مادتھا 12
12
حضرت عیسیٰ سی نی شابّادّی جاگی مسیح این۔
1تینّاتوسشیگّا حضرت عیسیٰ مسیح شابّادّی آرام چوچیسی جاگّا جینگ گیُودتے سکیودین یود زانے، کھونگی لوبٹوگسگون ستوگستے یودپا جینگی سنییما چادتے زاچیس گوزوگ۔ 2تیبو تھونگتے فریسی پا کھاچیگی حضرت عیسیٰ سی زیرس، ” کھیرانگی لوبٹوگسگونّی شابّادّی آرام چوچیسی جاگّا لاس چوستے چھوسٹھیمس چاگستے اینوگ۔“
3حضرت عیسیٰ سی سی لانسالس، ”حضرت داؤد تانگ کھوے ٹوپاگون ستوگستے یود زانے چی چوس ہلژخمہ شوقبُو بوے نانگنے کھیوجے ماسیلپینّا؟ 4حضرت داؤد خُدے کورّی چھودپا پھولسے ناسّے نانّگا سونگ، یانگ کھو تانگ کھوے ٹوپاگونّی ہلژخمہ تاگی زوستے چھوسٹھیمس چاگس، تیبو یہُودی پے اِمام مانے زاچھوگّا میدپین۔ 5یا چھوسٹھیمسّی نانّگا ماسیلپینّا، بیت المقدِس سی نانّگا اِمام گُونی چھودپا پھولچیسّی لاس چوستے شابّادّی جاگی شریعت چاگنانگ خُدے لدُونلا کھونگون نونگسمید اینوگ۔ 6نگے کھیوجا زیرّاد، بیت المقدِس سی سانگ ٹاگّاجیک ایکا یود۔ 7ہلژخمہ شوقبُو بوے نانّگا خُدے مولس، ’نگے دودپا نی نگا قُربان پھولچیس مانپا جانما سنینگرجے ستانچیسپو این۔‘ کالتیس تیبو کھیوجاگونلا ہاگوتے اِنپینّا تینے کھیوجے نونگسمیدگونلا سکیون کالتے میدڈو۔ 8چیازیرنا اِبنِ آدم شابّادّی آرام چوچیسی جاگّا چی چو چھوگس یا میچھوگس زیرچیسّی وانگچھا یود۔“
شابّادّی جاگّا نادپا گیالچوگّا زادس۔
9حضرت عیسیٰ مسیح تیکانے مجلِس لا سکیودس، 10تیرو لاگپا کھونگستے کول مانیانکھانّی میجیک یودپین۔ فریسی پاگونّی حضرت عیسیٰ سی سکیون کالچیسلا کھونگونی ای ٹیوابو ٹیس، ”چھوسٹھیمس نانگجین شابّادّی آرام چوچیسی جاگّا میجیک گیالچوگنا ڈیگتے اینّوگا؟“
11حضرت عیسیٰ سی کھونگونلا مولس، ”کالتیس کھیوجا چیگی لوگجیک شابّادّی جاگّا سادونگی نانّگا بودنا، کھیوجے لوگپو زومستے پھینگ می پھینّگا؟ 12لوگی سانگ می مانگستیانگ رینچھیا مانوگا۔ تیبویپھیا چھوسٹھیمس نانگجین شابّادّی جاگّا لاس زانگپو چو چھوگّانوگ۔“
13تینے حضرت عیسیٰ سی لاگپا کھونگسکھانبوا مولس، ”لاگپا کیونگ“ یانگ کھوے لاگپا کیانگسپا تیبو سینگ گیالتے جان لاگپابو ژوگس شیدچان گیور۔ 14اِین نانگ فریسی پاگون پھیلوگا سونگتے، حضرت عیسیٰ سی سادچیسّی تھابس نگانپا لدینگس۔
خُدے لدامّا زادکھانّی جابستوگپا۔
15حضرت عیسیٰ مسیح کھونگونی تھابسلدینگکھانبو کھیین پاسانگ، تیکانے سکیودس۔ میتشوگس چھینموجیک کھونّگا ڈانگستے یونگس، یانگ تے ٹوا یودکھانّی نادپا تشانگما کھونگی گیالچوگّا زادس۔ 16کھونگی گیالچوگکھانگونلا کھونگی زادکھانبو سوانگ ماشاد مولتے کا سالس۔ 17پیغمبر یسعیاہ پیغمبری گیُودتے مولکھان تشانگما ڈوبچوگّا زادچیسلا کھونگی تیزوگ چوا زادس۔ 18خُدے مولس،
”نگے لدامسکھانّیابستوگپا ستوس،
تشانگمیسانگ مانّگا کھوا نگے چیسپا چواد،
یانگ کھوے نگا تھادپو چھاچُوگدوگ۔
کھوا نگے نگارانگی رُوح تانگین۔
ایمان میدکھانگونلا چھادپا یانگ ٹانگپوگُونلا
