Luke 6
6
Sése ni Kumu letsuge lebavome
1Letsuge lebavome, Sése bone baate bɛndi nibàviɔge gutsɔ manungi ma baputu. Baate bɛndi bàtɔle baputu, bàyobele, nibàtchade. 2Baate ba lebuli la bafarichi nibàlɛle bɔ bo: «Letsuge lebavome, béne muki lasade tchambe le mangidi ma Muyise ma lége bése a béne mu sade?» 3Sése nàkale bɔ ndé: «Béne lesarange gutsɔ ichange cha mabige ma Nzɛmbi tchambe le Davide àsade bone a baate bɛndi va nzale yàkuate bɔ vɛ?» 4Davide àningele gutsɔ itini cha nzɔ Nzɛmbi cha buyimbe, àbɔnge mapɛ màbàvɛdenge lelage gulidi Nzɛmbi, nàtchade bone a baate bɛndi. Baate bàbade na butome bua tchade mapɛ muɛne ndile bavédi ba malage ngane a buni mangidi ma Muyise malɛle. 5Sése nàbàlɛle bɔ ndé: «Mɛ Wuwàbɔnge ndjime a baate mɛ ni Kumu letsuge lebavome.»
Sése aboge lebagele ngua gɔgɔ chavɔle
6Letsuge lekime lebavome letɔde, Sése àningele gu nzɔ yibàbɔndenge Nzɛmbi, nàlɔngese baate. Gutsɔ nzɔ muɛne niguàbade na lebagele lelàbade na gɔgɔ cha mbagele chavɔle. 7Basupili ba mangidi ma Nzɛmbi na baate ba lebuli la bafarichi nibàkengese Sése mu mɔne ti mu letsuge lebavome ndɛ bɛlese mutu muɛne. Bɔ lesoge la kutule Sése tchambe va mise ma bivonde bàsàgenge. 8Tɔ Sése wuwàyabenge mataase ma bɔ, nàlɛle lebagele muɛne ndé: «Tɛmene, yade va mise ma baate.» Lebagele muɛne letɛmene, nilàbade ka mutɛle. 9Sése nàlɛle basupili ba mangidi ma Nzɛmbi na baate ba lebuli la bafarichi ndé: «Mɛ ndjide ndile imochi mɛ dume béne. Tchambe lelebuɛ lebakitoge sade letsuge lebavome lini? Sade gua lebuɛ voki sade gua lebi? Nafuise gua mutu moyi na bome gua ndɛ, tchambe lelebuɛ lini?» 10Sése àmane kɛngese baate muɛne botchi, nàlɛle lebagele muɛne ndé: «Sokele gɔgɔ chawɛ.» Lebagele muɛne lesade buni Sése àlɛle, gɔgɔ chɛndi nichàbɛlege. 11Kéchi yikuàte basupili ba mangidi ma Nzɛmbi na baate ba lebuli la bafarichi, bàyambele pfuɛchi a bɔ muɛne na bɔ muɛne, nibasàge lesoge la bome Sése.
Sése asɔle baate bɛndi ba lekumi na bɔli
12Vayulavane, Sése nàkome gu yulu mukɔnge gu bɔnde Nzɛmbi. Butsuge botchi ndɛ ndile bɔndenge. 13Va makiaki ma buchi, Sése àkokese baate, asɔle lekumi la baate na baate bɔli va pfuɛchi abɔ, nàlɛle bɔ ndé: «Béne ka baduki bɛme.» 14Mandoge ma baate muɛne ni maneme: «Chime wu ndɛ béndelenge ndé Piɛre. André, mugɛge a Piɛre na Sake na Sa na Filipe na Batélemi. 15Matié. Tɔme. Sake wa muane a Alefé. Chime wuwàsagenge lesoge la pɔtele itsuku chɛndi, 16Sude muane a Sake na Suda Isekariɔte wuwàkabele Sése kase.»
