ZABUR 7
7
Do'e nunas keadilan
1Kesedihan Daud saq tenyanyiang bagi ALLAH lantaran Kus, dengan Benyamin nike.
2Ya ALLAH , Tuhan kaji, kaji berlindung léq Deside;
selametang dait lepasang kaji
léman selapuq dengan saq maléq kaji.
3Sampunang menengang ie pade maraq singe
nyakrah dait ngoros kaji dait
nénten araq saq nulung kaji.
4-5Ya ALLAH, Tuhan kaji, lamun araq perbuatan kaji saq celang,
gawéq jahat léq batur,
atao ngerugiang musuh nénten bedowé alasan,
lamun kaji piaq maraq nike,
6menengang kaji tepaléq dait tebau siq musuh,
terus tematéq dait tendotang léq tanaq.
7Silaq Deside bangkit, ya ALLAH, léq tengaq murke Deside,
lawan musuh-musuh kaji saq ngamuk nike.
Bangkit jari nulung kaji,
séngaq Deside nuntut keadilan.
8Kumpulang bangse-bangse léq sekelining Deside,
dait bekuase léq ie pade léman tahte Deside léq sorge.
9Deside hakimin umat manusie;
icanin kaji keadilan, ya ALLAH,
séngaq kaji nénten salaq.
10 #
Why. 2:23
Engkahang kejahatan dengan durhake
dait teguqang até dengan saq soléh,
séngaq Deside Allah saq adil,
saq paham angen dait pikiran manusie.
11Pelindung tiang nike Allah
saq nyelametang dengan saq tulus até.
12Allah nike hakim saq adil,
saq sebilang waktu ngukum dengan jahat.
13-14Lamun kelakuan ie pade nénten berobah,
Ie siep siq senjate saq nyematéqang.
Ie asaq kléwang-Ne dait ngedeng busur-Ne,
beterus papahang panaq-panaq-Ne saq berapi.
15Cingakin, dengan jahat ngerencaneang kejahatan;
ie miaq rencane jahat dait ngelaksaneang penipuan.
16Ie kedukang dengan lain longkak,
laguq ie mésaq saq geriq ojok dalemne.
17Jari ie tehukum siq kejahatanne mésaq,
dait tesiksaq siq kekerasanne mésaq.
18Tiang besyukur tipaq ALLAH séngaq Ie adil,
tiang nyanyiang pujian bagi ALLAH, Saq Maheagung.
Tällä hetkellä valittuna:
ZABUR 7: LAISAS
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään