Mateo 8
8
Jesupa aida pará k'ɨdade bada jɨpada
Marco 1:40-45; Luca 5:12-16
1Jesú eyadepa edá cheside ẽpẽrarã chok'ará ichi k'aade cheepɨrɨsidama. 2Mãɨya bɨde ẽpẽra aida pará bɨ Jesumá chesima.#8:2 Jesú ewaride aida ara sãmaasã́ basi tachia k'awadawẽa p'anɨma. Maamina judiorãmá aba Tachi Ak'õrepuru p'ue jɨpa beepi basima. Número 12:9-12; 2 Reye 5:7. Mãɨ awara aba aidapa jitasira awara ãyá bɨpachidama. Levítico 13:45-46. Sĩraporode k'obeek'ari nãɨya idisima:
—Mɨ Chipari, pɨa k'ɨ̃ria bɨpɨra, mɨ p'ue jɨpai bɨma.
3Mãɨne Jesupa jua ɨ̃rɨ bɨrude jarasima:
—Mɨa mãɨya oo k'ɨ̃ria bɨma. ¡Jɨpa beese!
Ara mãɨne mãɨ ẽpẽra aida pará bada wẽpasima. 4Jesupa ichiá jarasima:
—Pɨ jɨpa beeda abaɨa jararãse. Mãɨpari p'aaremá wãse pɨ jɨpa beesit'a unumẽrá. Maapae ne tease Moisepa jarada jĩra.#Levítico 14:1-32. Mãɨya ẽpẽrarãpa pɨ piarã jɨpa beeda k'awadaipɨ.
Jesupa chi papaká bɨ pae pari mimiaparí jɨpada
Luca 7:1-10
5Maapae Jesú Capernaum p'uurudea wãsima. Mãma cheside Romanepema papaká berã chi mãɨrã chaarea ichimá chesima. Mãɨpa nãɨya chupuria idisima:
6—Mɨ Chipari, chi mɨ pae pari mimiaparí tiida bɨma. K'ak'ua minachia p'ua bɨẽra k'ɨdade sorek'ea bɨma.
7Mãɨne Jesupa jarasima:
—Ichi jɨpade wãipɨ.
8Maamina chi papaká berã chi mãɨrã chaarea bɨpa jarasima:
—Mɨ Chipari, mɨ ẽpẽra piawẽa bɨma, pɨ mɨ tede eda wãit'a. Maamina pɨ nãmaripa pedeasira, chi mɨ pae pari mimiaparí jɨpa beeipɨ. 9Ara mãɨ jĩra chi mɨ k'aepẽra atepe chaarea bɨpa jararut'a, mɨa ĩjãa baparima. Ichiaba mɨa jararut'a, chi mɨ juade papaká berãpa ĩjãa p'anaparima. Mɨa abaɨa wãpade arude, wãparima; mãɨnepa abaɨa chepade arude, cheparima. Ichiaba mɨ pae pari mimiaparia ne oopade arude, ooparima.
10Mãɨ ũriside Jesupa pia k'ɨ̃risiasima. Mãɨne ichi k'aade wã p'anɨrã́ jarasima:
—Piarã mãrá jararuma: nãɨ ẽpẽrapa minachia ĩjãa bɨ jĩra israel ĩjũanepemarã t'ãena aba pida unuk'ama. 11Mɨa mãrá jararuma: ɨmata ochiaparidepa mãɨnepa ɨmata baeparidepa mãɨ tuadepemarã chok'ará chedaipɨ. Mãɨrã tachi chõarãenapemarã Abrahán ome, Isá ome mãɨnepa Jacobo ome Pajãne Bɨpa ichidirã ichi juade ua bɨ nek'opataɨde suak'abari p'aneenaipɨ. 12Maamina Tachi Ak'õrepa ẽpẽrarã naa ua k'ɨ̃ria bada p'ãrionea ãyá jerek'oaipɨ. Mãma jẽa p'ananaipɨ mãɨnepa p'uapa k'ida k'ɨterrea p'ananaipɨ.
13Maapae Jesupa papaká berã chi mãɨrã chaarea bɨa jarasima:
—Tedea wãse. Pɨa ĩjãa bɨ jĩra mɨa ooipɨ.
Ara mãɨne papaká berã chi mãɨrã chaarea pae pari mimiaparí jɨpa beesima.
Jesupa Simón Pedro p'ak'õre jɨpada
Marco 1:29-34; Luca 4:38-41
14Maapae Jesú Pedro tedea wãsima. Eda wãside Pedro p'ak'õre k'ɨamiapa k'ɨdade bɨ unusima. 15Jesupa ichi jua t'õmarik'ari, mãɨ k'ɨa nɨbada tuusima. P'irabarik'ari ãchiá nek'opisima.
16K'iuk'ari ẽpẽrarãpa chok'ará jaore mietá pará be Jesumá enemeesidama. Mãɨne Jesupa ara jararupa chi jaore mietá ãarea ãyá jerek'oasima. Ichiaba k'ak'ua piawẽa berã ãarea jɨpa beepik'oasima. 17Mãɨyasima Tachi Ak'õre pari pedeaparí Isaíapa jarada jĩra. Nãɨya jarasima: «Tachi k'ɨdade beada ichia jɨpasima mãɨnepa p'ua beada ichia jõpisima».#Isaía 53:4.
