Jɛnɛsis 18
18
Awo Abraham kɛ Sara binuu he shi
(Hebribii 13.2)
1Yehowa jie ehe kpo etsɔ̃ɔ Abraham yɛ Mamre tsei lɛ ahe, be ni eta shi yɛ buu lɛ shinaa lɛ naa shwane ketekete lɛ. 2#Heb 13.2 Abraham yaawo ehiɛ nɔ ni ekwɛ lɛ, naa hii etɛ̃ damɔ emasɛi. Be ni ena amɛ lɛ, esha foi kɛjɛ buu lɛ shinaa lɛ shi kɛtee koni eyakpee amɛ. Ekoto amɛ 3ni ekɛɛ akɛ, “MiNuŋtsɔ, kɛji ona mihe tsuijurɔ lɛ, miikpa bo fai, kaaho otsulɔ he ooya. 4Hã ni ayɛ nu fioo kɛba ni nyɛkɛfɔ nyɛnaji ahe, ni nyɛjɔɔ nyɛhe yɛ tso lɛ shishi 5koni mayakɔ aboloo atrɔma kome kɛba ni nyɛkɛwo nyɛdaaŋ. No sɛɛ koni nyɛfoŋ kɛya, akɛni nyɛbatsɔ̃ otsulɔ ŋɔɔ nɛɛ.” Amɛkɛɛ lɛ akɛ, “Feemɔ bɔ ni okɛɛ lɛ.”
6Kɛkɛ ni Abraham yiŋ kɛtee Sara ŋɔɔ oya mli yɛ buu lɛ mli, ni ekɛɛ, “Feemɔ mramra, tii mã kiloi etɛ̃ koni okpɔtɔ ni okɛshã aboloo.” 7Kɛkɛ ni Abraham sha foi kɛtee tsinai lɛ ateŋ ni eyamɔ tsinabi ni esako ni hi, ni ekɛhã etsulɔ ko, ni tsulɔ lɛ ye ehe oyai ni ekɛfee niyenii. 8Kɛkɛ ni Abraham wo butru kɛ fufɔ kɛ tsinabi loo ni akɛfee niyenii lɛ ni ekɛbamamɔ gbɔi lɛ ahiɛ, ni edamɔ amɛhiɛ esɔ̃mɔ amɛ yɛ tso lɛ shishi ni amɛye nii lɛ.
9Ni amɛbi lɛ akɛ, “Nɛgbɛ oŋa Sara yɔɔ?” Ni eto he ekɛɛ akɛ, “Eyɛ buu lɛ mli.” 10#Rom 9.9 Amɛteŋ mɔ kome#18.10: Mɛi komɛi susuɔ akɛ mɛi etɛ lɛ ateŋ mɔ kome lɛ Yehowa diɛŋtsɛ ni. kɛɛ akɛ, “Bɔ fɛɛ bɔ ni fee lɛ maku misɛɛ maba oŋɔɔ wɔsɛɛ afi benɛ mli ni be ni maba lɛ oŋa Sara ena binuu.”
Sara damɔ buu lɛ mli gbɛ yɛ shinaa lɛ shi yɛ Abraham sɛɛgbɛ eebo toi. 11Abraham kɛ Sara fɛɛ egbɔlɔ ni amɛye afii pii, ni Sara ekpa tsuiasɛɛ yaa. 12#Jɛn 17.17; 2 Pet 3.6 No hewɔ lɛ, Sara ŋmɔ yɛ eyitsoŋ ni ekɛɛ, “Belɛ migbɔlɛ nɛɛ mli be ni miwu etsɔ̃ nuumo nɛɛ, mɛɛ miishɛɛ wɔɔna yɛ nuu kɛ yoo bɔlɛ mli.”
13Yehowa bi Abraham akɛ, “Mɛni hewɔ ni Sara ŋmɔ, ni ekɛɛ akɛ, ‘Aso lɛɛlɛŋ akɛ mi ni mitsɔ yoomo nɛɛ mana bi mafɔ lo?’ lɛ. 14#Luk 1.37 Ani nɔ ko wa hã Yehowa lo? Be ni mito lɛ maba oŋɔɔ ekoŋŋ afi naakplɔ benɛ, ni Sara aaana binuu!”
15Shi Sara tso ni ekɛɛ, “Miŋmɔko,” ejaakɛ eeeshe gbeyei. Shi Nuŋtsɔ lɛ kɛɛ, “Dabida, oŋmɔ.”
Abraham kpa fai ehã Sodom
16Kɛkɛ ni hii etɛ̃ lɛ yi mli kɛjɛ jɛi ni amɛtsɔmɔ amɛhiɛ amɛhã Sodom gbɛ, ni Abraham kɛ amɛ tee eyajie amɛ gbɛ. 17Ni Yehowa kɛɛ akɛ, “Mikɛ nɔ ni mibafee nɛɛ eteŋ Abraham. 18#Jɛn 12.13 Abraham baatsɔ̃ maŋ kpeteŋkple ni he wa, ni abaajɔɔ shikpɔŋ lɛ nɔ maji fɛɛ kɛtsɔ̃ enɔ, 19#Deut 6.7; 32.46 ejaakɛ mile lɛ akɛ eeefã ebii kɛ ewebii ni baa yɛ esɛɛ lɛ koni amɛbo mi toi ni amɛfee nɔ ni hi kɛ nɔ ni ja koni nɔ ni mi, Yehowa, miwo shi yɛ ehe lɛ aba mli.” 20#Jɛn 19.13 Kɛkɛ ni Yehowa kɛɛ akɛ, “Akɛni nibii ni awieɔ ashiɔ Sodom kɛ Gomora lɛ fa, ni amɛhe eshai lɛ efa naakpa hewɔ lɛ, 21#Jɛn 11.5; Lal 34.15-16 makpeleke shi matee mayakwɛ akɛ nibii fɔ̃ji ni awieɔ ashiɔ amɛ ni minuɔ lɛ eyɛ mli nakai lo? Ni kɛji ebɛ mli nakai lɛ, koni male.”
