Matoosa Mishiraachcho 8

Yesusi Inchchirachcha Hargey Oykkida Addeza Paththides

(Luqa 6:37,41-42)

1Yesusi zuma bollafe wodhdhiin daro derey iza kaallides. 2Issi inchchirachcha#8:2 Inchchirachcha: Inchchirachcha Geeshsha Maxaafay qonccisiza mala asateththa bolla bollara galban keziza dumma dumma hargeta ubbaa bessees. hargey dizaadey Yesusaakko shiiqidi iza sinththan gulbatidi, «Godoo! Ne koykko tana paththanaas dandayaasa» gides. 3Yesusi ba kushe yeddidi, «Ta dosadis; paxa!» giin addezi he hargezappe heerakka paxides. 4Qasseka Yesusi addeza, «Ne paxidayssa oonaska yootoppa; gido attiin baada nena qeeses bessa. Istti azazida yarshoza gaththa; hessika isttas markka gidana» gides.

Yesusi Mato Halaqaza Ashkara Paththides

(Luqa 7:1-10)

5Yesusi Qifirnahoome gakkida mala mato halaqay izakko shiiqidi iza hizgi woossides. 6«Godoo! Ta ashkaray keehi sakettidi keeththan ichchi dees» gides.

7Yesusikka izas, «Ta baada paththana» gides. 8Mato halaqazi izas zaaridi, «Ta nena ta keeththe gelththanaas bessizaade gidikke; gido attiin ne haan daada issi qaala xalla giikko ta ashkaray paxana. 9Taaska tana azaziza halaqati taappe bollara deettes; qasseka taas azazettiza wottadarati taappe garsara deettes; isttafe issaa, ‹Ba!› giikko bees; qasse issaa, ‹Haa ya!› giikko yees; tani ta ashkaraza, ‹Hessa ooththa!› giikko ooththees» gides.

10Yesusi iza zaarozan malalettidi bana kaallizaytas, «Ta inttes tumu gays; haray attoshin Isra7eele asaa garsan hayssa mala ammanoy dizaade issaadeka demmabeekke. 11Ta inttes yootays; daroti arshey mokkiza baggafenne wulliza baggafe yaana. Salo Kawoteththa maaddan Abrahaamenttara Yisaaqanttaranne Yaaqoobenttara issife uttana.#Luqa 13:29 12Salo Kawoteththi isttas gidana bessiza asati heen kare dhuman yegettana. Heenkka yeehonne achcha garccech gidana» gides.#Mato 22:13; 25:30; Luqa 13:28 13Yesusikka mato halaqazas, «Ba! Ne ammano mala nees hano» gides; ashkarazi heerakka paxides.

Yesusi Darota Paththides

(Mar 1:29-34; Luqa 4:38-41)

14Yesusikka buro Phexroosa keeththe gelishin Phexroosa bolloteya misho harge sakettada ichchidaaro be7ides. 15Izi kushe Yesusi bochchiin misho hargezi aggides. Izakka dendada Yesusa mokkadus.

16He gallassa omars daydanththi oykkida daro asata Yesusaakko ehida. Izikka tuna ayanata ba qaalara isttafe kessides; harganchchata ubbaaka paththides. 17Isayaasi, «Izi nu harge ekkides; nu sakokka tookkides» gida qaalay hayssan polettides.

18Daro asay iza giddoththidayssa biyidi Yesusi asaa abbafe he pinth pinnana mala azazides. 19He wode issi Ayhuda ammano tamaarsizaadey izakko shiiqidi, «Astamaaree! Ne bizaso awakka ta nena kaallana» gides.

20Yesusikka izas zaaridi, «Worakanatas ollay dees; salo kafotas keeththi dees; taas Asa Naas gidikko hu7e gelththizasoykka deenna» gides.

21Iza kaalliza issi hara asi qasse, «Godoo! Koyro baada ta aawa moogoo?»#8:21 Ta aawa moogoo? gizayssi iza aaway hayqqana gakkanawu heemmidi hayqqiko moogi yaanaas diza iza amoza bessiza misatees. gides. 22Izi qasse, «Hayqqidayti ba hayqeth moogetto; neni gidikko tana kaalla» gides.

Yesusi Abba Dambala Co7u Histtides

(Mar 4:35-41; Luqa 8:22-25)

23Hessafe guye Yesusikka wogolon geliin iza kaallizaytikka izara issife bida. 24Qoppontta abba giddon dambalay dendidi wogoloyo mittana gakkanaas istta waayisides. Hessi wuri hanishin Yesusi dhiskides. 25Iza kaallizayti iza beegoththidi, «Godoo! Nu dhayoos; nuna ashsha!» gida.

26Yesusikka isttas, «Intteno ammanoy paccidaytoo! Aazas hayssa mala babbetii?» gides. Hessafe dendidi carkozanne abba dambalaa izi hanqiin heerakka sirphi gides.

27Isttika, «Hayssi abbaynne carkoyka izas azazettizaadey izi waanidaadee?» giidi malalettida.

Tuna Ayanappe Paxida Nam7u Asata

(Mar 5:1-20; Luqa 8:26-39)

28Izi abba pinnidi Gergesenoone geetettiza dere gakkida mala daydanththi oykkida nam7u as dayti ba diza duufoppe kezidi izara gaaggida. Asi he ogezara aadhdhanaas dandayetontta mala asas daro keehi meto gidi deettes. 29Isttika, «Xoossa Nawu! Nees nunara aaza issifeteththi dizee? Wodey gakkontta dishin nuna xuuggana yadii?» gi waassida.

30Heen isttafe guuth haakkidi daro guddunththa wudey issi bolla heemettees. 31Daydanththati Yesusa, «Ne nuna kessanaa gidikko haytan daro guddunththatan nu gelana mala nuus piqaade imma» giidi woossida. 32Yesusikka istta, «Biite!» gides. Daydanththatikka isttafe kezidi guddunththatan gelida. Guddunththati wurikka ba dizaso aafora bichcharishe abban gelidi haaththan mitetti hayqqida.

33Guddunththaa heemmizayti elelidi katamay dizaso biidi guddunthay hanoyssanne daydanththi istta oykkida asata bolla hanidayssa ubbaa asaas yootida. 34Katamaa asay wuri Yesusara gaagganaas kezides. Yesusa be7idinne istta dere yeddi baana mala iza woossida.

Tällä hetkellä valittuna:

Matoosa Mishiraachcho 8: GM

Korostus

Jaa

Kopioi