Jesú ome wãnayá p'anana
Luca 9:57-62
18Jesupa ẽpẽrarã chi chok'ará ichi adu jũra nɨbɨ unusima. Mãɨ k'orea ichi ome p'ɨrrɨapataɨrã́ senia k'ĩaria wãnayane asima. 19Maamina wãnai naena Moisepa bɨda jarateaparí Jesumá chesima. Mãɨ ẽpẽrapa jarasima:
Jarateaparí, pɨ wãrumá mɨ pɨ ome wãipɨ.
20Jesupa ichiá jarasima:
—Et'erre k'oparí te pará bɨma mãɨnepa ĩpana te pará bɨma, maamina mɨ, chi Ẽpẽra Warra chi mãma k'ãi newẽa bɨma.
21Mãɨne aba ichi ome p'ɨrrɨa baparipa jarasima:
—Mɨ Chipari, pɨ ome wãi naena mɨ ak'õre itu t'ɨbaripise.#8:21 Waapẽarãmá, mãɨ ẽpẽrapa nãɨya jara bɨma: «Pɨ ome wãi naena, mɨa nɨi pia bɨma mɨ ak'õre k'ĩrawẽarunea».
22Jesupa ichiá jarasima:
—Mɨ ome chese. Itu bɨse, chi piudaadapa chi piudada t'ɨbaridamẽrá.#8:22 Piudaadapa chi piudada t'ɨbaridamẽrá. Jesupa piuda t'ɨbaridai k'orea jara bɨwẽma. Mãɨpari ɨtɨa bɨma, ichi ome wãi naena, ara ãchia k'ɨ̃ria p'anɨ jĩra oopachida k'orea.
Jesupa nãu, senia choma ome k'ĩup'eapida
Marco 4:35-41; Luca 8:22-25
23Maapae Jesú p'ãp'orrode batook'ari ichi ome p'ɨrrɨapataɨrã sida wãsidama. 24Mãɨya p'anɨne nãu minachia p'õat'ɨ nɨbeek'ari, p'usa minachia k'ĩruu nɨbeek'ari, pania p'ãp'orrode eda wã nɨbeesima. Mãɨmisa Jesú k'ãi basima. 25Mãɨpuru ichi ome p'ɨrrɨapataɨrãpa ɨ̃rɨmanak'ari nãɨya jarasidama:
—¡Tai Chipari, k'aripase! ¡Tachi k'uawãmaa p'anɨma!
26Mãɨne Jesupa jarasima:
—Mãra ¿k'ãre k'orea ne wap'ea p'anɨma? ¡Mãrapa pia ĩjãanawẽa p'anɨma!
P'irabarik'ari Jesupa nãua mãɨnepa senia chomá ɨbɨa pedeasima. Ara mãɨne jõma ap'i ũu beesima. 27Mãɨne ãchia k'awa k'ɨ̃risiadaé pasima. Nãɨya jarasidama:
—Nãɨ ¿k'aima? Nãupa mãɨnepa to pida ichi pedea ũripatama.
Jesupa jaore mietá p'anana ãyá jeret'aada
Marco 5:1-20; Luca 8:26-39
28Maapae senia choma k'ĩaria wãnak'ari Gadara tuadea chesidama. Mãɨne ẽpẽra ume jaore mietá pará p'anɨ jãɨrã te p'ẽya uriadepa ochiadak'ari Jesumá chesidama. Mãɨ ẽpẽra minachia k'ĩruu p'anapachida pẽra aba pida mãmaria wãnak'a pasima. 29Mãɨne Jesua jĩk'ua biasidama:
—¡Tachi Ak'õre Warra!#8:29 Tachi Ak'õre Warra. Griego pedeade chi eda waapẽarã k'art'ade bɨ bɨma: Tachi Ak'õre Warra Jesú. ¿K'ãre k'orea mɨ ome bariyá bɨma? ¿Tai mĩapiyá ewari chei naena pɨ cheruk'ãra?
30Mãɨ ara k'ait'a sina chi chok'ará nek'o para basima. 31Mãɨpuru chi jaore mietaarãpa Jesua nãɨya chichupuria idisidama:
—Pɨa tai ãyá jeret'aaipɨra, sina k'ak'uade eda wãpise.
32Mãɨne Jesupa jarasima:
—Wãt'ɨ.
Ara mãɨne jaore mietaarã mãɨ ẽpẽrarã k'ak'uadepema wãnak'ari sina k'ak'uade eda wãsidama. Mãɨpa sina p'ira errodak'ari p'ẽyanepa toedá t'ĩuk'oa wãsidama. Mãɨya ãarea todepa piusidama. 33Mãɨ sinarã ak'ɨ p'ananapa mãɨya ununak'ari, p'ira wãsidama p'uurudea. Mãma padak'ari ẽpẽrarã jaore mietá pará beadapa mãɨ ãarea nepɨrɨsidama. 34Mãɨ k'orea chi p'uurudepemarã ãarea Jesú bɨmá chesidama. Ununak'ari Jesua chichupuria idisidama ãchi tuadepema ãyá wãmẽrá.
Tällä hetkellä valittuna:
Mateo 8: tdc
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© (Active), Wycliffe Bible Translators, Inc. All rights reserved.
