Lucas 1
1
1Imi teun takalgu, tulemal-ichejul anmal-abalgin immal-kujad nermasmalan. 2Tenal we tulemal peyedzhe alamadi-kusmal, tule-imial-takchamaladzhe tegin tulemal kepegin-Pab-Jesús-kaka-palchogmalad anmalga inniki Jesúsgin chogzhad-yopí nermasmalbal. 3Tummad-Teófilo, imi an-chunnad an nuekwa kepe-sagla-akar pél Jesúsgin-immal-kujad pal-amis-choggu, al an takto, antin pul nuekwa inniki-inniki Pab-Jesús-igal-kujadgin pega nermanemo. Tenal an takpaldo wedin pul ib-nued. 4Imi an pega nermaneed, pe nuekwa pal wisgugal, pe Jesús-igalgin pel-kwapa turdajad, ib-chunchunnad, ib-kakanzhul.
Angel chogzhagujad Juan Bautista mimmilenoniko
5Imi Errey-Herode Judea-napkin neg-takmaigu, teun tule-irwal-Pabzhe-koled-Abíaszhikid-walgwen maimo. Tenal we tuledin nug Zacarías. Tenal Zacarías-e-ome-Elisabet ampa Aarón-e-wagwamo. 6Tenal we abirginmalad napírra nanemal, al Pab Tummad we abirginmaladgin istar-choged kwen nikchul. Tenal we abirgin pane-pane Pab-chogzhad-pallí igal-mezhijadgin nanedimalbal. 7Tenal Elisabettin kusgu-wichul-nuchu-amiedbal nuchu-kwen-nikchul. Tenal we abirgineddin pato chelegangus, nuchu-nikued-wilub okpis.
8Imi te ibagwengin, Abíaszhikmaladga wilub noni Pabzhe-koled-neggin arpagal. Tenal teun takalgu, Zacarías Pabzhe-koled-neggin ampa tule-irwal-Pabzhe-koledga arpadimo. 9Tegidgin Zacarías tule-irwal-Pabzhe-koled-igal-maidbal chulenoni, Pabzhe-koled-neg-yabal toggal, tegin Pab Tummadga immal-wawad kuggalbal. 10Tenal teun takalgu, tule-Pabga-immal-wawad-kuged-wachi omosgu, tulemal-pel-kwapa magadbal aknidamal Pabzhe kolgal.
11Tegin Zacarías Pabzhe-koled-neg-yabal togzha Pabga immal-wawad kuggal. Tegin Zacarías Pabga-immal-wawad-kuged-kwichid-nuedzhik kwisgunoni. Tegidgin Pab-angel arpak Zacaríasga nononi. 12Tenal Zacarías Pab-angel-takchagu, weob pakal pes, tegin Zacarías angelgin kwakialbal. 13Tegin Pab-angel Zacaríasga chogal:
“Zacarías, melle pe an-tobguma. Imi Pab Tummad pe-eje-koled itos. Imi pe-ome-Elisabet pega machi-nikune. Tenal pe machi-nugzhao, Juan. 14Tenal we machi pega mimmilenonikil, pemal we machigin welgumalo tegin pemal ulubgin pela-pela weligwal itononimalbalo. Tenal tulemal-ichejul pe-machi-mimmilejadbal peyedzhe welgumalmogo.
15“Imi pe-machi Pab Tummadga tule-tummadga kunoniko. Tenal we machi keg vino kobel, tegin keg inna-kabil kobbalil. Tenal we machi e-mimmilejad-akar pela-pela Pab-Purpa-Nued-nika-kudio. 16Tenal we machi Pab-Tummadzhe-akpirgal íchejul Israel-tulemal-imanoniko. 17Tenal pe-machi-Juan Pab-akpene-chogzhad-palmidagoed-tule-iktual ne, tenal Juandin Pab-kaka-palchoged-Elíasyob kannaleged nikunatapmogo. Tenal Juan aga pilalgugal pabgan-istar-aga-nuskan-taktimalad-imanoniko. Tenal Juan tule-pirkin-pirkin-tamalad-pinzheed ogwabalo tule-yer-pinzhemaladyob. Tegin Juan Pabga kuakwa tule-urpemalbalo Pab-tule-palmidagoed-abingegal.”
