Tuima 9
9
1Alege Sɔɔl a kasim jam diem boro a nyigsi ti Nyɔnɔwa Yeezu Kirisita ŋaaŋviirɔma kama ayen wa a le ko ba. Wa yaa jam cheŋ kaabteerɔ kpioŋku jigi 2a bek wa ayen wa ŋmarisi gbaŋsa a te wa ate wa ta ga te Damasikus tɛŋka tuka diinaŋa demma, ate gbaŋsaŋa te wa suik ate wa dan nya waai ale wa ka Wen Suiku nuru, nidoa yaase nipok, abe wa yik kula nyɔnɔwa a bobi a ta cheŋ Jerusalem tɛŋka.
3Sɔɔl yaa ale bo suiku po a cheŋ moata Damasikus tɛŋka la, wenŋmazuk yaa nyaksi a gilim wa. 4Sɔɔl yaa lo tɛŋ a wom ale lueluk a weeni wa ayen, <<Sɔɔl, Sɔɔl, ka boa ale soa ate fi a namsi mu nna?>>
5Sɔɔl yaa weeni ayen, <<Ka wana, m Nyɔnɔ?>> Ate lueluku a yaa tulisi wa ayen, <<Ka mi Yeezu ate fi a namsi la, 6alege yiti a jo tɛŋka po ale fi le wom dii ale magsi fi nye la.>>
7Nidoa baai ale jam maa va wa a cheŋ la a jam wom ka lueluku alege ba an nya nuru. Ba be an ŋman jam baga a biisi. 8Sɔɔl ale ga yiti la, wa ninaŋa yaa lik ate wa an ŋman baga a nya. Ba yaa yik wa nisima a ta wa cheŋ Damasikus tɛŋka. 9Ku jam paari ka daa ŋata alege wa an diem a nya. Wa be an jam dɛ ŋandiinta yaase wa nyu nyiam.
10Yeezu ŋaaŋviirɔ ale jam bo Damasikus tɛŋka. Wa yuei jam le Ananaiyas. Ti Nyɔnɔwa Yeezu Kirisita yaa jan jam wa jigi nna se wa goa daasim kama la a weeni wa ayen, <<Ananaiyas.>> Ate wa yaa tulisi ayen, <<M Nyɔnɔ, nya mi ale nna.>>
11Ti Nyɔnɔwa a yaa weeni wa ayen, <<Yiti a cheŋ suik kuui ate ba a wi ayen Suyɔrɔsuŋ la. Fi dan ga paari Judas yenni, bek ayen fi a yaali ka nuru waai ate ba a wi ayen Sɔɔl ate wa nyini Taasus tɛŋka la. Wa boro a puusi kama. 12Wa seba kama ayen fi cheena dii nyiŋla, wa jam nya nuru ase wa goa daasim kama la, ale wa cheena wa jigi. Nuruwa yuei ale Ananaiyas. Wa jam pai wa nisima a vi wa zuk ayen wa ninaŋa ŋman lagri.>>
13Ananaiyas a yaa tulisi ti Nyɔnɔwa Yeezu Kirisita ayen, <<M Nyɔnɔ, mi wom ka nuruba yegayega jigi nuruwa de ale basi ate fi nuruma a nam dii Jerusalem tɛŋka po la. 14Wa be tuesi ka pagrim kaabteerɔ kpaŋŋa jigi a jam Damasikus tɛŋka po ayen wa yik waai ale a wi Fi Yuenni la.>>
15Ti Nyɔnɔwa Yeezu Kirisita a yaa weeni Ananaiyas ayen, <<Cheŋ, dii nyiŋla m potim lueri wa kama ayen wa chim mi tomteerɔ a weeni Mi Yuenni a sak nuru baai ale kan daa Izirali demma la, ale nalima ale Izirali demma dek. 16Mi dek abe le sak wa ninam buui ate wa ale nam Mi Yuenni nyiŋla.>>
17Ananaiyas yaa cheŋ ga jo yenni po, a pai wa nisimaŋa a vi Sɔɔl zuk a weeni ayen, <<M suok Sɔɔl, ti Nyɔnɔwa Yeezu Kirisita dek waai ale pai wadek a sak fu suik kuui po dek ate fi va a jam dela la ale tom mu fi jigi ayen m weeni fu ayen fi ninaŋa a ŋman lagri abe Wen Chiika a sueri fi suinummu.>> 18Wa ale ga weeni nueri la, ŋanta nna ase jum pagta la a yaa nyini Sɔɔl ninaŋa po a lo ate wa yaa ŋman baga a nya. Wa yaa yiti zaani a tuesi soka. 19Wa ale ga dɛ ŋandiinta la, wa pagrimu yaa ŋman pilim jam. Sɔɔl yaa jam goa daa maga dega Damasikus tɛŋka po ale ŋaaŋviirɔma. 20Wa yaa deri cheŋ ga jo Juuma tuka diinaŋa po a piilim a sak nuruma Yeezu wie a weeni ba ayen, <<Yeezu ka Wen Nidoabinni.>>
21Baai meena ale jam wom wa sinsaŋŋa la, ku yaa cha ba ate ba a bek chaab ayen, <<Mm, daa nuru waai ale jam bo Jerusalem tɛŋka a basi ate baai meena ale a wi Yeezu ba Naawen la a namu la? Wa be jam dela daa dila nyiŋ ayen wa yik ba a ta cheŋ kaabteerɔ kpaŋŋa jigiya?>>
22Alege Sɔɔl yaa ŋmasi jam ta ka pagrim nna yegayega a sak wa sinsaŋŋa ale a biisi a nak nanpaga nna yegayega ate ku yaa butim Juuma baai ale jam bo Damasikus tɛŋka po la. Wa jam a nye wieŋa de kama ayen ku sak ayen Yeezu sum ka Kirisitawa.