Sése alɔngese baate na bɛlese babéde
17Sése àkolene mukɔnge bone a baate bɛndi, bàtɔde va itchige cha idɛde, nibàtɛmene. Va itchige muɛne, ndɛ nàbakese baate bɛndi bakime na piti a baate mvuayɔvɛ yiyàmate va kɛse a Sudé na gu Sérusalɛme na gu misɛnge mia va tunge a nzɛli a Tire na Chidon. 18Baate muɛne gu yoge maambe ma Sése àlɔngesenge na mu bɛlese ma niute ma bɔ bàyade. Sése àpose matɛnge màmàyongesenge baate maniute, bɔ nibàbɛlege. 19Baate botchi nibàsagenge bɛmbe Sése mu bo bungudi bubulidi na ndɛ buni bɛlese bɔ.
Baate ba ngua misaange na baate ba ngua mutchime
20Sése àkɛngese baate bɛndi, nàlɛle bɔ ndé:
«Buédi gulidi béne baate babakolene.
Béne lemabage Buyumune bua Nzɛmbi.
21Misaange gulidi béne baate babakuade na nzale.
Béne nilebage biéle mvuabiɔvɛ bibikáfuise béne moyi.»
«Misaange gulidi béne baate balaléle.
Béne nilekuade na ngɔmbe.»
22Misaange gulidi béne ti baate babɛlebéne,
bavɔngele na toge béne, na posele béne maambe mamabi,
mu mɛ Wuwàbɔnge ndjime a baate.
23A bone nibu bakage ba baate muɛne bàtchisenge babigi ba mabige ma Nzɛmbi chigi.
Kuadani na ngɔmbe va maambe muɛne mákáyadele béne.
Béne nilebage musɛnde gu mboge a Nzɛmbi gu yulu.
24«Tɔ tinge gulidi béne bichine.
Muti béne lemabage mia béne mitsamene.»
25Tinge gulidi béne baate balemayotege maambe ma bulɔnge bunebu.
Béne nilekuade na pinde a nzale a maambe motchi.
Tinge gulidi béne baate balasɛbe.
Béne nilebade nimene, naleléle makɔnde.
26Tinge gulidi béne ti baate bakakese béne.
A bone nibu bakage ba baate muɛne bàkakesenge baate bàbàkutenge bɔ bo bɔ babigi ba mabige ma Nzɛmbi.
Tɔndani bambɛne ba béne
27Tɔ mɛ ka béne balayoge maambe ma mɛ yambele maneme mɛ lɛle mé, mɔnani tinge bambɛne ba béne. Sadani mabuɛ gulidi baate bababɛle béne. 28Vɛdani misaange gulidi baate babachibele béne. Bɔndani Nzɛmbi mu baate babasadele béne maambe mamabi. 29Mutu agobe wɛ lebɔte mu leboke la ngule a mbagele, vɛde ndɛ nala ngule a kase. Mutu abɔnge lengoyi lawɛ la yulu na imbabe, vɛde ndɛ namoni lengoyi la kɛti.
30Vɛde pɛti mutu wuwavɔnde wɛ bi wɛ lidi na biɔ. Mutu abɔnge mabuɛ mawɛ, yabafule ndɛ mɔ. 31Maambe mamabuɛ ma béne latɔnde ti baate basadele béne, sadelani na bɔ maambe muɛne. 32Béne ti latɔnde ndile baate babatɔnde béne, musɛnde kawuni béne lekábage? Namoni a baate bababi nabɔ balidi na letɔnde pfuɛchi abɔ muɛne na bɔ muɛne. 33Béne ti làsade mabuɛ ndile gulidi baate babàsadele béne mabuɛ, musɛnde kawuni béne lekábage? Baate bababi nabɔ basade tchambe muɛne. 34Béne ti lasɔmbichi baate badɔle na letase lati bɔ bátoge béne bɔ gabese, musɛnde kawuni béne lekábage? Baate bababi na bɔ basade matsombi pfuɛchi abɔ muɛne na bɔ muɛne mu bo bagabese bɔ lendji la badɔle lebasombichi bɔ. 35Tɔndani bambɛne ba béne. Sadani bɔ mabuɛ. Béne le sombichi bɔ badɔle, yabàkuadani na tsɔnge ti bɔ bàgabese béne bɔ. Nzɛmbi wulidi gu yulu nàvɛde béne musɛnde wu munéni. Béne vane nilebade baane bɛndi. Muti Nzɛmbi alidi na tinge a baate bababi na babavɛ na mutase. 36Mɔnani tinge a baate ngane a bu Taate a béne Nzɛmbi amɔne bɔ tinge.