18Tegin Zacarías angelga chogal:
—Nabir pe chogendo. ¿Tenal an igi wisguo pe-anka-chogzhad ib-chunchunnad? Imi antin tegin an-ome anmal pato cheredgusmal, anmal nuchu-nikued-wilubzhulmal.
19Tegin angel Zacaríasga chogal:
—Imi antin, an angel-Gabriel. Tenal an Pab-Tummad-waglika arpagedga kwichi Pab-choged-pallí immal imagal. Tenal Pab Tummad peje an-palmial, pega we kakapurwa-nuegan palchoggal. 20Imi pe ankin-pengujadbal keg-pe-chunma pe peine, an pega immal-chogzhad e-wilubganbal kunonikoedzhe.
21Tenal tule-magadbal-Pabzhe-kolbukmalad Zacarías-abintabukmal. Tenal tulemal Pabzhe-koled-neg-yabal owed-owed Zacarías-takchagu, chogalmal: “¿Igi Zacaríasde yabal kude-wede?”
22Tegin Zacarías Pabzhe-koled-neg-yabal-akar noalgu, tulemalga pato keg chunma. Tenal Zacarías kobalbi-immal-chogzhadbal tulemal mag takchamal Zacarías Pabzhe-koled-neg-yabal immal-purpaled takcha. Tenal Zacarías keg-chunma-peszhun.
23Tegin Zacarías Pabga-immal-uknaid-arpaged pelgusgu, aga negzhe nadzhun. 24Tegin Zacarías angel-takchad-cholbal, e-ome-Elisabettin ponigwal kwisgunonijun. Tenal Elisabet ponigwal-kwisgujad-akar ni-walatal aga e-neg-akar kwen noszhul-kus. 25Tenal Elisabet aga ulubgin chogalzhun: “Imi Pab Tummad imis-ibegin wilejakwa an-taknonikidbal an-pentas nuchu-nikugal, an-nuchu-nikchulidbal tulemal melle istar an-pal-takegal.”
Angel chogzhagujad Jesús mimmilenoniko
26Tenal Elisabet ni-walanerkwa ponigwal-kwichidgin, Pab Tummad Nazaret-Galileaje e-angel-Gabriel-palminoni puna-yaeje. 27Tenal we puna-yaedin nug María. Tenal María ampa machered-kwen-omodijulid. Tenal puna-yae-María tule-José-nugadbak aga kaka-ukchamal aga nikumalgal. Tenal Josédin Errey-David-e-wagwa. 28Tegin angel puna-chiid-neg-yabal tognonigu, punaje kote chogal:
—¡Anná, tegidde! Pab Tummad nugu pegin pinzhas. Tenal Pab Tummad chogdo, ede pebak kudii.
29Tegin María angel weob ega kaka-kolnoni itosgu, mag-itojul-pes. Tegin María aga ulubgin pinzheal: “¿Ibi chogle-wede, anka angel weob chognonikiddé?” 30Tegin angel Maríaga chogalzhun:
—María, pe melle an-tobguma, Pab Tummad nugu pegin pinzhas. 31Imi pedin ponigwal kwisgunoniko. Tenal pe nuchu-nikunonikil, pe machi-nikunoniko. Tenal pe machi-toto-nugzhao, Jesús. 32Tenal we machi-toto tule-tummadga kunoniko. Tegin we machi nug-kunoniko Pab-Pul-Tummad-E-Machi. Tenal Pab Tummad akpene-Errey-David-neg-takmaid-kujadyob we machi-odomogo. 33Tenal we machi-Jesús ilagwen-nadgu Israel-neg takmaio, tenal e-neg-takmaid pal kwen pelguojul-kuo.
34Tegin María angelga chogal:
—An nabir itogendo pe-anka-chognonikid. ¿Tenal pe-anka-chognonikid igi kunoniko-ade? An macherganbak kwen nanedijuli.
35Tegin angel Maríaga chogal:
—Imi Pab Purpa Nued pegin aktenoniko, tegin Pab-Pul-Tummad-e-kannaleged pel-kwapa pe-edunoniko. Al pe machi-nikunonikoed machi-chwilidikidga kuo. Tegin machi nugzhalenonibalo Pab-Tummad-Machi. 36Tenal pe-kwenad-Elisabettin pato cherediidgin nuchu-nikunonimogo. Imi tulemal Elisabetkin chogmaldo, Elisabet kusgu keg nuchu-ami. Tenal Elisabet pato ni-walanerkwagus ponigwal-kwichid-akar. 37Tenal Pab Tummadgadin keg chogel immal keg ku, tenal Pab Tummadga pel-kwapa nabir immal ku. Al an-pega-chogzhadyob pega kunoniko.
