ಮತ್ತಾಯ 11
11
ಬ್ಯಾಪ್ತಿಸ್ಮ ದೆವಾಳೊ ಯೋಹಾನನು ಖಬರ್‌
(ಲೂಕ 7:18-35)
1ಯೇಸುನೆ ಇನ ಭಾರ ಶಿಷ್ಯರ‍್ನ ಬೋಲ್ನುತೆ ಖ್ಹಾರುಸ್‌ ಬೋಲಿನ್ ಖತಮ್ ಕರಾನ ಬಾದ್ಮ, ಹಿಜ್ಜಾ಼ಥೊ ನಿಕ್ಳಿನ್, ಅಛ್ಛಿ ಖಬರ್‌ ಬೋಲಿವತಾಳಾನ ಅಜು಼ ಶಿಕಾಡಾನಖ್ಹಾಜೆ ಖನ್ನೇನ ಗಾಮ್ಮ ಗಯೊ.
2ಬ್ಯಾಪ್ತಿಸ್ಮ ದೆವಾಳೊ ಯೋಹಾನನೆ, ಕ್ರಿಸ್ತ ಕರುಕರ್ತೊಥೋತೆ ಕಾಮ್ ಖ್ಹಾರಾನಿ ಬಾರೇಮ ಜೇಲ್‌ಮ ಖ್ಹಮ್‌ಜಿನ್‌, ಇನ ಶಿಷ್ಯರ್‌ಮ ಥೋಡ ಜ಼ಣಾನ ಇನಾಕನ ಮೋಕ್‌ಲ್ಯೊ. 3ಇವ್ಣೆ ಯೇಸುನ, “ಯೊಹಾನ್ನೆ ಬೋಲ್ಯೋತೆ ಇಮ್‌ ಆವ್ಣುತೆ ಯೋ ತೂಸ್ಕಿಶು, ನಾತೊ ಹಮೆ ಬಿಜೇಕ್‌ನಖ್ಹಾಜೆ ಟಿವಾವ್‌ಣು?” ಕರಿ ಪುಛಾ಼ಯ.
4ಯೇಸುನೆ, “ಜೈ಼ನ್‌, ತುಮೆ ಶಾತ್‌ ಖ್ಹಮ್‌ಜ್ಯ ಅಜು಼ ದೇಖ್ಯಾಕಿ ಇನಿ ಬಾರೇಮ ಯೋಹಾನ್ನ ಬೋಲೊ: 5ಕಾಣಾವ್ನ ಡೋಳಾ ಆವ್‌ಶೆ, ಲಂಗ್ಡು ಖ್ಹಾರು ಚಾ಼ಲ್‌ಷೆ, ಖೋಡ್‍ ರ‍್ಹವಾಳು ಪಾಕ್‌ ಉಶೆ, ಭೈರಾವ್‍ನ ಖ್ಹಮ್‌ಜಾ಼ವ್‌ಶೆ, ಮರಿಗಯುಹುಯು ಜಿವ್ತು ಉಟ್‌ಶೆ, ಅಜು಼ ಗರೀಬ್‌ನ ಸುವಾರ್ತೆ ಬೋಲಾವ್‌ಶೆ. 6ಮಾರಿ ಬಾರೇಮ ಶಕ್ ಕರಾಕೊಂತೆ ಇವ್ಣೇಸ್‌ ಧನ್ಯ ಹುಯಿರ‍್ಹುಸ್‍” ಕರಿ ಬೋಲ್ಯೊ.
