San Mateo 2

Ndixaa ndia ndichi ndia kee xika ^ixtoꞌni ndia Jesús

1Ra ñuu Belén ña ndikun ndiaa chi Judea kuvi nuu kaku Jesús, ra suvi kuiya kan ke kuu ra Herodes rey ña ^xaꞌndia ra chiñu nuu takundiꞌi ñuu ña ndoꞌni chi kan; ra saa ndixaa sava ndia ndichi ñuu Jerusalén. Ra ndia ndichi kan, ra xika ni kee ndia, saa chi ndia chi nuu kanata ñuꞌu vi ke kee ndia; ra ndia sakuaꞌa xaꞌa takundiꞌi ñaꞌa ña ndee nuu ndivi kuvi ndia, ta kuu kimi xiꞌin ndia ndia ka ñaꞌa. 2Ra saa ndixaa ndia ndindakatuꞌun ndia kachi ndia saa:

―¿Ndia ke ^kanduꞌu ra loꞌo, ra kuu rey na Judío ra sakan kaku? Chi xini ndi kanata kimi ri kaꞌan xaꞌa ra ña kaku ra chi nuu kanata ñuꞌu, ña kan ke vaxi ndi ndasakaꞌnu ndi ra ―*kachi ndia.

3Ra te kundaa ini ra rey Herodes ña yoꞌo, ra ndiee ni nindiꞌi ini ra, ra iin sana suꞌva ini ra, ra iin saa ndoꞌo takundiꞌi tu na ñuu Jerasalén kan va. 4Saa ndakana ra takundiꞌi ndia kunaꞌnu nuu ndia sutu, xiꞌin ndia maestro sañaꞌa ndiayu Ndioxi ña ndakoo ra Moisés, ra nindakatuꞌun ra ndia, ndia ku ñuu nuu kaku Cristo, ra tiꞌvi Ndioxi xaa sakaku na ñuu yuuvi yoꞌo. 5Ra saa ndakuiin ndia kachi ndia saa:

―Ñuu Belén ña ndikun ndiaa Judea yoꞌo kuvi nuu kaku ra; chi saa iyoo tuꞌun ña tiaa iin ra ndikaꞌan tuꞌun yuꞌu Ndioxi xinaꞌa. Ra suꞌva ke kachi ña:

6Yoꞌo, ñuu loꞌo Belén, ña ndikun ndiaa Judá,

ra ñuu chee vaꞌa va kuu kun, xiꞌin ñuu naꞌnu ña ndoꞌni Judá;

saa chi ñaa ku nuu kaku iin ra kuchee

kaꞌndia chiñu nuu na ñuu yu Israel, ra kunuu ra nuu na,

ra kiꞌin ra kuenda xiꞌin na, kachi Ndioxi ndikaꞌan ra,

xiꞌin ra ndikaꞌan ndoso tuꞌun ra xinaꞌa ―*kachi ndia xiꞌin ra Herodes.

7Saa ndakana seꞌe ra Herodes ndia ndichi ndia ndixaa kan, ra ndindakatuꞌun ra ndia, ra saa kundaa kaxi ini ra nuu ndia, ndia mii kii kuvi ña xini ndia kanata kimi kan. 8Ra te ndiꞌi kundaa ini ra, ra saa tiꞌvi ra ndia kuaꞌan ndia ñuu Belén, ra ndikaꞌan ra xiꞌin ndia kachi ra saa:

―Kuaꞌan ndo ra nanduku vaꞌa ndo ra loꞌo kan, ra te xa na ndaniꞌi ndo ra, ra saa sa ndo ña mani ña na ndatuꞌun ndo loꞌo xiꞌin yu, ra kuꞌun tu yuꞌu va ña ndasakaꞌnu yu ra ―*kachi ra xiꞌin ndia.

9Ra te ndiꞌi xini soꞌo ndia ña ndikaꞌan ra rey Herodes xiꞌin ndia, ra saa ndakiꞌin ndia kuaꞌan ndia. Ra kimi ri xini ndia kanata ta kee ndia ñuu ndia vaxi ndia, ra ndakunuu tuku va ri nuu ndia kuaꞌan ri xiꞌin ndia, iin saa ndiakua ndixaa ri xikutuvi ri ndia nuu kanduꞌu ra loꞌo kaku kan. 10Ra te xini ndia nuu ndixikutuvi kimi kan, ra ndiee ka vi kusii ini ndia. 11Ra saa ndixaa ndia ndikiꞌvi ndia ini veꞌe, ra xini ndia ra loꞌo kan xiꞌin ña María, siꞌi ra ndee na, saa ra ndikun xikusiti ndia nuu ra, ña ndasakaꞌnu ndia ra; ra ndakuiña ndia xatun tu ndixaa xiꞌin ndia nuu ñuꞌu oro, xiꞌin xuxa vaꞌa ña yaꞌvi ni, xiꞌin ndutia xaꞌan tami tia nani “mirra” ra ñaꞌa yoꞌo ke ndisoko ndia nuu ra. 12Ra te nandiko na kuanuꞌu ndia, ra nindandïko ka ndia chi ñuu Jerusalén ña ndatuꞌun ndia xiꞌin ra rey Herodes, chi xa inka va ichi nandiko ndia kuaꞌan ndia, saa chin saa kachi Ndioxi xiꞌin ndia ña saxani ra ndia ñuu.

