San Mateo 8

Sandaꞌa Jesús iin tiaa ra ndoꞌo kueꞌe tiaꞌyu

1Ra saa te nandiko Jesús vaxi nuu ra iku kan, ra iin tiꞌvi chee yuvi ndikun sata ra vaxi na xiꞌin ra. 2Saa ra ndixaa va iin ra xiꞌi kueꞌe tiaꞌyu, ra xikusiti ra nuu Jesús, ra xaꞌa ra xaku ndaꞌvi ra, ^kachi ra saa:

―Tata, tu na kuiin kun ra kuvi va sanduvaꞌa kun yuꞌu ―*kachi ra. 3Ra saa nditiandiaa ndaꞌa Jesús tiaa kan, ra ndikaꞌan ra xiꞌin ra kachi ra saa:

―Kuni va yu sandaꞌa yu yoꞌo, ra na nduvaꞌa kun vichin ―kachi Jesús xiꞌin ra.

Saa ra ndikun nindoñuꞌu va kueꞌe tiaꞌyu kan sata ra, ra nduvaꞌa va ra. 4Saa ndikaꞌan Jesús xiꞌin ra kachi ra saa:

―Kuaꞌan, ra ndia nii na ndatüꞌun kun xiꞌin, ra takua nuu ra sutu va ke na kuꞌun kun ñaꞌa kun mii kun, ña xa nduvaꞌa kun xa Ndioxi, ra kaniꞌi kun ñaꞌa ña soko kun nuu Ndioxi, ta kuꞌva iyoo chiñu ña xaꞌndia ndiayu Ndioxi ña ndakoo ra Moisés. Ra na kundaa ini ndia ña xa nduvaꞌa va kun xa Ndioxi ―kachi Jesús xiꞌin ra.

^Sandaꞌa Jesús iin ra xachiñu nuu iin soldado ra kuchee

5Ra te sakan ndixaa Jesús ñuu Capernaum, saa ra ndixaa va iin soldado ra kuchee xaꞌndia chiñu nuu iin ciento na soldado ñuu Roma, ra xaꞌa ra xakundaꞌvi ra nuu Jesús, 6kachi ra saa:

―Tata, ndiee ni ndoꞌo iin ra xachiñu nuu yu kanduꞌu ra veꞌe, ra ndia nii nuu kanda ka ra ke küvi, chi iin xavita ni va ña ra, ra ndoꞌo ni ra, Tata ―kachi ra xiꞌin Jesús. 7Ra saa ndakuiin Jesús kachi ra saa xiꞌin ra:

―Vaꞌa va, na kuꞌun yu xiꞌin kun ra sandaꞌa yu ra ―kachi ra. 8Ra saa ndakuiin ra soldado kan kachi ra saa xiꞌin Jesús:

―Tata, köo ichi vi yu ña kiꞌvi kun veꞌe yu, chi ra kaꞌnu ni ka va kuvi yoꞌo; ra mii nuu íin kun yoꞌo vichin va, na kaꞌndia kun chiñu nuu kueꞌe kan, saa ra, saña va ña ra, ra nduvaꞌa va ra. 9Chi xini va yu, saa chi iyoo tu na xaꞌndia chiñu nuu yuꞌu va, ra kandixa va yu na; ra yuꞌu tu, xaꞌndia chiñu nuu ndia soldado ra kandixa va ndia yuꞌu: “Kuaꞌan ndo”, ^kachi yu xiꞌin ndia, ra kuaꞌan va ndia; “naꞌa ndo”, ^kachi yu, ra vaxi va ndia. Ra saa tu ra xachiñu nuu va yu, chi xaꞌndia yu chiñu nuu ra, ra kandixa va ra ña kaꞌan yu xiꞌin ra ―kachi ra xiꞌin Jesús.

10Ra ta xini soꞌo Jesús ña ndikaꞌan ra soldado kan, saa ra ndakanda ni ini ra xiꞌin tuꞌun ña ndikaꞌan ra, ra saa ndikaꞌan ra xiꞌin na ndikun sata ra, kachi ra saa:

―Ña ndixa kaꞌan yu xiꞌin ndo, chi täan ndaniꞌi yu ndia nii na ñuu Israel na kandixa yuꞌu, ta kuꞌva kandixa ra yoꞌo yuꞌu ―kachi Jesús xiꞌin na.

11Saa ndikaꞌan ka ra kachi ra saa:

―Tiaa soꞌo ndo ña kaꞌan yu xiꞌin ndo yoꞌo. Chi iinii kuvi ña yuuvi ke ke̱e̱ yuvi, na ke̱e̱ chi nuu kanata ñuꞌù xiꞌin chi nuu kita ñuꞌù, ra kuꞌun na ndakundee na nuu mesa ña kuxi na xiꞌin ra Abraham, xiꞌin ra Isaac xiꞌin ra Jacob, ndivi nuu ^xaꞌndia Ndioxi chiñu. 12Ndi su mii na ñuu ra, na kana ra koo xiꞌin ra ndivi nuu xanꞌdia ra chiñu, ra xaꞌa ña xïin na kandixa na ra, ra chi keꞌe va tava ra na, ra nuu ñáa̱ va ku̱ꞌu̱n na, ra ikan kuu nuu kuaku ni na, ra iin ndiakua ndakaxi nùꞌù na ―kachi Jesús xiꞌin na.