7ಯೋಹಾನನು ಶಿಷ್ಯರ್‌ ಹಿಜ್ಜಾ಼ಥು ನಿಕ್ಳಿನ್ ಜ಼ವ್‍ಕರ್ತುಥೂತೆ ವಖ್ಹತ್‌ಮ, ಯೇಸುನೆ ಯೋಹಾನ್ನಿ ಬಾರೇಮ ಯೋ ಅದ್ಮಿನಿ ಝೂ಼ಂಡ್‌ನ ಶಾತ್‌ ಬೋಲ್ಯೊಕತೊ, “ತುಮೆ ಶಾತ್‌ ದೇಕ್ಣು ಕರಿ ಉಜ್ಜಾ಼ಡಿ ಝ಼ಗೋಮ ಗಯಾಥ? ವಹಿರಾಮ ಹಲಾಸ್ತೆ ಘಾಖ್ಹ್‌ನ ಡಂಟ್‍ನಾಕಿಶು? 8ಕೊಯ್ನಿಕತೊ, ಶಾತ್‌ ದೇಕ್ಣುಕರಿ ಗಯಾಥ? ಶನ್ಗಾರ್‌ನ ಲುಂಗ್ಡ ಪೇರ‍್ಹಿರಾಖಾಸ್ತೆ ಅದ್ಮಿನಾಕಿ ಶು? ಅಛ಼್ಛ ಶನ್‌ಗಾರ‍್ನಲುಂಗ್ಡಾ ಪೇರ‍್ಹಿರಾಖಾಸ್ತೆ ಖ್ಹಾರು ರಾಜಾ಼ನ ಮಹೇಲ್‌ಮ ರ‍್ಹೇಸ್‌! 9ಇಮ್‍ಕತೊ ಶಾತ್‌ ದೇಖಾನ ಗಯಾಥ? ಏಕ್‌ ಪ್ರವಾದಿನಕಿ ಶು? ಓಹೊ, ಪ್ರವಾದಿಥೀಬಿ ಮೋಟಾನ ತುಮೆ ದೇಖ್ಯಾಕರಿ ತುಮೂನ ಖ್ಹಾಚಮಾಬಿ ಬೋಲುಸ್. 10“ಹಂದೇಕ್‌, ಮಾರ ದೂತಾನ ತಾರ ಖ್ಹಾಮ್ಣೆ ಮೋಕ್ಲಿಶ್‌, ಯೋ ತೂ ಜಾ಼ವಾನಿ ವಾಟ್ನ ಬರೋಬರ್‌ ಕರ್ಶೆ’ ಕರಿ ಕಿನಿ ಬಾರೇಮ ವಚನ್‌ಮ ಲೀಖೈರೂಸ್ಕಿ, ಯೋ ಅದ್ಮಿ ಯೋಹಾನಸ್‌. 11ತಯೇಡಾನ ಪೇಟೆ ಪೈದಹುಯುತೆ ಖ್ಹಾರಾನ ಬ್ಯಾಪ್ತಿಸ್ಮ ದ್ಯವಾಳೊ ಯೋಹಾನ್‌ಥಿ ಮೋಟು ಕೋಣ್‌ಬಿ ಕೊಯ್ನಿ. ತೋಬಿ ಪರ್‌ಲೋಕ್ ರಾಜ್ಯಮ ಛಾ಼ತೆ ನ್ಹಾನೊ ಜಿನ್‌ಕುಬಿ ಯೋಹಾನ್‌ಥಿ ಮಹಾನ್ ಹುಯಿರ‍್ಹೋಸ್ ಕರಿ ಮೆ ತುಮೂನ ಖ್ಹಾಚಮಾಬಿ ಬೋಲುಸ್. 12ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ್ನ ಹಗಾಮ್‌ಥು ಧರೀನ್ ಹಂಕೆತೋಡಿ ಸೊರ್ಗ ರಾಜ್ಯನಿ ಘಣು ಜು಼ಲಮ್‌ನ ಝೇಲ್‌ನು ಪಡ್ಯು, ಅಜು಼ ಜು಼ಲಮ್‌ ಕರಾವಾಳು ಅದ್ಮಿ ಇನ ಛಿನೈಲೇಣು ಕರಿ ಕರಾಸ್. 13ತಮಾಮ್‌ ಪ್ರವಾದಿ ಅಜು಼ ಧರ್ಮಶಾಸ್ತ್ರ ಯೋಹಾನ ಆವಾತೋಡಿ ದೇವ್ನಿ ರಾಜ್ಯನಿ ಬಾರೇಮ ಬೋಲ್ಯು. 14ಇವ್ಣೆ ಬೋಲ್ಯುತೆ ಇನ ನಂಬಾನ ತುಮೂನ ಮನ್ ಉಶೇತೊ, ಆ ಯೋಹಾನಸ್‌ ಆವಾಳೊ ಎಲೀಯಕರಿ ಬೋಲಾನಿತರ ಹುವಾಸ್ನಿ. 15ಖ್ಹಮ್‌ಜಾ಼ನ ಕಾನ್‌ ರ‍್ಹವಾಳು ಖ್ಹಮ್‌ಜಾ಼ದೆ!
