Genesis 14
14
Midlibri ni Abram si Lot
1Ne iyan haazà timpu he iyan si Hadì Amrafel he hadì te Shinar, si Hadì Arioc he hadì te Elasar, si Hadì Kedorlaomer he hadì te Elam, wey si Hadì Tidal he hadì te Goyim. 2Heini is menge hadì, ne midtebek dan ki Hadì Bera he hadì te Sodom, ki Hadì Birsha he hadì te Gomora, ki Hadì Shinab he hadì te Adma, ki Hadì Shemeber he hadì te Zeboyim, wey te hadì te Bela he iyan daan inged he Zoar. 3Heini is lelima he hadì, ne midsevaha zan is menge sundaru zan diyà te Suǥud he Sidim he iyan guntaan sikan is Daǥat he Minatey. 4Su heini is lelima he hadì, dutun he timpu, 12 he tuig, ne menge sakup sikandan ni Kedorlaomer, iyan, dutun te ike-13 he tuig ne midsukul sikandan. 5Ne zutun te ike-14 he tuig, mibpengayew si Kedorlaomer wey is menge zuma zin he hadì, ne midtebek dan wey nengezaag dan is menge Ripanhen diyà te Ashterot Karnaim, is menge Zuzhanen diyà te Ham, is menge Emhanen diyà te menge suǥud te Kiryataim, 6wey is menge Hurhanen diyà te menge vuvungan he Seir taman te inged he El Paran he ziyà te uvey te tanà he sibsivayan. 7Ne zutun midlikù dan ne midhendiyè dan te inged he En Mishpat (he iyan Kadesh), ne nengezaag dan is menge meǥinged diyà te tivuuk he tanà te menge Amalikanhen ne nengezaag dan daan is menge Amorihanen diyà te inged he Hazazon Tamar.
8Ne zutun is menge hadì te Sodom, Gomora, Adma, Zeboyim, wey is hadì te Bela, midtiǥum dan is menge sundaru zan diyà te Suǥud he Sidim 9ne nekidtebek dan ki Hadì Kedorlaomer he hadì te Elam, ki Hadì Tidal he hadì te Goyim, ki Hadì Amrafel he hadì te Shinar, wey ki Hadì Arioc he hadì te Elasar. Heepat he hadì is edtebeken te lelima. 10Ne haazà is Suǥud he Sidim, mezakel is menge vudsi zutun he nepenù te merumiket he espaltu. Ne nengezaag is menge sundaru te hadì te Sodom wey Gomora, ne hein mibpelaǥuy zan, nengeulug is duma kandan diyà te menge vudsi, is duma, ne mibpelaǥuy zan diyà te menge vuvungan. 11Ne zutun mibpenavan te heepat he hadì is langun he menge azen wey egkeenen te menge meǥinged te Sodom wey Gomora, ne midhipanew zan. 12Nevihag dan daan sikan is enaken ni Abram he si Lot ne mid-aǥew zan daan is langun he menge azen din, su ziyà sikandin med-ubpà te Sodom.
13Duen sevaha he tig-Sodom he nekepelaǥuy, ne midhendiyà sikandin te Hebriyuhanen he si Abram ne impenudtul zin haazà is langun he neulaula. Dutun he timpu, ziyà si Abram med-ubpà te uvey te menge kayu he ulayan ni Mamre te Amorihanen. Heini si Mamre wey is menge suled din he si Iskul wey si Aner ne neupakat sikandan engki Abram. 14Ne hein nezineg ni Abram he nevihag is enaken din, midtiǥum din is 318 he sakup din he egkeseriǥan din. Heini sikandan, menge sakup din puun pa te ked-enaka kandan, ne miduma zin sikandan, ne midal-as dan sikan is heepat he hadì taman te inged he Dan. 15Ne hein mezukilem, mibahin ni Abram te dezuwa he grupu is menge sundaru zin. Ne zutun midsurung dan is menge kuntada zan, ne nezaag dan heini. Ne haazà is menge kuntada zan ne mibpemelaǥuy midal-as eni Abram taman te inged he Hoba, he ziyà te zapit te egkezizaya te inged he Damascus. 16Midhawì ni Abram is langun he menge azen he nengaaǥew te menge kuntada. Ne midhawì din daan si Lot wey is langun he menge azen ni Lot. Elin daan midlibri zin is nengevihag he vahi wey is duma pa he menge etew.
Mibpenubtuvazan ni Melkizedek si Abram
17Ne zutun te ed-ulì en si Abram he ebpuun te kedeeǥa zin ki Kedorlaomer wey is menge zuma he hadì, midsinuǥung sikandin te hadì te inged he Sodom. Diyè din sinuǥunga te Suǥud he Shave he egngezanan daan te Suǥud te Hadì. 18Ne zuen hadì te inged he Salem he si Melkizedek he midsinuǥung daan kandan. Mid-uwit sikandin te supas wey vinu su ibpekaan din wey ibpeinum din ki Abram. Memumuhat si Melkizedek te Utew Lavew he Megbevayà. 19Mibpenubtuvazan din si Abram te egkaǥi te,
“Berakat, Abram, he tuvazi ka te Utew Lavew he Megbevayà
he nenlimbag te langit wey tanà.
20Deliǥa is Utew Lavew he Megbevayà,
su midhimu zin he mekezaag ka te menge kuntada nu.”
Ne zutun, imbeǥey kandin ni Abram is ikepulù he vahin te langun he netavan din.
21Ne zutun migkeǥiyan si Abram duen te hadì te Sodom te, “Is langun he menge azen dey he nahawì nu ne kenikew en, piru egkuwaan ku zed is langun he menge sakup ku.” 22Ne midtavak si Abram te, “Ebpenangdù a kayi te etuvangan te Nengazen, te Utew Lavew he Megbevayà he iyan nenlimbag te langit wey tanà. 23Minsan tanur zà etawa hiket te sandalyas, ne kenè ku edewaten. Ne kenè ku egkuwaan is minsan hengkey he azen nu su kela ke mekekaǥi ka he iyan ka insepian ku. 24Kenè ku edewaten is minsan hengkey he para zà kedì. Iyan dà edewaten ku is nekaan en te menge sakup ku, kenè ku en id-ulì kenikew, ne iveǥey nu zaan is bahin te menge midtavang kediey he si Eshcol, si Aner, wey si Mamre.”
Tällä hetkellä valittuna:
Genesis 14: mbbOT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2013, Wycliffe Bible Translators, Inc. All rights reserved.