Luke 22
22
Bivonde bia gade kunde ya bome Sése
1Mukungi wubàtchadenge mapɛ mabavɛ buge na bikumbe bibianzanzese mɔ, wubàtɛ Pake àbade ka bɛle. 2Bivonde bia bavédi ba malage na basupili ba mangidi ma Nzɛmbi nibiàkokene mu sage lesoge la bome Sése, tɔ bɔ nibàbade na bɔɔme bua baate.
3Diabele nàvɛde Suda wubàbéndelenge bo Isekariote, wuwàbadenge va pfuɛchi a baate ba Sése ba lekumi na bɔli mataase mamabi. 4Suda àtɛmene, nàyɛnde gu mboge bivonde bia bavédi ba malage na bivonde bia baate bibiàkɛlenge nzɔ Nzɛmbi gu kute kunde a lesoge le ndɛ mbé kabe Sése na bɔ. 5Bivonde bikuade na ngɔmbe mvuayɔvɛ, nibiàvɛde ndɛ badɔle. 6Suda àchinge, nàsagenge ndile ka lesoge la kabe Sése gu musuɛge.
Sése atchindege baate bɛndi gu vange mukungi a Pake
7Letsuge la mukungi a Pake wubàtchadenge mapɛ mabavɛ buge na ikumbe chichanzanzese mɔ, na lebàbomenge baane tabe ba mandɔmbe letɔde, 8Sése àtchindege Piɛre na Sa, nàlɛle bɔ ndé: «Yɛndani gu lambe biéle bia mukungi a Pake.» 9Bɔ nibàfule ndɛ bo: «Bése biéle muɛne guni layɛnde gu lambe?» 10Ndɛ nàkale bɔ ndé: «Va béne lekisote gutsɔ musɛnge, béne lɔ labuane na mutu apape tsobe a maambe. Dukani mutu muɛne na gutsɔ nzɔ yi ndɛ ki ningele. 11Avane béne lekáfule kumu a nzɔ ti, Kumu ndé, itini cha nzɔ chi ndɛ kitchade mukungi a Pake bome a baate bɛndi guni ilidi? 12Ndɛ lɔ namuɛse béne itini cha nzɔ chiyinéni chichilidi gu yulu na bikumbe biotchi bi béne lekibade na nzale a biɔ.» 13Bɔ bàyɛnde, nibàbakese maambe motchi ndile ngane a buni Sése àlɛle bɔ. Avanekaniva bɔ bàlambe biéle bia mukungi a Pake.
Lekɛse la tchade ilambe cha Kumu
14Lekɛse la tchade ilambe letɔde, Sése bone a baate bɛndi nibàtsagele mu tchade. 15Ndɛ nàlɛle bɔ ndé: «Mɛ napamɔne mimbɔnde, mɛ bédi ndile na nzale tchade ilambe chinechi na béne. 16Mumbuli mɛ lɛle béne mé, mɛ chibatchade ilambe muɛne vɛ kange nachi maambe muɛne motchi mákákuani gu mboge a Nzɛmbi gu yulu gu ndɛ yumu.» 17Ndɛ bɔnge ibungu cha malame, agabese malumbi gulidi Nzɛmbi, nàlɛle ndé: «Bɔngani ibungu cha malame chinechi niɔdani.» 18Mumbuli mɛ lɛle béne mé, bande lɔlɔ, kuange nachi Buyumune bua Nzɛmbi bukáyade mɛ sákábániɔde malame vɛ.