16“ಹಮ್ಕೆ ಮೆ ಆ ಹಗಾಮ್ನ ಪಿಳ್ಗಿನ ಮೆ ಖಿವಿ ಪರಕ್ಮ ಬೋಲು? ಅವ್ಣೆ ಬಜಾ಼ರ್‌ಮ ಬೆಠೂತೆ ಲಡ್ಕಾವ್‍ನಿಘೋಣಿ ಹುಯಿರ‍್ಹುಸ್‍. ಏಕ್‌ ಝೂ಼ಂಡ್‌ನ ಲಡ್ಕಾ ಬಿಜ್ಜೇಕ್‌ ಝೂ಼ಂಡ್‌ನ ಲಡ್ಕಾವ್‍ನ ಚಿಕ್ರಿನ್, 17‘ಹಮೆ ತುಮಾರಖ್ಹಾಜೆ ವಾಖ್ಹ್‌ಳಿ ವಜಾ಼ಡ್ಯ ತುಮೆ ಖೇಲ್ಯಕೊಯ್ನಿ; ಹಮೆ ಅಂದ್ರೋಖ್ಹ್‌ನು ಗೀದ್‌ ಬೋಲ್ಯ, ಕತೋಬಿ ತುಮೆ ರೋಯಾಕೊಯ್ನಿ!’ ಕರಿ ಬೋಲಾಸ್. 18ಕಿಮ್‌ಕತೊ, ಯೋಹಾನ ಆಯೊ, ಯೋ ಖಾತೋಥೊಕೊಯ್ನಿ ಅಜು಼ ಪೀತೋಥೊಕೊಯ್ನಿ, ಅಜು಼ ಅದ್ಮಿಖ್ಹಾರು, ‘ಇನ ಭೂತ್‌ ಧರಿರಾಖ್ಯುಸ್’ ಕರಿ ಬೋಲ್ಯು. 19ಅದ್ಮಿನೊ ಛಿಯ್ಯೊ ಆಯೊ, ಯೋ ಖಾಣುಪಾಣಿ ಲ್ಯವಾಳೊ ಹುಯಿರ‍್ಹೊಥೊ. ಅದ್ಮಿಖ್ಹಾರು ಇನ, ‘ಆ ಅದ್ಮಿ ಖಾಣನು ಮರ್‌ತೇಲ್‌ ಅಜು಼ ಪೀಕುಡ್ಕ ಹುಯಿರ‍್ಹೋಸ್! ಶುಂಕ ಮಾಂಗವಾಳನೊ ಅಜು಼ ಪಾಪಿ ಖ್ಹಾರಾನೊ ದೋಸ್ತ್’ ಕರಿ ಬೋಲಾಸ್, ಕತೋಬಿ ದೇವ್ನಿ ಗ್ಯಾನ್ ಖ್ಹಾಚಿಸ್ ಕರಿ ಬೋಲಾನು ಇನ ಕಾಮ್‌ಥೀಸ್‌ ಮಾಲುಮ್‌ ಪಡಾಸ್‌” ಕರಿ ಬೋಲ್ಯೊ.
