Luke 9
9
Sése atchindege baate bɛndi ba lekumi na bɔli gu tɔse tsaange yiyibuɛ
1Sése àkokese baate bɛndi ba lekumi na bɔli, nàvɛde bɔ bungudi na butome bua funze matɛnge na bɛlese babéde. 2Ndɛ nàtchindege bɔ gu itɔse tsaange Buyumune bua Nzɛmbi na gu bɛlese babéde. 3Ndɛ nàlɛle bɔ ndé: «Béne leyɛnde, ya bɔngani pɛti ikumbe. Mutunge vɛ. Pɛnge vɛ. Biéle vɛ. Badɔle vɛ. Mutu mutu abɔnge lengoyi ndile lemochi. 4Nzɔ yibakiyake béne, tsagelani gutsɔ yɔ nachi béne lekimate va kɛse muɛne. 5Bole buni bakibise béne yake, kobelani mufundu wulidi mu matɛmbi ma béne va béne lekimate gutsɔ musɛnge muɛne. Mu muɛse baate muɛne ti bɔ bàchide tchambe lelebi.» 6Baate ba Sése nibàyɛnde gu tɔse tsaange yiyibuɛ gutsɔ mala na bɛlese babéde.
Irodi amɔne page mu ndume a Sése yadunge
7Irodi Tétareke wàyumungu gu Ngalilé àyoge maambe ma Sése àsadenge, nàmɔne ka page. Muti baate bakɛ bàlɛlenge bo: «Sa Mbatise wuwàkuade niwubasoge?» 8Baate bakime nibàlɛlenge bo: «Eli wuwàkuade abasoge.» A bane na bɔ bo: «Mubigi a mabige ma Nzɛmbi mumochi vatsɔ bàbàkuade kɛti a kale abasoge.» 9Tɔ Irodi nàlɛle ndé: «Sa Mbatise ngɛ niwu mɛ lɛle mé bakɛse ndɛ va lekinge. Tɔ wu mɛ bayoge bàyambele maambe ma mu niute a ndɛ wunewu ka guni amate?» Ndɛ nàsagenge mɔme Sése. 10Baate ba Sése ba lekumi na bɔli bàmate gu ndɛ tchindege bɔ, bɔ nibàyole ndɛ musame a maambe motchi ma bɔ bàsade. Sése àbɔnge baate bɛndi, bone a bɔ nibàyɛnde va itchige cha lepémbe va kɛse musɛnge wubàtɛdenge Bétsayida. 11Baate mvuabɔvɛ bàyoge bo Sése amayɛnde, nibàduke ndɛ. Sése àyake bɔ, nàlɔngese bɔ maambe ma Buyumune bua Nzɛmbi na bɛlese baate bàbàbade na bibéde. 12Va mavivinde ma buchi, baate ba Sése bàkukule va pédi a ndɛ, nibàlɛle ndɛ bo: «Lɛle baate banebe bàyɛnde mu mala na mu bitchige bia va kɛse yineyi gu sage bitchige bia lase na biéle bia tchade. Muti bése a béne va itchige cha legɛngi lelidi.» 13Sése nàlɛle bɔ ndé: «Béne muɛne, vɛdani bɔ biéle bia tchade.» Tɔ bɔ nibàkale ndɛ bo: «Bése lelidi ndile na mapɛ mataane na batchui bɔli. Wɛ tɔnde atɔnde wo bése leyɛnde gu sombe biéle bia baate banebe botchi?» 14Lerange la baate muɛne àbade mitochini mitaane mia babagele. Sése nàlɛle baate bɛndi ndé: «Tsagesani bɔ makumi mataane mataane va itchige.» 15Baate ba Sése nibàtsagese bɔ. 16Sése àbɔnge mapɛ mataane na batchui bɔli, àchimbele mise gu yulu, nàgabese malumbi gulidi Nzɛmbi mu biéle muɛne. Ndɛ bokele lepɛ, nàvɛde baate bɛndi ba lekumi na bɔli mu kabele baate. 17Baate botchi bàtchade, nibàyotege. Tige a biéle yiyàsale, niyàbase lekumi la mapondji na mapondji mɔli.
Piɛre achilele ndé Sése ni Mupotili a baate
18Letsuge lemochi va Sése àbɔndenge Nzɛmbi va itchige cha lepémbe bone baate bɛndi ba lekumi na bɔli, ndɛ nàdume bo ndjide ndé: «Baate mɛ na baloge?» 19Baate bɛndi nibàkale ndɛ bo: «Baate bakɛ batase bo wɛ Sa Mbatisete. Bakime bo wɛ Eli. A bane bo wɛ mubigi a maambe ma Nzɛmbi wuwàkuade kɛti akale abasoge.» 20Sése nàbàfule bo ndé: «Tɔ béne, béne mɛ kana laloge?» Piɛre nàkale ndɛ ndé: «Wɛ ni Mupotili a baate wu Nzɛmbi atchindigi.» 21Sése nàchigese bɔ ndé: «Yadungesani tchambe muɛne.» 22Ndɛ nàlɛle bɔ ndé: «Mɛ Wuwàbɔnge ndjime a baate, mɛ mɔne mimbɔnde mvuamiɔvɛ. Bivonde bia bachife na bivonde bia bavédi ba malage na basupili ba mangidi ma Nzɛmbi, bakabele mɛ kase mu bome mɛ. Mɛ kuade. Tsuge yɔli yiviɔge, mu lamutate mɛ kasoge.»
