Mataayo 4

ɄYɨɨsʉ igelwa nʉ Setano

(Maliko 1:12-13; Luuka 4:1-13)

1Pwʉ ʉYɨɨsʉ akalongotswa nʉ Mepo ʉMbalatse ʉkʉbɨha kʉ lʉkɨnga pakʉta akagelwe nʉ ntavangwa ʉSetano. 2ɄYɨɨsʉ akataama ʉkʉ isigono isitsigo sinni (40). Mu sigono isyo syoni, pakɨlo na pamuunyi, naalitsage ɨkɨveetsaga. Pwʉ kʉ vʉsililo, jɨkamwibata ɨnzala. 3Baaho ʉSetano ʉnʼgelingelo akiitsa kukʉnʼgela akata, “Ʉngave ʉve ʉlɨ Mwana va Ngʉlʉve, gavʉʉle amaganga aga gahambʉke gave mikate.” 4ɄYɨɨsʉ akamwanda akata, “Mu Vʉvɨge ʉVʉvalatse jɨvɨgilwe ndee, ‘Ʉmuunu niiva nʼgʉge mu kyakʉlya kyene, apeene iiva nʼgʉge kʉ nzɨla jya mamenyu gooni agihʉma mu ndomo gwa Ngʉlʉve.’ ”#Simiilitso tsa Ndagɨlo 8:3

5ɄSetano akalʉta nave ʉYɨɨsʉ kʉ vʉtsenge ʉvʉvalatse ʉwa Yelusalemu, akatsikwɨma nave pa nnaala gwa tembile,#4:5 Tembile Ʉvʉganulu wa litaawa ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. 6akambʉʉla akata, “Ɨngave ʉlɨ Mwana va Ngʉlʉve, ɨtaage paasi, ʉlwakʉva jɨvɨgilwe ʉkʉta,

‘ɄNgʉlʉve jiikʉkʉsuungʼila avasuungʼwa va mwene vakʉtape

sigela isilʉnde syako sikʉvala mu maganga.’ ”#Zabuli 91:11-12

7ɄYɨɨsʉ akaanda ikange akata, “Lola, jɨvɨgilwe ikange ʉkʉta, ‘Kwʉ baako ʉkʉnʼgela ʉNtwa ʉNgʉlʉve vaako.’ ”#Simiilitso tsa Ndagɨlo 6:16

8Kʉ vʉmalɨlo, ʉSetano akalʉta nave ʉYɨɨsʉ kʉkyanya siitso kʉ kɨdugala, akambonia indeeva tsa silʉnga syoni paninie nʉ wɨɨmɨkiwa wa tsyene, 9akambʉʉla akata, “Ʉngave vusugama nʉ kwɨsaja kwane, ndikʉkʉpa syoni isi.” 10ɄYɨɨsʉ akambʉʉla akata, “Hega apa, Setano! Lola, jɨvɨgilwe ʉkʉta, ‘Wɨsajage kʉ Ntwa ʉNgʉlʉve vaako. Ikange, ʉmbombelage jyʉjwa mwene.’ ”#Simiilitso tsa Ndagɨlo 6:13

11Pwʉ ʉSetano akandeka ʉYɨɨsʉ palya, baaho avasuungʼwa va Ngʉlʉve vakiitsa, valɨkʉmbombela.

ɄYɨɨsʉ itengʉla ɨmbombo kʉ Galilaya

(Maliko 1:14-15; Luuka 4:14-15)

12Wʉ ʉYɨɨsʉ apʉliike ʉkʉta ʉYohana ʉMwotsi akʉngilwe, akahega palya, akalʉta kʉ Galilaya. 13Wʉ alɨ kʉ kɨlʉnga ɨkya Galilaya, akahega kʉ vʉtsenge wa Nazaleti, akahaamila kʉ vʉtsenge wa Kapelenaumu. Ʉvʉtsenge ʉvʉ vʉlɨ pa lʉkanzimbale lwa nyanza ɨjya Galilaya, kʉ lʉvasu lwa kɨlʉnga kya Zabuloni nɨ kɨlʉnga kya Nafutali. 14Ewo mwʉ jyavombekye ʉkʉkongana nɨ limenyu ɨlyʉ lyatsovilwe nʉ nyamalago ʉYesaya ʉkʉta,

15“Ɨkɨlʉnga kya Zabuloni nɨ kya Nafutali,

silɨ mu nzɨla ɨjilotsa kʉ nyanza, kʉ mwambo kʉ lʉgasi lwa Yolodani.

Kʉ Galilaya ʉkʉ kwʉ kwene vitaama avaanu va sivʉmbʉkʉ isinge.

