Mateus 8
8
Yeesus heelt en lepra kranke
Markus 1.40-45; Lukas 5.12-16
1Yeesus is te përich runer kang, un en kroos folek is tëm noo kang. 2Too is en lepra kranke ticht pay em khom, hot sich kekniit un saat:
— Hër, ich wees tas teyer mich heele khënt, wën teyer wolt.
3Yeesus hot sayn hant kextrekt, hot aan em kethupt un saat:
— Yoo, ich wil. Tuu pist heel.
Im selwiche momënt is tee fon te lepra krankheet keheelt kep. 4Too saat Yeesus tëm:
— Heyer mol aan! Tuu tas fer nimant saan, awer kee fer te priister ferlange tas tee tich unersuuche sol. Tëm noo, fer se pewayse fer ale layt tas tuu keheelt pist, kee en opfer mache wii Mooses kexikt hot.
Yeesus heelt em reemixe ofitseyer sayne knecht
Lukas 7.1-10
5Wii Yeesus in ti xtat Kafarnaum rin kang is, is em reemixe ofitseyer mit tëm trefe khom un hot ferlangt tas Yeesus sayne knecht kureere solt. 6Eyer saat:
— Hër, mayne knecht is in mayn haus, soo krank, tas er sich net mool im pet peweeche khan. Tee is tsu fiil am layte.
7Yeesus saat:
— Ich keen hiin un tuun em kureere!
8Te reemixe ofitseyer hot keantwort:
— Nee, hër! Ich sin net weyert tas teyer in mayn haus rin keet. Kep ploos em ortnung, un mayne knecht wërt kuut kewe. 9Ich sin aach unich te autoriteet fon heechere ofitseyer un hon soltaate woo mayn ortnunge noo keen. Ich saan fer ëne: “Kee tort hiin”, un tee keet. Ich saan fer anere: “Khom heyer”, un tee khomt. Un saan aach fer mayne knecht: “Mach tas”, un tee macht es.
10Wii Yeesus tas keheyert hot, hot eyer sich aarich fewunert un saat fer tii woo em noo am keen waare:
— Ich fersichere aych tas tas woer is: noch nii hon ich soo en klaawe kesiin, net mool unich em folek fon Israël! 11Un saan aych tas fiil layt fom Oost un fon West khome un tuun sich an te tix setse im Himels Raych mit Aapraham, Iisak un Yaakop.#Lk 13.29 12Awer ti layt woo hete sole im Raych sin kewe wech keworef, in ti tunkelheet. Too tuun se prile un ti tseen kwiitxe fon hofnungsloos.#Mt 22.13; 25.30; Lk 13.28
13Un Yeesus saat fer te ofitseyer:
— Kee hëm, wayl es wërt kemach wii tuu es klaawe tuust.
Un in tëm moment is te knecht fom reemixe ofitseyer kuriert kep.
Yeesus heelt fiil layt
Markus 1.29-34; Lukas 4.38-41
14Yeesus is pis an Pheeter sayn haus kang un siit tëm sayn xwiicher moter im pet, mit fiiwer. 15Yeesus hot an tëm sayn hant kethupt un te fiiwer is wech kang. Tan is sii uf kextii un hot aankefang Yeesus se petiine.
16Wii ti sun xon uner kang waar, hot tas folek fiil layt, woo tomineyert waare fon temoone, pis pay Yeesus kenom. Un eyer, mit ploos een wort, hot ti xlechte kayste aus kextoost un hot ti layt woo krank waare keheelt. 17Yeesus hot tas kemach fer inhale was te Profët Isaiias kesaat hat:
“Eyer hot unser krankheete mit kehool
un hot unser unkesuntheete ketraa.”#Is 53.4
Phaar layt woo wolte Yeesus noo keen
Lukas 9.57-62
18Yeesus hot tas folek um em rom kesiin um hot ti tisiple kexikt uf ti aner sayt fon te lakoo faare. 19En Kesets mayster is ticht pay iim khom un saat:
— Mayster, ich sin fërtich fer tich noo se keen uf aler plets woo teyer hiin keet!.
20Yeesus hot keantwort:
— Ti fukse hon sayn hoole, un ti feel hon sayn niste. Awer te Soon fom Man hot net woo te khop hiin leye fer se ruue.
21Un en anere, woo Yeesus sayne aanhënger waar, saat:
— Hër, los mich eyerxt tsurik keen fer mayne fater peërtiche.
22Yeesus hot keantwort:
— Khom mit mich un los ti toote sayn toote pekraawe.
Yeesus peruycht en xtorem
Markus 4.35-41; Lukas 8.22-25
23Yeesus is uf en kroos kanoo kextii, un sayn tisiple sin mit em kang. 24Uf mool, hot en kroose xtorem ti lakoo kexitelt, soo tas kroose wele te poot ketekt hon. Un Yeesus waar am xloofe. 25Ti tisiple sin ticht pay em khom un hon em wach kemach, am saan:
— Hilef, Hër! Meyer tuun xtërwe!
26Yeesus hot keantwort:
— Warom hot teyer soo em kroose pang? Wii kleen is te klaawe woo teyer hot!
Yeesus is uf kextii, hot xtram kexproch mit em wint un mit te wele, un ales hot sich peruycht. 27Too hon se sich al ferwunert un hon kesaat:
— Was fer man is tas woo sokaar am wint un an ti wele xikt?!
Yeesus heelt tswaay mëner woo tomineyert waare fon temoone
Markus 5.1-20; Lukas 8.26-39
28Wii Yeesus an ti rechioon fon Kataara aan khom is uf te aner sayt fom Kalilëya lakoo, sin tswaay mëner mit tëm sich trefe khom, woo tomineyert waare fon temoone. Ti sin fom friithoof khom, woo se am woone waare. Waare soo kewaltich un kefeerlich, tas nimant sich riskeyert hot tee weech torich keen. 29Tii hon aankefang se xraaye:
— Soon fon Hërkot, was wolt teyer fon uns? Sayt teyer khom fer uns se xtroofe foer te tsayt?
30Too ticht rom waare fiil xwayn am freese. 31Un ti temoone hon tringlich ferlangt fer Yeesus:
— Wën teyer uns ausxtoose tuut, xik uns in tii xwayn rin keen!
32Yeesus saat:
— Tan keet!
Ti temoone sin raus un sin in ti xwayn rin kang, un tii hon sich përich nuner kexmis, in ti lakoo rin un sin fersof.
33Ti mëner woo ti xwayn am uf passe waare sin auskeris un sin an ti xtat khom. Tort hon se tas ales fertseelt un aach was paseyert waar mit te tswaay mëner woo fon temoone tomineyert waare. 34Too sin ti kanse pewooner fon tee xtat aus kang fer Yeesus se pekeechne; un, wii se em ketrof hon, hon se tringlich ferlangt tas eyer fort këngt fon tëne sayn lant.
Tällä hetkellä valittuna:
Mateus 8: NTHunsrik
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
2022 Sociedade Bíblica do Brasil
