Mʉkpanganɨa 29
29
Yakɔɓɔ ɔɓɔyɔ anɔ Mɛsɔpɔtamɨa
1Yakɔɓɔ ɛ꞉sɨnganaka nɔ kyɛnda, nɔ, ɔ꞉tɔɓɔya tɨa nɔ ʉgbaa mesu akɔ ɨkʉmbʉ ngɨa aki ɨpá yachʉchwaka-ɛɛ. 2Ɓisi mʉngana, ɔ꞉tɛna tɨa ɨkɔ mɛngana aneju ɓɔ, aka ɓapɛmakɨa ɓɔ ɓakɔndɔlɔ ɓa꞉ɓika-ɔɔ akɔmwiso ɓanama mipo. Mitunduga ɓeetu yɔ ɓakɔndɔlɔ, ya꞉ɓio ɨkwaakɛ anambamba ɔngɔ, nɔ, ikopi yɛta ɨja ikute ananɨ amonu kɔngɔ. 3Angbinga ngɨa mitunduga yɔ ɓanama, ɓa꞉ɓijonokio-ɔɔ tɨa ɓaɓomu, ɓɔ꞉ɨkeliso ikopi ngɨyɛnɛnɨ anambamba, nɔ ɓɔ꞉pʉnga mwiso ɓanama mipo. Mbise ɔngɔ, ɓɔ꞉ɨtoiso ikopi kʉ ananɨ. 4Yakɔɓɔ ɔ꞉ɓokuo ɓapɛmakɨa ɓɔ ɓanama ɓɔ: «Ha inu ɓanduku-ei, nɛkɔ-sɨ inu gbani?» Ɓɔ꞉mutosio ɓɔ: «Anɔ Halanɨ.» 5Ɔ꞉ɓuɓokuo ɓata ɓɔ: «Nɛ́mbɨa ndɨ-sɨ kʉɔ Labanɨ, ngɨa mwana ɔ Naholi?» Ga ɨɓɔ nayɔ ɓɔ: «Iii, Tamɨmbɨa mbɨanɨ.» 6Ga ɨyɔ naɓɔ ɓata ɓɔ: «A ndɨ kʉ iɗo?» Ɓɔ꞉mutosio ɓɔ: «A ta iɗo! Dɔ ɨna-sɨ Lakeli, mwana ata moi ngɨangɔ, iya kʉ anɨka nɔ ɓanama akɛ.» 7Yakɔɓɔ ɔ꞉ɓusigio ɓɔ: «Ɓisi ɓa-sɨ ta ɓuɓomu, nɔ, yangɔmʉ-sɨ ngbinga ngɨyɔ mɔma ɓanama. Mwiseni ɓanama mipo, nɔ, nɔtɔwa-sɨ naɓɔ ta akɔ ɨda yɔ dyakakiso.» 8Yakamɛngana, ɓapɛmakɨa ɓɔ ɓanama ɓɔ꞉mutosio ɓɔ: «Isu, ta꞊ngɔkwanana kɨa ɓanɨ, akɔɓɔya ta aka mitunduga yɔ ɓanama iɓomu yɔ꞊gbʉkɔ-ɔɔ. Kʉdɔ, ta꞊keliso ikopi anambamba ɔ monu kɔ ɨkɔ, nɔ, tɔ꞉ɓumwiso dɔ tɨa mipo.»
