Yauhas 15

Yexus Yog Tsob Tseem Txivhmab

1“Kuv yog tsob tseem txivhmab, thiab Kuv Txiv yog tus uas tu. 2Nws muab txhua ceg hmab ntawm Kuv uas tsis txitxiv txiav povtseg. Txhua ceg hmab uas txitxiv nws muab tav rau kom hajyam txitxiv ncw. 3Nej twb raug muab ntxuav kom huv los ntawm Kuv tej lus qhia uas Kuv muab rau nej lawm. 4Nej yuavtsum txuas rau ntawm Kuv, Kuv thiaj yuav txuas rau ntawm nej. Tus ceg hmab uas tsis txuas rau ntawm txoj hmab yeej txi tsis tau txiv. Ib yam li ntawd, yog nej tsis txuas rau ntawm Kuv, nej yeej txi tsis tau txiv.

5“Kuv yog tsob hmab, nej yog cov ceg. Tus uas txuas rau ntawm Kuv thiab Kuv txuas rau ntawm nws, tus ntawd yuav txitxiv ncw; yog nej tsis txuas rau ntawm Kuv, nej yeej ua tsis tau ib yam dabtsi li. 6Tus uas tsis txuas rau ntawm Kuv, tus ntawd zoo ib yam li tus ceg hmab uas raug muab txiav povtseg thiab twb qhuav lawm; cov ceg hmab ntawd raug muab sua mus pov rau hluavtaws hlawv thiab kubhnyiab tas. 7Yog nej txuas rau ntawm Kuv thiab Kuv tej lus nyob rau hauv nej lawm, nej xav tau yam twg, nej ciali thov, nej yeej yuav tau yam ntawd. 8Yog nej txitxiv ncw, Kuv Txiv yuav tau ntsejmuag; thiab yog nej ua li ntawd, nej thiaj yog Kuv cov thwjtim.

9“Kuv Txiv hlub Kuv licas, Kuv yeej hlub nej ib yam li ntawd; nej yuavtsum nyob nraim rau hauv Kuv txoj kev hlub. 10Yog nej ua rawsli Kuv tej lus qhia, nej yuav nyob nraim hauv Kuv txoj kev hlub, ib yam li Kuv ua rawsli Kuv Txiv tej lus qhia thiab nyob nraim hauv Nws txoj kev hlub ntawd.

11“Kuv hais tej no rau nej kom nej zoosiab ib yam li Kuv zoosiab, thiab kom nej txoj kev zoosiab yuav muaj puvnpo. 12Kuv txoj kevcai yog li no: nej ib leeg yuavtsum hlub ib leeg, ib yam li Kuv hlub nej. #Yauh 13:34; 15:17; 1Yauh 3:23; 2Yauh 5 13Tsis muaj leejtwg uas yuav muaj kev hlub loj dua qhov no, uas yog muab tau nws txojsia pub rau nws cov phoojywg. 14Yog nej ua rawsli tej uas Kuv kom nej ua, nej thiaj yog Kuv cov phoojywg. 15Nimno Kuv tsis hu nej ua tubtxib lawm, rauqhov tus tubtxib yeej tsis paub xyov nws tus tswv ua dabtsi. Tiamsis Kuv hu nej hu ua phoojywg, rauqhov Kuv twb qhia txhua yam uas Kuv hnov ntawm Kuv Txiv rau nej lawm. 16Tsis yog nej xaiv Kuv, tiamsis yog Kuv xaiv nej thiab tsa nej kom mus txitxiv ncw, txi cov txiv uas nyob mus ibtxhis. Yog nej tuav Kuv lub npe thov yam twg, Leejtxiv yuav pub yam ntawd rau nej. 17Tej uas Kuv kom nej ua yog li no: nej ib leeg yuavtsum hlub ib leeg.

Neeg Ntiajteb Txoj Kev Ntxub

18“Yog neeg ntiajteb ntxub nej, kom nej ncontsoov tias lawv twb xub ntxub Kuv uantej lawm. 19Yog nej ua li ntiajteb ua, ces neeg ntiajteb yuav hlub nej npaum nkaus li nej yog lawv tus. Tiamsis Kuv twb xaiv nej tawm hauv lub ntiajteb no lawm, nej tsis yog ntiajteb li; yogli ntawd, neeg ntiajteb thiajli ntxub nej. 20Ncontsoov tej lus uas Kuv qhia rau nej hais tias, ‘Tus tubqhe yeej tsis loj dua nws tus tswv.’ Yog lawv tsimtxom Kuv, lawv yuav tsimtxom nej thiab; yog lawv ua rawsli Kuv tej lus qhia, lawv yuav ua rawsli nej tej lus qhia thiab. #Math 10:24; Lukas 6:40; Yauh 13:16 21Lawv yuav ua txhua yam no rau nej, vim yog Kuv lub npe, rauqhov lawv tsis paub tus uas txib Kuv los. 22Yog Kuv tsis tau los qhia lawv, lawv yeej yuav tsis muaj txim; tiamsis nimno lawv yeej tsis muaj lus hais uas yuav daws lawv lub txim kiag li. 23Tus uas ntxub Kuv, tus ntawd yeej ntxub Kuv Txiv thiab. 24Yog Kuv tsis tau los ua tej haujlwm uas yeej tsis tau muaj leejtwg ua dua rau lawv pom li, ces lawv yeej tsis muaj txim; tiamsis lawv twb pom tej uas Kuv ua lawm, lawv thiaj ntxub Kuv thiab Kuv Txiv. 25Yeej yuav muaj li no thiaj tiav rawsli tej lus uas tau sau tseg rau hauv lawv txoj Kevcai uas hais tias, ‘Lawv lam tau lam ntxub Kuv.’ #Nnkauj 35:19; 69:4

26“Thaum tus Pab, uas yog Vaj Ntsujplig tus qhia qhov tseeb txog Vajtswv, los ntawm Leejtxiv los. Kuv yuav txib Nws ntawm Leejtxiv los cuag nej, thiab Nws yuav ua timkhawv txog Kuv. 27Thiab nej los yuav ua timkhawv txog Kuv thiab, rauqhov nej yeej nrog Kuv nyob txij thaum chivthawj los lawm.

Tällä hetkellä valittuna:

Yauhas 15: MWW2022

Korostus

Jaa

Kopioi