Matáyɔ 9
9
Yéso anamisi nkpa na nnaoemana
(Ɔna phɔtɔ Mkɔ 2.1-12; Lók 5.17-26)
1Yéso áokambea ka koko. Áojaba etǔ, áojúa ka ntanga-nji nɛkɛ#Ɔna Mkɔ 2.1; Mat 4.13. 2Ɓakpa ɓáombikia na nɗɔti n'aɗe k'éka. Ɓî Yéso aɔni ye ɓeekea á ɓakpa ndɔ, áongoɗea nkpa ndɔ gea: «Mukuamɔ, koɓangɛ mɔnɔ, ɓojeɗe nɛkɔ aímiki.» 3Ka ɓaɗundu-ɛɔphi ɓáɔyɔnga sɔsɔɓɛ aɓɔ te: «Nkpa nde aombóma Mokonga#Ɔna Ɓlw 24.16.»
4Ɓî Yéso aúbi ye kanisia aɓɔ, áogea te: «Ɓona kanisia ájeɗe ka nyɔngɔ eke suɓi á měma anu? 5Kema sina nde aáphǒ ka yɔnga te: ‹Ɓojeɗe nɛkɔ aímiki›, na yɔnga: ‹Ma! Ótambɛ!›? 6Ka gea ɓóúbɛ te, eme Muna-Nkpa, nena kɔkɔta á ima á ɓojeɗe ka mokonda ndee.» Mpɔ áongoɗea nkpa ndɔ te: «Ma, ɔ́bɛɗɛ eka nɛkɔ, ójɛ mɔtɛ-akɔ.» 7Nkpa ndɔ áoma, áoja mɔtɛ-akɛ. 8Mbenɔ nde usɛsɛ á ɓakpa ɓáɔni nyɔngɔ ndɔ, ɓáoɓá na kɔɓɔɓɔkɔ, ɓáombeba Mokonga ka opha á ɓakpa ɓukpɛkpɛ ɓíndɔ.
Yéso amɔphani Matáyɔ
(Ɔna phɔtɔ Mkɔ 2.13-17; Lók 5.27-32)
9Ka gǎ á Yéso, áɔmɔna nkpa moci n'aiki ka ntua á phendisaga á manjanja, ina akɛ: Matáyɔ. Yéso áongoɗea te: «Ómoɓea!» Matáyɔ áoma, áomɓea. 10Ɓî ɗátúoeaga k'éndu ndea Matáyɔ#Ɔna Lók 5.29, ɓaphendisigi-manjanja ɓásii, na ɓato á ɓojeɗe ɓáobika koika kimoci na yɛ na ɓagoigi nɛkɛ. 11Ai ɓî Ɓaphaisáyɔ ɓáɔni ɓó, ɓáǒúsia ɓagoigi nɛkɛ te: «Ka nyɔngɔ sina nde ngoisigi nɛnu aoeaga kimoci na ɓaphendisigi-manjanja na ɓato á ɓojeɗe#Ɔna Lók 15.1-2?» 12Ɓî Yéso aɔ́ki ɓó, áǒsikisia te: «Ɓakpa nde ɓánáosamba ɓáná na siki á nsaku. Ɓunde ɓáosamba ɓáunge ɓána siki akɛ. 13Gǎni ɓóianegɛ nyɔngɔ nde Mokonga ɗáyɔngi te: ‹Nekondi měma á ngomi nna ɔphɛ́ɔ á ɓanyama#Ɔna Ɔsɛ́ 6.6› nga, kébiki k'aphe á ɔphana ɓato á ɓonjánja. Nebiki ndiu ka ɔphana á ɓato á ɓojeɗe.»
Músiɔ ka nyɔngɔ á ika kángá á eaga ka nyɔngɔ á mɛma á Mokonga
(Ɔna phɔtɔ Mkɔ 2.18-22; Lók 5.33-37)
14Cɔ, ɓagoigi ndea Yoáni-Mɓatisi ɓáombikia Yéso, ɓáomúsia te: «Ka nyɔngɔ éke nde ɓesu na Ɓaphaisáyɔ ɓeoikaga kángá á eaga ka nyɔngɔ á mɛma á Mokonga na ɓagoigi nɛkɔ ɓáná gǎkɛ ogea ɓo?» 15Yéso áǒsikisia te: «Ɓato-ɛ́kɛka ɓáikimbɛ mɔnɔ na ngomi na mǒko-ɛ́kɛka a kimoci na ɓɔ? Ɓɛɛndɔ! Ɓáikande kángá á eaga ka nyɔngɔ á mɛma á Mokonga mbenɔ nde ɓámphúiande mǒko-ɛ́kɛka ka ɔlɔ aɓɔ.
16Nna na nkpa nde aɔtɔka phopha bɔngɔ á kɛ̌kɛ na phaeka á bɔngɔ á kala nga, aoɓá n'agi ɓó, nnde á kɛ̌kɛ anyɔande nnde á kala. Nyɔɔka kau áɔɓá ángbó.
17Goto, ɓánáoɗukia divai á kɛ̌kɛ suɓi á mboso á kala nde ɓáɓɔngisigi na mpoko á nyama, mmbe abomokande, divai áoɗuukana. Akeni ndiu ɗukia divai á kɛ̌kɛ suɓi á mboso á kɛ̌kɛ. Kaɓondɔ, ɓáambande divai na mboso ánjá.»