13Ra te ndiꞌi saa ndikaꞌan Jesús xiꞌin ra soldado kan kachi ra saa:

―Kuanuꞌu veꞌe kun, chi ra xachiñu nuu kun, ra xa nduvaꞌa va ra, chi ta kuꞌva ^kandixa kun saa kuu va ―kachi Jesús xiꞌin ra.

Saa ra ndikun mii hora kan nduvaꞌa ndixa va ra xachiñu nuu ra soldado kan.

Sandaꞌa Jesús ña siso ra Simón Pedro

14Ra te ndixaa Jesús veꞌe ra Pedro, ra saa xini ra ña ndiee ka vi ndoꞌo ña siso ra Pedro kan kanduꞌu ña nuu ixto xiꞌin kaꞌni, ra iin ndiakua ndatuvi ña xiꞌin ña. 15Saa nditiandiaa ndaꞌa Jesús ña, ra ndikun nduvaꞌa va ña, chi ke̱e va kaꞌni kan, saa ra ndakoo ña, ra xaꞌa ña ^xavii ña kuxi va ndia.

Sandaꞌa Jesús kuaꞌa ni na xiꞌi

16Saa kuu ra kuaa va kii kan, ra ndixaa yuvi kan nuu Jesús, ra ndiaka na kuaꞌa ni na xiꞌi, xiꞌin na tiin tachi ndivaꞌa ña kuni na ña na sandaꞌa ra na. Saa ra takua tuꞌun va ndikaꞌan ra xiꞌin tachi ndivaꞌa kan ña xaꞌndia ra chiñu nuu ña, ña na kee ña kuꞌun ña, saa ra ndikun saña va ña na, ra kee ña kuaꞌan va ña, ra sandaꞌa ra takundiꞌi va na xiꞌi kan. 17Ra suꞌva ke kuu ña ndixinu nuu tuꞌun Ndioxi ña ndikaꞌan ra Isaías ra ndikaꞌan tuꞌun yuꞌu Ndioxi xinaꞌa ña kachi suꞌva: “Mii Ndioxi kuvi ra kindiaa takundiꞌi kueꞌe ña xiꞌi yo, ra sandiꞌi tu ra xaꞌa ña kuꞌvi va yo”, kachi ña.

Yuvi na kuni kundikun sata Jesús

18Ra saa ixtoꞌni Jesús ña ndukuaꞌa ni yuvi, saa ra xaꞌndia ra chiñu nuu ndia itaꞌan xiꞌin ra ña xa na koo nduvi ndia xiꞌin iin barca ña ndayaꞌa ndia chi inka xiyo yuꞌu tiañuꞌu kan kuꞌun ndia. 19Ra saa ndixaa iin ra maestro sañaꞌa ley Ndioxi ña ndakoo ra Moisés, ra ndikaꞌan ra xiꞌin Jesús kachi ra saa:

―Tata Maestro, ndia ndia ka mii nuu na kuꞌun va kun, ra kuꞌun yu xiꞌin va kun ―kachi ra. 20Saa ndakuiin Jesús kachi ra saa xiꞌin ra:

―Yukuii, ra iyoo va yavi nuu kixi ri, ra saa tu iyoo saa va, chi iyoo tu chiꞌyo nuu kixi ri kan va. Ndi su, yuꞌu, ra xaa yoꞌo vichin, ra ndia nii nuu kusun yu ke köo vi ―kachi Jesús xiꞌin ra.

21Ra saa ndikaꞌan tu iin mii ra itaꞌan xiꞌin mii Jesús va kachi ra saa xiꞌin ra:

―Tata, kundiatu ñaꞌa yuꞌu, ra na kuꞌun yu nduxin yu iva yu, saa ndakundikun yu yoꞌo kuꞌun yu xiꞌin kun ―kachi ra xiꞌin Jesús.

22Saa ndakuiin Jesús kachi ra saa xiꞌin ra:

―Kundikun yuꞌu, ra na koꞌo xiꞌin yu, ra ndakoo na ndii na nduxin taꞌan mii va na ―kachi ra xiꞌin ra.

