Tuima 8
8
1Sɔɔl a jam maa siak kama ayen ba ko Sitiven. Da dii danni ate ba ko Sitiven la, Kirisita bisaŋa ale a tu chaab Jerusalem tɛŋka la a deri piilim ninam nna yegayega nyaka. Baai ale ta siaka ale Yeezu la, a yaa jam waaŋ chaab Judia ale Samaria tɛŋsaŋa meena po. Ka tuimtomdɔma nyiini ale jam kan waaŋ chaaba. 2Nuru baai ale ŋmasi jam a yaali Wen suiku la, ale jam ta Sitiven a ga gu ale a kaari nna yegayega.
3Alege Sɔɔl a jam diem pii ka nyiŋ a nyiem gilim a cheŋ yeeŋa dinyi dinyi a basi ate Kirisita bisaŋa ale a tu chaab la a nam a dari ba meena nidoaba ale nipooba a yik ba a lik.
4Baai meena ale ta siaka ate ba waaŋ jigi meena la, a yaa jam nyiem a cheŋ jigi meena a sak Wen wamaŋsaŋa. 5Filip yaa jam cheŋ Samaria tɛŋ kpieŋka po a mooli Kirisitawa wie a te ba. 6Nuru boanni ale jam nya wakperikaliik sii ate Filip nye la, ba yaa ŋmasi lak ba tueŋa a wom wa sinsaŋŋa. 7Wie ŋaai ale jam nye la gela ale, nuruba yegayega baai ale jam ta chichirik baata la, a kaari ate ti a nyini, ale baai naŋsa ale ba nisima ale jam kpi la, a jam nya nyiŋyɔgsa kama. 8Dila nyiŋ suipeentik nna yegayega a jam bo tɛŋ kala po kama.
9Nuru ale jam bo tɛŋ kala po. Wa yuei jam le Simon. Wa jam ka tiita nyɔnɔ. Wa jam pai ka tiita a nye wakperikaliisa nna yegayega ate ŋa cha Samaria demma. Wa jam pai wadek a chim ka nuru kpioŋ. 10Waai meena nuru kpienta ale nuru fiisa tɛŋ kala po a jam a wom wa ka nna yegayega a weeni ayen, <<Nuruwa de ta ka Wen pagrim kpiem buui ate ti a wi ayen Pagrim kpioŋ la.>> 11Ba jam a wom wa kama nalimnyiini dii nyiŋla, wa wakperikaliisaŋa a jam cha ba beni ka nna yegayega. 12Alege ba ale jam wom Filip sinsaŋŋa a magsi chaab ale Wen naamu ale Yeezu Kirisita pagrimu wie la, ba meena nidoaba ale nipooba a jam tuesi ka soka. 13Simon dek a jam maa ta siaka kama. Ba ale jam te wa soka a ga nueri la, wa yaa jam maa boro ale Filip a nya wakperikaliisa ale wakinkagla nna yegayega ate ku cha wa.
14Tuimtomdɔma ale jam bo Jerusalem la ale wom ayen Samaria demma a tuesi Wen Wanni kama la, ba yaa tom Piita ale Jɔɔn ayen ba cheŋ ba jigi. 15Ba jam puusi a te ba kama ayen ba tuesi Wen Chiika. 16Dii nyiŋla, Naawen Chiika an diem jam siŋ ba waai zuwa. Ba jam tuesi soka ka ti Nyɔnɔwa Yeezu Kirisita yuenni nyiŋ. 17Piita ale Jɔɔn yaa pai ba nisimaŋa a vi ba zuk ate Wen Chiika a jam ba jigi.
18Simon ale nya ayen tuimtomdɔma a pai ba nisima a vi ba zuk ate ba tuesi Wen Chiika la, wa yaa pai ligra ayen wa te Piita ale Jɔɔn, 19a weeni ba ayen, <<Ni te mi mɛ pagrimu de choawa ate mi mɛ a dan pai m nisimaŋa a vi nuru zuk, abe wa mɛ a tuesi Wen Chiika.>>
20Alege Piita yaa tulisi wa ayen, <<Fi ale fi ligraŋa meena a kpi, fi a poli ayen fi baga a da Wen tiirimu ale ka ligra! 21Fi niŋ a maa ka ti tuimaŋa po dii nyiŋla, fi suinummu a ka nyemagsika ale Wen ya. 22Dila nyiŋ, ku a fɛ kama ayen fi tagri fi popola baataŋa de abe fi puusi ate ti Naawenni a vɔŋ a te fu fi ale poli wanni de choawa la nyiŋ. 23Dii nyiŋla, m nya kama ale fi suinummu ka wa tuasa ale biem ale kasim sueri bu.>>
24Simon a yaa weeni Piita ale Jɔɔn ayen, <<Mi a saalim, ni puusi a te mu ate wieŋa de meena ate ni biisi la a kan jam mi jigiya.>>
25Piita ale Jɔɔn ale biisi ba ale seba Yeezu a soa diila, ale maa sak ba Naawen wamaŋsaŋa a ga nueri la, ba yaa pilim ŋman cheŋ Jerusalem tɛŋka. Ba ale jam bo suiku po a cheŋ la, ba jam sak wapaala maŋsaŋa Samaria tɛŋ fiisaŋa yegayega po kama.
