Tatanigaina 1
1
Ia Tatanigaina
1Ka ia tatanigaina, God neke va vuhai ia kolanga nia malau iahi peka nia ira vahina leghutau nga ka ira giliodi. 2Malau iahi peka mu neke zighizoghoro nia neke korogha. Nagoromo neke toufi ia kolo ta rokasa nia ia Tarunga ka God geke rizu ghu ka ia fatena kolo, neke ghua.
3Ianimu tuna ghe neke kahei nga God, “Na kabai ghini ta auna ia fegala.” Nia au tuna ia fegala, neke ghua. 4God neke finini ta vehana ia fegala neke fotai ghu manei ia fegala ka ia nagoromo. 5God neke va kudo ghini “Ravata” ia fegala, nia “Redu” ia nagoromo. Fuludu age ia saighona nia au meha ia fufugho—iahi mu neke va kenuna ravata.
6Ianimu tuna ghe neke kahei nga God, “Na kabai ghini ta auna kaike kalasana ta kokomo hinae ta mala fotaina ia kolo fatena mo ka ia kolo pekana mo.” 7Taghe ianimu neke ghua ghu. God neke va vuhai ia kalasana ta kokomo hinae mala fotaina ia kolo pekana mo ka ia kolo fatena mo. 8God neke va kudo ghini “Kolanga” ia kalasana ta kokomo hinae. Fuludu age ia saighona nia au meha ia fufugho—iahi mu neke va paluna ravata.
9Ianimu tuna ghe neke kahei nga God, “Na kabai ghini ia kolo ka pekana ia kolanga ta varighara kaike pelona, e podolo ghu ia kava karangona.” Taghe ianimu neke ghua ghu. 10God neke va kudo ghini “kava,” ia kava ta karango nia neke va kudo ghini “Tahi,” ia kolo neke varighara kaike pelono. God neke finini ghu ianimu neke vehana.
11Ianimu tuna ghe neke kahei nga God, “Kabai ghini ia kava ta kodolina mauke: ka ira leghu kokolodi ta fuai subudi kakato nga nia ka ira leghu kokolodi ta kuru subudi nga ira fuadi, e ghua.” Taghe ianimu neke ghua ghu. 12Ia kava neke kodoli mauke: ka ira leghu kokolodi ta fuai subudi kakato nga nia ira leghu kokolodi ta kuru subudi nga ira fuadi, e ghua. God neke finini ghu ianimu neke vehana. 13Fuludu age ia saighona nia au meha ia fufugho—iahi mu neke va litona ravata.
14Ianimu tuna ghe neke kahei nga God, “Na kabai ghidi ta podolona ira leghutau ka kolangana ta va meha fegala mala fotaina ia ravata ka ia redu nia mala kuru va ghilaghiladira ira fafata nia ira ravata nia ira komuhu. 15Nia na kabai ghidi tadi pelara hinaena maneri ka kolangana mala vanani fegalana malau iahi peka.” Taghe ianimu neke ghua ghu. 16God neke va vuhari palu leghahai zuta—ia taunu ta pelara va faa e mala kopu ghini ia ravata nia ia hihile taka suri pelara ghu e mala kopu ghini ia redu. Manei neke va vuhari molamo ira babaghunu. 17God neke pata ghidi haroharo maneri ka kolangana mala vanani fegalana malau iahi peka, 18mala pelarana ka ia ravata nia ia redu, nia mala fotaina ia fegala ka ia nagoromo. God neke finini ianimu neke vehana. 19Fuludu age ia saighona nia au meha ia fufugho—iahi mu neke va rodanana ravata.
20Ianimu tuna ghe neke kahei nga God, “Na kabai ghini ia kolo ta fouduna ka tehi kokolodi va vuha, nia ia kolanga ta fouduna ka leghu kokolodi memeha nga.” 21God neke va vuhari ghu ira leghahai va vuha ta au ka ia tahi nia ira leghu kokolodi va vuha dolidi ta rizu nga ka ia kolo nia ira leghu kokolodi memeha nga, e ghua. God neke finini ghu ianimu neke vehana. 22God neke vanadi veha neke va kahe ghidi ghu ira va vuha ka giliona ia tahi ta hugarana maneri ta va foudina ghu ia tahi, nia neke va kahe ghidi ira memeha ta mala tehina maneri ka malau iahi peka. 23Fuludu age ia saighona nia au meha ia fufugho—iahi mu neke va gahana ravata.
24Ianimu tuna ghe neke kahei nga God, “Kabai ghini ta auna ka ia kava ira leghu kokolodi va vuha dolidi nga: ira tagukava popohi, ira va vuha ta tagu ka ia kava nia ira tagukava mauke.” Taghe ianimu neke ghua ghu. 25God neke va vuhari leghu kokolodi tagukava mauke nga, tagukava popohi nga nia leghu va vuha ta tagu nga ka ia kava e ghua. God neke finini ghu ianimu neke vehana.
26Ianimu tuna ghe neke kahei nga God, “Kabai ghini ghita ta va vuha nonina mala taghe totoghaledana ghita nia mala taghe ghita ta ghuana, e ghua. Maneri edi age auri mana mala kopu ghidira ira namari ka ia tahi nia ira memeha ka kolangana, ira tagukava popohi, nia ira tagukava mauke nia ira leghu va vuha ta tagu nga ka ia kava, e ghua.”
27God neke va vuha noni ghu ka ia totoghalena taghonai,
ka ia totoghalena taghonai neke va vuharina manei,
manei neke va vuha mane ghaseri.
28Ianimu tuna ghe neke vanadi veha nga God kahe ghuana iahi, “O hugara va tehi, mala ira pagusu ka ghau edi age au ghu hae ghe hae ka malau iahi peka mala mana kaputina. O kopuna ghidi ira namari ka ia tahi, ira memeha ka ia kolanga nia ira leghu va vuha ta tagu nga ka ia kava.”
29Kahe ghua tuna iahi neke ghua God, “Ara nato vanamu ira leghu kokolodi leghutau ta fuai subudi kakato nga ka malau iahi peka nia ira leghu kokolodi heke ta kuru subudi nga ira fuadi e ghua. Maneri mu edi mala age ghemu ghano ghau. 30Nia ka ira leghu tagukava mauke nga ka malau iahi peka nia ka ira leghu memeha nga ka kolangana, nia ka ira leghu va vuha ta tagu nga ka ia kava—maneri haroharo ira ta kuru dolidi—ara a va ghono vanadi sesehu nia heke ta kuru kaladi, mala ghedi ghanona maneri.” Taghe ianimu neke ghua ghu.
31God neke finiri ira leghu neke va vuhariro nga taghonai, dike torai vehana. Fuludu age ia saighona nia au meha ia fufugho—iahi mu neke va onomona ravata.
Tällä hetkellä valittuna:
Tatanigaina 1: kji
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022, Islands Bible Ministries. All rights reserved.