شزدے تھوبچیس، کھوے گیالکھاگگونلا شادّا زادِین۔
19کھوے دزینگمو یا کُوچو می تانگ،
ٹھومسّی نانّگا سوجیکّیانگ کھوے کوچوے سکاد میتشور۔
20کھوے نادکھانّی سواگون میچاگ یا شیکی یودکھانّی اوت میساد
تینّا تسوگسلا کھوے ایمانی نانّگا نیامشونگّونلا
ٹانگپو ٹھیمسچادّی گیالکھا کھیونگ کھیونگ تشوگپا سکیوبتے بورّا زاداین۔
21یانگ ایمان میدکھان گُونینگ کھو نی مینگی کا ریوا بورین“
کھونگون سکیوبچیسّی ریوا بورین۔
حضرت عیسیٰ سی گیابگالّا سپیرا نگانپا زیرکھان۔
22تینے می کھاچیگی ردود جوگسکھان، ہانڈانگ تانگ جارا یودکھانّی میجیک حضرت عیسیٰ مسیح یودسا کھیونگس۔ کھوا سپیرا تانگچوگچیس تانگ تھونگچوگچیسّی تھوگسدود حضرت عیسیٰ سی یود پاسانگ کھونگی کھو پھانچوگا زادس۔ 23میتشانگما ہالاستے زیرس، ”ای میبو گیالپو حضرت داؤد ّی اولاد اینّاہے کابوا نگاتانگون ثونگستے یود؟“
24اِین نانگ فریسی پاگونّی تیبو تشورّاچیگ زیرس، ”بیلزیبول ردودگونّی گوبے کھوا ردودگون پھینگچیسّی کھیود تانگستے اینوگ۔“
25کھونگونی سامبا نگانپابو حضرت عیسیٰ سی کھیینتے مولس، ”گیالثیدّی نانّگا یودکھانگون تھونتے مادوگنا تیبو میدکھان چھین، یانگ گیالسا یا نانگتشانگسجیکّی میگون نولاین دوگنا تیگون میدکھان چھین۔ 26کالتیس شیطانی شیطان پھینگنا، کھوے کھورانگی گیابگالّا نولتے اینوگ، تینے کھوے گیالثیدپو کازوگی لوسین؟ 27یانگ کالتیس نگے ردودّی گوبا بیلزیبول گیُودتے ردودگون پھینّگادنا تینے کھیوجے لوبٹوگسگونّی سو گیُودتے ردودگون پھینّگانوگ؟ تیبویپھیا کھونگونی کھیوجے زیرکھانبوا سکیون رجود چوین۔ 28اِین نانگ کالتیس نگے خُدے رُوح گیُودتے ردودگون پھینّگادنا تینے کھیوجیکا نامکھے گیالثید لیب تشارتے این۔ 29سوانگ می شیدچانجیکّی کھانگپے نانّگا جُوگستے کھوے نور کو مینیان نامتشوگپا کھوے سنگونلا می شیدچانبو لدام میلدام، تینے کھوے کھانگپے نانّگا یودکھانّی نورگون کو نیا نین۔“
30”نگے چھوگسلا مانکھانگونّی نگا گیابگالّا چوانوگ، یانگ نگا نیامپو لاس چوستے ڈاسبو مالدومکھانگونّی، نگے لاسّی ڈاسبو یانچوگّانوگ۔ 31تیبویپھیا نگے کھیوجا زیرّاد، میگونّی دِیگپا چوکھان تانگ خُدا نلوق چھوکھانن تشانگما مُعافی سالّا زادِین، اِین نانگ ہلژخمہ رُوح لا نلوق چھوکھاننگونلا مُعافی مانے سالّا میزاد 32یانگ اِبنِ آدمی گیابگالّا زیرکھانگونلا مُعافی سالّا زادِین، اِین نانگ ہلژخمہ رُوح بوے گیابگالّا زیرکھانگونلا ای میتشیے ماتشاد یونگچیسچانّی میتشیے نانّگانگ مُعافی مانے میسال۔“
33”لچانگما زانگپو اینّا تیبوا کھازاس زانگپو سمینین، یا لچانگما نگانپا اینّا تیبوا کھازاس نگانپا سمینین۔ لچانگما تیبوے ڈاسبوی کانے شیسّانوگ۔ 34کھیرانگ فریسی پا، توگرولّی ٹھوگوگون، کھیوجا نگانپا اینین جیک کازوگی سپیرا زانگپو تانگین؟ سنینگ گنگستے لودکھانبو کھانے بینّگانوگ۔ 35می زانگپوے سیمس زانگپوے بانگدزودنے ڈاسبو زانگپو سمینّانوگ، یانگ می نگانپے سیمس نگانپے بانگدزودنے ڈاسبو نگانپا سمینّانوگ۔ 36اِین نانگ نگے کھیوجاگونلا زیرّاد، خُدے ٹھیمسچادّی جاگّا کھیوجے سنانگمید چوستے سپیرا زیرکھان ریرے تون خُدے سکوندونلا شادگوساین۔ 37چیازیرنا کھیوجے سپیرا زیرکھانگونّی کھیوجا نونگسمید یا نونگسچان یودکھانبو ستانین۔“
