Gênesis 11
11
Babel anushũ hiwe keyatapahaira waibu Deusũ hatu kupikĩ hatu pashkanikiaki, na hãtxarã
1Hanua eskatiã mai hirabi anu pashkariabumahaira yura dasibi hanus hiweabutiã hatũ hãtxa habiãwẽs hãtxapaunibukiaki. 2Bari huaikiri bukubaĩkĩ atimas Sinar anu mai pepaki nukutã bai wati pepa anu hanu maewaima anu pashkariama hiwea 3yuinamekĩ shinãkĩ: “Ha hiwe wati na mai bawanãwẽ, txi itxapawẽ bawakĩ kushi wakinã”, ishũ hiwe wati mishki yamakẽ mishki keska wakĩ hiwe wati mai bawa mirimawashũ bui txashkawẽ tsamakubaĩkĩ 4ana yuinamekĩ: “Mae ewapa wanãkãwẽ. Hanushũ mae namakis anu hanushũ uĩti hiwe tapaitiya wabaĩkĩ keyatapahaira wakĩ tsamakubaĩkĩ nai merã hikiti wanãkãwẽ, haskawẽ taeshũ dasibitũ hau nukũ uĩti hiwe hawẽrua hau shinãkubaĩshanũbunã. Haskai hiwei mai hirabi anu nũ pashkama ishanaii”, ishũ 5dayakĩ nai anu hikiti keyatapa mai bawa tsamabaĩkĩ taewabainaibũ Senhor Deusũ hatũ daya uĩkĩ 6yuikĩ: “Uiã, dasibi habias yuraburã, hatũ hãtxa habiaski. Ibubis unanepakĩ haska daya taewashũ hamapai sharabu shinãkĩ atirubuki, pepa inũ txakaburã”, iwanã, 7ana yuikĩ: “Hatu anu butushũ hatũ hãtxa pashkanãwẽ, hãtxa betsa betsapaya wakinã. Haskawẽ taea hau ana hãtxai ana nĩkakanãyamanũbunã”, itã 8hatu hãtxa pashkakĩ betsa betsapa wa mai hirabi anu hau pashkanũbũ Senhor Deusũ hatu betsa wa mae ewapa wabiai hatũ daya henebainibukiaki. 9Hanushũ Senhor Deusũ hatũ hãtxa nĩkatima wakĩ itimaska wa shuku tibibaini pashkabainibukiaki. Ha mae anushũ hatu haska wawẽ taeshũ hatũ mae kenakĩ: “Babelki”, anibukiaki, nukũ hãtxawẽ yuiarã: “Hãtxa Betsa Betsapa Hunea Nĩkatimarã”, akinã. Hanushũ Babel mae hirabi anua Deusũ hatu pashkakĩ nitxiã akeakenikiaki, Noé enabu pawakinã.
Semnẽ enabu hatu tanakubainibukiaki, na hãtxarã
10Semnẽ enabu pai eska hiwenibu yuiaki. Hiri henẽ hatu atxini ma netsui keyunikẽ 2 ano ka ana binutã Sem 100 bariyatũ huni bake bawaima kaiã kenakĩ: “Arfaxadeki”, ayama 11hanushũ huni inũ aĩbu bakebu ana hatu bawakubaini 600 ano binua mawanikiaki.
12Hanua Arfaxade 35 bariyatũ huni bake bawaima kaiã kenakĩ: “Saláki”, ayama 13ana 403 ano hiwekũkaĩkĩ huni inũ aĩbu bakebu ana hatu bawakubaini 438 ano haya mawanikiaki.
14-15Hanua Salá 30 bariyatũ huni bake bawaima kaiã kenakĩ: “Éberki”, ayama ana 403 ano hiwekĩ huni inũ aĩbu bakebu ana hatu bawakubaini 433 ano haya mawanikiaki.
16-17Éber 34 bariyatũ huni bake bawaima kaiã kenakĩ: “Pelegueki”, ayama ana 430 ano hiwekĩ huni inũ aĩbu bakebu ana hatu bawakubaini 464 ano haya mawanikiaki.
18-19Hanua Pelegue 30 bariyatũ huni bake bawaima kaiã kenakĩ: “Reúki”, ayama ana 209 ano hiwekĩ huni inũ aĩbu bakebu ana hatu bawakubaini 239 ano haya mawanikiaki.
20-21Hanua Reú 32 bariyatũ huni bake bawaima kaiã kenakĩ: “Serugueki”, ayama ana 207 ano hiwekĩ huni inũ aĩbu bakebu ana hatu bawakubaini 239 ano haya mawanikiaki.
22-23Hanua Serugue 30 bariyatũ huni bake bawaima kaiã kenakĩ: “Naorki”, ayama ana 200 ano hiwekĩ huni inũ aĩbu bakebu ana hatu bawakubaini 230 ano haya mawanikiaki.
24-25Hanua Naor 29 bariyatũ huni bake bawaima kaiã kenakĩ: “Teraki”, ayama ana 119 ano hiwekĩ huni inũ aĩbu bakebu ana hatu bawakubaini 148 ano haya mawanikiaki.
26Hanua Tera 70 bariya huni bake dabe inũ bestitxai hayanikiaki, hatũ kena Abrão inũ, Naor inũ, Harãnã.
Tera enabu eska tananibukiaki, na hãtxarã
27-28Tera huni bakebu hati ipaunibukiaki, Abrão inũ, Naor inũ, Harãnã. Harãnẽ huni bake bawaima kaiã kenakĩ: “Lóki”, ani hanua hawẽ epa Tera mawariamakẽ Caldéia mai pakea anua hawẽ mae Ur anua habia kaini anuari ha dukũ Harã mawanikiaki. 29Harãnẽ ana bake dabe bima aĩbu bake Milca inũ huni bake betsa Iscá inikiaki. Hanua Abrão inũ Naor aĩyãkĩ Abrão Sarai biaya Naorĩ Milca hanubi binikiaki, hawẽ betsa Harãnẽ bakerã. 30Abrão Sarai mekĩ txutabiakubaina bake biama shãkĩ txakabu ikũkainikiaki.
31Hanushũ Tera Abrão inũ hawẽ aĩ Sarai inũ hawẽ berẽ Ló iyui Caldéia mai pakea anua hawẽ mae Ur kaĩkaĩkĩ henebaini Canaãkiri kakũkaini atimas mae pepa betsa natiã hawẽ kena Harã anu hikitã hawẽ bake debuniwẽ taeshũ mae kenakĩ: “Harãki”, atã hanu hiweaibũ 32hanua Tera ha mae kenani anua 205 ano haya mawanikiaki.
Sélection en cours:
Gênesis 11: cbsBR
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