26Ti Naawen maarɔ yaa weeni Filip ayen, <<Gomsi fidek a yiti cheŋ a va yeniŋ gala nyiŋ a va suik kuui ale dua Jerusalem ale Gaza tɛŋka suŋsuŋ la.>> (Ku ka suik kuui ale va sagni po a cheŋ la.) 27Ate wa yaa yiti a cheŋ. Wa le bo suiku po a cheŋ la wa yaa nya Itoopiya denɔ. Wa jam ka nuru kpioŋ dek, a bo Kandase a tom tuima, Itoopiya nipok Naawa yenni, wa ale jam a nya nipok naawa ligraŋa zuk. Wa jam cheŋ ka Jerusalem ayen wa puusi.#8:27 Azaya 56:3-8 28Ase wa le jam bo suiku po a kuli la, wa jam kala ka wa toroko po a kariŋ Biisiteerɔwa Azaya gbaŋka. 29Wen Chiika a yaa weeni Filip ayen, <<Yiti a ga pai fidek gum chaab ale nuruwa.>> 30Filip yaa chali cheŋ wa jigi yaa wom ale wa a karim Biisiteerɔwa Azaya gbaŋka. Filip yaa bek wa ayen, <<Fi miŋ a chak dii ate fi a karim la?>>
31Kpagni yaa tulisi wa ayen, <<Mi ale nye ka sɛ a miŋ chak ase nuru a nin kan weeni ku kiri a sak mu?>> Wa yaa wi Filip ate wa jueli kali jaamu po ale wa. 32Biisiteerɔwa Azaya ale jam a karim diila ale nna, <<Ase posuk ate ba ta a cheŋ tɔgridɔ jigi la ase pabiik ate ba a poni ka kɔbtaŋa a basi alege ka kan kaari la, wa an jam weeni wari ya. 33Wa jam nya chivie alege ba jam mini wa wensieŋa kama. Nuru karo ale baga a biisi wari a sak wa ŋaaŋbisaŋa, dii nyiŋla, wa nyuvunni tɛŋzuk de a kpeglim kama.>> (Azaya 53:7-8)
34Kpagni yaa bek Filip ayen, <<Weeni a sak mu ka wana ate biisiteerɔwa a biisi wa wari nna? Ka wadek yaa ka nuru yoŋŋoa?>> 35Filip yaa deri pai karimka de a piilim biik a weeni wapaala maŋsaŋa a magsi chaab ale Yeezu.
36Ba ale jam va chaab a cheŋ suiku po la, ba yaa jam paari jigi ate nyiam a dua ate kpagni yaa weeni Filip ayen, <<Nyiam ale nna. Ka boan ale ku kasi ate fi kan te mu soka?>> 37Filip yaa weeni wa ayen, <<Fi ale nya soka ase fi nin siak ale fi suinum meena.>> Kpagni yaa tulisi wa ayen, <<Mm, m siak ale m suinum meena ayen Yeezu Kirisita ka Wen Nidoabinni.>>
38Kpagni yaa nye ate torokowa a zaani, ate wa ale Filip a siŋ nyiamu po ate Filip a te wa soka. 39Ba ale nyini nyiamu po a jueli la, Wen Chiika yaa deri ta Filip a cheŋ ale ge kpagni nyiini. Kpagni an ŋman nya wa, wa yaa cheŋ ale suipeentik. 40Filip yaa deri nya ale wadek a bo ka Azotus tɛŋka. Wa ale jam bo suiku po a cheŋ la, wa jam a sak Wen wamaŋsaŋa ka dila a ga paari Siizariya tɛŋka.
Tällä hetkellä valittuna:
Tuima 8: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
