Matthai 6
6
Pahyana Kaw
1Biena luota hmangpha nama tuepa kha malie ta na hmung naaseyi tapata zaapuv hmielieta va tue kha ung. Cahaa cata nama tue kieca vuoruo lieta a awpa nama Paa'a taata lawmuo khaahmuo hmung'a va ungciy.
2Cacuonakaw hmangpha nama tue tiyta phahruocuo tie ta cawsaa malie pathuosa naaseyi tapata apungna-ing hne azaa luopuv lie hmyakaa tung yite ama tuepa haata tue kha ung. Biehmisi tana ica chang yi, iema ca ama lawmuo kha ama hmung diy tli. 3Cuorasala niema ca hmangpha nama tue tiyta nama cacuo luo kuv ta a tuepa kha nama cavyi luo kuv tahmuo a pachang li riypata va tue tie ung. 4Cahaa cata a paruv ta nama tuepa a hmungtuvpa nama Paa khata nama lawmuo kha aca pi'a yi.
Thlaachuona Kaw
(Luk 11:2-4)
5Thlaa nama chuo tiyta phahruo a cuo pakhipa tie kha lu kha ung. Iema ca cawsaa ta malie hmung naaseyi tapata luopuv a tawna lie hne apungna-ing lie a daa pata thlaa chuo kha ama tlechuo sa. Biehmisi tana ica chang yi: iema ca ama lawmuo kha ama hmung diy tli. 6Cuorasala thlaa nama chuo kieca nama khuo luo a ngie ungla, ingchiy kha khaa ungla, ming ta hmung khu a aw lipa nama Paa'a luo kha chuo tie ung. A paruv ta nama tuepa a hmungtuv nama Paa ta nama lawmuo kha aca pi'a yi.
7Thlaa nama chuo tiyta Jentail ming ta bie a hluvsa ma ri kieca malie a thyi thlu aa tapata siyluo a hnyi lipa bie a syisa ama ripa haakhata thlaa chuo kha ung. 8Iema ca va lu lie ungciy, tahematapakieca nama Paa ta nama hie hluo ta khaapama namaa hu tapa kha a pachang diy tli.
9Cacuonakaw hinghaahingta thlaa chuo tie ung:
Vuoruo lie a awpa ma Paa,
Na mingpathepa ca pa-uvsathyi pata aw mangsue.
10Na pena tlung paatie se;
Vuoruo lie haata alyicung lie
na khingnapa tling paatie se.
11Ningting ta maa hupa sa ca
ata ning zaw malie pi tie.
12Malie ta ima cunglie ama sue ningta
maa ngiethepa haayita,
Ma suenapa kha malie a ngiethe ra tie.
13Pasupaliyna luo malie pachiy sa li pata,
A pha lipa chung taata malie khuo tie.#6:13 Or Hluo vie caa-uv lieca, ‘Pena hne, Lesyina hne pa-uvsathyina ca Chuozaa ta na cunglie aw mangsue. Amen,’ tapa a bechiy.
14Malie ta nama cung lie ama tuepa suena kha namaa ngiethe kieca, vuoruo lie a awpa nama Paa ta niema zaw acaa ngiethe ra'a yi. 15Cuorasala malie kha namaa ngiethe li kieca niema suena zaw kha nama Paa ta caa ngiethe ra'a vayi.
Sa Uvna Kaw
16Sa namaa uv tiyta phahruocuo tie haata nama hmiephya a pachie sa kha ung. Sa amaa uvpa kha cawsaa ta malie pachang naaseyi tapata ama hmiephya kha amaa pachie sa. Biehmisi tana ica chang yi: iema ca ama lawmuo kha ama hmung diy tli. 17Sa namaa uv tiyta nama hmie kha a siy ungla nama luv zaw kha sathu a thuv tie ung, 18tahematapakieca sa namaa uvpa kha malie ta ca pachang lipa yi ta hmung khu lipa nama Paa kyalya ta aca pachang'a yi. Cahaa cata a paruv ta nama tuepa a hmungtuv nama Paa ta nama lawmuo kha aca pi'a yi.
