Mateghusi 5
5
Yiyaghura yomudirundu
(Mat 5—7)
1Apa gha monine Jesusi mbunga dhawanu, ko kudhina kwendi kudirundu. Pakuhungumana, heyire hakathishongero wendi kukwendi, 2no gha tangire kuwahonga.
Hakaruvigha roshemwa
(Luk 6:20–23)
3“Hakaruvigha awa ha kudimuka eshi hahepwe
kughutho waNyambi,
yoyishi wawo ghufumu ghodiwiru.
4Hakaruvigha hakakutokota,
yoyi mbana wa hengaghura.
5Hakaruvigha haturumuki,
yoyi mbana wana ditunga edi ha wa turekera.
6Hakaruvigha hakakufa ndhara nodinota
mughuhunga wawo,
yoyi mbana wekutitha.
7Hakaruvigha hakathin̂eke,
yoyi mbo hana wa neghedha thin̂eke.
8Hakaruvigha awa ha kushuka mumutjima,
yoyi mbo hana mono Nyambi.
9Hakaruvigha hakakutenda thiraro,
yoyi mbo hana wa toyo hana Nyambi.
10Hakaruvigha awa ha mona rupetho payitenda yawo yoyihunga,
yoyishi wawo ghufumu ghodirwiru.
11“Mwakaruvigha mwe ngeshi hana kumushamuna no kumukutha‐kutha no kumurundera yoyimango muDina dyange. 12Mu shamberere no mu shogherere, yoyishi ghushwi wenu ghomudiwiru ne ghukuru, no karo kemo dyo ha pethire haporofeta awa ha karire kughutho wenu.”
Mungwa ghomuve nomunyenge ghokaye
(Mark 9:50; Luk 14:34–35)
13“Amwe ne mwamungwa ghomuve, ene ngeshi ghuna hamupa mungwa ne no nye sho gha ghu tove munu, ghu kare karo mungwa mwene? Ghumango vene keho. Hasha kughumwaghera panunda, ha ghu djata‐djate hanu.
14“Yamwe mwamunyenge ghokaye. Mbara kadi dha kukona kundeka, ngeshi ku dha tenama padirundu. 15Karo munu kadi wa kumuneka munyenge no kughufurumeka thinu, ghuhunga ne peghuru ndani no ghu munekere wahe awa ha di mundhugho. 16Mu muneke munyenge wenu kemo kwawanu, eshi ha kone kumona yirughana yenu yoyiwa no ha fumaneke Wihenu ghomudiwiru.
Mayarithero ghomuragho
17“Mwa ghayara eshi neyire kukushutura muragho ngambi haporofera. Mbadi neyire kukushutura, ene kukurikanyitha yoyiheya. 18Ghushemwa na kumutongwera yi: Diwiru nomuve mbo yina pu, kumuragho wa Nyambi ne mbadi mbo ka tunda ko nokamyandhu‐myandhu temba oku mbadi na rikanyitha yoyiheya me.
19“Oyu ghokushutura kumuragho ngambi kambiru‐mbiru nokuhonga kemo hanu, mbo ghana piri dikuto mughufumu ghodiwiru. 20Yoyi na kumutongwera eshi: Ngeshi mbadi sho ghu piterere ghuhunga wenu kughuhunga wawakamarukwaro nowa Wafarasayi, ngo mbo mu kufere eshi kwingena mughufumu ghodiwiru.
Mayarithero ghomuragho: makushemwethaneno
21“Mwa yuva edi ya ghamba kwawakuru eshi: ‘Wa pagha; no kehe mukakupagha mbana mu twara kundhango.’ 22Ene na kumutongwera eshi: Keheyu ghokupatera muyendhendi, gha pwa kutetera kare ndhango. Karo kehe yu ghokumangopitha muyendhendi kumandengure, ghana kupwa kutetera kundhango dhishokuru. Noyu ghokushwahura muyendhendi eshi ghodibotwa, ghana kupwa kutetera mudirara dyo mudiro.
23“No ku ghuna twara ndupu dhoye kualtare, munyima ghuna kuvuruka eshi thinu pakatji koye namuyendhoye, 24thi thighe tango popo paaltare no ghu yende tango ghu ka tende thiraro namuyendhoye, po sho ka huke na ghu tupure thitapa thoye.
25“Ngeshi ku ghuna tendi murandu kwamuyendhoye, ghu kwinduke wangu kukuyuva namuyendhoye oku shime mwa karera mundhira dhokundhango. Maghana sho gha kutware kwamupanguri, namupanguri sho gha kutape kwawamaporitha, nawo maghana sho ha kupake mutorongo. 26Shemwa na kukutongwera: Mbadi wa kona kushwagha mo oku mbadi ghuma mana kuruwera kasende kohura.