^Sayaa Jesús tachi xiꞌin tiakuii

23Saa nandaa Jesús ini barca kan xiꞌin ndia itaꞌan xiꞌin ra, ra ndakiꞌin ndia kuaꞌan va ndia. 24Ra sakan saa kuu ndia kuaꞌan va ndia, saa ra tuꞌva ndiee ka vi xaꞌa xika tachi kuiꞌna nuu tiañuꞌu kan, ra iin ndakundichi ndakundichi nuu ra xa ña, ra xaꞌa iin kuni ndakava barca kan xiꞌin ndia kaꞌa tiañuꞌu kan, ndi su Jesús ra yaa yaa ndisaꞌvi ini ra kanduꞌu ra kixi va ra. 25Ra saa kuyachin ndia itaꞌan xiꞌin ra, ra sandoto ndia ra, ra ndikaꞌan ndia xiꞌin ra kachi ndia saa:

―¡Tata, ndakoo ra sakaku kun nduꞌu chi kuaꞌan saꞌvi va barca yoꞌo xiꞌin yo! ―kachi ndia xiꞌin ra. 26Saa ndikaꞌan ra xiꞌin ndia kachi ra saa:

―¿Nichuun ndiee ni iyuꞌvi ndo? ¿Ra nichuun loꞌo ni ndiaa ini ndo yuꞌu? ―kachi ra xiꞌin ndia. Ra saa ndakoo ra, ra ndikaꞌan ra xiꞌin tachi ra ndikaꞌan tu ra xiꞌin tiakuii va, saa ra ndikun xikoyaa va ña, saa ra iin kuu taxin va. 27Saa ra ndakanda ka vi ini ndia, ra kachi ndia saa xaꞌa Jesús:

―¿Ni tiaa kuvi ra yoꞌo, ra ndia tachi xiꞌin tiañuꞌu yoꞌo ra kandixa va ra ña kaꞌan ra? ―kachi ndia.

Sandaꞌa Jesús na tiin tachi ndivaꞌa ñuu Gadara

28Ra te ndixaa Jesús chi inka xiyo yuꞌu tiañuꞌu nuu ndikaa ñuu na Gadareno, ra saa ndakoyo uvi tiaa ndia tiin tachi ndivaꞌa, ndia ndoꞌni ini yavi ndii, ra ndixaa ndia niniꞌi taꞌan ndia xiꞌin Jesús, ra tiaa kan, ra yavi ndii ke kuu veꞌe va ndia, ra tiaa ni ndiee sana ndia, chi kani taꞌan ndiꞌi va ndia xiꞌin yuvi. Ña kan ke mii na ñuu kan ra ndiküvi vaꞌa ka vi kaka na ichi nuu xindoꞌni ndia. 29Ra saa te kuyachin ndia nuu Jesús, ra iin kokoꞌo xaꞌa ndia ndaꞌyu ndia, ra kachi ndia saa:

―¿Ni ke kuni kun xiꞌin ndi ña vaxi kun sataꞌan kun nduꞌu Jesús seꞌe Ndioxi? Chi kuni ka va, saa xaa tiempo ña sandoꞌo kun nduꞌu ―kachi ndia ndaꞌyu ndia. Ndi su tachi ndivaꞌa ña ndoꞌni ini va ndia ke ndikaꞌan.

30Ra yachin kan xika iin tiaꞌndia chee kini xaxaꞌan ri. 31Ra saa xakundaꞌvi ni tachi ndivaꞌa kan nuu Jesús kachi ña saa:

―Tu tava kun nduꞌu, saa ra, taxi ndiayu ndaꞌa ndi ña na kuꞌun ndi ndee ndi ini kini kaa va ―kachi ña xiꞌin ra.

32Ra saa ndikaꞌan Jesús xiꞌin ña kachi ra saa:

―Kuaꞌan ndo ―kachi ra xiꞌin ña, ña taxi ra ndiayu ndaꞌa ña.

Ra saa ndakoyo tachi ndivaꞌa kan ini uvi saa tiaa kan, ra ndixaꞌan ña nandee ña ini kini ri xika kan, ra iin sasána ndiꞌi ña ri, ra saa xanindiee ndiꞌi ri kuaꞌan ri chi yuꞌu iin taꞌvi kan, ra ikan koꞌni ndiꞌi ri mii ri ini mini kan, ra ndikaandiaa ndiꞌi ri ndixiꞌi ri. 33Ra saa kee na ndiaa kini kan xinu na ndixaꞌan na ñuu kan ndatuꞌun na xiꞌin yuvi xaꞌa takundiꞌi ña xini na kuu kan, ra saa tu xaꞌa ña xini na ndoꞌo ndia xindoꞌni tachi ndivaꞌa ini kan va. 34Ra saa ndakoyo takundiꞌi na ñuu kan ndixaa na nuu iin Jesús, ra te xini na ra, saa ra, xaꞌa na xakundaꞌvi na nuu ra, ña na sa ra ña mani kanata ra ñuu kan, ra kuꞌun ra inka xiyo va kachi na xiꞌin ra.

Tällä hetkellä valittuna:

San Mateo 8: mxvNT

Korostus

Jaa

Kopioi