Matthew 27
27
Iesu kundo maundo Rome da gavana, Pilate da ipada pipisitera.
(Mark 15:1; Luke 23:1-2; John 18:28-32)
1Ango edo sipo atesiri, pirisi babain berari de Jew gisijijiegari de awa doregedo nongo edo Iesu daro betaini awa ge jijiritera. 2Edo awamanemi Iesu asimi bundedo gisijido kundo maundo gavana Pontius Pilate da ipada pipisitera.
Judas imo akuta kive edo jimundo besisina.
(Iwata Ari 1:18-19)
3Edo iji ainde Judas mi Iesu Jew embomaida babadegarida ipada pipisisina, awamane awa Iesu daro betarate katetera awa gido, imo dubo vevera esisina. Ango edo ganu silver 30 awa tenda kundo pirisi babain ae gisijijiegari deda yai piain gupusina. 4Edo sisina, “Na jimbo beyae etena. Nanemi embo beyae nei ro itae awa emboboda ipada daro betarate pietena.”
Edo awamanemi mina sitera, “Nanekare nongo ari? Awa ito buriya.”
5Ango tetero Judas ganu silver awa oro kotopu bajina doda augedo idegedo maundo kive edo jimundo besisina.
6Edo pirisi babainmi silver awa kundo sitera, “Ganu eiwa dari betarida mina piari, edo kaenato aodarida tari isira awa, ganu ango oro kotopu bajinada ganude daedo mana piorote.” 7Edo awamane ge jirido kotembari da (1) budo yai ou ari embomi jigamo eora awa oriesitera, embomai yai neneida betari goiari awaembo. 8Aindabé ganu awa emboda dari betari oriesisina, awatedo butuda dao tuturoda awa Ororoda Butu. Edo matawa gundo iji boroko einde#27:8 iji boroko einde da moka awa ove gaiari embo Matthew da ijide. daedo dao dá ango tedo era. 9Edo ge ro peroveta Jeremiah#27:9 Jeremiahda dao einda isira, ata Matthew 27:9-10 awa Zechariah da ge. Awarata, iji ainde Matthew mi ove einda gagurisina, ove da (1), ainda dao ‘Peroveta maneda Ove Gaiari’ isinesina, edo ainda doda awa peroveta maneda ove gaiari berari. Daedo Jeremiah da ove awa gisibé ‘Peroveta maneda Ove Gaiari’ da doda. Awatedo iji ainde embomaimi ove ainda yai dao nei ‘Jeremiah’ daedo pisido tedo esitera. Ango edo Matthew mi Zechariah da ge einda burisina, edo ami ‘Jeremiah mi sisina’ gagurisina. mi sisina awa bé esisina: “Awamanemi ganu silver 30 awa buritera. Ganu awa embo ainda minada tega awamane awara esitera, edo Israel embomaimi embo ainda minada tega awara esitera. 10Edo awamanemi ganu ami yai ou ari embomi jigamo eora awa oriesitera, dá Badari mi ge okain namonde sisina ango.”#Zechariah 11:12-13
Gavana Pilate mi Iesu de tedogari pisido esisina.
(Mark 15:2-5; Luke 23:3-5; John 18:33-38)
11Edo Iesu gavana Pilate da dombuda pietero peposisina. Edo gavana mi ainde tedogari pipisisina, “Imo Jew embomaida Daotari rita?”
Edo Iesu mi mina ainde sisina, “Imo ro teta awa awara.”
12Edo iji angode pirisi babain de gisijijiegari demi Iesu de bekumba ge tedo esitera, ata imo ge mina da ji tae. 13Ango edo Pilate mi embo ainde sisina, “Awamanemi bekumba ge jiwae imonde tedo era imo gaeta?” 14Ata Iesu ge mina da ji tae esiri Pilate awa kore bajinabé esisina.
Barabbas ainda udegari burisina.
