Mateo 5

Tachi pia p'ananai Jesupa jarateada

Luca 6:20-23

1Ẽpẽrarã chok'ará unuside Jesú eyadea ɨt'aa wãk'ari suak'abari beesima. Mãɨne ichi ome p'ɨrrɨapataɨrã ichimá chesidama. 2Maapae Jesupa nãɨya jarateasima:

3«Pia p'anɨma mãra chi chichupuria berã k'awa p'anɨrã, mãɨ Tachi Ak'õrepa mãra ichi juade ua bɨẽra.

4Pia p'anɨma mãra sõp'ua p'anɨrã, Tachi Ak'õrepa mãɨ sõp'ua bɨt'a jõpii pẽra.

5Pia p'anɨma mãrapa atepe k'awa p'ananai k'orea jɨrɨdawẽa p'anɨrã, Tachi Ak'õrepa mãrá jõma nãɨ ĩjũa jɨ̃anamẽrá teai pẽra.

6Pia p'anɨma chi ãchi sõne jĩp'a oo k'ɨ̃ria p'anɨrã, mãɨ ãchia k'ɨ̃ria be Tachi Ak'õrepa teai pẽra.

7Pia p'anɨma mãra k'ĩra chupuria idi p'anɨrã, mãɨ Tachi Ak'õrepa k'ĩra chupuria idii pẽra.

8Pia p'anɨma mãra sõnepa abapuru Tachi Ak'õre pae p'anɨrã, Tachi Ak'õre ununai pẽra.

9Pia p'anɨma chi mãɨ ẽpẽrapa nepɨra tachi ũpẽa ome uru p'anɨ mãɨ k'aripa p'anɨrã, Tachi Ak'õre warrarãane adai pẽra.

10Pia p'anɨma chi jĩp'a be k'orea waapẽarãpa mĩapi p'anɨrã, Pajãne Bɨpa ichi juade ua bɨẽra.

11Mɨ k'orea k'achia pedeadaipɨra, mĩapii p'anɨpɨra mãɨnepa wawaria seadepa k'achia pedeadaipɨra, mãra pia p'anɨma.

12Minachia arapá p'anat'ɨ, mãrapa nepia waibɨa pajãne uru p'ananai pẽra.

Chõarãenapema ewaride pida Tachi Ak'õre pari pedeapataɨrã ara mãɨ jĩra ẽp'ẽsidama mĩapidai k'orea.

T'ã mãɨnepa ɨnaa bɨ

Marco 9:49-50; Luca 14:34-35

13»Mãra nãɨ ĩjũane t'ã jĩra p'anɨma.#5:13 T'ã jĩra p'anɨma. Mãɨpa jara bɨma «mãra nãɨ ĩjũane p'anɨma ẽpẽrarã pia p'ananamẽrá» wa «mãrapa nãɨ ĩjũanepemarã́ Tachi Ak'õre k'ɨ̃risiat'a jarateadaipɨ». Maamina t'ã k'ɨyaa jõsira ¿sãmaasã́ mãicha k'ɨyaa beeima? Jãapae k'ɨ̃rianaiwẽma. Tajatá amaai pia bɨma t'ɨadamẽrá. 14Mãra ɨnaa jĩra p'anɨma, nãɨ ĩjũanepemarãpa mãra k'orea Tachi Ak'õre unu p'anɨ pẽra. P'uuru eyade bɨ ¿sãmaasã́ mẽranaima? 15Ichiaba laap'ara uruapidak'ama ne yaapataɨ ek'ari mẽra bɨdai k'orea. Mãɨ k'aepẽra uruapidak'ari, ne ɨtɨa ɨ̃rɨ bɨpatama ẽpẽra te eda p'anɨrãpa ɨnaa ununamẽrá. 16Ara mãɨ jĩra ẽpẽrarã k'ĩrari pia oo p'anat'ɨ ãchia Tachi Ak'õre pajãne bɨa pia pedeadamẽrá.

Jesupa Moisepa bɨda jarateada

17»K'ɨ̃risiarãt'ɨ mɨ chesima Moisepa bɨda itu bɨpiemaapa, mãɨyawẽpɨra Tachi Ak'õre pari pedeapataɨrãpa bɨdada itu bɨpiemaapa. Mɨ mãɨ k'orea cheé pasima. Mãɨ k'aepẽra mɨ chesima ãchia jara p'anɨ jõma piarã ooi k'orea. 18Mɨa piarã jararuma: pajã mãɨnepa nãɨ ĩjũa bɨmisa mãɨ Moisepa bɨdadepema letra aba mi ãpia pida jõiwẽma, aba mãɨne jara bɨ ãarea baerudea.#5:18 Letra aba mi ãpia pida. Griego pedeade nãɨya bɨ bɨma: Tilde aba pida ichiaba letra aba pida. 19Mãɨneepuru ẽpẽrapa Moisepa bɨdade ne oopi bɨ pedea ooepɨra, mãɨ ãpia pida ooepɨra; mãɨyawẽpɨra waapẽarã́ jarateaipɨra ara mãɨya oopiemaapa, mãɨ waapẽarã k'aepẽra ãpia baipɨ Pajãne Bɨpa ichi juade ua bɨ t'ãena. 20Mɨa piarã jararuma: Moisepa bɨda jarateapataɨrãpa oo p'anɨ k'aepẽra mãɨnepa p'ariseorãpa oo p'anɨ k'aepẽra mãrapa jĩp'a oodaepɨra, Pajãne Bɨpa mãra ichi juade ua baiwẽma.

