Mataayi 8

ɄYesu ɨkʉnsosia ʉmuunhu ʉnya bʉʉba

(Malɨka 1:40-45; Lʉʉka 5:12-16)

1ɄYesu akiika kuhʉma kʉ kɨdunda, ɨlɨpʉgha lya vaanhu lɨkamʼbɨngɨlɨla. 2Pe ʉmuunhu jʉmonga ʉnya bʉʉba akiisa na kufughama pa Yesu, akamʼbʉʉla akati, “Ghwe Mʉtwa, nave ʉkeliile kʉkʉmbalasia, nisʉʉma ʉmbalasie!”#8:2 Ʉmbalasie: Indaghɨlo sa Moose silyale siiti, ʉmuunhu ʉnya bʉʉba iiva mʉlamafu, neke pano asokile, iiva avaliile. 3ɄYesu akagholosia ʉlʉvoko, akamwabasia akati, “Nikeela, valala!” Ʉnsiki ghʉghuo ʉmuunhu jʉla, akavalala. 4Pe ʉYesu akamʼbʉʉla akati, “Nʉngamʼbʉlaghe nambe muunhu imhola isi! Ʉlwene ʉlʉte ghuhʉfie kwa ntekesi, ʉkahʉmie ɨlɨtekelo ndavʉle alyalaghiile ʉMoose, neke vʉʉve vwolesi kʉ vaanhu vooni kuuti ʉvalasivue.”#8:4 Ʉlwene ʉlʉte ghuhʉfie kwa ntekesi, ʉkahʉmie ɨlɨtekelo ndavʉle alyalaghiile ʉMoose, neke vʉʉve vwolesi kʉ vaanhu vooni kuuti ʉvalasivue: Ʉmuunhu ghweni jʉno asokile ɨbʉʉba akavonekagha kuuti avaliile. Akalondwagha kulʉta kukuhʉfia kʉ vatekesi kuuti asokile, neke vanʼgomosie kuuva palɨkɨmo na vange (Valeevi 13:45-46; 14:1-31).

ɄYesu ɨkʉnsosia ʉmʼbombi ghwa mʼbaha ghwa vasikali

(Lʉʉka 7:1-10; Yohani 4:43-54)

5ɄYesu akalʉta mʉ lɨkaaja ɨlya Kapelenaumu. Ye ikwingila mʉ lɨkaaja ɨlio, ʉmʼbaha jʉmonga ʉghwa vasikali ava Kɨlooma akiisa, 6akampelepesia akati, “Ghwe Mʉtwa, ʉmʼbombi ghwango ighona kʉ kaaja, alɨ nɨ nhamu ɨja lɨteela, ivavua kyongo.” 7ɄYesu akamʼbʉʉla akati, “Nikwisa, nɨnsosie.” 8Neke ʉmʼbaha jʉla akamʉla akati, “Ghwe Ntwa, ʉleke kukwingila mʉ nyumba jango, ʉlwakʉva ʉne nanɨnoghiile. Ʉve ʉjove lɨ lɨsio lyene, ʉmʼbombi ghwango isooka. 9Nijova enendɨɨkɨ, ʉlwakʉva na jʉʉne nipʉlɨka kʉ vavaha vango, kange nɨlɨ na vasikali vano vipʉlɨka kʉlyʉne. Nɨngamʼbʉʉle jʉmonga nɨɨti, ‘Lʉta!’ Ilʉta. Ʉjʉnge, nɨngati, ‘Isa!’ Ikwisa. Najʉ mʼbombi ghwango nɨngamʼbʉʉle kuuti, ‘Vomba ndɨɨkɨ!’ Ivomba.”

10ɄYesu ye apʉliike amasio aghuo, akadegha, akavavʉʉla vano valyale vikʉmʼbɨngɨlɨla akati, “Kyangʼhaani nɨkʉvavʉʉla kuuti, mʉ Vaisilaeli vooni nanɨmwaghile ʉmuunhu ʉnya lwɨtɨko ʉlʉkome ndavʉle ʉjʉ! 11Nɨkʉvavʉʉla kuuti, avaanhu vinga kuhʉma imbale sooni isa ɨɨsi vilikwisa na kukukala pa kɨkulukulu nʉ lʉkeelo palɨkɨmo na vakʉʉlʉ viitu ʉAbulahamu, nʉ Isaka, nʉ Yakovo mʉ Vʉtwa vwa kʉkyanya. 12Looli aVayahudi vano vakanoghiile kuuva mʉ Vʉtwa ʉvuo vilitaghua kʉnji kʉ ngʼhiisi, ʉkuo vililɨlagha na kugwegwenʉla amiino, ʉlwakʉva valɨ mʉ vʉvafi ʉvʉkome.”

13Pe ʉYesu akamʼbʉʉla ʉmʼbaha jʉla akati, “Vujagha! Sivombeke kʉlyʉve ndavʉle lʉlɨvuo ʉlwɨtɨko lwako.” Ʉnsiki ghʉla ghʉla, ʉmʼbombi ghwa mʼbaha jʉla akasooka.

ɄYesu ɨkʉvasosia avatamu vinga

(Malɨka 1:29-34; Lʉʉka 4:38-41)

14Pambele ʉYesu akingila mʉ nyumba ja Peteli, ʉmuo akamwagha ʉnkwive ghwa Peteli, kwekʉti ʉngʼina ghwa nʼdala, alɨ nɨ mhʉngʉ, aghonile pa kɨtala. 15Pe ʉYesu akamwabasia ʉlʉvoko, akasooka, akɨɨma akatengʉla kʉkʉvatengelela.