(Mark 15:6-15; Luke 23:13-25; John 18:39—19:16)
15Edo God da Darutegari Bondo iji ainde, duberi da da, Rome da gavana mi embomai jisi da (1)da jipapa awa ambo ambo edo bundari oroda embo da (1) awa udegedo esisina. 16Edo iji dá ainde, embo dao Barabbas awa jivere embo beyae da (1), edo embomai berari imo gari. Edo embo awa bundari oroda isima edo esisina. 17Awatedo embomai doregetero Pilate mi awamanede sisina, “Embo indawa nanemi imomane embo udeganate jipapa evi? Barabbas rita, ko Iesu, dao Keriso tedo era awa ri?”#27:17 Pilate kotembesisina awa, embomai jiwaebé jiwae ami Iesu da udegari jipapa ara, edo Barabbas udegari jipapa ainyae. Awatedo Pilate mi ge ango awamanede tedogosisina. 18(Pilate matu gosisina, embomai jiwaebé Iesu ambo ambo edo era, edo Jew embomaida babadegarimi Iesu de do beyae eite jitedo era. Awatedo awamanemi Iesu ainda yai pipisitera.)
19Edo iji angode Pilate awa katari anumbada anumbedo isiri, ainda aromi ge ainda yai piesiri maunsisina: “Deguta boroko na aturo etena, edo aturo doda na embo awa gido do buriya bajinabé esira. Awatedo wasiri dambu darari embo awa udegeyo, ainda yai buro nei ro ainyae.”
20Ata pirisi babain de gisijijiegari demi embo jisijisi doregesitera awamaneda do da (1) edo Barabbas awa tedogaro udegarate edo Iesu awa daro betarate sitera.
21Edo gavana Pilate mi awamanede mina sisina, “Embo tote (2) einda doda, indawa nane imondemane udeganate jipapa evi?”
Edo awamanemi mina sitera, “Barabbas!”
22Pilate mi awamanede sisina, “Edo ango ana, embo Iesu, dao Keriso tedo era awa, nanemi ainde nongo anate jipapa evi?”
Ango tesiri awamane berarimi ainde sitera, “Awa oregada de!”
23Edo gavana Pilate mi sisina, “Ro awaembo? Embo ami buriya bajina ro esiri?”
Ata awamanemi aoro ikanade gatedo tedo esitera, “Awa oregada de!”
24Edo iji ainde Pilate gosisina, awamaneda do wareregari tao ae, atako awamane sinigambari ge bajinabé tedo gundo doregedo iwata tepotapo tuturo era. Awatedo imo teo bajina un nukari isira awa budo embo berarida jisida ainda ipa teiedo sisina, “Iwata emi arapa esira, iji ainde wasiri dambu darari embo eiwa daro betaina awa, ainda betarida ororo nato yai itae. Awa itomane buriya!”
25Edo embomai berarimi mina sitera, “Embo ainda betarida ororo natokare yai edo natokare mamaida yai itaina!”
26Edo Pilate mi awamaneda yai Barabbas udegesisina, ata ami tesiri ainda itoro embobomi Iesu vejitera. Edo ainda amboda, Pilate mi embo awa awamaneda yai pipisisina oregada daro betarate.
Pilate da itoro embobomi Iesu tedojijiritera.
(Mark 15:16-20; John 19:2-3)
27Ango edo Pilate da itoro embobomi Iesu gisijido kundo maundo Paraetorium#27:27 Paraetorium awa Pilate da mando bajina Jerusalem doda. da torido itoro embobo jisi da (1)#27:27 itoro embobo jisi da (1)da ajijigari tega awa 600 ango. awa berari tetero gundo imo jinenembesitera. 28Edo awamanemi ainda ombarijiari jido teugedo ombari ribori ororo#27:28 ombari ribori ororo awa kariwa ango daotegeregarimi iji ainde awamaneda dariga arapa ain omundo esitera. Awatedo Iesu tedojijireite ombarida kariwa ango ainda tamonda pipisitera. awa ainda tamonda pipisitera. 29Edo awamanemi daotarida gobe dongo bebedemi ari engoegedo ainda kopuruda pipisitera. Edo inguta da (1) awa Iesu da ipa beda pietero jiri ainda doda baongo dadari edo tedojijireite sitera engo, “Oro! Oro! Jew embomaida Daotari!” 30Edo awamanemi Iesu da yai kosiwa edo inguta ainda ipada awa kundo ainda kopuruda ami dedo esitera. 31Edo iji ainde awamane Iesu tedojirido itae edo, ombari ribori jido teugedo ainda ombari topo awa ainda tamoda piedo imo gisijido oregada dain maunsitera.