23Daa yega ale ga taam la, Juuma yaa jam jigi yeŋ a nye tuka a poli ayen ba ko Sɔɔl. 24Alege wa jam wom ba ale poli ayen ba nye wa diila kama. Daa meena yok ale kantueŋ ba kasim jam za ka tɛŋka po nansiuŋtaŋa noa a limisi ayen ba dan nya wa abe ba ko wa. 25Alege Sɔɔl ŋaaŋviirɔma a yaa pai wa a nyo busik po a ta wa va siaka ate wa siŋ cheŋ.
26Sɔɔl ale jam cheŋ Jerusalem tɛŋka la, wa jam pii nyiŋ a yaali ayen wa maa gum ka Yeezu ŋaaŋviirɔma po. Alege ba jam ka siaka ayen wa ka Yeezu ŋaaŋviirɔ. Yɔgsum yaa jam yik ba. 27Alege nuru waai ate ba a wi ayen Banabas la yaa maari wa a ta wa jam Yeezu tuimtomdɔma jigi. Banabas yaa weeni sak ba Sɔɔl ale jam bo suiku po a cheŋ Damasikus ate wa nya ti Nyɔnɔwa Yeezu Kirisita ate wa biisi ale wa diila. Wa ŋman weeni sak ba Sɔɔl ale jam nyini peelim dii Damasikus tɛŋka po a pai Yeezu Yuenni nyiŋ a sak nuruba ale kan chali yɔgsum la. 28Ba yaa siak ate Sɔɔl a maa boro ale ba Jerusalem tɛŋka po a nyini peelim a sak nuruba ti Nyɔnɔwa Yeezu Kirisita Yuenni nyiŋ ale kan chali yɔgsum. 29Wa jam a biisi kama ale zukooŋ a nak nanpaga ale baai ale ka Juuma a wom Girik demma biika la. Ba yaa jam pii nyiŋ a yaali ayen ba ko wa. 30Wa Kirisita bisa suataŋa ale ga seba la, ba yaa ta wa cheŋ Siizariya tɛŋka, a yaa zaani dula jigini a basi wa ate wa a cheŋ Taasus tɛŋka.
31Kirisita bisaŋa ale a tu chaab meena a jam bo Judia tɛŋka po la ale Galili tɛŋka po la ale Samaria tɛŋka po la yaa jam boro ale ka suiyɔgni a chim. Ba siaka jam ta ka pagrim a kasim jam a chim nna yegayega a gum du ate ba va Wen Suiku ale a chali wa. Wen Chiika abe jam a maari ba kama ate ba jam piisi a gum du.
32Piita kasim jam nyeemu a cheŋ ka Kirisita bisaŋa ale a tu chaab la jigi, jigi meena. Dai yeŋ ate wa yaa cheŋ Lida tɛŋka. 33Dula jigini wa yaa nya nuru wa yuei jam le Aniiyas. Wa jam gbariŋ kama an baga a cheŋ ate wa kasim jam dua tiak po ate ku ga paari bena naaniŋ. 34Piita yaa wi wa ayen, <<Aniiyas>>, a weeni wa ayen, <<Yeezu Kirisita a basi kama ate fi nya nyiŋyɔgsa. Yiti ŋmai a kpamsi fi tiaka.>> Aniiyas a yaa deri yiti nna bunyi dekki. 35Nuru baai meena ale bo Lida ale Saaron tɛŋsaŋa ale nya wa la, ba mɛ yaa deri tagri a maa va ti Nyɔnɔwa Yeezu Kirisita.
36Nipok ale jam bo Jopa tɛŋka. Wa maa ka waai ale ta siaka ale Yeezu la. Wa yuei ale Tabita. Ba jam a wi wa ale Girik demma biika ayen ka Dookas. Di kiri ale yisik. Wa kasim jam a yaali tuimaŋsa tomka ale a maari ŋanjaksa mɛ. 37Va ŋala po nyiŋtuila yaa yik wa ate wa kpi. Ba ale jam so wa nyiŋka nueri la, ba yaa jam pai wa a ta jueli dueni kiari po. 38Lida tɛŋka ale moata Jopa la, ŋaaŋviirɔma ale wom ale Piita bo Lida la, ba yaa tom nidoaba baye wa jigi a saalim wa a weeni ayen, <<Ti a saalim, nye nwuli a jam dela.>> 39Piita yaa yiti va ba a cheŋ. Wa ale jam la, ba yaa ta wa jueli kiani po. Pukɔŋŋa meena a jam gilim wa kama a kaari ale a sak Piita garuk tii meena ate Dookas a jam nye ti diipo ate wa jam vua la.
40Piita yaa yiak ate ba meena nyini peelim ale ge a kpi duna tɛŋ a puusi ale ge viriŋ tuk kpiewa nyiŋ ayen, <<Tabita, yiti ŋmai.>> Tabita yaa lak wa ninaŋa. Wa ale ga nya Piita la, wa yaa yiti kali ŋmai. 41Piita yaa forisi paari wa a maari wa ate wa yiti zaani ŋmai. Piita yaa wi baai ale ta siaka ale Yeezu la, ale pukɔŋŋa a yaa pai wa javuk a te ba. 42Waai meena Jopa tɛŋka po a jam wom wanni de kama ate nuruba yegayega a jam siak a te ti Nyɔnɔwa Yeezu Kirisita. 43Piita jam goa Jopa ka da boari ale nuru wanyi ate ba a wi wa ayen Simon. Wa jam ka gbanzaba.
Tällä hetkellä valittuna:
Tuima 9: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
