Mateo 8
8
Jesús Jujucaiye, Ja̱'ju Dahuë Ju̱'iquëre
(Mr 1.40-45; Lc 5.12-16)
1Jesús ai cu̱tihuëpi cajeina, jai pa̱i i̱te pe'tehuë. 2Pe'tejëna, ja̱'ju dahuë ju̱'iquëpi Jesús quë'rona tsioja̱ni do're ja'runi capi.
“Ëjaë më'ëpi yë'ëre ju̱'i dahuë jujucaiye yëni necaijë̱'ë.”
3Ja̱je caquëna, Jesupi jë̱tëpi patoquë capi:
“Yëyë, si'si peoquë pa'ijë̱'ë.”
Ja̱je ca maca ja̱'ju dahuë ju̱'iquë pa'isiquëpi tsoe de'oquë paji'i. 4Cui'ne ja̱ maca Jesupi capi, i̱te:
“I̱na, yecohua'ire quëama'pë pa'ijë̱'ë. Coa Maija'quë huë'ere necaiquëse'ere sani i̱ñojë'ë. I̱ñoquë Moisés cua̱ñequë pa'ise'ere i̱sijë̱'ë, Maija'quëna. Ja̱je yo'oquëna, si'aohua'i ju̱'i dahuë peoquë to̱mesiquëpi yo'oji, cuasajë ñaja'cohua'ire.”
Jesús Jujucaiye, Romano Jo'yaëre
(Lc 7.1-10)
5Jesús Capernaum yejana sa ti̱'aquëna, te'i Capitán romanopi tsio dani i̱te se̱ji'i, 6ñeje caquë:
“Ëjaë, yë'ë huë'e ñacaiquëpi yë'ë jo'yaëpi ju̱'iji. Ti cu'ima'ë cui'ne ai a'si ju̱'iji.”
7Caquëna, Jesupi capi, i̱te:
“Yë'ëpi sani jujusi'i.”
8Caquëna, Capitánpi sehuopi:
“Co'aquë maca'ë, Ëjaë, yë'ë huë'ena daima'ë pa'ijë̱'ë. Coa co'ya ja̱'ñese'e se cua̱ñejë'ë. Ja̱je yo'ouna, yë'ëre necaiquëpi co'yaja̱quëre. 9Ja̱re yë'ëpi ëjaëohua'ipi meñe cua̱ñesiquëpi pa'iyë. Ja̱je pa'ita'a yë'ë soldado pa̱ireje̱ se meñe payë, yë'ë cua̱ñecohua'ire. Yë'ëpi ja̱ohua'i aquëni ‘saijë̱'ë’ cato saiji. Cui'ne ‘daijë̱'ë’ ca maca daiji. Cui'ne yë'ëpi yë'ë jo'yaëre ‘ja̱ro nejë'ë’ caquë cua̱ñeru, yë'ë cua̱ñese'ere nequë api.”
10Ja̱je caquëna, Jesús asani ta̱'ñerepa caquë a'ni cuasaquë ñapi, i̱te. Ja̱ maca i̱te pe'tecohua'ire capi:
“Nuñerepa cayë, si'a Israel pa̱i ti peohuë, iquë cuasayeje̱ ta̱'ñe cuasacohua'i. 11Ja̱je pa'ina, yë'ëpi cayë, jai pa̱i ë̱së mëi hue̱'ñapi cui'ne ë̱së du'i hue̱'ñapi daija̱'cohua'i a'ë, Abraham, Isaac, cui'ne Jacobo ja̱'re co̱ni ma'tëmona a̱ija'cohua'ipi. 12Ja̱je pa'iquëta'are i̱ti ma'tëmo pati'ñe pa'iohua'ipi nea hue̱'ña hue'sena je̱ocosicohua'i pa'ija̱'cohua'i a'ë. Ja̱ropi oijë cu̱ji qui̱'coja̱'cohua'i a'ë.”
13Ja̱ maca Jesús capitánre capi:
“Saijë̱'ë më'ë huë'ena, më'ë cuasase'eje̱ yo'ose'e pa'ija̱quë.”
I̱ ja̱je ca maca i̱ jo'yaë co'yasiquë paji'i.
Pedro Huaore Jujucaiye
(Mr 1.29-31; Lc 4.38-39)
14Pedro huë'ena Jesupi saji'i. Sani ñapi, Pedro huaopi ca̱i saihuëre su̱ña dahuëre ju̱'icopi u̱iona. 15Ñani ja̱ maca i̱ote jë̱tëpi patoquëna, su̱ña dahuë peo hue̱'ña je̱ouna, huëni i̱opi i̱te necai huëo.
Jai Pa̱ire Jujucaiye
(Mr 1.32-34; Lc 4.40-41)
16Ñami de'oye ja'i maca jai pa̱i Jesús quë'rona huati quë'iohua'ire dahuë. Darena, te'e yë'opo cayepi huatiohua'ire eto saopi, cui'ne ju̱'icohua'ireje̱ jujupi. 17Iye cato Maija'quëre quëacaiquë Isaías caquë pa'ise'epi ti̱'aëna, yo'opi. Ñeje case'epi: “I̱pi mai ju̱'iñere hue'equë saji'i cui'ne mai ju̱'i dahuëje̱ jujucaji'i.”
