मत्ती 7
7
अर्काए ओखत मापले·न्या
(लूका ६:३७-३८,४१-४२)
1“जे अर्काए ओखत पले·द ताएच्यो, म़ानी परमेस्वरए जे जेखत ब पले·द्यान्या ले। 2जे छुतलाई कितावनी जेथ·रैज़्या, जे मनी हितावनी ज़ जेथ॰रिरिज़्या। स़ोनो किताव गोइँनी जेगोइँज़्या, जे मनी हिताव गोइँनी ज़ दैन्या जेले। 3फरी कै जैद ननैंए उमीलाव तकेज़ा सींका नरँःज़्याव, नँ नमीलाव नाःल्दिउ मुँदा ताकितर नमारँःज़्याव? 4नमीलाव नाःल्दिउ मुँदा लिज़्यावत कै जैद ननैंलाई, ‘नमीलाव सींका हाइद ङाईं’ है नदोधुरिज़्याव? 5ए निताव पाँज़्याव कैफती, ङ़ादा नमीलाव मुँदा हाइकेदा, ननैंए उमीलाव सींका नहाइक छर्लङ्ग रँःन्या नले।”
काः स्यासोर स़ोनो ऊ स्यासोर
6“छैंव पाँर काः स्यासोरालाई ताराएच्यो, म़ानी नोर जेल्योदा हुद छुपिहुन्या लेर। स़ोनो हिरामुती स्यासोर ऊ स्यासोराए याङ़ाक ताख्याच्यो, म़ानी नोराए हिलाल छिल्न्या लेर।”
जोए खिम्ज़्याव होए ज़ दैज़्याव
(लूका ११:९-१३)
7“फरी ब तोबो है ङादाचिज़्या, परमेस्वरस जेऩिकिन जेलाई यान्या ज़ ले, जेखिम्किन दैन्या ज़ जेले, य़ाम कोतो कोतो जेजैकिन जेजूँनी फैसिन्या ले। 8जोए ऩिज़्याव होलाई यान्या ले, जोए खिम्ज़्याव होए दैन्या ले, जोए कोतो कोतो जैज़्याव होए उजूँनी फैसिन्या ले। 9फरी तोबो ज़िम्ज़ा ल़ुज़ाए ओबाबुस भरेस उऩिकिन लुँ ते मायो, 10ङाँः उऩिक घुल ते मायो। 11है जैद जे निताव पापल लिज़्याव मिँराए जेज़ारालाई निताव चाव चाव यान्या जेसैंकिन, स्वर्गताव जेबाबुए झन ओलस जेऩिकिन चाव चाव कै जैद मायाचिउके? 12है जैद जे छुतए ल्योनी किताव जेपैंज़्या, जे ब छुतए ल्योदा हितावनी ज़ दोचिके। मोसाए ओकानुन स़ोनो अगमबक्ताराए यासरो ब नत ज़ तुपिज़्या।”
चूव य़ाम
(लूका १३:२४)
13“चूव य़ामनी ज़ पसिच्यो। नासदा बान्या येम ते राँव, पसिन्या य़ाम ब बनै वैःव लिज़्या। नो येमनी बाज़्यावर बनै कुधु ज़ लिज़्यार। 14खाली अजम्बरी जुनीदा बान्या येम स़ोनो य़ाम चूव, धो पसिउ ओतावए नो येमल बान्यार छ्या ज़ ताज़्यार।”
मिँ ओय़ेननी ज़ सरेस्सिए
(लूका ६:४३-४४; १३:२५-२७)
15“परमेस्वरए ओपाँ बले·द तँनी पैज़्यावराए ल्योनी जोगोइसिद लिच्यो। नोर पाखात बगाललाव बेधा स्यासोर जैसिज़्यार, यायुँल ते छे छे ङम्सिउ प़र स्यासोर लिज़्यार। 16किताव सींरालाई यासैनी जेरासरेस्ज़्या, हिताव ज़ नोरालाई मनी याय़ेननी ज़ सरेस्न्या जेले। कारज़ुत जोम्परसै मासैए, ज़ुसैत कोराली ब मासैए। 17हिताव ज़ चाव सींए चाव सै ज़ झाःज़्याव, माचाव सींए माचाव सै ज़ झाःज़्याव। 18फरी चाव सींए माचाव सै माझाःव, माचाव सींए चाव सै ब माझाःव। 19जो सींए चाव सै माझाःव नो सीं पल्द मेंःल ख्यान्या वाज़ ताज़्या। 20है जैद जे हो तँनी पैज़्यावरालाई याय़ेननी ज़ सरेस्न्या जेले।
21“जोए ओयाःए वाज़ ङालाई ‘प्रभु, प्रभु’ है दाँज़्याव, नो स्वर्गताव राज्याल पसिधुन्या माले। जोए स्वर्गताव ङाबाबुए उयुँलाव मिताव य़ेन दोज़्याव, हो वाज़ पसिन्या ले। 22नो छ्याम कुधुए ङालाई, ‘अ प्रभु, अ प्रभु, गे नमिननी परमेस्वरए ओपाँ ब गेरासथैके, माचाव पुरूसर ब गेरापले·के, अचम्बलाव सरेसर ब गेरासतैंके,’ है यादाँकिन, 23ङा नोरालाई, ‘जेलाई खर्क ज़ ङामासरेस्चिए, जे निताव परमेस्वरकिन तँदाङाव य़ेन दाज़्यावर, आनी पुलुस्द बाचिके,’ है दान्या ङाले।”#भज ६:८
लुँ तर्त स़ोनो बालुवा तर्त जैसिउ झ़िमनी
(लूका ६:४७-४९)
24“है जैद जोए आव ङापाँ थैद दोज़्याव, नो तोबो ओगहक ल्यो मिँए झ़िम ओजैक पतालल लुँ तर्त गज ओथाँज़्याव स्यासो लिज़्या। 25नम बनै वाद, ल्यो माल्यो बतासर भलर उहुक नो झ़िम लुँ तर्त ओतावए माधलिके। 26हो मिताव ज़ जोए आव ङापाँर थैद ओमादोकिन तोबो ओगहक माल्यो मिँए झ़िम ओजैक बालुवा तर्त ओजैव स्यासो ज़ लिज़्या। 27बतासर दाद, नमर वाद, भलर हुद नो झ़िमलाई धलैद प्याःपी जैद लाँज़्याव।”
28येसुए आव पाँर सथैद उतुपैवत, नो माहोल्यार येसुए ओपाँ थैद अचम्ब ताकेर, 29काराव ल्यो ताकिन होए यासास्त्रीराए यारापैज़्याव मिताव माताद बनै हकस ओरापैज़्याव।
Sélection en cours:
मत्ती 7: NKham
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2015, Wycliffe Bible Translators, Inc. All rights reserved.
