मत्ती 20
20
एँःल य़ेन दाज़्यावर
1“है जैद स्वर्गताव राज्या तोबो एँःए ओर्गे स्यासो लिज़्या। नो मिँ छकाल्न्या घग ज़ ओएँःल य़ेन दान्या मिँर याखिम्नाज़्याव। 2नोरास तला भरिकाव जेला यान्या कबल दाद ओय़ेन दाना यापरींक्यो दी। 3नौ बजेवाक फरी नो एँःए ओर्गे बजार जीदा ओबाक याय़ेन माल्योरालाई रँःद, 4नोरालाई, ‘जे अइज़ जेलिज़्याव देखा ङाएँःल य़ेन दोनाचिके, जेजेला ङायाच्या,’ है ओरादोक ते, नोर बाद य़ेन दोनाकेर दी। 5नो एँःए ओर्गे फरी बाह्र बजेवाक तखेप, तीन बजेवाक तखेप फरी ब बाहोर्यार जैद यापरींक्यो दी। 6पाँच बजेवाक फरी ब नो एँःए ओर्गेए तोबोक अइज़ च्याँःसिद लिज़्यावरालाई रँःद, ‘जे काराव बिनु य़ेन च्याँःसिद जेलिज़्याव?’ है ओरादोक ते, 7नोराए, ‘गेलाई सुए ज़ य़ेन मायासिर,’ है यादोक ते, नोरालाई मनी ओय़ेन दाना यापरींक्यो दी।
8“नम ओझ्यानाक नो एँःए ओर्गेए नो य़ेन दोज़्यावराए याङ़ैतावलाई खुल्द, ‘नो ङाय़ेन दाज़्यावरालाई दुप्द याजेला भाःद याएके, प़ाइँरानी छींनी हुवरालाई प़ाइँरानी ङ़ात याएयो,’ है ओदोक ते, नोए नो य़ेन दाज़्यावरालाई खुल्द,#लेबी १९:१३; ब्य २४:१५ 9पाँच बजे हुवरालाई ङ़ात याएक्यो। नोराए तछाकाव याजेला दैकेर दी। 10नो छकाल्न्या हुवराए निताव रँःद ‘नोराकिन गे ते कुधु ज़ गेदैया,’ है यालिज़्याव। खाली छींनी ते या ब हाःज़ दैकेर दी। 11नै ओतावए नोर एँःए ओर्गेए ल्योक बाद, 12‘नो प़ाइँरानी छींनी हुवर तघन्ता वाज़ य़ेन दोकेर, नोर कै जैद गे तला भरी घाम सोता सोता ताद दावरास सम सम नजैसिउ?’ लिद गन गन दोकेर दी। 13है जैद नो एँःए ओर्गेए तोबोलाई, ‘ङानैं, नँस छकाल्न्या ज़ तला भरिकाव जेलाल गिन्कबलिसिउ माःक रो? ङा नउपर्त मादान्या ङामादोए। 14नजेला तीद बानिके। आव छींनी हुवरालाई मनी नँसकाव जुँ ज़ याव ङापैंज़्या। 15पैसा ङामीं ज़, ङापैसा जोलाई यान्या ङायुँ लिज़्या, होलाई यान्या ओमाताज़्याव रो? ङायुँ ओगराँव काराव नमी उतूज़्याव?’ है दोक्यो दी।
16“हो मिताव ज़ ख्वा ख्वा छींतावर ङ़ात तारिज़्यार, ङ़ातावर छींत तारिज़्यार।”
येसु उसिन्याए जूँनी फरी ओपाँव
(मर्कूस १०:३२-३४; लूका १८:३१-३४)
17नकिन येसु यरूसलेमदा ओबाज़्याक बाह्र जना उसिसरालाई याबातङ खुल्द, 18“गे यरूसलेमदा गेपुलुस्नाज़्या। नल गेकेसोत ङा मिँ मिन्सिउलाई मुख्या पुजारीर स़ोनो सास्त्रीराए याकुइत सूँपिन्या ज़ लेर। नोराए ङालाई सैःन्या ज़ थ·रैद, 19रोमी सरकारए उकुइत याझाःनावत नोराए फरी उल्ली गिल्ली दाद, रीःद, क्रुसत तङ्गैद सैःनारिज़्यार। हैदी ब स़ोंलात सिउनी सैंसिद सोन्या ङाले,” है यादोक्यो।