Yéso anamisi nke na jujúkisa á nseka ka kukuwa
(Ɔna phɔtɔ Mkɔ 5.21-43; Lók 8.40-56)
18Mbenɔ nde Yéso, ɗáɔyɔnga na ɓagoigi ndea Yoáni, mɔkɔta moci Moyúda áombikia, áongbukia muanku, áongea te: «Nseka nɛmɔ aɗusukani tɔ kɛ̌kɛnde. Bika óbisɛ njaga akɔ gǔ akɛ na aendande.» 19Yéso áoma, áomɓea kimoci na ɓagoigi nɛkɛ.
20Nke moci mmbé ɗátúotambaga na kukuwa-ɛ́yɛna ka ɓasaga nkama na iɓɛ (12), áombikia Yéso ɓí na ngɔngɔ, áodunga ɛɔkɔ á bɔngɔ ndea Yéso. 21Nga, ɗáɔyɔnga sisakɛ te: «Aoɓá na nedungi tɔ ka bɔngɔ nɛkɛ, ámbé neamande.» 22Yéso áǒpháia mbusa, áɔmɔna, áongoɗea te: «Nseka nɛmɔ, bisa měma akɔ, ɓeekea nɛkɔ akoamisi.» Ka mbenɔ ndɔ tɔ, nke ndɔ áoama.
23Ka jua á Yéso k'éndu ndea mɔkɔta ndɔ, áǒdonda ɓasugu-mbengu na usɛsɛ á ɓakpa na ɓáagatani bíbí á gǎ úmba akɛ. 24Yéso áǒngoɗea te: «Tókani wani nga, nseka káku, aka tɔ̌.» Ɓáoikia tɛbɛa akɛ. 25Mbusa á usɛsɛ á ɓakpa júana na nsɛngɛ, Yéso áongia k'éndu, áondunga nseka ndɔ ka njaga, nseka áǒmesia. 26Mbinɔ ndɔ, áɔɛmba kekanga ndɔ bui.
Yéso aeamisi ɓakeíme-íme ɓaɓɛ
27Mbenɔ nde Yéso amɛi, ɓakeíme-íme ɓaɓɛ ɓáomɓea na ɓáokogaga gea: «Mosuko á Daúdi hoo, ósokuia phɔ́ ngomi ee!» 28Ɓî ajú ye, áongia k'éndu, ɓáɔsɛkɛɗa ka mpɛphɛ akɛ. Mpɔ áǒúsia te: «Ɓoɓeeki gea te nɛɔtɔka tɔtɔkisa nndɔ?» Ɓáonsikisia te: «Eya, Mɔkɔta!» 29Áobisa njaga akɛ k'íso aɓɔ, áogea: «Mokonga ágeɛ ka ɓenu ɓíndɔ ɓoɓeeki.» 30Mpɔ iso áǒkoɗokana. Yéso áɔ̌kɔkɔmɛa na nyɔngɔ gea: «Ɓókongoɗeɛ mɔnɔ nkpa.» 31Ɓâ ndiu oga kɔɛmbisa kema nde Yéso agi kekanga ndɔ bui.
Yéso anamisi kaúma
32Ɓî ɓakeíme-íme ɓáge ye, ɓáombikia Yéso na kaúma moci n'ana kukuwa á ɓansombo. 33Mbusa á Yéso ɓeaga á ɓansombo ndɔ, kaúma áokpanga yɔnga. Usɛsɛ á ɓakpa ɓáoyayama, ɓáɔyɔnga te: «Ɓɛ́kɛ́ɔnimbɛ mɔnɔ ɓende suɓi á Isilaɛ́li!» 34Ɓaphaisáyɔ ɓâ gǎkɛ ɔyɔnga te: «mɔkɔta á ɓansombo aámbé amophi Yéso ɓukpɛkpɛ á juanisa á ɓansombo#Ɔna 12.24.»
Yéso ana ngomi á ɓakpa
35Yéso ɗáɔtɔmba nji na ntanga-nji bui n'aǒgoisaga ɓakpa suɓi éndu á madondanɔ ndea Ɓayúda ka nyɔngɔ á Mokonga, n'aɔphɛa Mbino-Ánjá á koɓoamɛ, n'aoamisa etéte á ngobo na kiɗɔti bui. 36Ɗáǒkuia usɛsɛ á ɓakpa nde ɗéɓɔni ngomi nga, ɓakpa ndɔ ɗáɓáɛli, ɓáoɓá kángá ɓukpɛkpɛ ɓea ɓamɔgɔgɔ kángá á mɓondigi#Ɔna Mɔɔ 27.17; 1 Ɓam 22.17. 37Yéso áǒngoɗea ɓagoigi nɛkɛ te: «Ɗúngú aásii, ɓabɛɗanigi ɓákáɓiki gǎkɛ. 38Mɛmani Mokonga mɛna-ɗungu áetekɛ ɓaɓɛdanigi ɓuangbo ka ɗungua.»
Tällä hetkellä valittuna:
Matáyɔ 9: KMW
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2021, Wycliffe Bible Translators, Inc.