16Avaanu valya ʉwʉ vitaama mu ngʼiisi,#4:16 Vitaama mu ngʼiisi kwʉ kʉta vitaama mu mbiivi.

valʉweene ʉlʉmuli ʉlʉlʉti,

nʉ wʉ vitaama mu mwɨtsɨɨtsɨ gwa vʉswe,#4:16 Mu mwɨtsɨɨtsɨ gwa vʉswe kwʉ kʉta ʉvʉswe wa numbula, ʉkʉleka ʉkʉmmanya ʉNgʉlʉve.

ʉlʉmuli lwa pavʉsiku lʉvamulikye.”#Yesaya 9:1-2

17Ʉkʉhʉma ʉnsɨkɨ gʉlya, ʉYɨɨsʉ akatengʉla ʉkʉlʉmbɨlɨla alɨkʉta, “Laatagi imbiivi tsiinyo, manya ʉLʉdeeva lwa Kʉkyanya lʉhegelye.”

ɄYɨɨsʉ itengʉla ʉkʉvɨɨlanga avakongi va mwene

(Maliko 1:16-20; Luuka 5:1-11)

18Wʉ ʉYɨɨsʉ igenda mu lʉkanzimbale lwa nyanza ɨjya Galilaya, akavavona avanamuunu vavɨlɨ: ʉSimoni ʉvɨ ɨlitaawa ɨlɨnge aale vɨ Petulo nʉ nnunaave ʉAndeleya. Aveene avo vaategaga ɨmisʉngʉlʉ mu nyanza, manya vaale valovi va somba. 19ɄYɨɨsʉ akavavʉʉla akata, “Itsagi mungʼongage! Ʉne ndikʉvavɨɨka ʉnyie muve valovi va vaanu.”#4:19 Valovi va vaanu kwʉ kʉta avakongi va Yɨɨsʉ ava viiva va kʉlʉmbɨlɨla ɨLivangɨli kʉ vaanu pakʉta avaanu avo viingile mu Lʉdeeva lwa Ngʉlʉve. 20Pwʉ baaho, vakagɨleka ɨmisʉngʉlʉ gya veene, valɨkʉnkonga ʉYɨɨsʉ.

21Wʉ ʉYɨɨsʉ alʉtile pavʉlongolo padebe, akavavona avanamuunu avange vavɨlɨ: ʉYakobo nʉ nnunaave ʉYohana. Avo wʉ vavɨlɨ vaale mu waato paninie nʉ dadajyavo ʉZebedayo, valɨkʉtetengʼania ɨmisʉngʉlʉ gya veene. ɄYɨɨsʉ akavɨɨlanga naveene, 22baaho, vakavʉleka ʉwaato vʉlya nʉ dadajyavo ʉZebedayo, valɨkʉnkonga ʉYɨɨsʉ.

ɄYɨɨsʉ imanyiisa avaanu nʉ kʉvaponia avatamu

(Luuka 6:17-19)

23ɄYɨɨsʉ aagendagendaga mu kɨlʉnga kyoni ɨkya Galilaya. Ʉkwa alɨkwingila mu masinagogi#4:23 Masinagogi Itsi tsyale nyumba tsa kʉlʉndamana aVayahudi mu sigono sya Sabato. Lola ʉvʉganulu wa limenyu ɨlɨ kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ga Vayahudi, alɨkʉvamanyiisa avaanu, alɨkʉlʉmbɨlɨla ɨLivangɨli lya Lʉdeeva lwa Kʉkyanya, ikange alɨkʉvaponia avaanu isitamu syoni nʉ vʉdekedeke wa mihana gya veene. 24Pwʉ ikulongwi tsa mwene tsikavaala siitso mu kɨlʉnga kyoni ɨkya Siliya. Avaanu valɨkʉgega kʉ mwene avatamu vooni avaale ni sitamu isi niisi pakʉta avaponie. Mu vatamu avo, vaalemwo ʉwʉ vaale vatamu siitso, ʉwʉ viibiitwe ni mepo imbiivi nʉ wʉ vaale nɨ ligotsi na vaasugujwike. ɄYɨɨsʉ aavaponiitse avo vooni. 25Ɨkɨpʉga ɨkɨvaha kya vaanu kɨkava kikʉnkonga ʉkʉhʉma kʉ Galilaya, kʉ Dekapoli,#4:25 Dekapoli Ɨlitaawa ɨlɨ kwʉ kʉta ʉvʉtsenge kɨtsigo (10). kʉ Yelusalemu, kʉ Yuuda na kʉ mwambo jya lʉgasi ʉlwa Yolodani.

Tällä hetkellä valittuna:

Mataayo 4: zga

Korostus

Jaa

Kopioi