پیغمبر حضرت یُونسی ستاگس۔
38تینے شریعتی عالِم تانگ فریسی پا کھاچیگی حضرت عیسیٰ سی زیرس، ”لوبپونلے، نگاجا نیرانگی نگاجا خدے ستاگس شیگ ستون“
39کھونگی کھونگونلا لان سالس، ”میرابس نگانپا تانگ خُدا ایمان میدکھانگونّی نامکھے ستاگس ستون زیرّانوگ۔ اِین نانگ پیغمبر حضرت یُونسی ستاگس پو مانے کھونگونلا یانگ ستاگس شیگ میستان۔ 40کازوگی پیغمبر حضرت یُونس نییما سوم تانگ تشان سوم چھوی سیمسچان ما چھینموجیکّی ٹودپے نانّگا لوسکھان تسوگسلا اِبنِ آدمنگ نییما سوم تانگ تشان سوم سے نانّگا لوسین۔“
41”خُدے ٹھیمسچادّی جاگّا لانگس زانے نینوہ پاگونّی ای میرابسپوا چھادپا پھوگچیس اوسپا اینوگ زیرین چیازیرنا کھونگونی حضرت یُونسی چھوسشادکھانبو نیانتے، گیودپا چوس، ستوسّانگ یونا سانگ ٹاگّاجیک داگسا ایکا یود۔ 42ٹھیمسچادّی جاگّا لانگس زانے لو چھوگسّی گیالموے ای میرابسپوا چھادپا پھوگچیس اوسپا اینوگ زیرین چیازیرنا کھو گیالپو حضرت سُلیمانی شیسرابسّی سپیراگون نیانّالا ساچھا ما تھاگرینگنے یونگس، ستوسّانگ حضرت سُلیمانی سانگ ٹاگّاجیک داگسا ایکا یود۔“
43”میجیکّی نانگنے ردود بینگتے ستینگنے، ردود چھو میدسا ریستونگی نانّگا کھورین آرام چوسے ناسّا ژالتیانگ ماتھوب پاسانگ، 44کھوے کھورانّگا زیرّانوگ، ’نگا بینگتے یونگکھانّی تینّا میی نانّگا لوگستے چھین۔‘ تیرو لیبّاچیگ، تے ناسّابو ستونگپا تانگ لاگمو لدوستے چیتشانگما رانگرانگی مالّا بورتے تھونگ۔ 45تینے کھو سونگتے کھورانگی سانگ مانّگا نگانپا جان ردود ردون کھورانگ نیامپو کھیونگستے تینّا ناسّے نانّگا دُوگس، یانگ تے میی ناسلوگپو سنگونّی سانگ تھوا سونگ “
ای میرابس نگانپا نیامپوانگ تینّا ژوگس جیگسنانگچانّی ناسلوگ شاراین۔
حضرت عیسیٰ مسیح اما تانگ نوگون۔
46حضرت عیسیٰ مسیح میتشوگسلا جالتا سالین یود زانے کھونگی اما تانگ نوگون یونگستے، کھونّگا سپیرا تانگچیسلا کھونگون کھانگپے پھیلوگا ثونگستے دُوگس۔ 47میجیکّی کھونّگا زیرس، ”نیرانگی اما تانگ نوگون نیرانّگا سپیرا تانگچیسلا پھیلوگا ثونگتے دوگ۔“
48حضرت عیسیٰ سی کھوا لانسالس، ”سو اینوگ نگے اما تانگ نوگون۔“ 49لوبٹوگسگون چھوگسلا دزیگو ژُوگستے، ”یگون نگے اما تانگ نوگون این۔ 50نگے یاب خُدے نامکھے نانّگا جُوگستے یودکھانّی تھوگّونگس نانگجین چوکھانگون نگے اما تانگ سترِنگمو گُون این۔“
Tällä hetkellä valittuna:
مادتھا 12: LBJNT
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ladakhi Bible by The Love Fellowship is licensed under Creative Commons Attribution-ShareAlike 4.0 License.
