LITANGA 19

Uvwoni vwa Sodoma

1Lwi zingelosi vaviri vaduuka mu lidaala lia Sodoma ing'inga ya ha mugolova, Loti yaali niyikaye ha kirivwa chi lidaala. Nonoho lwa yavalola, yazia navaganira. Yinama imbiri wavo 2navoora, “Avami vange, inzi mbeeye hano kutumikira munyi. Mwaza yaanzi muuzi munyumba yange. Mwisaave virenge vienyu kandi musoose mu vudiku vwa lero. Maku mulatula mugambazuri.” Navuzwa zingelosi yava vaativura, “Awa, kunyi kulava hano hagati hi lidaala linene vudiku vwa lero.”

3Navuzwa Loti yavagoonya, ligali, kunangwa zingelosi yava vavugilira kuzia na Loti munyumba yeeye. Yavolera avatumikiri veve kolomba mugadi gutaveeyemu na mamera, ma navalombera lilia lilahi.

4Imbiri wa vaali nivakikiri kogona vudiku vwene yivwo, avasaza vosi vi lidaala lia Sodoma, vombi avasoleri navakulundu, vakumbiriza inyumba ya Loti. 5Avandu yava valanga Loti nivamuteeva, “Vaveeye haliha vasaza vingiyi munyumba yooyo uvudiku vwa kalunu? Valeete ichova kunangwa kuduuki kuva harara navo!”

6Loti yatura ichova ma nahana muliango. 7Yavavolera, “Ngonya munyi avaamitu vange, mutakola uvudamanu kuli yivu mba! 8Heenzi, Inzi mbeeye na vakana avagima vaviri. Leki mbalete ichova ku munyi, na mulavakolera choosi cha muganaganaa. Navuzwa mutakola kindu kali kilala ku avasaza yava mba, kigira vaveeye avageni munyumba yange kandi kuduuka mbasole.”

9Navuzwa avandu yava vavoola, “Tulayo kuviti ivi mundu oveeye mugeni vuzwa mukunyi! Ivi oveeye vwaha okovolera agakokola? Tulayo kuviti, anoho kulakokolera vudamanu ligali kuvita sakwali kuvakokolere.” Avandu yava vaalumba Loti ni vazia kuvunaga muliango. 10Navuzwa zingelosi yava vazia nivavugura Loti kutura ichova ni vamuleeta munyumba, ma nivahana muliango. 11Maku avasaza yava vaakora vandu vaali ichova kuva avavoku, vosi avanene kuvakekeke kunangwa vavuli kolola muliango.

Loti harara na Avinyumba yeye Vaturaa Sodoma

12Avasaza vaviri yava vaavoolera Loti, “Niiva oveeye nu mundu woosi hano ku vayaayi, avakaana anoho navizara anoho aviiko vovo vandi avamenyi mu lidaala yili, uvatulizi mu lidaala yili, 13Kigira kuziiza kudiviza havundu yaaha. Yahova yamala kuhulira vindu vidamanu ligali via vandu va Sodoma vakora. Kulwayago yaakutumi kudivizi lidaala yili.”

14Maku Loti yazia ku avanavizara venya koleta avakaana veve, navavoolera, “Mukore vwangu muturi havundu hano, kigira Yahova azizaa kudiviza lidaala yili.” Navuzwa valora ndi Loti akole kehenyahenye.

15Lwa vwacha mugambazuri, zingelosi yava vageriza kovoolera Loti avakolera vwangu. Vavoola, “Koli vwangu! Vugula mukali woovo harara na vakana vovo vaviri ma muturi havundu hano, gase mulakuza lwa Yahova adiviza lidaala yili.” 16Navuzwa Loti yalindagilira. Nitali Yahova yamuvererera. Kunangwa zingelosi vaavugura Loti nu mukali weve harara na vakana veve vaviri, nivavatuliza mu lidaala. 17Maku mulala ku zingelosi yava yavavolera, “Mwiruki muhonyie livamwoyo lienyu! Mutikivuka mba, kandi mutasingira mu livona mba. Mwiruki muzie ku vigulu, kunangwa muvuli kwitwa.”