Uduke gua Sése
23Sése àmane yambele, nàlɛle baate botchi ndé: «Mutu atɔnde kémbe nɛme, apatamene maambe ma mu niute a ndɛ. Tsuge yotchi abade wuwakoge mu mɔne mimbɔnde. Tsɔvane akakémbe nɛme.» 24Mutu wuwatɔnde fuade moyi mu bungudi buɛndi ndɛ muɛne, návide moyi a ndɛ. Tɔ mutu wuwavide moyi a ndɛ mu mɛ, náfuade moyi wa mubunamubu. 25Mutu abage buchine bua bulɔnge bunebu, mane akavide moyi a ndɛ, tsɔnge kana abage? 26Ti mutu amɔne tsoni a mɛ Wuwàbɔnge ndjime a baate, na ya mabige mɛme, va mɛ káyáde gutsɔ buyumune buɛme na bua Taate a mɛ na bua batome bɛndi ba buyimbe ba gu yulu, mɛ nɛme mɛ nimɔne tsoni a ndɛ. 27Mumbuli mɛ lɛle béne mé: «Vatsɔ béne botchi balelidi vaneve, bakɛ básákápákuade Buyumune bua Nzɛmbi pamɔne vɛ.»
Sése bone a baate bɛndi ba batate gu yulu mukɔnge
28Sése àmane maambe muɛne motchi yambele, tsuge tsaambe iviɔge, mula pɔɔmbe, àbɔnge Piɛre, Sa na Sake, nàyɛnde gu yulu mukɔnge gu bɔnde Nzɛmbi. 29Va Sése abɔndenge, lebunze lɛndi legɛle ndjime, biluɛti biɛndi nibiàyingegenge. 30Avakinava baate bɔli bàyambelenge na Sése. Baate muɛne Muyise bone Eli. 31Bɔ gutsɔ buyimbe bua Nzɛmbi bàbade. Bɔ maambe ma buni Sése ákuanise gu Sérusalɛme tchambe le Taate a ndɛ atchindege ndɛ gu sade bàyambelenge. 32Piɛre bone a bambɛgi bɛndi bàbade bamadɔne na chɔle. Bɔ bàsoge, nibàmɔne Sése àyingengenge gutsɔ miyumune buɛndi na baate bɔli bàbade na ndɛ. 33Muyise bone Eli bàgabege, Piɛre nàlɛle Sése ndé: «Bése a béne buédi mu tsagele vaneve. Bése letonge bakɔvége batate. Mumochi wa wɛ. Mumochi wa Muyise. Awone wa Eli.» Piɛre asàditege maambe ma ndɛ yàmbelenge vɛ. 34Piɛre àbade kiyambele ayambele, lebungi lekolene nilàdibege bɔ. Bɔɔme nibuàkuate baate ba Sése. 35Lebungi ledibe bɔ, bɔ nibàyoge ndage yiyàlɛle ti: «A wunewu ni Muane wa mutéme wu mɛ tɔnde. Yogelani ndɛ.» 36Bɔ bàyoge ndage muɛne, bàmɔne Sése ndile ka ndɛ pénze, nibàbade ka lingii. Bɔ basàyole musame a maambe ma bɔ bàmɔne gulidi baate vɛ.
Sése abɛlese muane wu letɛnge lapapene
37Buchi bukiade, Sése bone baate bɛndi ba lekumi na bɔli bamate gu yulu mukɔnge, piti a baate mvuayɔvɛ niyàkɛsele bɔ. 38Vatsɔ piti a baate, lebagele nilàbuamege ndé: «A Mulongichi kɔkɔle a wɛ, mɔne tinge a muane a mɛ lɔ lekike.» 39Letɛnge lepapane ndɛ, ndɛ rage, afule makime, ayambege, mafudi makapole ndɛ gutsɔ muniɔ. Letɛnge muɛne lamuɛse ndɛ mimbɔnde, lɔ mu mate mu niute a ndɛ kapage. 40Mɛ bɔnde baate bawɛ mu funze letɛnge muɛne, bɔ basatugi lɔ funze vɛ. 41Sése nàlɛle bɔ ndé: «A baate babavɛ na lebiɔge, na bangua mitéme bunɔne banebe, mɛ mubunamubu mɛ kábábade na béne mu sɔlele pɔɔnde a maambe ma béne lekɛse lotchi?» Sése nàlɛle lebagele muɛne ndé: «Tsuale mɛ muane a wɛ.» 42Lebagele lekukele na muane va busu bua Sése, letɛnge letchindege muane muɛne va tɔtɔ, ndɛ nàyambege. Sése akambege letɛnge, àbɛlese muane, nàgabese ndɛ gulidi taate a ndɛ. 43Baate botchi nibàgémbe va bɔ bàmɔne bungudi bua Nzɛmbi.
