Jon 10
10
Mangai Ban Trìu Lem Lình
1“Au doi ca pì bàu joq 'nàng: Mangai leq mùt ta cadrong trìu, ùh mùt trong 'mang, mahaq heo trong 'noiq, mangai aih mangai atùng. 2Mahaq mangai mùt ti 'mang ngo, haq mangai ban trìu. 3Mangai gòm 'mang ngo pèh 'mang am ca haq wa trìu canao ca bàu haq. Haq creo hiniq tang toq trìu haq, 'nong trìu loh enh gùng. 4Jò haq khoi 'nong trìu loh enh gùng, haq lam adroi wa trìu tiaq haq taiq trìu canao ca bàu haq. 5Trìu ùh tiaq mangai ùh canao, mahaq trìu cadàu mot, taiq trìu ùh canao ca bàu mangai ùh canao.” 6Chuaq Jêxu capoch bàu cô, mahaq wì ùh 'nì tàng Haq enh doi cleq.
7Chuaq Jêxu doi hòm ca wì: “Joq 'nàng, joq 'nàng, Au anoi ca pì: Au cô raq 'mang da trìu. 8Dìq dŏng wì ma trùh adroi ca Au, wì aih mangai atùng, 'màng aih trìu ùh tàng dì tiaq wì? 9Au cô 'mang, mangai leq mùt 'mang Au, haq jah dèch. Mangai aih jah mùt loh glàm nhat. 10Mangai atùng trùh đòiq atùng, jêh wa raliang đac. Au trùh waq ca trìu jah i can rìh, aih can rìh joq 'nàng.
11“Au cô Mangai ban trìu lem lình. Mangai ban trìu lem lình cađac dèh can rìh waq ca trìu jah rìh. 12Mahaq mangai caq cùng, ùh xài mangai ban trìu, wa trìu aih ùh xài trìu haq, jò haq cô hnoq coq brì trùh, haq hi cađac trìu cadàu hloi. Coq brì rùp cap caq trìu wa hnan wì loh tac mac. 13Ma jah 'màng aih haq mangai ban trìu caq cùng, 'màng aih haq ùh hèm trùh ca trìu.
14“Au cô Mangai ban trìu lem lình. Au canao ca trìu Au, trìu Au canao ca Au. 15'Màng ca Baq loq ca Au, Au loq ca Baq. Au cađac dèh can rìh đòiq dèch dèh trìu. 16Ŏi i trìu ma 'noiq hòm, ùh ŏi ta calùh cô. Au phai 'ràng wì hadai jah hlài dìq. Trìu aih jah tàng bàu Au, 'màng aih, jah i mòiq calùh trìu wa mòiq Ngai ban. 17Baq loq waq ca Au taiq Au cađac dèh can rìh đòiq jah yŏc hlài. 18Ùh i ca cabô jah yŏc can rìh Au, mahaq taiq cla Au to am. Au i cwìang cađac dèh can rìh, wa i cwìang yŏc hlài. Baq Au khoi thê 'màng aih.”
19Wì mangai Yothaiq axong ca dabau taiq Haq capoch bàu aih. 20I bàc ngai doi: “Haq i can kiac ŏi ti Haq, Haq loh ca ranhùa. Gleq pì ma tamàng Haq?”
21Wì ma 'noiq doi: “ 'Màng aih, ùh xài bàu capoch da mangai i kiac ŏi ti haq. 'Màng leq can kiac ma jah broq brêh ca mangai ùh xau mat?”
Lè Broq Hadròih Hnem Cùh Waiq
22Wop jò aih ta phôq Jê-ru-sa-lem i lè Broq Hadròih Hnem Cùh Waiq. Aih jò ralìm ŏi ta Jê-ru-sa-lem. 23Chuaq Jêxu lam ba'yàt ta Hnem Cùh Waiq enh ca'nàm pra Sa-lô-môn. 24Wì mangai Yothaiq yòng wawenh ca Haq bòch Haq: “Ìh broq ca nhèn chìuq hèm ta manoh ùh ro trùh jò leq? Tàng Ìh joq Crich, phai doi ca nhèn ma ro.”
25Chuaq Jêxu tèu wì: “Au khoi doi ca pì adroi, mahaq pì ùh lùi Au! Dìq ca bìac halac ma Au broq canòm hiniq Baq Au, aih bìac patô Au cabô. 26Mahaq pì ùh lùi Au, taiq pì ùh xài trìu Au. 27Trìu Au tamàng bàu Au wa Au loq ca wì haq wa wì haq tiaq Au. 28Au am ca wì can rìh hloi hloi, èh wì ùh hnhung; ùh i mangai leq jah atùng yŏc wì khoi enh tì Au. 29Baq Au ma khoi am trìu aih ca Au, Haq ma yi càn dŏng; ùh i cabô jah yŏc atùng trìu aih khoi enh tì Baq Au. 30Au wa Baq Au khoi mòiq.”
31Mòiq yàng hòm wì mangai Yothaiq yŏc hmu padon tèm jêh cađac Haq. 32Chuaq Jêxu doi: “Nhò Baq Au, Au khoi broq bìac lem bàc enh ngìa ca pì. I bìac ma leq ma broq pì chaq trong tèm hmu jêh cađac Au?”
33Wì mangai Yothaiq padreo hlài bàu doi: “Aih ùh xài taiq Ìh broq bìac lem ma nhèn enh tèm hmu Ìh, mahaq taiq Ìh capoch bàu ha'nhèq đùng trùh Boc Plình. Ìh mangai, mahaq Ìh doi dađeh Boc Plình.”
34Chuaq Jêxu tèu: “Khoi achìh ta ranenh da pì: ‘Au doi: cla pì 'bài yiang, ajoq?’#BCP 82:6. 35Tàng Haq creo wì haq ma jah bàu Boc Plình ma anoi trùh: Wì 'bài yiang, wa tàng Sech Hadròih ùh jah cađac, 36èh Au cô, ma Baq khoi ràih loh hadròih thê trùh ta crŏng taneh, toq doi: ‘Au cô Con Boc Plình, gleq pì ma jah kìan Au doi, Au capoch 'mèq ca Boc Plình’? 37Tàng Au ùh broq bìac da Baq Au, pì paq lùi Au, 38mahaq tàng Au broq bìac Baq Au, 'nhac ca pì ùh lùi Au, pì phai lùi bìac halac Au ma broq beq, đòiq pì loq Baq ŏi enh dalam ca Au, Au ŏi enh dalam ca Baq.” 39Wì xôq chaq trong rùp Haq, mahaq Haq claih khoi ca tì wì.
40Haq cwa pah tau cròng diac Jôđan, mùt ta nòi Jon ma baxèm broq 'baptem. Haq ŏi ta aih. 41Wì bàc ngai trùh ti Haq. Wì doi ca dabau: “Jon ùh lah broq teo halac cleq, mahaq rìm nà Jon anoi hlài bìac Mangai cô, haq capoch dìq troq dŏng.” 42Ŏi ta nòi aih i bàc ngai lùi Haq.
Tällä hetkellä valittuna:
Jon 10: HreB
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 201̣̣9 WEC International
