyeg nohibareg Lea ino indi isanggoma reg lit Rahel ino eneg indi anggen teg latfag. Ari roho wereg lit nin mo sabiren fam Laban iyabuk wituk latfag.

Yakuben umalikisi indag eneptuk latfag ane

31Hun Yakub inowen Lea ino indi isanggoma regma Ninikni Allahn yet hibareg Lea inowen malik indag tawag pibareg Rahel malik indag ta fug angge welamag pibag. 32Ari pibagma Lea malik ahummu atfagma malik ap angge misig indag tibag. Indag tibareg ele uruk lit, ”An nindi siyag toho weregma Nikni Allahn yet niyarisimu nahunen an indi pulmu numbahaku,” ulug malik ino unuk Ruben suwalfag.#Ruben: Ibrani enele fam unuk Ruben ino men, an nindi siyag toho weregma Allahn yet niyarisi urukon men, namloho indag tarikikon aru yet hemek urukon men ambi reg. 33Welatfareg Lea ino malik eke ahummu atfagma malik ap angge indag tibag. Indag tibareg ele uruk lit, ”An nahunen indi nasug eleg ane fahet Nikni Allahn hol harisireg malik aru oho og nitisi,” ulug malik ino unuk Simeon#Simeon: Nit nenele roho Allahn hol harisi uruk. suwalfag. 34Welatfareg Lea inowen malik ap angge eke indag tibareg ele uruk lit, ”Malik ap umalik hinahan indag itikikon fahet nahunen inggik kobog niya fug teg,” ulug malik ino unuk Lewi#Lewi: Nit nenele roho inggik kobog niya fug teg uruk. suwalfag. 35Welatfareg Lea ino malik eke ahummu atfagma malik ap angge indag tibareg ele uruk lit, ”Ketiya tu famen Allah fam Nikni ulug hi ruruk lahi,” ulug malik ino unuk Yehuda#Yehuda: Nit nenele roho Allah fam Nikni uruk lahe uruk. suwalfag. Yehuda indag tibahon famen Lea malik indag ta fug angge welatfag.

Sélection en cours:

KEJADIAN 29: YLI

Surbrillance

Copier