Iesu oregada doritera.
(Mark 15:21-32; Luke 23:26-43; John 19:17-27)
32Ango edo awamane idegeteite embo dao Simon taputera. Embo awa nasi bajina Sairin edo gumbari. Edo awamanemi embo awa Iesu kondade edo ainda orega amboka arate jijine sitera. 33Edo awamane maundo yai dao Gologata ainda esitera. Ainda moka awa, ‘Kopuru Akouda Yai’. 34Edo yai ainda awamanemi Iesu mi waini jigagani ae siwo dokaka de daedo baige ari awa indarate pipisitera. Ata un awa injido gido, ainda amboda indari jipapa ae esisina. 35Edo itoro embobo imo oregada dedo jiero erido peposisina. Edo Iesu da ombarijiari da da avigedo baintedo, ganuma babaingae ove gaiaride awa augedo ango tetenya esitera. 36Ango edo awamane yai ainda anumbedo imo matawa sima ero jijirisina. 37Edo ainda kopuru enoda awa bekumba ge gaiedo detero takimbesisina: EIWA IESU, JEW EMBOMAIDA DAOTARI. 38Edo iji ainde awamanemi beono embo tote (2) awa ae Iesu de daedo oregada doritera, da (1) ainda ipa beda edo nei ainda ipa andada. 39Edo embomai gundo daginegeteite embo ainde ge bebegae tedo esitera. Edo awamane kopuru govegove eite 40sitera, “Inemi oro kotopu bajina awa dedo sitedo tekago deguta tamonde (3)da doda jiato erari tao siteta. Awatedo imo akuta toregeyo! Edo imo awa God da Mai gido, oregada dodo wote, nakare gore!”
41Edo dá ango pirisi babain ae Aodarida atopapasigari de gisijijiegari de Parasi mane de#27:41 Parasi mane. Guriki da ove gaiari indewae ge Parasi mane de einda piae doturitera. awamanemi tedojijireite sitera, 42“Imo embo nenei toregedo esira, ata ainda wasiri akuta toregari tao ae! Edo imo awa Israel embomaida Daotari gido awa, boroko orega dodo wotari kaenato gebé ari ainda yai piara. 43Ainda tumonda ari God da yai isira. Edo inemi tesira, ‘Na awa God da Mai.’ Awatedo God mi jipapa edo gido, imo boroko toregaina.” 44Edo daedo beono embo tote (2) Iesu de oregada doritera ami bekumba ge dá ango ainde tedo esitera.
Iesu oregada besisina.
(Mark 15:33-37; Luke 23:44-46; John 19:28-30)
45Edo iji ainde awa iji toropu eiri muyae wotedo butu berari awa apuregesisina. Awa matawa maundo iji wareregedo turo 3:00 gupusina. 46Edo ora 3:00 ango turode Iesu aoro ikanade gatedo sisina, “Eli, Eli, lama sabachthani?” (Ainda moka awa, “God nato, God nato, ro embo na dodo taigetesi?”)#Psalm 22:1
47Edo embo nenei yai ainda petari itera, ami ge awa ingido sitera, “Embo eiwa Elijah dao sira.”
48Edo burigibé awamaneda itoro embo da (1) tumundo maundo, pepeu kundo waini jigaganide ainda pasido ingutada kanjigedo Iesu mi indarate pipisisina. 49Ata embo nenei yai ainda ami tedo esitera, “Embo awa doyo isiari Elijah gundo imo toregainita awa kaende gore.”
50Edo Iesu aoro ikanade tekago gatedo ainda asisi doturisina.
Iesu da betari iji ainde kariwa neide kainde idegesitera.