याकूब स़ोनो यूहन्नानी निआमाए ओपाँ
(मर्कूस १०:३५-४५)
20नकिन जब्दियाए ओज़ानी याकूब स़ोनो यूहन्नानी निआमास येसुए ल्योक हुद, निआमाए धो दाद, “जेरो प्रभु,” है ओदोक ते, 21येसुए, “काता दाद्यान्या नपैंज़्याव?” है ओदोक ते, नो मेंमाए, “नराज्याल आव ङाज़ानिलाई तोबोलाई नवोर्दा, तोबोलाई नदाबर्यादा च़ुसिन्या निजैयो,” है ओदोक ते, 22येसुए, “नँ नज़ारास आव जेऩिज़्यावए जूँनी जेमासैंए। ङा जाँवाक धो सहिउ दुखर ङासहिरिज़्याव नोनी मासहिधुरिज़्यानी?” है ओरादोक ते, नोनी, “गिन्सहिधुया ज़,” है दोकिनी। 23हाःत ज़ येसुए, “हैज़, ङा ङादैरिज़्याव धो सहिउ दुखर जिन मनी दैन्या ज़ जिन्ले, खाली ङावोर्दा ङादाबर्यादा च़ुसिउ यान्या ते ङा ङाकुइत माले। निताव दैन्या स्वर्गताव ङाबाबुए जोलाई एज़्याव, होए उजूँनी वाज़ लिज़्या,” है निदोक्यो। 24उपुर्काव दस जना उसिसराए नो पाँ थैद नोनिलाई रँःद यारिस चोके।
25नाःत ज़ येसुए उसिस भरिरालाई ओल्योदा खुल्द, “जे ज़ जेसैंज़्याखेहो, आव मानुवाताव याघेप्पार याधूँलावराए ङ़ैत बनै अखत्यासोर ताद हाप हाप ख्याज़्यार। 26जे जेल ते निताव जैसिन्या माताए। है जैद जेनी जो स़ेर जैसिउ जेपैंज़्या, हो प़ाइँए यासेवा दान्या ओजैसिक। 27स़ोनो जेनी जो घेप्पा जैसिउ जेपैंज़्या, हो प़ाइँए याबाँदा ओजैसिक। 28ङा मिँ मिन्सिउ ब ‘ङासेवा घदोरक’ लिद ङाहुव माःक, कुधुलाई बाँचैन्याए जूँनी ङाजिउ झाःद यासेवा ङादोहुव ची,” है यादोक्यो।
येसुए निमी मारैंःवनिलाई रँःधुन्या उनिजैव
(मर्कूस १०:४६-५२; लूका १८:३५-४३)
29येसु उसिसरास यरीहो सहरनी पुलुस्द याबाज़्याक मिँर ब बनै माहोल्या यास ज़ याबाज़्याव। 30येमक ऩेब्लो निमी मारैंःवनी च़ुसिद निलिज़्याव। नोनी ‘येसु आलाव घ्याँ हुज़्या दी’ लिन्या थैद, बनै चोइस, “अ दाऊदए ओथोलाव प्रभु, गिनलाई नयुँ ओनाक,” है लिद निक़िज़्याक, 31नो माहोल्याराए ‘झ्याउँ तालिचिन’ लिद यारासिङार्केर। नोनी झन ज़ चोइस क़िद, “अ दाऊदए ओथोलाव प्रभु, गिनलाई नयुँ ओनाक,” है निलिक ते, 32येसु नक च्याँःसिद नो निमी मारैंःवनिलाई ओल्योक खुल्द, “ङा जिनजूँनी काता दाद्यान्या?” है उनिदोक ते, 33“प्रभु, गिन रँःधुन्या गिन्ताक,” है निदोक ते, 34येसुए उयुँ नाद निमीत छाप्द उनियो प़ाइँना ज़ रँःधुन्या ताद उछींत बाकिनी।
Sélection en cours:
मत्ती 20: NKham
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2015, Wycliffe Bible Translators, Inc. All rights reserved.