19Vayulavane ndɛ bɔnge lepɛ, agabese malumbi gulidi Nzɛmbi abokele lepɛ, akabele baate bɛndi nàlɛle bɔ ndé: «Lepɛ lineli, kani niute a mɛ yi mɛ kichindele mu mbate a béne. Lekɛse lotchi, sadengani tchambe muɛne mu bangelenge mɛ.» 20Bɔ bàmane tchade, ndɛ bɔnge ibungu cha malame àvɛde bɔ, nàlɛle ndé: «Ibungu cha malame chinechi, kani ndɛgi yanamanze yi Nzɛmbi agade mu ndjine a mɛ yiyikitsɔle mu béne. 21Tɔ mutu wukikabe mɛ kase na baate, va pfuɛchi a bése béne alidi. 22Muti mɛ Wuwàbɔnge ndjime a baate mɛ kuáde ngane a bu Nzɛmbi ndɛ muɛne àgade. Tɔ mutu wukikábe mɛ kase nábade na mutchime.» 23Avanekaniva baate bɛndi bàyambele pfuɛchi a bɔ muɛne na bɔ bo: «Mutu wukisade tchambe muɛne naa?»
Ivonde vatsɔ béne naa?
24Musɔse nàtubuge va pfuɛchi a baate ba Sése muti bɔ bàtɔndenge yabe mutu wuwàbade ivonde va pfuɛchi a bɔ. 25Tɔ Sése nàlɛle bɔ ndé: «Bakumu ba bulɔnge bunebu muɛsenge baate ba bɔ bayume va yulu a bɔ ndile mimbɔnde. Baate lɛlenge bɔ bo bɔ bachidi ba maambe mamabuɛ. 26Tɔ yasadani ngane a baate muɛne. Buédi ti wulidi ivonde vatsɔ béne abade ngane a muane a ngɛbe. Mutu wuwatɔnde bade ivonde, buédi ti ndɛ bade muséli a bambɛgi. 27Ivonde vatsɔ mutu wubavɛde biéle bia tchade na wuwavɛde ndɛ biɔ naa? Ivonde mé bombe wubavɛde biéle bia tchade? Tɔ mɛ vatsɔ béne mɛ ngɛ ngane a muséli mɛ lidi. 28Béne nibalebédi badige bɛme va maambe mamanɔne mayidili mɛ. 29Nimulɔ mɛ vɛde béne bukumu ngane a bu Taate a mɛ àvɛde mɛ. 30Bése a béne niletchade na niɔde itchige imochi gu yulu gu mɛ yumu. Béne niletsagele va makuange ma bukumu mu pase mipame mia baate ba bibande bia bichi Ichirayɛle bia lekumi na biɔli.»
Sése alɛle Piɛre ndé wɛ nitone mɛ
31Avanekaniva Sése àlɛle Piɛre ndé: «A Chime, a Chime, yoge. Diabele ka béne botchi akitchitse mitéme ngane a bu bakagele mise ma muréchi na bipupidi. 32Tɔ mɛ bondi Nzɛmbi mu wɛ Piɛre mu mé mutéme a wɛ asagabege mbise. Va wɛ kágabese mutéme gulidi mɛ, yitémbese na baane ba Taate a wɛ maniute.» 33Piɛre nàkale Sése ndé: «A Mulongichi, mɛ tchitse mɛ lidi mu mɔne mimbɔnde na mu kuade nawɛ.» 34Sése nàkale Piɛre ndé: «A Piɛre mumbuli mɛ lɛle wɛ mé, kɔke lɔlɔ napakɔkidi, lɔ wɛ tone mɛ matone matate wo mɛ sayɛbi ndɛ vɛ.»
Baate ba Sése bàsàkambe na ikumbe va ndɛ tchindege bɔ gu tɔse tsaange yiyibuɛ vɛ
35Vayulavane, Sése nàlɛle baate bɛndi ndé: «Va mɛ tchindege béne gu tɔse tsaange yiyibuɛ, mé yabɔngani pɛti ikumbe. Badɔle vɛ, pɛnge vɛ, bapɔnde vɛ, béne làkambe na ikumbe ti imochi gone?» Bɔ nibàkale ndɛ bo: «Bése lesàkambe na ikumbe ti imochi vɛ.» 36Avane Sése nàlɛle bɔ ndé: «Ka mutu wuwulidi na badɔle, akibonge. Mutu wulidi na pɛnge a ndɛ abɔnge. Mutu wuwavɛ na leyɛnge, asombese lengoyi lɛndi mu sombe leyɛnge.» 37Mumbuli mɛ lɛle béne mé buédi ti maambe màbàkome gutsɔ ichange cha mabige ma Nzɛmbi mu mɛ: «Bɔ bakéle ndɛ bo ndɛ mutu wu mubi. Muti maambe màbàkome gutsɔ ichange cha mabige ma Nzɛmbi mu mɛ, makuani tchitse.» 38Baate bɛndi nibàlɛle ndɛ bo: «A Kumu mayɛnge mɔli mome maneme.» Sése nàkale bɔ ndé: «Mayɛnge mama mɔli maneme ka tchitse.»
