LITANGA 20
20
Aburahamu na Abimeleki
1Aburahamu yazia kutura Mamure kuduuka mukivala cha Kanaani, namenya hagati ha Kadeshi na Shuri. Yazia kandi komenya mu Gerari. 2Naveeye ahene yaho, Aburahamu yavoola ndi Sara aveeye mbozo weve. Kunangwa Mwami Abimeleki wa Gerari yatumana Sara aletwe kuye. 3Navuzwa Nyasaye yaloleka kuye mu maloto namuvolera, “Ivi ulakuza kigira umali kuvugura mukali uyu oveeye wu musaza wundi.”
4Navuzwa mwami Abimeleki yaali nakikiri kuva harara naye, kandi yavoola, “Yahova inzi mbeeye vugira imbara! Ivi ulandiviza harara na vandu vange? 5Aburahamu mwene yavoola ndi Sara yaali mbozo weve, kandi Sara mwene yavoola ndi Aburahamu aveeye mbozo weve. Inzi ndaakola yaga mu vulungi vwu mwoyo gwange, kandi si ndaakola vudamanu mba.”
6Maku Nyasaye yamuvolera mu maloto ndi, “Yee, Inzi manya ndi ivi wakola yaga mu vulungi vwu mwoyo gwugwo; kunangwa inzi ndaakugaya uvuli kokora uvwoni, kandi ndaakwigalira kuva harara naye. 7Navuzwa kalunu, oleke mukali uyu yirani ku musaza weve. Musaza weve aveeye muporofeti, kandi alakusaalira kunangwa uvuli kukuza. Navuzwa niiva si ulamuleka yirani ku musaza weve, inzi gwiganihizaa ndi ivi harara na vandu vovo vosi mulakuza.”
8Lidiku lia londaku mugambazuri, mwami Abimeleki yalanga avanene veve vosi navavoolera goosi agaali nigekoleki, na vaali nuvuti ovonene ligali. 9Maku Abimeleki yalanga Aburahamu namuteeva, “Kindiki cha ivi umali kokokolera yiki? Kindiki kidamanu cha inzi mali kokolera ivi kigira ondeeteye kivi harara nu uvwamihi vwange? Ivi ongoleeye kekolwa kitaduukana kali hakuzu. 10Kigira ki okoli kindu kuli yiki?”
11Aburahamu yativura, “Inzi ngoli ndio kigira ndaaganagana ndi havundu yaaha avulaho mundu watia Nyasaye, na valanzita ma vavuguli mukali wange. 12Aveeye mbozo wange, baba mulala, navuzwa mama si aveeye mulala mba, na ndaamuvugura kuva mukali wange. 13Kunangwa lwa Nyasaye yangola kuva mugendagendi kutura munyumba ya baba wange, kuzia muvivala vwu vogeni, ndaavoolera Sara, ‘Ivi ulamanyia kuli wanyanza mu livoolera mundu woosi ndi inzi mbeeye mbozo woovo.’ ”
14Maku Mwami Abimeleki yiranyira Aburahamu mukali weve Sara. Yahaana ku Aburahamu magondi ni zing'ombe, kandi avatugwa avakaana na vayaayi. 15Yavolera Aburahamu, “Yiki ni kivala change choosi; unyala komenya havundu hoosi hakuyaanzizaa.” 16Yavolera Sara, “Mali kuhaana ku mbozo woovo vidonye vie ifeza 1,000. Yiki kilava kelolero ku vosi avaveeye harara ni munyi ndi muveeye vugira imbara, kandi valamanya ndi si mukoli vudamanu mba.”
17Maku Aburahamu yasaala ku Nyasaye, na Nyasaye yahonyia Abimeleki harara mu mukali weve kandi avatugwa veve avakaana, kunangwa vaduuki kwivura avana. 18Yahova yaali niyigalira vakali vosi vu vwami vwa Abimeleki vavuli kwivura avana kigira aga Abimeleki yaali nakoleye Sara, mukali wa Aburahamu.
Sélection en cours:
LITANGA 20: LOGOOLI
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
©Bible Society of Kenya, 2019