22 #
Jɛn 19.1
No hewɔ lɛ, hii enyɔ lɛ tsɔ amɛhe ni amɛtee Sodom gbɛ; shi Abraham damɔ shi yɛ Yehowa hiɛ lolo. 23#Num 16.22; 2 Sam 24.17 Kɛkɛ ni Abraham tsi ebɛŋkɛ Yehowa ni ekɛɛ akɛ, “Ani oookpãtã jalɔ kɛ gbɔmɔ fɔŋ fɛɛ hiɛ shi kome lo? 24Ekolɛ benɛ jalɔi nyɔŋmai enumɔ aaahi maŋ lɛ mli. Ani kɛji nakai lɛ, oookpãtã maŋ lɛ hiɛ, ni okɛfaŋ maŋ lɛ yɛ jalɔi nyɔŋmai enumɔ ni yɔɔ mli lɛ ahewɔ? 25Enɛ akagbale bo fɔ̃ŋfɔ̃ akɛ oooye nɛkɛ sane, ni ooogbe jalɔ kɛ gbɔmɔ fɔŋ fɛɛ shi kome, ni jalɔ aaana nɔ tamɔ gbɔmɔ fɔŋ nɔŋŋ lo! Enɛ akagbale bo! Ani shikpɔŋ lɛ fɛɛ nɔ kojolɔ lɛ, ekojoŋ kojomɔ ni ja lo?”
26 #
Yes 65.8; Mat 24.22; Eze 22.30 Kɛkɛ ni Yehowa kɛɛ akɛ, “Kɛji mana jalɔi nyɔŋmai enumɔ yɛ Sodom maŋ lɛ mli lɛ, mikɛbaafa maŋ lɛ fɛɛ yɛ jalɔi lɛ ahewɔ.”
27Abraham here nɔ ni ekɛɛ akɛ, “Naa, miŋɔ mifɔ̃ minɔ akɛ mikɛ Nuŋtsɔ lɛ aaawie, tsɛbelɛ mi lɛ su kɛ lamlu kɛkɛ ji mi. 28Ekolɛ be nɛ, aaashwɛ mɛi enumɔ dani ashɛ jalɔi nyɔŋmai enumɔ lɛ. Ani oookpãtã maŋ lɛ fɛɛ hiɛ yɛ mɛi enumɔ ni shwɛ dani ashɛ lɛ hewɔ?” Nyɔŋmɔ kɛɛ, “Kɛji mana mɛi nyɔŋmai ejwɛ kɛ enumɔ yɛ jɛi lɛ, mikpãtãŋ maŋ lɛ hiɛ.”
29Abraham kɛ Nyɔŋmɔ wie ekoŋŋ, ni ekɛɛ akɛ, “Ekolɛ aaana jalɔi nyɔŋmai ejwɛ yɛ jɛi.” Ni Nyɔŋmɔ kɛɛ akɛ, “Mifeŋ nɔ ko yɛ mɛi nyɔŋmai ejwɛ lɛ ahewɔ.”
30 #
Koj 6.39
Abraham wie ekoŋŋ akɛ, “Nuŋtsɔ mli akawo la akɛ mawie. Ekolɛ aaana gbɔmɛi nyɔŋmai etɛ̃ yɛ jɛi.” Nyɔŋmɔ kɛɛ akɛ, “Kɛji mina mɛi nyɔŋmai etɛ̃ yɛ jɛi lɛ, mikpãtãŋ maŋ lɛ hiɛ.”
31Abraham kɛɛ akɛ, “Miŋɔ mifɔ̃ minɔ akɛ mikɛ Nuŋtsɔ lɛ aaawie. Ekolɛ aaana mɛi nyɔŋmai enyɔ yɛ jɛi.”
Nyɔŋmɔ kɛɛ akɛ, “Mikpãtãŋ maŋ lɛ hiɛ yɛ mɛi nyɔŋmai enyɔ lɛ ahewɔ.”
32Abraham kɛɛ akɛ, “Ao, Nuŋtsɔ mli akawo la kɛji mawie shi kome nɛɛ pɛ kɛkɛ. Ekolɛ aaana mɛi nyɔŋma yɛ jɛi.”
Nyɔŋmɔ kɛɛ akɛ, “Mikpãtãŋ maŋ lɛ hiɛ yɛ mɛi nyɔŋma lɛ ahewɔ.” 33Be ni Nyɔŋmɔ kɛ Abraham wie etã lɛ, Nyɔŋmɔ yiŋ etee ni Abraham ku esɛɛ kɛba shĩa.
Sélection en cours:
Jɛnɛsis 18: NEGAB
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
Bible in Ga Language © Bible Society of Ghana, 2020.