Mayarithero ghomuragho: Rungu
27“Mwa yuva edi ha ninga eshi: ‘Mbadi wa kona kutjora mayekero.’ 28Ene me na kumutongwera eshi: Kehe yu ghokukengurura mukamadi nokumurumbera, ghana tjoro mayekero nendi mumutjima wendi.
29“Ngeshi ha di kutemaghuritha diho dyoye dyorudyo, di korongoremo no ghu di tundithe papoye ghu di mwaghe. Yoyishi hasha papoye kutunda po thipo thofotji, kadi yira wa kumwaghera yirama yoyiheya mudirara. 30Endi ngeshi ha di kuharuritha dyoko dyoye dyorudyo, di tete ko no ghu di mwaghe. Yoyishi hasha kukoye ngeshi ha thi tundu po thipo thofotji kuyirama yoye, kadi yira wa kuyimwagherera mudirara.
Mayarithero ghomuragho: Matjorero ghomayekero
(Mat 19:9; Mark 10:11–12; Luk 16:18)
31“Apa ya ninga eshi: ‘Kehe yu ghana kuyakunuka kwamunu wendi, gha mu pe ndani mbapira dhomakuyakunukero.’ 32Ene na kumutongwera eshi: Yomuhe ghokukuyakunuka namunu wendi, pamurandu ghoruhonda, ghana tjoro mayekero. Noyu ghokukuyeka namukamadi ghokukuyakunuka naghumweya, ghana tjoro naye mayekero.
Mayarithero ghomuragho: Medhero
33“Shime mwa yuva karo kwawakuru di ha ninga eshi: ‘Mbadi wa kona kwedha mbango, no yi wedha kwaFumu, ghu kone kuyikutha.’ 34Ne, na kumutongwera eshi: Perere poye eshi wedhe, nokudiwiru temba, yoyishi dyodipuna dyaNyambi. 35Nokumuve temba, yoyishi dyodimbaro dyendi. NokuJerusalema temba, yoyishi dhombara dhaFumu shokuru. 36Karo perere poye eshi wedhe kumutwi ghoye, yoyishi mbadi wa kona kutenda kahuki kofotji ka kare kakenu ngambi keru. 37Ngo mu tawe vene eshi kemo ngambi kadi kemo. Yoyishi wingi wayo yi, mughuyi yina kushwagha.
Mayarithero ghomuragho: Yikuhuthangedhera
38“Mwa yuva edi ya ninga eshi: ‘Diho kudiho, diyegho kudiyegho.’ 39Ene na kumutongwera eshi: Mwa kon̂omeka munu ghomupata. Ngeshi ha kungcambura ghumweya kuditama dyorudyo, mu pirwere karo ditama dimweya. 40No ngeshi ghumweya ha shana kukutwara kundhango, no ghana shana kukuhurura thokwishi, mu pe karo thopeghuru. 41No karo ghumweya ha kuthineneka eshi, ghu mu shimbere thinu thendi kilometeri yofotji, thi mu shimbere we makilometeri mawadi. 42Mu pe yu ghana kukukumbera thinu, no wa yumena mukakukuyadhima.
Mayarithero ghomuragho: Ruhakitho rokwamunyathi
(Luk 6:27–28, 32–36)
43“Shime mwa yuva ya ninga eshi: ‘Hake muyendhoye no ghu dhimbe n̂ore dhoye.’ 44Ame ne na kumutongwera eshi: Mu hake han̂ore dhenu, no mu raperere hakakumukutha‐kutha. 45Kemo sho mu kare hana Wihenu ghomudiwiru. Aye gha sheghenyithera diyuwa dyendi kwawamango nokwawahunga. No gha rokitha mvura wendi kwawakakutenda ghuwa nokwawakakwipitha. 46Yoyishi ngeshi ha mu haka keho wa ha mu haka ne, yiruwera munye sho mu wane po? Mbadi hana tendanga haketethi nawo kemo ndi? 47Endi ngeshi ha mu rumeritha hayendhenu keko, nye muna kutenda yokupiterera hamweya? Mbadi hana kutenda hahayidena nawo kemo ndi?
48“Mu kare mwahunga thika di gha hungama Wihenu ghomudiwiru.”
Tällä hetkellä valittuna:
Mateghusi 5: MHW1986
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Mbunga dhoBayibili dhaNamibia (Bible Society of Namibia) 1986
