Maatewos 8
8
Akka Yesus Namicha Qomaaxaa Qabu Fayyise
(Mar. 1:40-45; Luq. 5:12-16)
1Yesus gaara irraa gad buunaan, gumiin guddoon isa gula yaate. 2Namichii qomaaxaa qabu tokko isatti dhufee, duratti jilbiiffatee, “Aabboo, atin yo feete na fayyisuu indandeetta” jedheen. 3Yesus harka diriirfatee, isa tuqee, “Infedhaa fayyi!” jedhee, innii yoma tokkoon dhukkuba sun fayye. 4Jennaan Yesus, “Caqasi! Waan tokkoollee namaan hinjedhinii, ammoo dhaqii, qaallicha ufi garsiisii, sooriyoo Museen mure baas, akka namii cuftii akka atin fayyite argu” jedheen.
Akka Yesus Hojjataa Shuuumii Roomaa Fayyise
(Luq. 7:1-10)
5Yesus Qifirnaahom seennaan, shuumichii gosa Roomaa tokko gara isaa dhufee, qarqaarsa kadhate, 6“Aabboo, hojjataan kiyya tokko fayyaanitii mana keessa ciisee gaargaluutti jiraa, chocho'uullee hindanda'u” jedhe. 7Yesus, “Anin dhufeetti isa fayyisa” jedheen. 8Shuumichii kaan, “Atin mana kiyya seenuu hinmallee ammoo afaanumaan jedhi, hojjataan kiyya infayyaa. 9Anin nama jala hojjadha, warra waraanaatti na jala jira, yo anin nama tokkoon ‘Deem’ jedhuu, indeema; yo kadhibiin ‘Kootti’ jedhu indhufa. Ammallee hojjataa kiyyaan, yo anin ‘Waan kana tolchi’ jedhuu, intolcha” jedhe. 10Yesus waan kana dhageennaan mamee, warra isa gula yaa'uun, “Dhugumaa, waan anin isaniin jedhuu, dhugeeffachaa akkanaa tana Israa'el keessaalleetti anin takka hingarre. 11#Luq. 13:29 Mee laalaa, namii hedduun mirgaa bitaa dhufee Abrahaam, Yisihaqii fi Yaaqoob waliin Mootummaa Waaqaa keessa tata'an. 12#Mat. 22:13; 25:30; Luq. 13:28 Nama ammoo mootummaa sunitti dhalatee dukkana alaa keessa buusan; achitti namii boo'ee ilkaan qara” jedhe. 13Yesus shuumichaan, “Been! Wantii atin dhugeeffatte sun sii ta'inaa!” jedhee, jennaan hojjataan yoma sun fayye.
Akka Yesus Nama Hedduu Fayyise
(Mar. 1:29-34; Luq. 4:38-41)
14Yesus mana Phexros seennaan, jaartii soddaa isaa ta qandhoo qabdu arge. 15Innii harka isii tuqee, jennaan qandhoon isii lakkiftee, isiin kaatee warra gololchite.
16Galgala sun nama hedduu jinnii qabu Yesusittiin dhufanii jennaan innii jecha tokkoon jinnii baasee, nama dhukkuba qabullee cufa fayyise. 17Wantii kunin akka himanii raagii Isaayas, “Innii dhukkuba keenna fudhatee, fayyadhaba keennaallee baate” jedhe guutamu garsiifti.
Waan Warra Yesus Gula Yaa'uu Fedhee
(Luq. 9:57-62)
18Yesus gumii isa marsitu arginaan akka jari isaa gama galaanaa kaanitti taakku ajaje. 19Namichii seera beeku tokko gara isaa dhufee, “Aabboo, anin fulaa atin deemtu cufaa si gula deema” jedheen. 20Yesus ammoo, “Geedaltii boolla qabdii, simphirreelleen mana qabdii, ilmii namaa ammoo fulaa mataa ufii keeyyatuu hinqabu” jedheen. 21Jara isaa keessaa namii tokko, “Aabboo, eegii qara dhaqee aabboo awwaalaa!” jedhe. 22Yesus ammoo, “Du'aan ha du'aa awwaaluutii, ati na gula kootti” jedhen.
Akka Yesus Bubbee Callisiise
(Mar. 4:35-41; Luq. 8:22-25)
23Yesus hoboloo seennaan, jarii isaa isa gula yaa'e. 24Bubbeen guddoon galaana dhooftee, dhawwaan hoboloo roraafte, Yesus ammoo rafuu jira. 25Warrii dhaqee isa dammassee, “Aabboo, nu baas! Nu baduutti jirraa” jedhe. 26Jennaan Yesus warraan, “Maaf akkana sodaattan? Dhugeeffachaan teessan waan diqqoo” jedheen. Jennaan Yesus ka'ee, bubbee fi galaana callisiisee, wantii cuftii qabbanoofte. 27Biyyitii maadeffattee, “Kunin nama akkam, ka qilleensaa fi galaaniilleen sarmuuf?” jette.
Akka Yesus Jara Jinnii Qabu Fayyise
(Mar. 5:1-20; Luq. 8:26-39)
28Innii gama galaanaa, gara lafa “Gadaraa” jedhanii taakkinaan, namii lama ka jinnii qabu awwaala keessaa yaa'e isaan ba'e. Jarii guddoo bineensa'ee, namii tokkoolleen karaa sun gula yaa'uu dadhabe. 29Warrii iyyee, “Atin maan nurraa qabda, Ee ilma Waaqaa? Adoo guyyaan hinga'in nu gaargalchuu dhuftee?” jedhe. 30Mana booyyeetti diqqoo warra irraa fagoo dheeduutti jira. 31Jennaan jinniin, “Yo ka nu baaftu taatee, gara booyyee sunii nu ergi” jetteen. 32Yesus, “Beenaa yaa'aa!” jennaaniin warra keessaa yaatee booyyee taan duudde. Duuba booyyeen oriitee, bisaan keessa duuddee, bisaan liqimsan. 33Tissituun baqaattee, dira dhaxxee waan warrii jinnii qabu ta'e cufaa haasofte. 34Duuba dirii cuftii haguma ga'uunuu Yesus arguu dhufe; arginaan akka innii lafa warraa keessaa deemu kadhatan.
Tällä hetkellä valittuna:
Maatewos 8: KakHaa
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