ವಿಶ್ವಾಸ್‌ಕೊಂತೆ ಖ್ಹಯೇರೆನಿ ಬಾರೇಮ
(ಲೂಕ 10:13-15)
20ತದೆ ಯೇಸುನೆ ಯೋ ಕೈಯೆಕ್ಕಿ ಮಹಾನ್ ಕಾಮ್‌ಖ್ಹಾರು ಕರ‍್ಯೊತೆ ಗಾಮ್‌ವಾಳು ಪಾಪ್ನ ಮ್ಹೇಲಿನ್ ಫರ‍್ಯುಕೊಂತೆ ದೇಖಿನ್‌, ಇವ್ಣುನ ಗುರ್‌ಕಾವಲಗ್ಯೊ. 21“ಅಯ್ಯೋ ಖೊರಾಜಿನ್‌ ಖ್ಹಯೇರ್, ತುಮಾರಿ ಹಾಲ್ನ ಶಾತ್‌ ಬೋಲು ಬೆತ್ಸಾಯಿದ, ತುಮಾರಿ ಹಾಲ್ನಬಿ ಶಾತ್‌ ಬೋಲು! ತುಮಾರಾಮ ಚಾ಼ಲ್ಯುತೆ ಮಹಾನ್ ಕಾಮ್‌ಖ್ಹಾರು ತೂರ್ ಅಜು಼ ಸೀದೋನ್ ಖ್ಹಯೇರ್‌ಮ ಚಾ಼ಲ್ಯುಹೋತ್ತೊ, ಹಿಜ಼್ಜಾವಾಳು ಕದೇಸ್‌ಕಿ ಛೈ಼ನೊಕೋಥ್‌ಳೊ ಲಪೇಟಿಲೀನ್, ರಾಕ್‌ಮ ಬೇಶಿನ್, ಇವ್ಣು ಪಾಪ್ನ ಮ್ಹೇಲಿನ್, ಫರಿಗಯುಹೋತ್‌! 22ಕತೋಬಿ ನ್ಯಾವ್‍ನಿ ತೀರ್ಪ್‌ನ ದನ್ಮ ತುಮಾರಿ ಹಾಲ್‌ಥೀಬಿ ತೂರ್ ಅಜು಼ ಸೀದೋನ್ ಖ್ಹಯೇರ‍್ನಿ ಹಾಲ್‌ ಅಛ್ಛಿ ರ‍್ಹಿಶೆ ಕರಿ ಮೇ ತುಮೂನ ಬೋಲುಸ್! 23ಅಲಾ ಕಪೆರ್ನೌಮ್ ಗಾಮ್‍, ತೂ ಸೊರ್ಗಾಮ ಪಡೈಲೀಶ್‌ಕರಿ ಸೋಚಾಸ್ಕಿ ಶು? ಕೊಯ್ನಿ! ತುನ ಪಾತಾಳ್ಮ ನಾಕ್‌ಶೆ! ತಾರಾಮ ಚಾ಼ಲ್ಯುತೆ ಅದ್ಭುತ್‌ಕಾಮ್‌ಖ್ಹಾರು ಸೊದೋಮ್‌ಮ ಚಾ಼ಲ್ಯುಹೋತ್ತೊ, ಯೋ ಖ್ಹಯೇರ್ ಹಂಕೆತೋಡಿ ರ‍್ಹಯುಹೋತ್‌. 24ಕತೋಬಿ ನ್ಯಾವ್‍ನಿ ತೀರ್ಪ್‌ನ ದನ್ಮ ತಾರಿ ಹಾಲ್‌ಥೀಬಿ ಸೊದೋಮ್ ತಬರ್‌ಖಾನಿ ಹಾಲ್‌ ಅಛ್ಛಿ ರ‍್ಹಿಶೆ ಕರಿ ಮೇ ತುಮೂನ ಬೋಲುಸ್” ಕರಿ ಬೋಲ್ಯೊ.