Jesupa k'ĩruupida k'orea jarateada

Luca 12:57-59

21»Mãrapa k'awa p'anɨma tachi chõarãenapemarãpa nãɨya jarapachidama: “Mĩa pearãse”.#Éxodo 20:13; Deuteronomio 17:8. Mãɨnepa “Peasira mãra chi chaarearãpa ɨtɨadaima”. 22Maamina mɨa jararuma: abaɨpa chĩara ome k'ĩruusira Tachi Ak'õrepa ɨtɨaipɨ. Abaɨpa chĩará k'ĩra piawẽa bɨade arupara, mãɨ chi chaarearãpa ɨtɨadaima.#5:22 Mãɨ chi chaarearãpa. Griego pedeade nãɨya bɨ bɨma: Sanedrín. Mãɨrã judiorã minachia k'awa be ará posoa chepachidama edaɨde, nepɨra oodai k'orea. Ichiaba abaɨpa chĩará k'achia pedeasira, Tachi Ak'õrepa t'ɨpɨ tau uruadea wãpiipɨ.

23»Mãɨpuru pɨ Tachi Ak'õre pae ne paapataɨdea ateerude, pɨ ũpẽa pɨ ome nepɨra uru bɨ k'ɨ̃risiasira, pɨa ãnimara Tachi Ak'õre pae paai pada paatearãse. 24Mãɨpari chi ãnimara paapataɨk'á ameek'ari pɨ ũpẽa ome pia pedeade wãse, ichi ome sõpia p'aneenai k'orea. Maapaepuru jĩitea chek'ari pɨ ãnimara Tachi Ak'õrea paatease.

25»Pɨa ooda k'orea pɨ chi nek'ĩramaapa pɨ chi nepɨra ak'ɨparimá ateewãipɨra, ode wãutade ichi ome ãarea pedease, ichi ome sõpia beei k'orea. Mãɨya oowẽpɨra, ichia pɨ chi ak'ɨparí juade bɨipɨ. Maapae chi ak'ɨparipa pɨ chi jɨ̃a nɨbɨpataɨ te ot'eaparia jitapiipɨ eda jɨ̃a nɨbɨmẽrá. 26Mɨa piarã jararuma: pɨ jãmapema wãiwẽma aba pɨa teai bɨ erreara ãarea p'aarudea.

K'ima awaraɨ ome k'ãipataɨ k'orea jarateada

27»Mãrapa k'awa p'anɨma nãɨya jarapataɨ: “K'ima awaraɨ ome k'ãirãse”.#Éxodo 20:14. 28Maamina mɨa mãrá jararuma: abaɨpa wẽra ak'ɨk'ari k'ɨ̃riasira abaeda mãɨ wẽra ome ichi sõnepa nemietá oosima.

29»Mãɨpuru pɨ tau juaraaripemapa pɨá nemietá oopisira, mãɨ noet'aak'ari amaat'aase nemietá ooemaapa. Pɨ k'ak'uadepema abawẽa beerumina, ewaricha Tachi Ak'õre ome baipɨ. Mãɨya pia bɨma Tachi Ak'õrepa pɨ k'ak'ua jõma t'ɨpɨ tau uruadea bat'a peei k'aepẽra. 30Ichiaba pɨ juaraaripemapa pɨá nemietá oopisira, mãɨ bɨat'ut'aak'ari amaase nemietá ooemaapa. Pɨ k'ak'uadepema abawẽa beerumina, ewaricha Tachi Ak'õre ome baipɨ. Mãɨya pia bɨma Tachi Ak'õrepa pɨ k'ak'ua jõma t'ɨpɨ tau uruadea bat'a peei k'aepẽra.

Jesupa jarateada wẽra amaanai k'orea k'ɨ̃risiada

Mateo 19:9; Marco 10:11-12; Luca 16:18

31»Ichiaba nãɨya jarapachima: “Abaɨpa ichi wẽra amaai k'ɨ̃risiasira, chi wẽrá amaai k'orea k'art'a bɨda teai pia bɨma”.#Deuteronomio 24:1. 32Maamina mɨa jararuma ɨmɨk'ĩra abaɨpa chi k'ima awaraɨ ome k'ãiwẽa bɨt'a amaasira mãɨnepa mãɨ wẽra awaraɨ ome k'ãisira, Tachi Ak'õre taade mãɨ ɨmɨk'ĩrapa mãɨ wẽrá nemietá oopii bɨma, awaraɨ ome k'ãii pada pẽra. Mãɨ awara ẽpẽrapa wẽra amaana atasira chi k'ima pamẽrá, mãɨ ẽpẽrapa nemietá oo bɨma.