38Tegin María angelga chogal:
—Tegil nabirde. Tenal antin Pab-Tummad-mosga yer an itomo-choggu, al Pab Tummad akalzhul pe-chogzhadyob ankin immal imakodo.
Tegidgin angel ilgwen María-akar nadzhun.
María Elisabet-taknaded
39Tegidgin María nadzhun Judea-yalaganbal neg-kwebur-Elisabet-chiidzhe. 40Tegin María Zacarías-neg-maidzhe tognatapku, Elisabetche kolnatap. 41Tenal Elisabet María-eje-kolnoni itosgu, Elisabet-mimmi sapejul e-nan-ebus. Tegidgin Elisabet pela-pela Pab-Purpa-Nued-nikunoni. 42Tegin Elisabet sapejul kolmas chogal:
—¡Imi Pab Tummaddin egmal-omeganga pul nugu pe-takcha, tegin pe-nuchu-nikuoed ampamo! 43¿Tenal ante ibi-tule-ade, an-Tummad-e-nan an-taktagal?
44Tenal Elisabet Maríaga pél chogalzhun:
—Imi an kepegin itononigu pe wanagakkin anche kolnai, an-nuchu weligwal-itogedbal sapejul an-ebunoni. 45Tenal pe Pab-Tummadgin-penzhul-kunonikidbal, Pabdin pega ib-nued imas, tegin Pab-pega-chogzhadyob, pél pega kunoniko.
46Tegidgin María chogal:
Imi antin ulubgin-akar Pab-otummonai.
47Tegin an-purpa Pab-an-abonogedgin weligwal-itomo.
48¿Ibiga an weligwal-ito? Nabir.
Imi antin tule-pinchegad
tenal Pabdin yabli ankin nugu pinzhas.
Tenal tulemal imis-akar ukin-ukin-e-wagwagan-ampagumaloed
yer an-takti-kumalmogo.
49Tegin Pab-pela-pela-kannaleged-nikad
peyedzhe anka immal imas,
tenal Pabdin, tule-chwilidikid.
50Tenal Pab tule-ukin-ukin-ampagumaloed-ilbal
keg-chulgu wilejakwa tule-egin-atamaloed-tako.
51Tegin Pab Tummad aga tukin e-kannalegedgin
peyedzhe immal imas.
Tenal Pabdin tule-tummarba-itomalad-onis.
52Tegin Pab tule-tummagan-neg-takmamimalad-onos,
tule-tummaganga.
Tenal Pab Tummad tule-tummarba-itojulmalad-odos,
tule-tummadga.
53Tegin Pab Tummad imme tule-ukul-mesdimalad-imas.
Tenal Pab Tummad chunkal-kwabi mani-ibgan-palmisbal.
54Tenal Pab Tummad anmal-tadganga-kaka-ukchadyob
immal imas.
Al Pab Tummad e-mosmal-Israel-tulemal-pentas.
Tenal Pab Tummad kwen igeszhulbal,
55wilejakwa Abraham tegin
e-wagwagan-ukin-ukin-ampagusmalad-takegalbal.
56Tegin María e-kwenad-Elisabet-neggin ni-walapá chii-peszhun. Tegin María kep te-cholbal kannan aga e-negzhe albal.
Juan Bautista mimmilejad
57Tegin Elisabet nuchu-nikued-wilubgan nonigu, machi-toto-nikunoni. 58Tegin Elisabet-kwenamalad tegin e-aimal itosmalgu Pab Tummad peyedzhe wilejakwa Elisabet-takcha, Elisabetpak mes welgusmalmo.
59Tegin Elisabet nuchu-nikujad-ibapábakkin, e-kwenamalad tegin e-aimal Elisabetche nonimal, Moisés-igal-mamikidbal machi-toto-e-abgan-tuku chikegal. Tegin tulemal-Elisabetche-nonimalad e-pabyob machi-toto-nugzhebi-kualin, Zacarías. 60Tenal machi-toto-e-nan-Elisabet chogal, ede aga e-pabyob machi-kwen-nugzhenejul. Tenal Elisabet chogal: “An-machi nug-kuenab Juan.”
