LOS HECHOS 11

Appeyvasquiclha Pedro napatavo Jesucristo apmolhama tingma Jerusalén

1Apnaycam alhta apóstoles apquilapajasomap najan apquilyalhinga yoclhilhma Judea. Apquillingac alhta amyaa almam apquilvalhoc Dios appayvam metnaja judíos. 2Lhama alhta apvoclho Pedro tingma Jerusalén. Yejemoc alhta apquilpamejitsaclho mataa judíos melyasquiyam tasic amyaa. 3Pedro alhta appamejitsacpoc:

—¿Soctomja appalhavocmo alhta lhip enlhit metnaja judíos, appasmec alhta najan aptoycaoc? —alhta apquiltomjac.

4Yejemoc alhta apquiltimnamcaa Pedro moclhama actemaclha apvitay siclhoc anco:

5—Acnec alhta coo tingma Jope. Naysicsa silmalhnancama alhta sicvita malha sevanmescama. Acvitac alhta asoc ayinyema netin malha manta apyiviy malmaycaoc nipvayc. Apvayventamo acpayjo sicnaclha. 6Yejemoc alhta silano. Acvitac alhta alyanca asoc navjac alpalhcomalhca najan asoc alpilhyevaycam nalhpop najan nata nipyesicsa manta. 7Yejemoc alhta siclinga appayvam: “Pedro, itnimiclha netin. Ilnajap, itov sat” —alhta intomjac siyanyalhco. 8Ayatingmavoc alhta: “Paj, Visqui. Am otomac coo mocjam asoc ningasomalhca ontoc.” 9Anit siclingay alhta intomjac ayinyema netin: “Noltime nasa ningasomalhca ontoc aptomja apcayoclha Dios Ingyapam” —alhta intomjac siyanyalhco. 10Natqui siclingay alhta intomjac. Yejemoc alhta apmiyaclho netin manta apyiviy. 11Yejemoc alhta apquilvaa sicnaclha tingma apnatqui enlhit apquilapajasomap. Tingma Cesarea alhta apquilinyema. Coo alhta jelquitamac. 12Eyapajasquic alhta Dios Espíritu, yoyam oyiplaclha enlhitaoc mepqui sicyasquiyam. Seis elyalhinga alhta najan sellhalhmaa. Ningilantalhningvocmoc alhta Cornelio tingma pac. 13Ingiltimnasquic alhta nincoo Cornelio actemaclha apvitay ángel napaat. Apquiningvaac nic alhta tingma pac. Aptomjac nic alhta apcanya: “Ilapajas enlhit tingma Jope, yoyam elyantamenta Simón, moc apvisay Pedro. 14Yejemoc sat eltimnacsic amyaa, yoyam elvomsacpoc tap lhip najan apmolhama” —nic alhta intomjac apcanyacpo Cornelio. 15Naysicsa siltimnaycam alhta apvayventamo Espíritu Santo tacjaplhit enlhitaoc. Innoc actomjaclha alhta nincoo lha apvayventamo tecjinlhit nincoo. 16Inlhenquic alhta evalhoc actemaclha appayvam Visqui ingac: “Yingmin alhta apyapascasamcoc Juan. Quellhip eyca colhic acyapascasamco Espíritu Santo.”#Hch 1.5. 17Apnasoc alhta apquilmescama Espíritu Santo Dios Ingyapam actomjaclha alhta nincoo lha, ningiltomja mongyasquiyam Jesucristo Visqui ingac. Enlhit nac coo. ¿Evanqui ya olyacsilhma coo Dios Ingyapam? —alhta aptomjac Pedro.

18Lhama alhta apquillinga apquiltimnaycam apquilyalhinga apnaycam tingma Jerusalén. Inquiltamilaclhec alhta apquilvalhoc. Inmasquec alhta apquilyasquiyam. Apquilacoc alhta Dios Ingyapam, apquilpamejitsa:

—Dios Ingyapam apmescama elyanmongsic apquilvalhoc metnaja judíos najan colhic acyimnatem apnenyaoc cotmongvoycamlha nelha —alhta apquiltomjac.

Jesucristo apmolhama tingma Antioquía

19Apmatnec alhta Esteban. Apquilminlhinacpec alhta najan enlhit melyasquiyam tasic amyaa. Invocmoc alhta apquinyajaycaoc yoclhilhma Fenicia najan acyayem inquilhe acvisay Chipre najan tingma Antioquía.#Hch 8.1-4. Apquiltimnam alhta tasic amyaa apvamlha nipyesicsa judíos. 20Apquilinyictac alhta napocja enlhit melyasquiyam tasic amyaa acyayem inquilhe Chipre najan tingma Cirene. Apquilvocmec alhta tingma Antioquía. Apquililtimnasam alhta nipyesicsa metnaja judíos (griegos) tasic amyaa ayinyema Visqui ingac. 21Apquilmopvan alhta innac ayinyema Visqui ingac. Apquilyanmoncasquic alhta apquilvalhoc aplhamoclhojo. Am alhta elyascacmoc Visqui ingac.

22Lhama alhta apquillinga amyaa Jesucristo apmolhama co Jerusalén. Yejemoc alhta apquilapajasa enlhit apvisay Bernabé tingma Antioquía. 23Lhama alhta apvoclho maa Bernabé. Apquilitsovasoc alhta apvita actemaclha appasmom Dios Ingyapam enlhitaoc. Apquililtimnasquic alhta, yoyam elinlhanmojo mataa apquilyiplovquiscama Visqui ingac. 24Aptasic alhta as enlhit Bernabé. Inlanoc alhta apvalhoc Espíritu Santo najan meyasquiyam. Apquilpalhavocmec alhta Visqui ingac aplhamoclhojo enlhit.

25Yejemoc alhta aplhinga Bernabé. Tingma Tarso alhta apyasa. Saulo alhta apquitamac. Aptajanyavoc alhta Saulo. Yejemoc alhta apyantamaclho tingma Antioquía. 26Lhama año alhta intomjac apquilnayam nipyesicsa Jesucristo apmolhama. Apquillhicmosquic alhta mataa aplhamoclhojo enlhit. Apquiltomjacpo siclhoc anco apquilvisay “cristianos” enlhit melyasquiyam tasic amyaa tingma Antioquía.

27Lhama alhta apquilvoclho tingma Antioquía profetas Dios apquillingascama. Apquilinyemac alhta tingma Jerusalén. 28Apquiningvaac alhta nipyesicsa apquilyalhinga lhama profeta Dios aplingascama. Apvisay alhta Agabo.#Hch 21.10. Espíritu Santo alhta apnac apvalhoc. Apquiltimnasamcaa alhta amyaa, yoyam covac sat alnapma mayc lhalhma anco. Naysicsa aptimem apvisqui Claudio alhta intamongvocmoc mayc. 29Yejemoc alhta allhena apquilvalhoc enlhit melyasquiyam tasic amyaa tingma Antioquía. Apquililtamjoc alhta elapajasquisic solyayem apquilyalhinga apnaycam yoclhilhma Judea. Apquilmesquic alhta moclhama actemaclha apmopvan apquilmescama. 30Apquilansaclhec alhta solyayem. Apquilasinacpec alhta Bernabé najan Saulo, yoyam elsaclhac solyayem. Apquillhovamquic alhta apquilimja apmamyi apnaycam yoclhilhma Judea (tingma Jerusalén).

Sélection en cours:

LOS HECHOS 11: ENHL

Surbrillance

Copier