16Ye vwilile, vakamʉletela ʉYesu avaanhu vinga avanya mapepo. Pe akaghadaga amapepo ghala mʉ ngʉfu sa lɨsio lyake. Kange, akavasosia avatamu vooni. 17Isio sikavombiike kukwɨlanɨsia sino silyajovilue nʉ mʼbɨli ʉYesaya kuuti,

“Akavʉsia inhamu siitu,

akatʉsosia.”#Yesaya 53:4

Kukutavʉla kʉkʉmʼbɨngɨlɨla ʉYesu

(Lʉʉka 9:57-62)

18Ɨlɨpʉgha ɨlya vaanhu lɨkansyʉngʉtɨla ʉYesu. ɄYesu ye alʉvwene ʉluo, akavavʉʉla avavʉlanɨsɨvua vaake kuuti valovoke valʉte ɨmwambo jɨla. 19Pe ʉmʼbʉlanɨsi jʉmonga ʉghwa ndaghɨlo sa Moose akalʉta pa Yesu, akamʼbʉʉla akati, “Ghwe Mʼbʉlanɨsi, nilonda kuuva mʼbɨngɨlɨli ghwako, nɨkʉkʉvɨngɨlɨlagha kwoni kʉno ghulʉta.” 20ɄYesu akati, “Ingʼheve sili ni mhanga, injuni sili ni fivwasu, neke ne Mwana ghwa Muunhu#8:20 Mwana ghwa Muunhu: Ɨmba kʉ Vʉghanʉle vwa Masio aMahesia. nɨlɨ nsila nambe apa kʉghona!”

21Pambele, jʉmonga mʉ vavʉlanɨsɨvua vaake akamʼbʉʉla akati, “Ghwe Mʉtwa, ʉnhavʉle nɨlʉte taasi nɨnsyɨle ʉnhaata ghwango.” 22Neke ʉYesu akamʼbʉʉla akati, “Ʉmbɨngɨlɨlaghe! Valeke avafue vavasyɨle avafue vaave.”

ɄYesu ilitamɨsia ɨmhepo ɨmbaha na mavɨngo

(Malɨka 4:35-41; Lʉʉka 8:22-25)

23Pe ʉYesu akingila mʉ ngalava,#8:23 Ngalava: Ɨmba kʉ Vʉghanʉle vwa Masio aMahesia. voope avavʉlanɨsɨvua vaake vakingila mula, vakavʉʉka vilʉta. 24Ye valɨ mʉ lɨsʉmbe, nakalɨngi ɨmhepo ɨmbaha jɨkagugula, amavɨngo amavaha ghakatengʉla kukupikila ɨngalava jɨla. Ʉnsiki ʉghuo ʉYesu akaghoneliile. 25Avavʉlanɨsɨvua vaake vakalʉta pa mwene vakansisimula vakati, “Mʉtwa, ʉtʉpoke! Tufua!”

26ɄYesu akavamʉla akati, “Kɨki mʉlɨ voghofi, mwe vanya lwɨtɨko lʉdebe ʉmue?” Pe akɨɨma, akajɨdalɨkɨla ɨmhepo nɨ lɨsʉmbe, kʉkalitama lwoni. 27Avavʉlanɨsɨvua vaake vakadegha kyongo vakati, “Ʉjʉ ghwe veeni jʉno ɨmhepo na mavɨngo fikʉmpʉlɨka?”

ɄYesu ɨkʉvasosia avanya mapepo

(Malɨka 5:1-20; Lʉʉka 8:26-39)

28Pambele ye valovwike valɨ ɨmwambo ɨja ɨɨsi ɨja Vagadala, ʉYesu akatangʼhana na vaanhu vavɨlɨ avanya mapepo, vahʉmile kʉno vikukala kʉ mbiipa.#8:28 Vikukala kʉ mbiipa: Lwale lwiho lwa Vayahudi kʉkʉvasyɨla avafue mʉ mhanga nambe mʉ liina lɨno vakagimilagha ngʼhaani mʉ lɨnhalavue lɨno lɨlɨ mʉ kɨdunda. Avaanhu avuo valyale vakali kyongo, nakwealyale ʉmuunhu jʉno akaghelagha kukila ɨsɨla jɨla.

29Avaanhu avuo vakakoola fiijo vakati, “Ghwe Mwana ghwa Ngʉlʉve, tʉlɨ vʉki nuuve? Ghwisile kʉno kʉkʉtʉpumusia pano ʉnsiki ghwitu ghʉkyale?” 30Pa vʉtali padebe pwelɨlyale ɨlɨpʉgha ɨlɨvaha ɨlya ngʉbe lidɨmua. 31Pe amapepo ghala ghakampelepesia ʉYesu, ghakati, “Nave ʉkʉtʉdaga, ʉtwɨtɨkɨsie tʉlʉte, twingile mʉ lɨpʉgha lɨla ɨlya ngʉbe.”

32ɄYesu akati, “Lʉtagha!” Pe ghakahʉma mʉ vaanhu vala, ghakingila mʉ lɨpʉgha lɨla ɨlya ngʉbe. Nakalɨngi ɨlɨpʉgha lɨla lyoni lɨkiika lʉvɨlo, lɨkaselembʉkɨla mʉ lɨsʉmbe, ingʉbe sooni sikafua.

33Avadɨɨmi va ngʉbe vakakɨmbɨla lʉvɨlo, vakalʉta mʉ lɨkaaja, vakapanga sooni sino sivombiike, palɨkɨmo na sino sihʉmiile kʉ vanya mapepo vala. 34Avaanhu vooni ava lɨkaaja ɨlio vakahʉma, vakalʉta kwa Yesu. Ye vamwaghile, vakampelepesia avʉʉke mʉ ɨɨsi jaave.

Tällä hetkellä valittuna:

Mataayi 8: wbi

Korostus

Jaa

Kopioi