Jɛnɛsis 20
20
Abraham kɛ Abimelek
1 #
Jɛn 12.9, 10; 26.1 Abraham fã yɛ he ni eyɔɔ lɛ kɛtee wuoyigbɛ shikpɔŋ lɛ nɔ. Eyahi Kadesh kɛ Shur teŋ, ni eyato gbɔ yɛ Gerar. 2#Jɛn 12.13; 26.7 Abraham kɛɛ yɛ eŋa hewɔ akɛ, “Minyɛmi yoo ji lɛ.” Kɛkɛ ni Abimelek, Gerar maŋtsɛ lɛ, tsu ayaŋɔ Sara abahã lɛ. 3Shi Nyɔŋmɔ ba Abimelek ŋɔɔ nyɔɔŋ yɛ lamɔ mli, ni ekɛɛ lɛ akɛ, “Naa, obaagbo yɛ yoo lɛ ni oyaŋɔ lɛ hewɔ, ejaakɛ mɔ ko ŋa ni.”
4Shi Abimelek nako ata Sara he, no hewɔ lɛ, ekɛɛ akɛ, “Nuŋtsɔ, ani ooobutu maŋ ko ni efeko efɔŋ ko lo? 5Ani jeee Abraham diɛŋtsɛ kɛɛ mi akɛ, ‘Minyɛmi yoo ji lɛ’ lɛ? Ni yoo lɛ diɛŋtsɛ hu kɛɛ akɛ, ‘Minyɛmi nuu ji lɛ’ lɛ? Mihe nɔ ni amɛkɛɛ mi lɛ miye, ni nɔ ni mifee nɛɛ lɛ, mijɛ tsui ni tse mli mikɛfee, ni midɛŋ hu diii#20.5: midɛŋ diii: mifeko efɔŋ ko.”
6Kɛkɛ ni Nyɔŋmɔ kɛɛ Abimelek yɛ lamɔ lɛ mli akɛ, “Hɛɛ, mi hu mile akɛ onɔkwale fɛɛ okɛfee enɛ. Asaŋ, mi ni mitsi onaa koni okafee esha oshi mi, no hewɔ ni mihãaa bo hegbɛ akɛ ota ehe lɛ. 7#Lal 105.15 No hewɔ lɛ, agbɛnɛ kɛ nuu lɛ ŋa lɛ aku sɛɛ oyahã lɛ ejaakɛ gbalɔ ji lɛ, ni eeesɔle ekpa fai ehã bo, ni oyi aaana wala. Shi kɛji okɛ lɛ hãaa lɛ lɛ, no lɛ na ole akɛ gbo ooogbo, bo kɛ mɛi fɛɛ ni ji onɔ lɛ.”
8No hewɔ lɛ, Abimelek te shi leebi maŋkpa, ni etsɛ etsuji lɛ fɛɛ, ni ebɔ amɛ nɔ ni ba lɛ fɛɛ; ni hii lɛ she gbeyei naakpa. 9Kɛkɛ ni Abimelek tsɛ Abraham ni ekɛɛ lɛ akɛ, “Mɛni ofee wɔ nɛɛ? Mɛni esha mifee bo hewɔ ni otsi mi kɛ mimaŋtsɛyeli lɛ owo esha kpeteŋkple tamɔ nɛkɛ mli nɛɛ? Nɔ ni afeee ofee mi nɛɛ.” 10Asaŋ Abimelek bi Abraham akɛ, “Mɛni osusu hewɔ ofee enɛ?”
11Abraham to he akɛ, “Miyasusu akɛ ekolɛ mɛi ni yɔɔ biɛ nɛɛ lɛ sheee Nyɔŋmɔ gbeyei, ni amɛbaagbe mi yɛ miŋa lɛ hewɔ. 12Ni asaŋ eyɛ mli lɛɛlɛŋ akɛ minyɛmi yoo ni, ejaakɛ mitsɛbi ni, shi jeee minyɛbi ni, ni etsɔ miŋa. 13No hewɔ lɛ, be ni Nyɔŋmɔ hã mije mitsɛ we lɛ ni miyatsomlo lɛ, mikɛɛ miŋa lɛ akɛ, ‘Enɛ ji ejurɔ ni mitaoɔ ni ofee mi: He fɛɛ he ni wɔɔshɛ lɛ, kɛɛmɔ yɛ mihe akɛ minyɛmi nuu ni.’ ”
14Kɛkɛ ni Abimelek ŋɔ toi kɛ tsinai kɛ wehii kɛ weyei eyahã Abraham, ni ekɛ eŋa Sara lɛ ku sɛɛ ehã lɛ. 15Abimelek kɛɛ Abraham akɛ, “Mishikpɔŋ lɛ kã ohiɛ nɛɛ; hii he ni osumɔɔ.” 16Ni Sara lɛ ekɛɛ lɛ akɛ, “Naa, mihã onyɛmi nuu lɛ shika jwiɛtɛi kukuji akpe ni yeɔ odase yɛ mɛi ni kɛ bo yɔɔ lɛ ahiɛ akɛ muji ko bɛ ohe.”
17Kɛkɛ ni Abraham kpa Nyɔŋmɔ fai, ni Nyɔŋmɔ tsa Abimelek kɛ eŋa kɛ eweyei lɛ, ni amɛfɔfɔɔ bii, 18ejaakɛ kulɛ Yehowa eŋa yei fɛɛ ni yɔɔ Abimelek we lɛ amusu naa yɛ Abraham ŋa Sara sane lɛ hewɔ.
Sélection en cours:
Jɛnɛsis 20: NEGAB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Bible in Ga Language © Bible Society of Ghana, 2020.
