Maatosa 5

Dere Bolla Tamaarsida Timirte

1Daro derey shiiqidaysa Yesuusi be7ida wode zumaa bolla keyidi uttis. Iya tamaareti iyako shiiqin, 2haysada yaagidi tamaarsis:

Tuma Ufaysi

(Luqa 6:2-23)

3“Banta ayyaanan manqoti anjetidaysata,

salo kawotethay entassa.

4Yeekeysati anjetidaysata,

enti minthetho demmana.#Isa 61:2.

5Banta wozanan ashketi anjetidaysata,

enti sa7aa laattana.#Maz 37:11.

6Xillobaa oothanaw koshateysatinne saamoteysati anjetidaysata,

enti kallana.#Isa 55:1.

7Maareysati anjetidaysata,

enti maarotethi demmana.

8Wozana geeshshati anjetidaysata,

enti Xoossaa be7ana.#Maz 24:3.

9Sigetheysati anjetidaysata,

enti Xoossaa nayta geetetidi xeegetana.

10Xillobaa oothiya gisho gidi,

goodeteysati anjetidaysata,

salo kawotethay entassa.#1 Phex 3:14.

11“Asay hintena ta gisho gidi cayiya wode, gooddiya wodenne hinte bolla iitabaa ubbaa wordon odisiya wode hinte anjetidaysata.#1 Phex 4:14. 12Hinte woytoy salon gita gidiya gisho ufaytite, hashshu giite. Hintefe kase de7iya nabeta hessada goodidosona.#2 Taari 36:16; Hawa 7:52.

Maxinenne Poo7o

13“Hinte biittas maxine; maxiney ba maxinetetha aggiko, ba mal7otetha waati zaari demmanee? Kare holin asan yedhetanaape attishin, aybiska maaddenna.#Mar 9:50; Luqa 14:34-35.

14“Hinte biittas poo7o; zuma bolla de7iya katamiya qosetanaw danda7uku.#Yoha 8:12; 9:5. 15Xompe oythidi son de7iya asa ubbaas poo7ana mela dhoqa son wotheesipe attishin, daallo giddon wothey baawa.#Mar 4:21; Luqa 8:16; 11:33. 16Hessa mela asay hinte lo77o oosuwa be7idi, salon de7iya hinte aawa bonchana mela hinte poo7oy asa sinthan poo7o.#1 Phex 2:12.

Muse Higge

17“Taani Muse higgiyanne nabeta qaala shaaranaw yida hintew daanopo. Taani, enti odidaysi tuma gideysa qoncisanaw yasipe attishin, shaaranaw yabiike. 18Ta hintew tuma odayis; saloynne sa7i aadhana gakanaw higge ubbay poletanaape attishin, higgiyafe issi qaalay woyko pidaley aadhenna.#Luqa 16:17. 19Hessa gisho, ha kiitatape guuxiya issi kiitaa menthiya oonika qassi harata hessatho oothana mela tamaarsey oonika salo kawotethan ubbaafe guutha gidana. Shin ha kiitaa poleysinne harataka polana mela tamaarsey salo kawotethan gita gidana. 20Ta hintew odayis; hinte xillotethay Farsaaweta xillotethaafenne higge astamaareta xillotethafe aadhona ixiko, salo kawotethaa geleketa.

Wodhoba

21“Hinte mayzatas, ‘Wodhopite; shempo wodhida oonika pirdetana’ geetetoysa si7ideta.#Kessa 20:13; Zaare 5:17. 22Shin ta hintew odayis; ba isha bolla hanqetiya ubbay pirdetana. Ba ishaa cayiya oonika daynna sinthe pirdas shiiqana. Ba ishaako, ‘Eeyay’ giya oonika qassi gaanname taman pirdetana.

23“Hessa gisho, neeni ne yarshuwa yarshiya wode, ne isha qohidabay new akeeketiko, 24ne yarshuwa he bessan aggada ba; koyrota bada ne ishaara giiga; yaata simmada, ne yarshuwa Xoossaas yarsha.

