Tes Haujlwm 3
3
Petus Kho Tus Txivneej Tuag Ceg Uas Thovkhawv
1Muaj ib hnub thaum peb teev hnubqaij, Petus thiab Yauhas nkawd txawm mus pem lub Tuamtsev, uas yog lub sijhawm thov Vajtswv. 2Nyob rau ntawm lub roojvag uas hu ua Roojvag Zoonkauj, muaj ib tug txivneej uas tuag ceg thaum nruabthiab nyob rau ntawd. Muaj neeg niajhnub kwv nws tuaj tso rau ntawm lub roojvag thiab thov nyiaj ntawm cov neeg uas tuaj thov Vajtswv hauv lub Tuamtsev. 3Thaum nws pom Petus thiab Yauhas tabtom yuav mus hauv lub Tuamtsev, nws txawm thov kom nkawd pub ib yam dabtsi rau nws.
4Nkawd ntsiantsoov tus txivneej ntawd, ces Petus txawm hais tias, “Koj saib wb nawb!” 5Tus txivneej ntawd thiaj ntsiantsoov nkawd, thiab ciasiab hais tias yuav tau txais ib yam dabtsi los ntawm nkawd. 6Tiamsis Petus hais rau nws tias, “Kuv tsis muaj nyiaj tsis muaj kub, tiamsis kuv yuav muab yam uas kuv muaj rau koj: ntawm Yexus Khetos uas yog neeg Naxalev lub npe, koj ciali sawv thiab mus kev!”
7Petus txawm tuav nkaus tus txivneej ntawd sab tes xis thiab rub nws sawv. Tamsim ntawd nws ob txhais kotaw thiab tej pobtaws txawm ciali muajzog tuaj; 8nws sawvtsees thiab ciali mus taus kev. Nws txawm nrog nkawd mus rau hauv lub Tuamtsev, nws mus kev thiab dhia pajpaws qhuas Vajtswv.
9Cov neeg uas nyob ntawd pom nws mus kev thiab hnov nws qhuas Vajtswv, 10thiab lawv paub tias nws yog tus yawg uas tuaj nyob ntawm lub Roojvag Zoonkauj thov nyiaj, lawv xav tsis thoob hais tias xyov yog ua licas nws ciali mus taus kev lawm.
Petus Tej Lus Qhia Hauv Lub Tuamtsev
11Thaum tus txivneej ntawd tseem tuav rawv Petus thiab Yauhas ntawm Xalumoos lub qabkhav, cov neeg uas nyob ntawd txawm xav tsis thoob thiab ciali khiav zomzaws los rau ntawm lawv. #Khiav 3:15 12Thaum Petus pom li ntawd, nws thiaj hais rau lawv tias, “Cov kwvtij Yixalayees 'e, ua licas nej yuav xav tsis thoob rau tej no thiab ua licas nej yuav ntsiantsoov wb? Nej xav tias wb muaj hwjchim lossis wb yog neeg dawbhuv, es wb thiaj ua rau tus txivneej no mus taus kev no lov? 13Tus Vajtswv uas yog Anplahas, Ixaj, Yakhauj, thiab peb cov yawgkoob tus Vajtswv, yog tus ua rau Nws tus Tubtxib Yexus tau koobmeej. Tiamsis nej ntes Nws coj mus rau cov nomtswv uas muaj hwjchim, txawm yog Philaj xav muab Nws tso los nej twb tsis kam. 14Nej tsis lees paub tus dawbhuv thiab ncajncees, tiamsis nej ho thov kom Philaj tso tus neeg uas tua neeg rau nej. #Math 27:15-23; Malak 15:6-14; Lukas 23:13-23; Yauh 19:12-15 15Nej muab tus uas ua tau rau neeg muaj txojsia tua povtseg, tiamsis Vajtswv tsa Nws sawv hauv qhovtuag rovqab los; peb yog cov ua timkhawv txog tej no. 16Twb yog Yexus lub npe uas muaj hwjchim thiaj ua rau tus txivneej uas tuag ceg no muajzog tuaj. Qhov uas nej pom thiab paub no yog ua los ntawm txoj kev ntseeg uas nyob rau hauv Yexus lub npe; nej sawvdaws yeej pom tias vim txoj kev ntseeg Yexus, thiaj ua rau nws zoo.
17“Cov kwvtij, kuv paub tias qhov uas nej thiab nej cov thawjcoj ua li ntawd rau Yexus, twb yog vim nej tsis paub. 18Yav thaum ub Vajtswv tau hais kom txhua tus xibhwb cev Vajtswv lus qhia uantej hais tias Nws tus Mexiyas yuav raug kev tsimtxom; nimno twb muaj tiav rawsli Nws tau hais tseg ntawd lawm. 19Yogli ntawd, nej yuavtsum tso nej tej kev txhaum tseg thiab tig los cuag Vajtswv, kom Nws thiaj yuav zam nej lub txim. Yog nej ua li ntawd, 20nej yuav tau so lossiav nyob rau ntawm Vajtswv lub xubntiag, thiab Nws yuav txib Yexus, uas yog tus Mexiyas uas Nws tau xaiv tseg lawm los rau nej. 21Yexus yuav nyob saum ntuj ceebtsheej mus txog thaum lub sijhawm uas ibpuas tsavyam hloov dua tshiab huv tibsi, rawsli thaum ub uas Vajtswv twb tau hais rau cov xibhwb cev Vajtswv lus uas yog neeg dawbhuv los lawm. 22Rauqhov Mauxes hais tias, ‘Tus Tswv uas yog nej tus Vajtswv yuav tsa ib tug hauv nej haivneeg los ua tus xibhwb cev Vajtswv lus ib yam li Nws tau tsa kuv#3:22: ib yam li Nws tau tsa kuv lossis zooli kuv., nej yuavtsum mloog txhua yam uas nws qhia rau nej. #2Kev 18:15 (LXX) 23Yog leejtwg tsis mloog tej lus uas tus xibhwb cev Vajtswv lus ntawd qhia, tus ntawd yuav raug muab tshem tawm ntawm Vajtswv haivneeg mus thiab yuav raug kev puastsuaj.’ #2Kev 18:19
24“Txhua tus xibhwb cev Vajtswv lus thaum ub uas yog suav txij Xamuyees los, puavleej hais txog tej no ib yam nkaus. 25Nej yog cov xibhwb cev Vajtswv lus tej xeebntxwv, thiab tej lus cogtseg uas Vajtswv tau hais rau nej cov yawgkoob, yog Nws coglus rau nej thiab. Vajtswv hais rau Anplahas hais tias, ‘Los ntawm koj li cajces, Kuv yuav foom koobhmoov rau txhua haivneeg hauv qabntuj no.’ #Chiv 22:18 26Yogli ntawd, thaum Vajtswv txib Nws tus Tubtxib, Vajtswv thiaj xub txib Nws los cuag nej uantej, kom Nws foom koobhmoov rau nej los ntawm qhov uas muab nej txhua tus tig tawm ntawm nej tej kev txhaum.”
Tällä hetkellä valittuna:
Tes Haujlwm 3: MWW2022
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2022 United Bible Societies. All rights reserved.