9Ngbinga ngɨa a꞉ɓio-ɔɔ-sɨ ta ayakanaka naɓɔ, Lakeli ɛ꞉ka nɔ mitunduga yɔ ɓanama ngʉɓɔ ɨsɛ, dɔ ɨyɔ akɛ, a꞉tɨɓʉpɛmakɨa. 10Ɨyɛ ndʉ Yakɔɓɔ ɛ꞉na Lakeli, mwana ata moi ngɨyɔ manye ɔ inye Labanɨ, ɨhɔ nɔ mutunduga wɔ ɓanama ngʉɓangɔ, kʉdɔ, ɔ꞉mɨsɨnganɨa. Ndʉ aka nasugo-ɔɔ aka, ɔ꞉keliso ikopi anambamba, anɨngwa akɔ monu kɔ ɨkɔ, kʉdɔ, ɔ꞉mwiso ɓanama ngʉɓɔ manye ɔ inye Labanɨ mipo. 11Yakɔɓɔ ɔ꞉mwaka Lakeli ɨngʉngʉ#29:11 Pɔ ɓɔ isisenio yɔ pananiso ɓɔ ba amati ɔ ɨfananja mɛnga, nɔ, ɔ꞉pʉnga ndɨa nɔ iso yɛta ɓʉmʉ. 12Ga Yakɔɓɔ nayɔ ɓɔ: «Ɨmɨ, na mwana ɔ kwaba asɔɔ Lɛbɛka. Nɔ, nesoko atɔ ɓɔ mainaa.» Kʉdɔ, Lakeli ɔ꞉sa anʉngakɨa ɨsɛ yaka ngɨyɛnɛnɨ. 13Ɨyɛ ndʉ Labanɨ ɔ꞉ka ɓɔ Yakɔɓɔ ngɨa mwana ɔ manye, Lɛbɛka ɛ꞉kɔ, ɨyɔ Labanɨ, ɔ꞉sa bangʉ nayɔ akɔtɛtɨa. Ɔ꞉tɔmʉnaputo ga putu, ɔ꞉mʉmwaka ɨngʉngʉ, nɔ, ɔ꞉sa nayɔ andɔngɔ. Yakɔɓɔ ɔ꞉mʉngakɨa yaka ngɨyɛnɛnɨ ta iɓomu. 14Kʉdɔ, Labanɨ ɔ꞉mutosio ɓɔ: «Yaɓanɨ, ʉwɛ ingainga, wa ta ɨkyɛmʉ yɛsɛmɨ, nɔ menike kɔsɛmɨ ɓɔ kpɛ.» Yakɔɓɔ a꞉kwaa ananɨ andɔngɔ, uyi mʉngana ta iti.
Yakɔɓɔ ɔsɨkɔ moi ino ɓɔ Lakeli
15Ya꞉ɓio tɨa ɓisi mʉngana, ga Labanɨ nɔ Yakɔɓɔ aka ɓɔ: «Ha gue, ya ndɨ akɔsugo ɓɔ wa꞊nakyananakɨa tɨta akɔ ɨjɨɔ, dɔ, wa mʉnɔnɔ wɔsɛmɨ ndɨ? Aɓɨa-sɨ ɓɔ na꞊nakwa nɔ ɨmanɨ?» 16Ɨnadɔ, Labanɨ a꞉ɓio ananɨ nɔ ɓiga ɓeɓoi ɓapɨnɨ. Ɨya tapio a꞉ɓio ino ɓɔ Lɛa, nɔ gwa ata mwana ino ɓɔ Lakeli. 17Lɛa a꞉ɓio ɨyɔ mesu ɓɔ yapuu, yakamɛngana, Lakeli a꞉ɓio ɨyɔ moi ata muɗo ɓɔ chɨla chɨla. 18Kʉdɔ, Yakɔɓɔ ɔ꞉tɔkʉnda tɨa Lakeli. Ga ɨyɔ nɔ Labanɨ ɓɔ: «Na꞊nakyananakɨa mago mɛɗɨanɛka, akɔ yaka yɔ Lakeli, gwa ata moi ngɨasɔɔ ɔ mbise.» 19Ga Labanɨ nayɔ ɓɔ: «Ɨmɨ, nakʉnda ɓɔ nɨnenjo gɔ pɛngɛ ɨyɔ, ta ʉwɛ, sɔkɔmʉ gue ngakɔmɔ. Ɓio pɨ ʉwɛ, ɨhɔ tɨta nɛmɨ aka.»