25“Nena mooteysara pirda keethi bashe oge bolla iyara giiga. Hessi atto giiko I nena daynna sinthe efana. Daynnay nena qacheysas aathidi immana; I nena woynen yeggana. 26Ta tuma odayis; ne bolla pirdetida acuwa issi santimey attonna cigga ongana gakanaw qasho keethafe keyaka.

Laymatethaba

27“Haysafe kase, ‘Laymatopite’ geetetoysa si7ideta.#Kessa 20:14; Zaare 5:18. 28Shin ta hintew odayis, maccas xeellidi, amotida ubbay ba wozanan iira laymatees. 29Ne ushacha ayfey new nagaras gaaso gidiko, kessa hola. Ne asatethay kumethi gaanname taman wodhanaape ne asatethafe issoy dhayiko new lo77o.#Maato 18:9; Mar 9:47. 30Ne ushacha kushey new nagaras gaaso gidiko, iya qanxa hola. Ne asatethay kumethi gaanname taman wodhanaape ne asatethafe issoy dhayiko, new lo77o.#Maato 18:8; Mar 9:43.

Macho Anjoba

(Maato 19:9; Mar 10:11-12; Luqa 16:18)

31“ ‘Ba machees anjo worqate immo’ geetetis.#Maato 19:7; Mar 10:4. 32Shin ta hintew odayis; ba machiya laymatonna de7ishin billiya oonika iya laymatana mela oothees. Hessadaka, anjetida maccasiw ekiya ubbay laymatees.#Maato 19:9; Mar 10:11-12; Luqa 16:18; 2 Qoro 7:10-11.

Caaqoba

33“Hinte mayzatako, ‘Wordon caaqofite; hinte Xoossaa sinthan caaqidaysa polite’ geetetidaysa si7ideta.#Leewe 19:12; Taybo 30:2; Zaare 23:21. 34Shin ta hintew odayis; ubbaraka caaqofite. Xoossay uttiya araata gidiya gisho, salon caaqofite.#Maato 23:22. 35Iya tohoy yedhiya soo gidiya gisho, sa7anka caaqofite. Gita kawa katama gidiya gisho, Yerusalaamenka caaqofite.#Isa 66:1; Maz 48:2. 36Hinte binaanape issuwaka boothi woyko kareethi oothanaw danda7onna gisho, hinte, hinte huuphenka caaqofite. 37Hessa gisho, hinte qaalay, ‘Ee’ woyko ‘Akay’ gido. Hessafe kare keyey Xalahepe yees.

Halo Keyopa

38“ ‘Ayfe gisho ayfe; acha gisho ache’ geetetidaysa si7ideta.#Kessa 21:24; Leewe 24:20; Zaare 19:19. 39Shin ta hintew odayis; hinte bolla iitabaa oothiya uraara eqetofite. Oonika ne ushacha shakala baqiko ne haddirsa shakala bessa. 40Issi asi ne shamziya ekanaw nena mootiko, ne kootiya gujada imma. 41Issi asi nena wolqan babaa toossidi issi saate oge baara baana mela nena un7ethiko, iyara nam7u saate oge ba. 42Woossiya oodeska imma; neepe tal7anaw koyiya oonaka diggofa.

Ne Morketa Dosa

(Luqa 6:27-36)

43“ ‘Nena doseysa dosa; nena ixeysa ixa’ geetetoysa si7ideta. 44Shin ta hintew odayis; hinte morketa dosite; hintena qoheysatas woossite. 45Hessatho hinte oothiko, salon de7iya hinte aawas hinte nayta gidana. I iitatasinne lo77otas awa kessees; xillotasinne nagaranchotas ba ira bukisees. 46Hintena dosiya asaa xalaala hinte dosiko, hintew ay woytoy de7ii? Hari attoshin, qaraxa qanxiseysatika hessa oothosona. 47Hinte, hinte ishata xalaala sarothiko, haratape ay hara aadhiyaba oothidetii? Hari attoshin, Xoossaa ammanonna asayka hessa oothosona. 48Hiza, salon de7iya hinte aaway polo gidoysada hinteka polo gidite.”#Leewe 19:2; Zaare 18:13.

Tällä hetkellä valittuna:

Maatosa 5: GFBLVF

Korostus

Jaa

Kopioi