Niagani bambɛgi mambɛle bome
37Yabomani baate mambɛle. Nzɛmbi na ndɛ ákábome na béne mambɛle. Yatchisani bambɛgi chigi. Nzɛmbi na ndɛ ákátchise na béne chigi. Chindelani bambɛgi ba béne maambe mabɔ basadele béne mamabi. Nzɛmbi na ndɛ akachindele béne maambe mamabi ma béne lasade. 38Vɛdani bambɛgi bi bɔ balidi na nzale. Nzɛmbi na ndɛ návɛde béne bi béne lelidi na nzale. Nzɛmbi avɛde béne mabuɛ mvuamɔvɛ nachi mɔ makilokege. Buni béne lavɛde bambɛgi, a bone nibu Nzɛmbi akivɛde béne. 39Sése nàbàlɛle bɔ ndé: «Mupɛpidi, atoge lage mupɛpidi na ndɛ ndjile?» Tchavɛ. Mbégi bɔ babɔli bapatege gutsɔ lebéle. 40Sése nàbàlɛle bɔ ndé: «Mutu wubalɔngese maambe asalotele mulongichi a ndɛ vɛ. Tɔ mutu wubalɔngese maambe, ayabe mɔ, bone a mulongichi a ndɛ mulinge ka mumochi.» 41Sése nàbàlɛle bɔ ndé: «Wɛ muki wɛ mɔne ndile isɛsɛle chichilidi gutsɔ dise la muane a taate a wɛ. Tɔ wɛ lepɛyi lelidi gutsɔ dise lawɛ wɛ lɔ mɔne vɛ?» 42Ti wɛ samɔne lepɛyi lelidi gutsɔ dise lawe vɛ, wɛ kamuki wɛ lɛle muane a taate a wɛ wo yade mɛ mase isɛsɛle chichilidi gutsɔ dise lawe? A mutu ngua levédi wunewu, kɛtiatsomi pamase lepɛyi le lelidi gutsɔ dise lawe, tsɔvane wɛ mɔne buédi, wɛ kalɛle muane a taate a wɛ wo yade mɛ mase isɛsɛle chichilidi gutsɔ dise lawɛ.
Muti bayabe mu milonde miɛndi
43Sése nàbàlɛle bɔ ndé: «Muti wu mubuɛ asabote milonde mimibi vɛ. Namoni a muti wu mubi asabote milonde mimibuɛ vɛ.» 44Muti bayabe ndile mu milonde mi ndɛ bote. Baate bachitoge tɔle ninge gutsɔ lekuake la bakiɛme vɛ. Tumbi nayɔ basatɔle mu mbate bifundi vɛ. 45Mutu wuwulidi na maambe mamabuɛ gutsɔ mutéme, apose ndile maambe mamabuɛ. Namoni a mutu wuwulidi na maambe mamabi gutsɔ mutéme, apose ndile maambe mamabi. Maambe mabase gutsɔ mutéme, muniɔ akapose.
Manzɔ mɔli
46Maambe ma mɛ lɛle béne, béne mɔ sade vɛ, béne mɛ kamuki latɛde Kumu? 47Mɛ ka béne ayole musame mu muɛse béne ifuɛni cha mutu wuwayade gulidi mɛ. Ayoge mabige mɛmɛ, akasade buni mɔ malɛle. 48Ndɛ ngane a mutu wuwabande nzɔ tonge alidi. Aboke mikise mimiadɔnge, abakese lemani, akatonge nzɔ va yulu a Lɔ. Mvulu anɔge, tonde yiyade, mingébe migobe mu mbate a nzɔ, yɔ bolege vɛ. Muti ndɛ yɔ va yulu a lemani atungi. 49Tɔ mutu wuwayoge mabige mɛmɛ, ndɛ maambe ma mɔ malɛle sade vɛ, ndɛ vane ka ngane a mutu wuwatonge nzɔ va yulu a tɔtɔ ndɛ mikise pa boke vɛ alidi. Mvulu anɔge, tonde yiyade, mingébe migobe mu mbate a nzɔ, yɔ yikapanzege yotchi.
Tällä hetkellä valittuna:
Luke 6: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