Sése abɔnde gu mukɔnge miti mi batɛde ba olivié
39Sése àpole, nàyɛnde gu mukɔnge a miti bibatɛde ba olivié ngane a buni ndɛ sàdenge na bukale. Baate bɛndi na bɔ nibàduke ndɛ. 40Sése atɔde va itchige muɛne, nàlɛle bɔ ndé: «Bɔndani Nzɛmbi achitese béne mitéme, Diabele akayade gu sɔge béne.» 41Sése àkagege na bɔ, àyɛnde mua vale, àsome mabɔnge, nàbɔnde Nzɛmbi ndé: 42«A Taate ti wɛ tɔnde, yachinge ti mɛ mɔne mimbɔnde. Yasade maambe ma mɛ muɛne mɛ tɔnde. Tɔ sade ndile ngane a bu wɛ muɛne wɛ tɔnde.» 43Avanekaniva tome a Nzɛmbi wa gu yulu àyade va Sése àbade gu témbese ndɛ niute. 44Bɔɔme bukuate Sése, ndɛ nàbɔnde Nzɛmbi na bungudi bua lotele. Lerogene lɛndi nilàtsɔlenge va tɔtɔ ka ngane a matɛngi ma ndjine.
45Ndɛ mane bɔnde, àtɛmene, nàgabege gu baate bɛndi bàbade. Ndɛ nàbakese bɔ balase maniute mavɔle mu tinge yi bɔ bàbade nayɔ mu ndɛ. 46Avanekaniva ndɛ lɛle bɔ ndé: «Béne chɔle muki lalase? Sogani, bɔndani Nzɛmbi achitese béne mitéme, Diabele akasɔge béne.»
Baate bayade gu kuate Sése
47Sése àbade ki na baate bɛndi àyambele, avanekaniva Suda, mutu wuwàbade vatsɔ baate bɛndi ba lekumi na bɔli bàbàkémbenge na ndɛ àyade na kɔngi a baate. Ndɛ kukule va pédi a Sése, nàsambene na ndɛ. 48Avanekaniva Sése àlɛle Suda ndé: «A Sude, ilémbe chi wɛ kabe Mɛ Wuwàbɔnge ndjime a baate ka mu sambene gua nɛme?» 49Baate ba Sése bàmɔne maambe muɛne bɔ nibàfule ndɛ bɔ: «A Mulongichi, bése lesɛke baate muɛne na mayɛnge?» 50Mutu mumochi vatsɔ baate ba Sése àbɔnge leyɛnge, nàkɛse letchui la muséli a ivonde cha bavédi ba malage la ngule a mbagele. 51Tɔ Sése nàlɛle baate bɛndi ndé: «Niagani bɔ basade buni bɔ muɛne batonde.» Sése àbɛmbe letchui la mutu muɛne, mutu muɛne nàbɛlege. 52Vayulavane Sése nàlɛle gulidi bivonde bia bavédi ba malage, na bivonde bia baate bibiàkɛlenge nzɔ Nzɛmbi na bivonde bia baate ndé: «Béne yade gulidi mɛ ka na mayɛnge na mibɔte ka ngane a wo mubongi béne leyade gu kuate?» 53Sabone, tsuge yotchi va bése a béne labédingi gu Nzɔ Nzɛmbi béne lesakuɛti mɛ vɛ. Tɔ yabani ti alineli ka lekɛse la béne na la bungudi bua maambe ma ifunde.