20Kʉdɔ, Yakɔɓɔ a꞉mʉkyananakɨa Labanɨ amati ɔ mago mɛɗɨanɛka akɔ yaka yɔ Lakeli. Yakamɛngana, mago ngʉkɔnanɨ ka꞉mʉchanɨa Yakɔɓɔ, ta ndʉ ɓenyo, dɔ, a꞉ɓio ɓɔ ɔmʉkʉndeni Lakeli nɔgbɛ. 21Mbise ɔngɔ, ga Yakɔɓɔ nɔ Labanɨ ɓɔ: «Ha mainaa-e, anenjo tɨa moi ngɨasɛmɨ, dɔ, angbinga ngɨasɛmɨ ɔndanɔ tɨa ʉndananɨ. Nakʉnda nayɔ asɨka tɨta sɨka.» 22Kʉdɔ, Labanɨ a꞉dyiso ʉmbɔ wɔ mʉsɨkana, nɔ, ɛ꞉soko ɓombi ɓɔ ɨkʉmbʉ ɓaɓomu. 23Yakamɛngana, ngbinga ngɨa ɨpá ya꞉kwa-ɔɔ, nɔ tɨa nɛpasɨ, Labanɨ ɔ꞉mɨkɨa Yakɔɓɔ tɨa nɔ Lɛa ga yɛɛ, kʉdɔ, ɓɔ꞉kwaa nayɔ tɨa kʉ kwaa. 24Labanɨ e꞉njo jɛnɛ Lɛa, mombi ɔ tɛa ngɨangɔ ata moi, ino ɓɔ Jɨlɨpa, dɔ, iɓio nayɔ akɔkyananakɨa.
25Ɨyɛ tɨa ndʉ ɓisi ɓɔya, ndʉ aka ɓɔ tɨta Lɛa. Ga Yakɔɓɔ ɓɔ: «Himbo! Ambɔgɔ pɛpɛ Lɛa!» Kʉdɔ, ɔ꞉ɓokuo Labanɨ ɓɔ: «Wa꞉nakɨa pɛ ɓanɨ dɔtanɨ? Sɨ ɨmɨ, na꞊nanakyananakɨa pɔngɔ ta akɔ yaka yɔ Lakeli. Wa꞉napɛta jɛnɛ-sɨ ɓanɨ dɔtanɨ?» 26Labanɨ ɔ꞉mutosio ɓɔ: «Ya ɓʉkaɨ akɔ gbali ngɨyeso akɔgaba gwa ata moi ngɨyɔ mbise, akɔ ɨɓaa, apɛɨ ɔ mutatamusie wangɔ. 27Pipiso pɨ-sɨ makwaa mɛɗɨanɛka kɔ ʉmbɔ ngʉwɔ Lɛa ingono, mbise ɔngɔ, isu tɔ꞊nenjo dɔ tɨa Lakeli. Yakamɛngana, wa꞊nakyananakɨa ɓata ɨmɨ, kʉ amati ɔ mago ngakɔmɔ mɛɗɨanɛka.» 28Yakɔɓɔ ɔ꞉tɔbaya ɨyɔ tɨa kʉ ananɨ. Ndʉ Yakɔɓɔ a꞉pipiso ta ʉmbɔ wɔ mʉsɨkana ɓɔ gba, Labanɨ ɔ꞉minjo Lakeli ga gbʉ. 29Labanɨ ɔ꞉tenjo ɓata Lakeli, kʉ mombi ɔ tɛa ngɨangɔ ata moi, ino ɓɔ Bɨlɨha, dɔ, iɓio nayɔ akɔkyananakɨa. 30Kʉdɔ, Yakɔɓɔ ɔ꞉tɔkwaa ɓata nɔ Lakeli kʉ kwaanɨ, nɔ, ɔ꞉tɔmʉkʉnda ɨyɔ tɨa nɔgbɛ akɔ nagaaka Lɛa. Ɨyɔ Yakɔɓɔ, ɔ꞉tɔmʉkyananakɨa ɓata Labanɨ kʉ amatɨ ɔ mago mɛɗɨanɛka.