18Navuzwa Loti yavoola, “Awa Mwami wange gatava ndio mba. 19Ivi umali kongolera zimbavasi zinene ligali kandi umali kombonyia. Navuzwa vigulu viveeye ihale ligali; kivi kilanyoola na ndakuza imbiri wangikiri kuduuka ku vigulu. 20Ololaa kadaala kekekeeke kala? Kaveeye ahimbi ligali, haveeye havundu hakekeke ligali. Leka nzie ahene yaho na ndahona.”

21Engelosi yavoola, “Voveeye vulahi, inzi mali kuvugilira. Si ndadiviza kadaala yako mba. 22Wiruki vwangu! Inzi sindakola kindu choosi mba kuduuka lwa nduuka ahene yaho.” Kulwayago, Loti yalanga havundu hene yaho “Zohari”#19:22 Zohari: Mu Luheburaina; liveeye kovora, “Hakekeke”..

Lidivizwa lia Sodoma na Gomora

23Lwi liuva liali nilitura, Loti yaduuka Zohari. 24Nonoho Yahova yatuma muliru kuli imbura kutura mu ligulu nigusamba madaala ga Sodoma na Gomora. 25Muliru yigu gwadiviza vandu vosi, amavoona goosi kandi vitagwa viosi iviali ku lirova. 26Navuzwa mukali wa Loti yikivuka, yamanya naagwa ligina lie jumbi.

27Mugambazuri ku lidiku lialondaku, Aburahamu yanyagula kuzia havundu ha yaali nasingiyi imbiri wa Yahova. 28Aburahamu yahenza ku madaala ga Sodoma na Gomora, na yalora mwoki niguduumaa kutura mu livona lie kivala choosi, kuli mwochi gutulaa mu kisambiru ekenene. 29Lwa Nyasaye yaali ni yakadiviza madaala ga mavoona, havundu ha Loti yamenya, yizuliza Aburahamu ma naahononokiza Loti kutura mu lidivizwa.

Uvutangiliru Vwa Vandu va Moabu na Amoni

30Kigira Loti yaali nuvuti komenya mu Zohari, yazia harara na vakana veve vaviri komenya ku vigulu muluhangaywa. 31Mukaana mukulundu yavolera mukaana muke ndi, “Baba wiitu azizagiliraa kugwa musakulu, na mukivala mwosi si aveeye kuho musaza woosi wa kunyala kuziaku lukali ma kwivuli avana mba. 32Genda kunwehizi baba wiitu iwaini ahambiki, ma kove harara naye kunangwa kuduuki kwivura vana naye.” 33Vudiku vwene yivwo, vaaha baba wavo iwaini naanwa ma nahambika. Mukaana muhindira yamanya nava na baba weve; navuzwa yaali muhambiku ligali na si yamanyiriza cha yakola mba.

34Lidiku lialondaku, mukaana munene yavolera mukaana muke ndi, “Inzi ndaali harara na baba wiitu vudiku vwa mugolova. Kalunu genda kumuhe iwaini ahambiki vudiku vwa kalunu, ma ivi ove harara naye, maku vuli mulala ku kunyi yiivuli mwana na baba wiitu.” 35Kunangwa vudiku vwene yivwo, vamuha iwaini ma nahambika ligali. Mukaana muke yaali harara naye, navuzwa yaali muhambiku ligali na si yamanyiriza cha yakola mba. 36Mu likora ndio, vombi avakaana va Loti vamanya nivaveleka zinda zia baba wavo. 37Mukaana muhindira yivula mwana muyaayi, ma namugulika lieta lilie Moabu#19:37 Moabu: Yili ni lieta liu Luheburaina liveeye kovora, “Kutura ku baba wange.”. Uyu niye waali guuga wa vandu va Moabu kuduuka na lero. 38Mukaana muke yivula kandi mwana muyaayi, ma namugulika lieta lilie Benami#19:38 Benami: Yili ni lieta liu Luheburaina, liveeye kovora, “Mwana muyaayi wu mwiko wange.”. Uyu niye waali muuguuga wa vandu va Amoni kuduuka na lero.

Sélection en cours:

LITANGA 19: LOGOOLI

Surbrillance

Copier