Piɛre atone Sése
54Bivonde bibiàkɛlenge nzɔ Nzɛmbi bikuate Sése, nibiàbéte ndɛ gu nzɔ ivonde cha bavédi ba malage. Piɛre wuwàbade mua vale, nàdukunge bɔ mu mambise. 55Baate bàdukuse mbuage va ndande mu yɔte, Piɛre na ndɛ àyade àbàkese bɔ, nàtsagele. 56Muséli wa mukaase àmone Piɛre àtsagele va ngule a mbuage, àyimene ndɛ buébuédi nàlɛle ndé: «Lebagele lineli ngɛ abédingi bone a ba Sése.» 57Tɔ Piɛre atone, nàkale mukaase muɛne ndé: «Mutu wu wɛ lɛle mɛ wone, mɛ sayɛbi ndɛ vɛ.» 58Mua mukule pése àvioge, mutu mukime àmɔne Piɛre, nàlɛle ndɛ ndé: «Wɛ na wɛ ngɛ wɛ kimbingi na lebagele lineli.» Piɛre nàkale ndɛ ndé: «Mɛ sayɛbi ndɛ vɛ.» 59Mua lekɛse levioge, mutu mukime nàchigese ndé: «Mutu wunewu ngɛ vatsɔ baate bàbàkimbingi na lebagele lineli àbédi, muti ndɛ muchi Ngalilé.» 60Piɛre nàkale ndɛ ndé: «Mɛ satchikese buni wɛ tonde lɛle vɛ.» Piɛre àbade ki yambele ayambele, tchitse kɔke nàkɔkidi. 61Sése àgɛlege, nàkɛngese Piɛre. Avanekaniva Piɛre àbangele lebige le Sése àlɛle ndɛ ndé: «Kɔke lɔlɔ napakɔkidi, lɔ wɛ tone mɛ matone matate.» 62Piɛre àmate va bɔ bàbade, àpole nàléle.
Bagɔdi babome Sése na toge ndɛ
63Bagɔdi bàbàkɛlenge Sése, nibàbome ndɛ na sɛbe ndɛ. 64Bɔ bagade ndɛ tsaande mu lebunze, nibàfule ndɛ bo: «Lɛle bése mutu wubumi wɛ.» 65Bɔ nibàposele ndɛ maambe mamabi mvuamɔvɛ na toge ndɛ.
Bivonde biapase mupame a Sése
66Buchi buàkiade na nguɛli, bivonde bia bachife, na bivonde bia bavédi ba malage, na basupili ba mangidi ma Nzɛmbi nibàkokene. Baate bàbàkɛlenge Sése, nibàbéte ndɛ va busu bua bivonde muɛne. 67Bivonde muɛne nibiàfule Sése bo: «Lɛle bése, wɛ kani Mutu wu Nzɛmbi àsɔle?» Sése nàkale bɔ ndé: «Mɛ lɛle béne maambe, béne lɔ lechichilele mɔ vɛ. 68Mɛ dume béne ndjide, béne lɔ lechikasele mɛ yɔ vɛ. 69Tɔ yabani ti, baande lɔlɔ mɛ Wuwàbɔnge ndjime a baate Mɛ ndile ka va ma mbagele ma Nzɛmbi wulidi na bungudi mɛ kitsagelenge.» 70Baate botchi nibàlɛle bo: «Wɛ ka Muaane a Nzɛmbi?» Ndɛ nàkale bɔ ndé: «Béne lemamane lɛle ti mɛ Muaane a Nzɛmbi.» 71Avanekaniva bivonde biàlɛle bo: «Bése a béne lesaséli na nzale bimoni vɛ. Bése muɛne lemamane yoge mabige ma ndɛ muɛne apuchi.»
Tällä hetkellä valittuna:
Luke 22: NZB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