Sése abayambele na baate bɛndi mu tchambe la leku lɛndi
Baate botchi nibàbàgémbe va bo bàmɔnenge maambe ma Sése àsàdenge. Avakaniva Sése àlɛle baate bɛndi ba lekumi na bɔli ndé: 44«Yogani buébuédi tchambe le mɛ ki lɛle béne. Baate bakabele mɛ Wuwàbɔnge ndjime a baate kase.» 45Tɔ baate bɛndi bàsàtchikese tchambe le ndɛ lɛle bɔ vɛ. Muti ndɛ sàpandele bɔ lɔ vɛ. Bɔ nibàmɔne bɔɔme mu fule Sése tchambe muɛne.
Baate ba Sése bakuate page mu yabe wulidi ivonde
46Letsuge lemochi, baate ba Sése nibàkuate page mu yabe wuwàbade ivonde va pfuɛchi a bɔ. 47Muti Sése àyabenge mataase ma bɔ bàbade na mɔ gutsɔ mitéme, àbɔnge muane a ngɛbe, àtɛmese va pédi a ndɛ, 48nàlɛle bɔ ndé: «Mutu wuwachinge muane a ngɛbe wunewu mu ndoge a mɛ, ndɛ mɛ achingi. Namoni a mutu wuwachinge mɛ, amachinge Taate a mɛ wuwàtchindege mɛ. Tɔ mutu wuwakolene va pfuɛchi a béne, ndɛ ni wulidi ivonde.»
Mutu wuwasade maambe ma béne lasade ndɛ mudige a béne
49Avanekaniva Sa àlɛle Sése ndé: «Bése lemoni mutu afunze matɛnge mu tate gua ndoge a wɛ. Tɔ bése nilekubichi ndɛ muti ndɛ salidi gutsɔ lekabe la baate babakémbe na wɛ vɛ.» 50Sése nàkale bɔ ndé: «Mutu wuwasade bimuile mu tate gua ndoge a mɛ, ya kubusani ndɛ. Mutu avɛbɛle béne, ndɛ mudige a béne.»
Sése ayɛnde gu Sérusalɛme
51Sése nàyɛnde gu sérusalɛme, muti lekɛse lɛndi lagabege gu yulu àbade kakukule lakukule. 52Avanekaniva ndɛ tchindege baate bɛndi gu busu. Bɔ bàyɛnde, nibàsote gu bole bua bichi samari gu vange leyade lɛndi. 53Tɔ bichi samari bàsàyake ndɛ vɛ. Muti Sése bone baate bɛndi gu sérusalɛme bàyɛndenge. 54Sake na Sa bàmone tchambe muɛne, nibàlɛle Sése bo: «A Kumu, wɛ tɔnde wo bése lefule Nzɛmbi atchindege mbuage mu guduse baate muɛne?» 55Sése àgɛlese mise gu bɔ bàbade, àkambege bɔ, nàlɛle bɔ ndé: «Béne lesayɛbi Lenioni le latome béne mu sade tchambe muɛne vɛ. Mɛ Wuwàbonge ndjime a baate mɛ sàyade gu guduse baate vɛ, tɔ mɛ yàde ndile mu fuise baate moyi.» 56Avakaniva bɔ bàyɛnde gu bole bukime.
Utamene gua maambe motchi mu duke Sése
57Va Sése bone a baate bɛndi bàyɛndenge, mutu nàlɛle Sése ndé: «Mɛ wɛ mɛ tɔnde duke mu bitchige biotchi bi wɛ yɛnde.» 58Sése nàkale ndɛ ndé: «Bakumbi na miléke. Baniodi na manzɔ ma bɔ balase gutsɔ mɔ. Tɔ mɛ Wuwàbɔnge ndjime a baate mɛ salidi na nzɔ ya lase vɛ.» 59Sése nàlɛle mutu mukime ndé: «Duke mɛ.» Mutu muɛne nàkale Sése ndé: «Kumu chingese mɛ mɛ payɛnde gu kunde taate a mɛ.» 60Sése nàkale ndɛ ndé: «Niagani baate babaniambene gu ngule Lenioni bakunde bamvumbi ba bɔ. Tɔ yɛnde gu tɔse Tsaange Buyumune bua Nzɛmbi.» 61Mutu mukime nàlɛle Sése ndé: «Kumu mɛ tɔnde kémbe nawɛ.Tɔ chingese mɛ mɛ payɛnde gu yagene na ngage a mɛ.» 62Sése nàkale ndɛ ndé: «Mutu ti atɔnde kémbe nɛme, mane akabagabese mutéme mbise mu maambe ma bulɔnge bunebu, ndɛ salidi wuwakoge mu yɛnde gu tɔse Tsaange Buyumune bua Nzɛmbi vɛ.»
Tällä hetkellä valittuna:
Luke 9: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