61Tegin tule-pukmalad Elisabetka chogalmal:
—¿Ibiga pe weob machi-toto nugzhebimal-wede? Imi pe-kwenamalad weob kwen nugzhul-ne.
62Tegin tule-pukmalad chunkalbal machi-toto-e-pabzhe ekichialmal, igi machi-toto-nugzhebi.
63Tegin Zacarías tulemalzhe chunkalbal akwa-matarra ekichis akwagin nermagal. Tegin tulemal akwa-matarra cheinonimalgu, Zacarías akwagin nermas: “Machi-toto nug-kuo Juan.” Tegin Zacarías akal-pakal nuchu nugzhajadbal, tulemal-pel-kwapa weob pakal pesmal. 64Tegidgin Zacarías kannan nabir chunmanonibal. Tegin Zacarías Pab-Tummad-otummoalzhun.
65Tegidgin tule-aka-tikalbal-mamimalad peyedzhe Zacaríasga-ib-kujadbal kwakialmal. Tegin tulemal-Judea-yalaganbal-mamimalad-pel-kwapa Zacaríasga ib-kujadginbi chunmananimalbal. 66Tenal tulemal-pel-kwapa-itosmalad aga ulubgin pinzhedii-pesmal chogalmal: “¿Imi we machide ibi-tule-wede?” Tenal tulemal takchamaldo Pab-kannaleged Juanbak kudii.
Zacarías Pab-Tummad-otummojad
67Imi teun Zacarías pela-pela Pab-Purpa-Nued-nikunonikidbal, kujal-ib-kuoedgin chunmakal chogal:
68Imi Israel-tulemal-e-Pab-Tummad otummodi-kuelen,
nabirinye.
Imi Pab Tummad kannan aga e-tulemal-ololchasmalye.
69Tenal Pab Tummad e-mos-David-e-wagwabal
tule-pela-pela-kannaleged-nikad-palminoni anmal-abonogalye.
70(Imi Pab Tummad akpene e-kaka-palchogmaladbal
chogzhagusmo, kujal immal weopí kunonikoye.)
71Tenal Pab Tummad tule-anmalbak-aichulmalad-akar
anmal-abonogo,
tegin tule-istar-anmal-takmalad-akar anmal-abonobaloye.
72Imi Pab Tummad anmal-tadganga chogzhabal
ede wilejakwa anmal-tadgan-takoye.
Tegin Pab Tummad anmal-tadganbak aga napírra
igal-mezhijad pal kwen igeojul-kuoye.
73Tenal we igal-megwijad,
Pab Tummad aga e-nuggin tad-Abrahamga kaka-ukcha,
ede keg-chulgu we igal imakenabye.
74Tegin Pab Tummad kaka-ukchabalye,
tulemal-anmalbak-aichulmalad-akar anmal-abonogo,
tegin Pab Tummad anmal-pentako,
anmal tobzhulidgin Pab Tummadga immal-imamalgalye,
75tenal anmal chwilidikidgin
tegin anmal inniki-naneedgin
Pab Tummadga tula-tio, anmal purkwedzheye.
Tegin Zacarías chogalbal:
76Tenal pe-an-machi nugzhaoye,
Pab-Pul-Tummad-e-kaka-palchogedye.
Imi pedin, Pab-iktual Pabga igal-nudane
77e-tulemal wisgunonimalgal
Pab-tule-iskued-eliedbal
Pab-tule-abonoged-igal igi maiye.
78Tenal Pab-anmal-pilaledgin peyedzhe wilejakwa
anmal-taknoniye.
Al Pab-tule-palmied nikpa-akar noniko,
neg-oipojadgin tad neg-otalonaidyobye.
79Tenal Pab-tule-palmied nonibalo
tule-Pab-wichulmalad
tegin tule-purkwed-tobmalad Pab-wisgumalgal,
tadgwa tule-neg-chichidgin-mamimaladga
neg-otalogedyobye.
Tenal Pab-tule-palmied nonibalo anmal-pentagal
anmal ulubgin-akalzhul-itoged-igal amigalbalye.
Tenal teun Zacarías weob Pab-otummosdo.
80Tegin machi-Juan tunkualgu, purpal kannaleged nikunoni. Tegin Juan neg-nikchulidbal megwis, Pab-igalgin Israel-tulemalga-chunmaked-wilub-omoedzhe.
Tällä hetkellä valittuna:
Lucas 1: kvn
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2009, Wycliffe Bible Translators, Inc. All rights reserved.