Xinu na iva siꞌi Jesús kuaꞌan na xiꞌin ra chi ñuu Egipto

13Ra te xa ndakiꞌin na ndichi kan kuanuꞌu ndia, ra saa kixi iin ra tatun Ndioxi saxani ra ra José, ra kachi ra saa xiꞌin ra:

―^Ndakoo, ra ndakiꞌin kun ra loꞌo yoꞌo xiꞌin siꞌi ra, ra kunu kuaꞌan xiꞌin na chi ñuu Egipto, ra ikan koo kun xiꞌin na, ra ndia te na kaꞌan tuku yu xiꞌin kun saa nandiko kun, chi kaka nduku ra rey Herodes ra loꞌo yoꞌo ña kaꞌni ñaꞌa ra ―*kachi ra tatun Ndioxi xiꞌin ra José.

14Saa ra ndikun ndakoo va ra José, ra ñuu saa ndakiꞌin ra ra loꞌo kan xiꞌin siꞌi ra, ra ndakiꞌin ra na kuaꞌan na xiꞌin ra chi ñuu Egipto va. 15Ra ikan xindee na ndia te nditiandiaa kii ña ndixiꞌi ra rey Herodes va. Ra suꞌva ke kuu, ña ndixinu nuu tuꞌun, ña ndikaꞌan Ndioxi xinaꞌa, xiꞌin iin tiaa ra ndikaꞌan tuꞌun yuꞌu ra, ra suꞌva ke kachi ra: “Chi ñuu Egipto ke ndixaꞌan seꞌe yu ndixiyo ra, ra ndia mii kan ke ndakana yu ra ña na kanata va ra ñuu kan”, kachi Ndioxi.

16Ra te kundaa ini ra Herodes ña sandaꞌvi na ndichi kan ra, saa ra ndiee ni ndisaa ini ra, ra saa xaꞌndia ra chiñu nuu ndia soldado, ra ndixaꞌan ndia xaꞌni ndia takundiꞌi na kuachi vali, na sakan kaku, iin saa ndia na uvi kuiya, na iyoo ñuu Belén xiꞌin takundiꞌi ñuu ña ndoꞌni yachin xiꞌin ña; chi kuꞌva saa ke tava mii ra Herodes kan tiempo xiꞌin tuꞌun ña ndikaꞌan ndia ndichi kan xiꞌin ra, ña kaku Jesús. 17Ra suꞌva ke kuu ña ndixinu nuu tuꞌun Ndioxi ña tiaa ra Jeremías, ra ndikaꞌan ndoso tuꞌun yuꞌu Ndioxi xinaꞌa, ña kachi suꞌva:

18Iin niniꞌi ^kuu tiaku xaku na ñuu Ramá,

ra iin siso siso ndaꞌyu na.

Ra ña Raquel va kuvi ña xaku ni xaꞌa seꞌe ña,

ra xïin ña kaꞌan ndia nii yuvi xiꞌin ña,

saa chi seꞌe ña ra xa na ndixiꞌi va kuvi na, kachi Ndioxi ndikaꞌan ra,

kachi ra Jeremías.

Nandiko ra José xiꞌin ña Maria xiꞌin ra loꞌo Jesús ndaxaa na ñuu Nazaret

19Ra te xa ndixiꞌi ra rey Herodes, saa ndixaꞌan iin ra tatun Ndioxi saxani ra ra José chi ñuu Egipto, ra ndikaꞌan ra xiꞌin ra kachi ra saa:

20―Ndakoo, ra ndakiꞌin kun ra loꞌo yoꞌo xiꞌin siꞌi ra, ra nandiko kun xiꞌin na chi ñuu Israel, chi xa ndixiꞌi va na xika nduku kaꞌni ra loꞌo yoꞌo ―kachi ra tatun Ndioxi xiꞌin ra José.

21Ra saa ndakoo ra, ra ndakiꞌin ra ña Maria xiꞌin ra loꞌo kan, ra nandiko na kuanuꞌu na chi Israel. 22Ra te kundaa ini ra José xaꞌa ra Arquelao ña xa ndakiꞌin ra xaꞌndia ra chiñu nuu na ñuu Judea ña ndakundichi ra nuu ra Herodes, iva ra, saa ra ndiyuꞌvi va ra ña kuꞌun ra chi kan; ra saa taxi Ndioxi xani nuu ra, ndia chi ke kuꞌun ra, ra saa ndakiꞌin ra kuaꞌan ra chi Galilea va. 23Ra te ndixaa na ikan, ra saa ndakiꞌin na kuaꞌan na koo na ñuu Nazaret, ra yoꞌo ke ndixinu nuu tuꞌun ña ndikaꞌan ndia ndikaꞌan tuꞌun yuꞌu Ndioxi xinaꞌa: Ña kaꞌan na ña kuu Jesús ra ñuu Nazaret.

Tällä hetkellä valittuna:

San Mateo 2: mxvNT

Korostus

Jaa

Kopioi