SAN MATEO 3
3
Nda Juan cui̱i̱ lo'o ngu' ne' quixi̱' su ná ndi'i̱ ñati̱
1Lo'o ngua tyempo, li' nguxana Juan nda yu cui̱i̱ lo'o ngu' nu ndya'a̱ slo yu su ndi'i̱ yu ycui' ti yu ne' quixi̱'; ntyucuatya yu ji'i̱ ngu' li'. La cui' loyuu su cuentya Judea ndi'i̱ yu; pana btyi tsa yuu su ndi'i̱ Juan, ndi'i̱ tsa quee, lo'o ná ndi'i̱ xa' ñati̱ cajua.
2―Ca tyuju'u ti' cu'ma̱ ―nacui̱ Juan ji'i̱ ngu'―, xtyanu ma̱ ji'i̱ cha' cuxi nu ndyu'ni ma̱ ―nacui̱―. Cua xana ti cha' caca ycui' Ndyosi loo ne' cresiya ji'i̱ ñati̱ chalyuu.
3Lo'o nu Juan ni, laca yu la cui' ñati̱ nu nchcui' jyo'o cusu' Isaías ji'i̱ sa'ni, cha' jyo'o cusu' bi' ngua tu'ba ji'i̱ ycui' Ndyosi. Ndi'ya̱ nscua lo quityi bi':
Cui̱i̱ xi'ya sca ñati̱ ne' quixi̱':
“Xaala clya ma̱ sca tyucui̱i̱ su ca̱a̱ ycui' nu Xu'na na;
xquiñi tso'o ma̱ tyucui̱i̱ su tyeje tacui ycui'”, ñacui̱ ñati̱ bi'.
Jua'a̱ nguscua jyo'o cusu' cuentya ji'i̱ ñati̱ bi', lo'o Juan laca ñati̱ bi'.
4Lo'o nu Juan bi' ni, lacu' yu sca late' quicha̱' camello, lo'o jua'a̱ ndyaaca̱' juata sii' yu; ndacu yu tscu' lo'o cuiñaa' cuityu̱. 5Lo'o li' ndyu'u ti'i̱ quiña'a̱ ñati̱ slo yu; ñaa ngu' quichi̱ Jerusalén slo yu, lo'o jua'a̱ ñaa ngu' lcaa quichi̱ sube ti nu ndi'i̱ loyuu su cuentya Judea bi' slo yu, lo'o ngu' nu ntsu'u cacua ti to' sta'a̱ Jordán, ñaa ngu' slo yu. 6Li' ntyucuatya Juan ji'i̱ ngu' nu ndya'a̱ slo yu nde lo hitya Jordán, ntyucuatya yu ji'i̱ lcaa ngu' nu nchcui' cha' ngua tyuju'u ti' ngu' ji'i̱ cha' cuxi nu ndyu'ni ngu'.
7Lo'o ngua sca tsa̱ na'a̱ Juan ji'i̱ tyu̱u̱ tya'a ngu' fariseo lo'o ngu' saduceo; tacati tsa ndu'ni ycui' ngu' ngua ti' ngu', lye tsa ndu'ni tyucuaa ti' ngu' ji'i̱ tya'a ngu'. Lo'o xi ngu' bi' lijya̱ ngu' cha' tyucuatya Juan ji'i̱ ngu', pana ná ndiya ti' Juan jua'a̱.
