Lukas 17

Lia ema monu baa sala hotu nusu pardua

(Mateus 18:6-7,21-22; Markus 9:42)

1Hotu, Yesus katak tenik baa Niakaan maktuir sia naꞌak, “Dala waꞌin, ema monu baa sala tan ema seluk niakaan hahalok. Hanono! Ema mak sasuꞌat ema toꞌo monu baa sala, ema nia netan dinu boot. 2Kalo ema sasuꞌat ema kiꞌik ida toꞌo nia la fiar baa Haꞌu, Naꞌi Maromak atu taa ukun todan liu baa ema nia. Diꞌak liu, kesi fatuk boot ida#17:2Hakerek Moon lia Yunani naꞌak ‘fatuk laledun’. Uluk ema Yahudi sia ledu hare gandum nodi fatuk laledun mak boot liu ema. Sia feur fatuk laledun nia, nodi kuda keledai. baa niakaan kakorok, hotu soe nia baa tasi. 3Daka aan diꞌa-diꞌak, nebee keta halo ema monu baa sala. Kalo maluk ida nalo sala, deꞌan nia. Kalo nia nalo neon aat, hotu nia mai nusu pardua, maluꞌa lakon niakaan salan nia.#Mateus 18:15

4Kalo baa loron ida laran, maluk ida nalo sala dala hitu baa o, hotu nia nalo neon aat nodi nusu pardua kedas, o musti maluꞌa lakon niakaan salan dala hitu nia.”

Fiar baa Naꞌi Maromak

5Baa loron ida, Yesus klosan sia mai nasoru Nia nodi nusu naꞌak, “Ama Boot! Amikaan fiar la biit. Tulun makbiit tuꞌan amikaan fiar lai.” 6Yesus nataa naꞌak, “Kalo fiar baa Naꞌi Maromak, masik fiar oan ida dei moos, ita bele haruka ai boot ida haꞌak, ‘Makfokit lori baa tasi.’ Ai nia nanis nakfokit kedas lori baa tasi.”

Ata mak diꞌak la buka tonun

7Hotu, Yesus dale tenik naꞌak, “Lia nuneꞌe: noo ata ida mak fila rai iha naꞌin niakaan toꞌos no daka naꞌin niakaan bibi malae iha hae molik. Serwisu notu, ata nia fila uma. Toꞌo baa, kalo naꞌin dale baa nia naꞌak, ‘Mai ita rua haa ona!’ lia nia fatan ka? Lale! 8Fatan, kalo naꞌin naruka naꞌak, ‘Baa mahulin haa-hemu bodik haꞌu! Haꞌu kaa uluk lai, foin o maa.’ 9Kalo ata nalo tuir naꞌin hakaran, naꞌin musti tonu nia ka? Lale! 10Nunia moos emi. Kalo serwisu hotu tiꞌan bodik Naꞌi Maromak, emi musti dale haꞌak, ‘Ami neꞌe, ata dei. Ami la buka tonun. Ami halaꞌok naꞌin hakaran dei.’ ”

Yesus nadiꞌak nola ema moras funi mea naꞌin sanulu

11Oras baa Yerusalem, Yesus sia toꞌo rai Galilea no rai Samaria kladik. 12Tama baa leo ida, ema moras funi mea naꞌin sanulu mai nasoru Yesus. Sia nariik nosi dook, 13nodi nahii bele-bele naꞌak, “Ama Boot Yesus! Hadomi ami lai!”

14Titu-naree sia, Yesus naruka naꞌak, “Baa hatudu isin lolon baa naꞌilulik, nebee leno emikaan moras lakon tiꞌan ka sei.” Rona Yesus naruka nunia, sia moos baa. Iha dalan klaran, teki-tekis sia hotu-hotu diꞌak tiꞌan.#Ukun-badu Naꞌilulik 14:1-32

15Haree nunia, sia laꞌo liu nodi neon diꞌak. Mais ema ida nosi sia fila baa Yesus nodi nahii naꞌak, “Tonu-haboot Naꞌi Maromak! Haꞌu diꞌak tiꞌan!” 16Hotu nia nakniꞌa nodi sera dodan baa Yesus. (Tuir loos, ema ida neꞌe lahoos ema Yahudi, mais ema Samaria. Ema Samaria no ema Yahudi sakar malu nohuun.)

17Naree ema nia fila mai nunia, Yesus katak naꞌak, “Ohin nia Haꞌu kadiꞌak kola emi naꞌin sanulu! Naꞌin siwi iha nabee? 18Tan saa ema maktabar neꞌe mesan mak mai tonu-naboot Naꞌi Maromak?” 19Hotu Yesus katak tenik baa ema nia naꞌak, “Tan o fiar Haꞌu tebe-tebes, o diꞌak tiꞌan. Mariik! Fila ona!”