Vuoruo Lie Suethiy Pacung Ung
(Luk 12:33-34)
19Thinghlaa ta ning te a pabung khunapa hne a se ta ce te a ra khunapa, a ruvhangpa ta a paruv khunapa alyi lieta nama suethiy kha pacung kha ung. 20Thinghlaa ta ning te a pabung khu linapa hne a se ta ce te a ra khu linapa vuoruo lieta nama suethiy kha pacung tie ung. 21Tahematapakieca nama sue a awna lie khana nama pathiypalung zaw a aw ra aa.
Na Pangpa Khena
(Luk 11:34-36)
22Ming ca pangpa cuota myi-ing tana a cuo. Cacuonakawta na ming a pha kieca nama pangpa ca a khe diy aa. 23Cuorasala na ming a pha li kieca na pangpa ca zingna chunglie tana a aw aa. Cacuonakaw na chunglie a awpa khena ca zingna ta a cuo sue kieca capa zingna ca a zing suesaapa a cuo aa.
Byi Pahning Cuo Rehriena
(Luk 12:22-23; 16:13)
24Ahungtahmuo byi pahning re hriepa pakhaw the'a vyi; pakha kha due'a te a hrangpa pakha kha a hue aa, pakha'a lie kha zangtluo aa tla pata aw'a te a hrangpa pakha kha siysaa ri li pata a aw aa. Khazing re hne hnyirungna re ca hrie pakhaw the'a va ungciy.
Nama Palung rie Thyi Kha Se
(Luk 12:22-23)
25Cacuonakawta ica chang yi, “Ning riy dang riypa kawlie cuose, nama pangpa hne abuv-ase riypa kawlie cuose, ningting hringna kawlieta nama palung rie thyi kha se. Hringna ca sa laata biepuv vie te pangpa ca cawsie laata a biepuv vie cuo vama? 26Pavaa zaw hing mang tie ung: saciy vaa vayi, sa zaw la yite be luo raw vayi. Cuorasala vuoruo lie a awpa nama Paa ta ama riy a pabi thluo yi. Niema ca pavaa laata nama sungnaa vie karaa cuo vama? 27Nama palung rie a thyi nakawta nama hringnapa siymaluo pakha chuo a pasyi sa vie khupa pakha chuo nama aw ma?
28Cacuonakaw khaapanakawma cawsie kawlie nama palung rie a thyi? Ruo lie paapaapa khiy pacuo tie ung, tuokhaatama ama lethaw, re hrie vayi, cawsie cuota palaa hrie vayi. 29Ica chang yi, Siepahruo Solomon khahmuo, khatluv kha ta a hnyirung raalaa pa khata a hnyirungna hne a cawsie kha hingpa paapaapa paakha puvthenapa tluv hing ta vyi. 30Ata ning hring te mawluo myi chung luo hmaw riypa, ruo lie aphuv kung zaw hmuo a pangituv Khazing ta niema changchiy ca ca pangi li pata aca aw'a yi ma? Nama zangna hing a caw hringhruo de!
31Cacuonakawta, ‘Khaapama ma ning aa? khaapama ma dang aa? Khaapama maa tue aa?’ tapata nama palung rie thyi kha se. 32Hingpa hing ca Khazing a zang lipa tie ta ama palung rie a thyikhyi tawpa tana a cuo. Vuoruo lie a awpa nama Paa ta hingpa bangkhuo hing namaa hu diy tapa kha a pachang. 33Cacuonakawta Khazing pena hne aa dangna kha huv taa ungla hmanghrangpa bangkhuo zaw hing aca pi puo ngiethie'a yi.
34Cacuonakaw mawluo cuota nama palung rie thyi kha se, mawluo ta ama cuota a palung rie thyi thluo se. Ata ning'apa ruvnaana hing ata ning cuota aa de.
Sélection en cours:
Matthai 6: LNT1
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
New Testament in Chin Lautu © Bible Society of Myanmar, 2015.