(Mark 15:38-41; Luke 23:45, 47-49)
51Edo giwo! Iji ainde, gongo puruta bajina oro kotopu bajina doda awa isinesina. Edo gongo awawa toropuda keredo, ikane edo wotedo tuda kupo eve kupo eve esisina. Edo daedo butu jipesiri banga bebedegetero 52goiari ude jiwae awa God mi pirigesisina. Edo embo kotopu#27:52 embo kotopu. God mi ainda Mai piesiri gupusina, embomai berarida jimbo beyae awaembo oregada maundo betarate. Awatedo embo ainmi ainda gebé ari God da Mai da yai piesira awa kotopu God da jisida (John 3:14-17; 2 Korinth 5:21). jiwae bebetegari awa God mi jiri erido wasiri buritera. 53Edo amboda God mi Iesu betarida jiri erorisina, awamaneda goiari yaida awa dodo nasi bajina kotopu#27:53 nasi bajina kotopu awa Jerusalem da dao nei. da torido embo jiwaeda yai idegedo esitera.
54Edo itoroda gisijiari ae embo nenei de Iesu sima ero jijirisina. Edo iji angode awamanemi butu jipesira edo wasiri ro berari idegesira awa gido, adu bajinabé edo sitera, “Gebé, embo eiwa God da Maiǃ”
55Edo eutumai jiwae Iesu kondade eimene yai Galili edo ambo ambo edo guputera. Edo awamanemi yai aikeda petedo Iesu goteite itero jijirisina. 56Edo awamaneda doda awa Mary nasi Magadala eutu de, Mary nei James ae Joses deda ai de, edo Zebedee da mamaida ai de.
Joseph mi ainda banga toda Iesu goisina.
(Mark 15:42-47; Luke 23:50-56; John 19:38-42)
57Ango edo turo jiriri embo gaiapade da (1) nasi Eremateia edo gupusina. Ainda dao awa Joseph, edo imo daedo awa Iesu da ambodani nei. 58Edo embo emi maundo Pilate da yai edo Iesu da tamo bainita awa tedogosisina. Edo Pilate mi Iesu da tamo awa Joseph da yai piorote sisina. 59Ango edo Joseph mi tamo kundo gongo virarae dono itae ami doisina. 60Edo embo ami tamo awa kundo maundo ainda banga to teka duredo siya ari ainda piedo, ganuma bajina apepegesiri maundo to be engiregesiri imo dodo maunsisina. 61Edo Mary nasi Magadala eutu de, Mary neide awa yai banga to edo kupo neida anumbedo itero jijirisina.
Itoro embobomi banga to sima esitera.
62Edo amboda Siya baiya Ari Deguta#27:62 Siya baiya Ari Deguta. Iji einde deguta awawa English embomaida Friday. Iesu da ijide awa Oena Apari Deguta da siya ari iji. itae esiri, audo pirisi babain de Parasi mane de Pilate da yai maundo doregedo 63sitera, “Embo bajina, nakare kotembetera awa ge pitawa embo ami wasiride isite sisina, ‘Deguta tamonde (3) itae ari amboda, na jiari erana.’ 64Awatedo imo tedogotera, ine ge okain tato itoro embobomi banga to ouwa sima dave eiaro maundo deguta tamonde (3) itae arate. Gae gae edo ainda ambodanimi muyaede gundo tamo awa beono budo embomaide tara, ‘Embo awa betarida jiri erira.’ Edo ango tara, ge pitawa amboda ami awa udumbari ge gisi awa daginegaina.”
65Edo Pilate mi awamanede mina sisina, “Awara, nato itoro embobo awa kundo mambuwo banga to awa simageteite itore. Nongo ain evi awa, itomane garimi ango ewo.” 66Awatedo awamane maundo banga to beda ganuma ainda dedegari kariwa pipisitera. Edo awamanemi itoro embobo yai ainda pietero banga to simagesitera.
Sélection en cours:
Matthew 27: bhg
Surbrillance
Partager
Copier
Tu souhaites voir tes moments forts enregistrés sur tous tes appareils? Inscris-toi ou connecte-toi
© 2014, Wycliffe Bible Translators, Inc. All rights reserved