Lia Yesus namaan aan mai nikar

(Mateus 24:23-28,37-41)

20-21Baa loron ida, ema Farisi naꞌin hira mai nusu baa Yesus naꞌak, “Ama Boot! Katak kokon lai! Wainhira Naꞌi Maromak nahuu nalaꞌok Niakaan ukun?”

Yesus nataa naꞌak, “Lia nuneꞌe! Keta haneo Naꞌi Maromak nalaꞌok Niakaan ukun nodi tadak oi-oik mak ema raiklaran bele leno. Kalo ema katak naꞌak, ‘Haree kokon mai! Naꞌi Maromak nalaꞌok Niakaan ukun iha neꞌe!’, keta fiar. Kalo ema seluk naꞌak, ‘Naꞌi Maromak nalaꞌok Niakaan ukun iha nebaa!’, keta fiar. Ema la netan kakaer nunia, tan Naꞌi Maromak nalaꞌok Niakaan ukun iha itakaan neon laran.”

22Hotu Yesus katak baa Niakaan maktuir sia naꞌak, “La kleur ona Haꞌu, Ema Raiklaran Isin neꞌe, la kamutuk ko emi tiꞌan. Loron susar toꞌo, emi atu beer Haꞌu, mais Haꞌu la iha ona. 23Kalo ema balu mai katak naꞌak, ‘Kristus iha neꞌe!’ lale ema seluk katak naꞌak, ‘Kristus iha nebaa!’, lalika halau aan buka baa-mai, tan sia naktolek aan. 24Oras Ema Raiklaran Isin namaan aan mai nikar, niakaan tadak malorek basuk, hanesan mameran mak laka naroma laleꞌan nosi rohan baa rohan. 25Mais Nia musti natiu susar oi-oik uluk lai, tan ema oras neꞌe la noꞌuk rona baa Nia. Sia moos atu dudu sees Nia. 26Nosi ikus, oras Nia namaan aan mai nikar, ema atu moris nalo aat nuꞌu ema mak moris oras Noh otas.#Lia Uluk Fohon 6:5-8 27Baa otas nia, ema la noꞌuk rona. Sia naa-nemu, nalo dahur hola malu, toꞌo loron Noh tama baa roo. Teki-tekis, motasaꞌe boot mai, nadodok sia hotu.#Lia Uluk Fohon 7:6-24

28Nosi ikus, oras Ema Raiklaran Isin namaan aan mai nikar, ema sia moos atu moris hanesan ema mak moris baa oras Lot otas. Baa otas nia, ema kota Sodom moris nalo aat nodi naa-nemu, nodi faꞌan no sosa, nodi serwisu toꞌos, no nariik uma. 29Mais sia moos la noꞌuk rona. Hotu, baa seisawan ida, Lot nalai nela kota Sodom. Teki-tekis, fatuk laak mak nasai dubun raso monu nosi laleꞌan mai, sunu mohu ema Sodom sia.#Lia Uluk Fohon 18:20—19:25

30Dadi, sintidu! Oras Ema Raiklaran Isin namaan aan mai nikar, keta toꞌo emi moris halo aat nunia, tan teki-tekis Nia mosu mai. 31Baa loron nia, ema mak iha uma tehen, keta tama uma ona atu nahulin naha. Ema mak serwisu iha toꞌos, keta fila uma ona atu nola naha.#Mateus 24:17-18; Markus 13:15-16 32Hanoin saa mak uluk dadi baa Lot feen. Nia mate, tan nanoin naha iha uma.#Lia Uluk Fohon 19:26

33Ema mak la noꞌuk tuir Haꞌu tan beer aan duꞌuk, nosi ikus, nia moris butan. Mais ema mak noꞌuk tuir toꞌo latan moris tan beer Haꞌu, nosi ikus, nia netan moris nohuun no Naꞌi Maromak.#Mateus 10:39, 16:25; Markus 8:35; Lukas 9:24; Yohanis 12:25 34Rona! Nosi ikus, oras Ema Raiklaran Isin namaan aan mai nikar, ema naꞌin rua toba iha fatik ida. Teki-tekis Naꞌi Maromak foti nola ida, nabusik nela ida. 35Feto naꞌin rua ledu hare namutuk, Naꞌi Maromak foti nola ida, nabusik nela ida. 36[Ema naꞌin rua serwisu namutuk iha toꞌos, Naꞌi Maromak foti nola ida, nabusik nela ida.]”#17:36Tohar neꞌe la noo iha Hakerek Moon lia Yunani mak tuan.

37Rona nola nunia, Yesus Niakaan maktuir sia nusu naꞌak, “Ama Boot! Lia nia sia atu dadi iha nabee?”

Hotu, Yesus soe lia naꞌak, “Naꞌan dodok iha nabee, manu kawaa iha nebaa.” [Yesus dale lia funin naꞌak, oras Kristus namaan aan mai nikar, ema hotu-hotu bele naree.]

Tällä hetkellä valittuna:

Lukas 17: tetNTPO

Korostus

Jaa

Kopioi