Jesure Pe'teye Yëcohua'i Ayere Quëaye
(Lc 9.57-62)
18Jesús i̱ quë'rona jai pa̱i tsi'sijëna, ñani jaira je te̱'tena je̱ñu'u ne de'huajë̱'ë cua̱ñepi, i̱ ye'yacohua'ire. 19Caquëna, ja̱ maca cua̱ñese'e ye'yaquëpi Jesús quë'rona tsio dani capi:
“Ye'yaquë, coa si'a hue̱'ña më'ë saina, tuiye yëyë.”
20Caquëna, Jesupi sehuopi, i̱te:
“Airo yai mañaje co̱ña pacohua'i a'ë, cui'ne pi̱'aje i̱ohua'i tsianoa pacohua'i a'ë. Ja̱je pacohua'ita'are Pa̱i Mamaquë cato peoquë api, i̱ si̱opë tëoni pëa huajë hue̱'ñaje.”
21Caquëna, i̱ ye'yacohua'i aquëpi i̱te capi:
“Ëjaë, du'ru yë'ëta'a yë'ë ja'quëre ta̱jasi'i.”
22Caquëna, Jesupi sehuopi, i̱te:
“Yë'ëni pe'tejë̱'ë, i̱ohua'ise'e ta̱jajë ju̱'isicohua'ire ja̱re cui'ne ju̱'isicohua'ije̱ pa'iohua'ipi.”
Jesupi Tuture Cui'ne To̱'añere Cua̱ñeñe
(Mr 4.35-41; Lc 8.22-25)
23Ja̱ maca Jesús jai yohuëna aya mëni saina, i̱ ye'yacohua'ije̱ co̱ni saë'ë. 24Ja̱je saijëna, jairana ai tutu dapi, yohuëna to̱'añepi cacayerepa. Ja̱je yo'otoje̱ Jesuta'a ca̱isiquëpi paji'i. 25Pa'ina, ja̱ maca i̱ ye'yacohua'ipi i̱te sani ne sëtojë cahuë:
“¡Ëjaë, huasojë̱'ë! ¡Mai ea du'iyë!”
26Ca maca i̱pi sehuopi:
“¿I̱na me yo'ojë airepa ca'raye'ni? ¡Mësaru, Maija'quëpi nequë api, cuasayere a'ri maña payë!”
Cani huëni nëcani tuture cui'ne co'poyere yo'oma'o capi. Ca maca jairapi ti yo'oma'corepa de'o nëco'ë, tutuje̱ peoyerepa. 27I̱ohua'ipi ja̱re ñani ai cuasajë cahuë:
“¿I̱queire pa'ni, iquë, ja̱ jerepa tutupi cui'ne jai tsiayapi asani sehuoquërepa?”
Gadara Yeja Acohua'ipi Huati Quë'iohua'i Pa'ise'e
(Mr 5.1-20; Lc 8.26-39)
28Jesús jaira je te̱'tena, Gadara yejana ti̱'asi maca huati quë'iohua'ipi caya ë̱mëohua'i ju̱'isicohua'ire ta̱ hue̱'ñapi etani daicohua'ipi i̱ quë'rona tsio daë'ë. Cayahua'i huati quë'iohua'i paë'ë. Ja̱je pa'iohua'ipi pa'ijëna, yecohua'ije̱ ja̱ ma'a ti cu'iye pa̱huë, ai pë̱ti yëcohua'i pa'ijëna, ca'rajë. 29Ja̱ohua'ipi ñani cuihuë, ñeje:
“¿Me nesi'quë yëquëre jo̱sa yo'osi'i caquë daquë'ni, Maija'quë mamaquë? ¿Ja̱ yë'ta'a nejoñe ti̱'ama'në yëquëre ai yo'oyena, nejosi'i caquë daquë?”
30Ja̱ropi a'ri maña so'ore jai se̱se tsëcapë a̱ore a̱ijë nëtëroja̱ië'ë. 31Ja̱je nëtëroja̱ijëna, asajë co'a joñoapi Jesure se̱ë'ë:
“Më'ëpi yëquëre eto saoquë pani, coa ñajë'ë yequëse'e se̱sena cacaja̱'cohua'ire.”
32Cajëna, Jesupi capi:
“De'oji, cacajë̱'ë.”
Caëna, ja̱ maca ja̱ohua'ire pa'isicohua'ipi, co'a joñoapi etani se̱sena caca maca se̱sepi të̱'tëpaja̱'a hua'que to̱mejë jairana dutu ju̱juhuë.
33Ja̱ maca se̱sere ñacohua'ipi quëquëni huë'huëjë pa̱i daripëna ti̱'ani si'aye i̱ti yo'ose'e quëajë cui'ne huati quë'iohua'i pa'isicohua'ire yo'ose'eje̱ quëahuë. 34Quëajëna, asani pa̱i daripë pa'icohua'ipi si'aohua'i Jesús pa'i hue̱'ñana daë'ë. Dani i̱te ñani se̱i'ë, saijë̱'ë, i̱ño yëquë quë'ro pa'ima'ë, cajë.
Tällä hetkellä valittuna:
Mateo 8: sey
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2012, Wycliffe Bible Translators, Inc. All rights reserved.