―Ñi'ya̱ nti' cuaña tyaala, jua'a̱ nti' cu'ma̱ ―nacui̱ Juan ji'i̱ ngu' bi'―. ¿Ha cua nchcutsi̱i̱ ngu' ji'i̱ ma̱ lacua? ¿Ha juani ndube ti' ma̱ cha' ca ñasi̱' tsa ycui' Ndyosi lo'o xcube' Ni ji'i̱ ma̱ nu lo'o tye chalyuu? ―nacui̱ yu―. 8Tso'o lacua, culu'u ma̱ ji'i̱ ya si chañi cha' cua ngulochu̱' ma̱ ji'i̱ cha' cuxi nu ntsu'u ji'i̱ ma̱. 9Ná culacua ti' ma̱ cha' caca tso'o ji'i̱ ma̱ slo ycui' Ndyosi si xcui' ndyi'u ti' ma̱ ji'i̱ jyo'o cusu' ji'i̱ ma̱, nu cusu' Abraham bi'. Ná talo ycui' Ni ji'i̱ cha' cuxi nu ndu'ni ma̱ tsiya' ti, masi ñati̱ tya'a ji'i̱ jyo'o Abraham laca ma̱, nchcui' ma̱. Na cuiñi ma̱. Si nti' ycui' Ndyosi, taca ji'i̱ Ni cuiñá Ni ji'i̱ ñati̱ tya'a ji'i̱ jyo'o Abraham, masi lo'o quee to' sta'a̱ re, taca ji'i̱ Ni si nti' Ni. Nga'aa taquiya' Ni ji'i̱ cu'ma̱ li'. 10Ñi'ya̱ ndu̱ sca ñati̱ lo'o hacha ji'i̱ cha' clyaja lo yaca si'yu ji'i̱ yu, jua'a̱ nti' ycui' Ndyosi; si'yu yu bi' ji'i̱ lcaa yaca nu ná nda si'yu tso'o cha' tyaqui̱ lo quii', lo'o jua'a̱ xcube' Ni ji'i̱ ñati̱ nu ná ntaja'a̱ xtyanu qui'ya nu ntsu'u ji'i̱ ngu'. 11Lo'o na' ni, ntyucuatya na' ji'i̱ ma̱ lo'o hitya, si chañi cha' cua ngua tyuju'u ti' ma̱ ji'i̱ qui'ya nu ntsu'u ji'i̱ ma̱; pana cua ca̱a̱ ti sca ñati̱ nu tso'o la que na'. Lo'o na', cua'ni tlyu na' ji'i̱ ñati̱ bi'; tso'o tsa caca tyiquee na', masi caña nu ntsu'u quiya' ñati̱ bi' culo na'. Lo'o nu ñati̱ bi' ni, ná tyucuatya yu ji'i̱ ngu' lo'o hitya ti; pana cua'ni yu cha' tyanu Xtyi'i ycui' Ndyosi ne' cresiya ji'i̱ ngu' nu lo'o tyucuatya yu ji'i̱ ngu', lo'o li' subii Ni ji'i̱ ngu' lo'o xee ji'i̱ Ni cha' caca lubii ne' cresiya ji'i̱ ngu'. 12Ñi'ya̱ ndu'ni xu'na ltya, jua'a̱ cua'ni Ni; ñi'ya̱ ndyu'u co'o yu nscua', pana ndaqui̱ yu cualya' lo'o nguti, jua'a̱ sa'be tya'a Ni ji'i̱ ñati̱, lo'o li' su'ba Ni ji'i̱ ñati̱ cuxi cha' tyaqui̱ ngu' lo quii' su nga'aa tye cha' tyaqui̱.
Jua'a̱ ngulu'u Juan ji'i̱ ñati̱ nu ndya'a̱ slo.
Ntyucuatya Juan ji'i̱ Jesús
13Tyempo bi' lo'o nga'a̱ Juan to' sta'a̱ Jordán, ndu'u Jesús nde loyuu su cuentya Galilea lijya̱ ca slo Juan, cha' lo'o ngua ti' Jesús cha' tyucuatya Juan ji'i̱. 14Lo'o li' ngua ti' Juan cua'a yu ji'i̱ Jesús.
―Ná tso'o tyucuatya na' jinu'u̱ ―nacui̱ Juan ji'i̱―. Tso'o la tyucuatya ycui' nu'u̱ jna'.
15Li' nchcui' Jesús lo'o yu:
―Tso'o tyucuatya nu'u̱ jna' juani ―nacui̱ Jesús ji'i̱ Juan―, cha' jua'a̱ tso'o si cua'ni na lcaa cña nu nti' ycui' Ndyosi cha' cua'ni na.
Lo'o ndyuna Juan cha' nu nchcui' Jesús lo'o, ntyucuatya yu ji'i̱ Jesús li'. 16Lo'o cua ngua cha' bi', ndu'u Jesús lo hitya, li' cua ndyaala tyucui̱i̱ nde cua̱. Lo'o li' na'a̱ Jesús cha' ngua'ya Xtyi'i ycui' Ndyosi lo; ñi'ya̱ nda'ya sca tyupe' lo yuu, jua'a̱ ngua'ya Xtyi'i ycui' Ni lo Jesús. 17Li' nguañi nchcui' ycui' Ndyosi ca su ntucua Ni nde cua̱. Ndi'ya̱ nacui̱ Ni:
―Nu nde laca Sñi' na' ―nacui̱ Ni―. Tyaca'a tsa yu 'na, cha' tso'o tsa ntsu'u tyiquee na' ña'a̱ na' ji'i̱ yu.
Tällä hetkellä valittuna:
SAN MATEO 3: cta
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 1981, Wycliffe Bible Translators, Inc. All rights reserved.