Yakɔɓɔ ɔpʉngɔ ʉnɔtʉ
31Ɨyɛ ndʉ MAKWƆƁƗƗ ɛ꞉na ɓɔ Yakɔɓɔ angɔmʉ akɔkʉnda Lɛa nɔgbɛ, ɔ꞉tɔminjo tɨa ɨyɔ, ʉnɔtʉ. Yakamɛngana, Lakeli a꞉ɓio ɨyɔ tɨta isude. 32Kʉdɔ, Lɛa a꞉sio ɓʉa, nɔ, ɔ꞉nɔta mwana ata gue, ɔ꞉mʉsʉa ino ɓɔ Lubeni#29:32 Lubeni: pɔ ɓɔ nɔ Ebelenia yanʉkanɨa tinetine ndʉ «nɨna». Ɔ꞉yakananaka akɔsugo ɓɔ: «Ɨna ɨmɨ-ee! MAKWƆƁƗƗ ɛ꞉na pɛ ikoko ngɨyɛsɛmɨ tɨa ɛnanɨ. Andɨ gue asɛmɨ ɔ꞊manɔ tɨa nɛmɨ akʉnda.» 33Ndʉ aka, Lɛa ɔ꞉tɔsio ɓata ɓʉa ngaɓɔmɔ, ɔ꞉tɔnɔta ɓata kʉ gwa ata gue. Kʉdɔ, a꞉sugo ɓɔ: «MAKWƆƁƗƗ ɔ꞉nenjo pɛngɛ ɓata gwa ata gue ngɨa, dɔ, ɛ꞉na pɛ ɓɔ gue asɛmɨ angɔmʉ nɛmɨ akʉnda.» Kʉdɔ, ɔ꞉mʉsʉa ino ɓɔ Simoni#29:33 Simoni: pɔ ɓɔ nɔ Ebelenia yanʉkanɨa tinetine ndʉ «nʉka». 34Mbise ɔngɔ, Lɛa ɔ꞉tɔsio ɓata ɓʉa ngaɓɔmɔ ta sioni, ɔ꞉tɔnɔta ɓata kʉ gwa ata gue. Ga ɨyɔ ɓɔ: «Pɛpɛ tɨta nɔ kyɛnda ngɨyɛ, gue asɛmɨ a꞊beliso ɓʉnʉ nɛmɨ akɔkʉnda tɨta belisoni, dɔ, nɔ꞉pɔmʉnɔtɨa ɓana ɓegue tɨa ɓaatʉ.» Kʉdɔ, ɓɔ꞉sʉa ɨyananɨ ino tɨa ɓɔ Lawi#29:34 Lawi: pɔ ɓɔ nɔ Ebelenia yanʉkanɨa tinetine ndʉ «kpakpanɨa, kʉnda». 35Nɔ pɛɨ ndʉ aka, Lɛa ɔ꞉tɔsio ɓata ɓʉa ngaɓɔmɔ, ɔ꞉nɔta ɓata kʉ mwana ata gue. Ga ɨyɔ ɓɔ: «Nɔ kyɛnda ngɨyɛ, nabibiso-sɨ ɓʉnʉ MAKWƆƁƗƗ tɨa kʉ bibisoni.» Kʉdɔ, ɔ꞉mʉsʉa ɨyananɨ ino tɨa ɓɔ Yuda#29:35 Yuda: pɔ ɓɔ nɔ Ebelenia yanʉkanɨa tinetine ndʉ «bibiso». Mbise ngɨananɨ, ʉnɔtʉ ngʉwangɔ wɛ꞉pa.
Tällä hetkellä valittuna:
Mʉkpanganɨa 29: buuN
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translators, Inc.