Tachi Ak'õre k'ĩrari piarã ne ooyade ada jarateada

33»Mãrapa k'awa p'anɨma tachi chõarãenapemarãpa nãɨya jarapachidama: “Pɨa Tachi Chipari k'ĩrari piarã ne ooyade aipɨra piarã ooi pia bɨma”.#Deuteronomio 23:21-23. 34Maamina mɨa jararuma: ni abaɨ t'ɨ̃ne piarã ne oodayade arãt'ɨ. Pajã t'ɨ̃ne piarã ne oodayade arãt'ɨ, pajã Tachi Ak'õre poro jũra jɨ̃parí jɨ̃ bɨ suak'a beeparí jĩra bɨẽra. 35Nãɨ ĩjũa t'ɨ̃nepa piarã ne oodai arãt'ɨ, nãɨ ĩjũa Tachi Ak'õre jĩru bɨparí jĩra bɨẽra. Ichiaba Jerusalén t'ɨ̃nepa piarã ne oodayade arãt'ɨ, Jerusalén Tachi Ak'õre Poro jũra jɨ̃parí jɨ̃ bɨ p'uuru pẽra. 36Ichiaba ara pɨchi t'ɨ̃ne piarã ne ooyade arãse, pɨ puda aba pida p'ue t'orroapiiwẽa bɨẽra ichiaba p'ue p'aimaapiiwẽa bɨẽra. 37Mãrapa ne oodayade adaipɨra, oot'ɨ. Ichiaba oodawẽane adaipɨra, oorãt'ɨ. Mãɨ paritua t'ɨ̃ne piarã ne ooyade a jarasira mãɨ pedea nemietaadepa che bɨma.

Pɨchi nemietá ooda choayade ada

Luca 6:29-30

38»Mãrapa k'awa p'anɨma nãɨya jarapataɨ: “Abaɨ pida chĩara tau jĩap'et'asira chi mãɨya ooda abarik'a tau jĩap'et'ai pia bɨma.#Levítico 24:20. K'ida bɨap'et'asira chi mãɨya ooda abarik'a k'ida bɨap'et'ai pia bɨma”. 39Maamina mɨa jararuma: pɨ piawẽa oosidara k'ĩup'ea choase. Abaɨpa pɨ uitarra chi juaraaripema p'esira, ichiaba uitarra juawieripema unupise p'emẽrá. 40Mãɨ abaɨ pɨ ome k'ĩruusira chi nepɨra ak'ɨparí taade pɨ neet'á ɨ̃rɨ jɨ̃parí ẽemarii k'orea, pɨchi neet'á ek'aripema sida tease. 41Ichiaba ẽpẽra chaarea bɨpa ne chɨk'ɨa uapisira kilómetro aba, sõpia ua ateewãse kilómetro ume. 42Mãɨ awara abaɨ pida pɨá ne idiipɨra tease mãɨnepa ne teadoopade asira, wãak'arãse.

Tachi nek'ĩramá k'ɨ̃ria bapade ada

Luca 6:27-28; 6:32-36

43»Mãrapa k'awa p'anɨma nãɨya jarapataɨt'a: “Ẽpẽra abaɨ k'ɨ̃riase, maamina pɨ nek'ĩramá unuemaa uru base”.#5:43 Ẽpẽra abaɨ k'ɨ̃riase. K'aipa tachi nek'ĩramá ununaanait'a pia bɨade a jarasit'a k'awadawẽma. Levítico 19:18. 44Maamina mɨa jararuma: mãra chi nek'ĩramá k'ɨ̃riat'ɨ. Chi mãrá k'achia pedeautá pia pedeat'ɨ; mãra k'ĩramá p'anɨrã pia oot'ɨ.#5:44 Mãrá k'achia pedeautá pia pedeat'ɨ; mãra k'ĩramá p'anɨrã pia oot'ɨ. Griego pedeade chi eda waapẽarã k'art'ade mãɨ newẽma. Tachi Ak'õrea ɨt'aa chiidit'ɨ ãchi k'aripamẽrá. 45Mãɨya baipɨ mãra Ak'õre pajãne bɨ warrarãpɨ. Tachi Ak'õrepa ɨmata ochiapiparima ẽpẽra sõpia berã ɨ̃rɨ, k'achia berã ɨ̃rɨ pida. Ẽpẽra jĩp'a be k'orea chi jĩp'a bewẽa k'orea pida k'oe chepiparima. 46Maamina mãrapa abapuru mãra k'õp'ãerorãt'a k'ɨ̃ria p'ananaipɨra, ¿k'ãret'a nepia Tachi Ak'õrepa teaima? Romanepema pae erreara jɨrɨp'epataɨrã pida mãɨ jĩra oopatama. 47Mãɨ awara mãrapa waapẽarã́ pia pedeasidara, ¿nepia oo p'anɨk'ãra? Chi Tachi Ak'õrene ĩjãanak'apɨɨrã pida mãɨya oopatama. 48Mãɨpuru jõmãɨrã k'ɨ̃ria beat'ɨ mãra Ak'õre pajãne bɨpa jõmãɨrã k'ɨ̃ria bɨ jĩra.

Tällä hetkellä valittuna:

Mateo 5: tdc

Korostus

Jaa

Kopioi