ಮಾರಕನ ಆವೊ ಅಜು಼ ಅರಾಮ್‌ ಕರೊ
(ಲೂಕ 10:21-22)
25ಯೋ ವಖ್ಹತ್‌ಮ ಯೇಸುನೆ ಶಾತ್‌ ಬೋಲ್ಯೊಕತೊ, “ಬಾ, ಸೊರ್ಗ ಅಜು಼ ಧರ್ತಿನೊ ಯಜಮಾನ್! ತುನೆ ಗ್ಯಾನಿ ಅಜು಼ ಅಕ್ಲಿಥಿ ಅದ್ಮಿಥಿ ಆ ವಾತೆನ ಲಪಾಡಿನ್ ಶಾತ್ಬಿ ಮಾಲುಮ್‌ಕೊಂತೆ ಇವ್ಣುನ ವತಾಳಿರಾಖ್ಯೋತೆ ಇನಖ್ಹಾಜೆ ಮೇ ತುನ ಧನ್ಯವಾದ್ ಕರುಸ್. 26ಓಹೋಲಾ ಬಾ, ಅಮ್ಮಸ್ ಕರಾನು ಅಛ್ಛು಼ಕರಿ ತುನ ದೆಖಾಯು.”
27“ಮಾರೊ ಬಾ ಮನ ಖ್ಹಾರುಸ್‌ ಮಾರ ಹಾತ್ಮ ದೀರಾಖ್ಯೊಸ್. ಬಾನ ಮ್ಹೆಂದಿನ್ ಕೋಣ್‌ಬಿ ಛಿಯ್ಯಾನ ಮಾಲುಮ್‌ ಕರಿರಾಖ್ಯುಕೊಯ್ನಿ, ಅಜು಼ ಛಿಯ್ಯಾನ ಮ್ಹೆಂದಿನ್ ಕೋಣ್‌ಬಿ ಬಾನ ಮಾಲುಮ್‌ ಕರಿರಾಖ್ಯುಕೊಯ್ನಿ ಅಜು಼ ಛಿಯ್ಯೊ ಬಾನ ಕಿನ ವತಾಳ್ಣುಕರಿ ಆಖ್ಹ್‌ಕರಾಸ್ಕಿ, ಇವ್ಣೆ ಬಾನ ಮಾಲುಮ್‌ ಕರಿಲಿಶೆ.
28“ಅಲಾ ಥಕಿರ‍್ಹವಾಳ, ಭೋಜೊ ಪಾಡಿರಾಖವಾಳ, ತುಮೆ ಖ್ಹಾರು ಮಾರಕನ ಆವೊ; ಮೇ ತುಮುನ ಅರಾಮ್‌ ದೆವುಸ್‌. 29ಮೇ ಹಂಕಾರ್‌ಭರ‍್ಯೊ ಕಾಹೆ ಅಜು಼ ಕೌಳೊ ದಿಲ್‌ವಾಳೊ ಹುಯಿರ‍್ಹೋತೆ ಇನಖ್ಹಾಜೆ, ಮಾರು ನೊಗಾನ ತುಮಾರಪರ್ ಪಾಡಿಲೀನ್ ಮಾರೇಥಿ ಶಿಕಿಲೇವೊ. ತದೆ ತುಮಾರು ಆತ್ಮಾನ ಅರಾಮ್‌ ಮಳ್‌ಶೆ. 30ಶನಕತೊ ಮಾರು ನೊಗ ಪೋಲು ಹುಯಿರ‍್ಹುಸ್‍ ಅಜು಼ ಮಾರು ಭೋಜ಼್‌ ಕಮ್‍ ವಜ಼ನ್ನು ಹುಯಿರ‍್ಹುಸ್‍” ಕರಿ ಬೋಲ್ಯೊ.
Tällä hetkellä valittuna:
ಮತ್ತಾಯ 11: NTWVe23
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
The New Testament in Waghri Language © The Word for the World International and Waghri Translation Samiti, Karnataka, 2023.
