Embandizo 13
13
Okutaishukana kwa Aburamu na Loti
1Ao Aburamu aruga Misiri, na mukaziwe na Loti n'ebyo yabaire ainabyo byona agya Negebu. 2Akaba ali mutungi muno, aina ebitunganwa, efeza n'ezahabu. 3Aruga Negebu agenda atyo ayolekeire Beteli, agoba mbali yabaire ateire eihema obubere omugati ya Beteli na Ai. 4Niho yabaire ayombekire ealutare elya mbere, aho afukamira Omukama. 5Loti ayagenzire na Aburamu nawe akaba aina amahyo g'entaama n'embuzi, n'ente, aina n'amahema. 6Kityo ensi tiyakubamazire bombili kutura hamoi, aha rw'okuba eitunga lyabo likaba lili lingi. Okwikara hamoi tikwashobokire. 7Nangu n'abashumba babo b'ebitunganwa bakagoba aha kurwana. Omu makiro ago ensi egyo ekaba neturwamu Abakanaani n'Abaperizi.
8Aho Aburamu agambira Loti ati, “Tutagira ndwano, n'abashumba bange n'abawe batarwana, okuba ichwe tuli banyaruganda. 9Ensi yona niy'egi nogibona. Mbwenu tutaishukane. K'orakwata omukono gwa bumosho inye ndagya ogwa bulyo; anga k'orakwata omukono gwa bulyo, inye ndagya ogwa bumosho.”
10Loti aleba oku na kuli abona oruhanga rwona rwa Yorudani okwo rwina amaizi buli hantu kugendera kimoi kugoba Zoari, rwashusha endimiro y'Omukama, anga ensi ya Misiri. Rukaba ruli rutyo Omukama atakasosotoire Sodoma na Gomora. 11Aho Loti arondaho oruhanga rwona rwa Yorudani, agya oburugaizoba, baba nikwo bataishukana batyo. 12Aburamu atura omu nsi ya Kanaani, na Loti atura omu bigo by'oruhanga rwa Sodoma agya asisira bwatana Sodoma. 13Kyonkai abantu ba Sodoma bakaba bali babi, nibafakalira muno Omukama.
Ruhanga naraganisa Aburamu ensi n'oruzaro
14Loti kayamazire kutaishukana na Aburamu, Omukama agambira Aburamu ati, “Naga amaisho gae olebe, kwema mbali oli, orubaju rwa bikara n'orwa kasi, oburugaizoba n'obugwaizoba. 15Ensi yona ey'olikubona ndigikuha iwe na baijukuru bawe eirai lyona. 16Ndikuha abaijukuru bangi, bakanye okw'obona eitaka. K'omuntu araba nashobora kubara eitaka, na baijukuru bawe alishobora kubabara. 17Imuka ogende orambure ensi yoa, aha rw'enshonga ndigikuha yona.” 18Aho Aburamu asimbura eihemalye, aija atura aha mialoni ya Mamure, eli Heburoni; ayombekeraho Omukama ealutare.
Tällä hetkellä valittuna:
Embandizo 13: RHAY01
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
Ruhaya DC Bible © Bible Society of Tanzania, 2001.