Panagnaꞌan 44
44
Sawan malepasin tinapukan dem karut
1Pag ubus siye mangan, dinaꞌak weꞌ si Yusup daraꞌakan pangandelannen, paꞌinne, “Pennoꞌanun karut meꞌ aꞌa iyan duk kinakan tamanan taboꞌoden duk meꞌ sīnden isihun dem karutde dangan-dangan. 2Ubus isihun sawanku pilakin dem karut salihin duk sīn pamelline kinakanin.” Ubus tinuhut weꞌ daraꞌakan pangandelannen kēmon pinaꞌin Yusupin.
3Manjari pag subu-subu ne dinaꞌak hap lumaꞌ ne meꞌ pungtinaꞌi Yusupin sampay meꞌ hayepden. 4Gaꞌ pe siye tala amban puweblo, paꞌin si Yusup si daraꞌakan pangandelannen, “Pī kew paturul si meꞌ aꞌa miyaꞌan. Bang taꞌabutnu siye paꞌinun si siye, ‘Weꞌey tumbasanbi mahāpin duk laꞌat? 5Weꞌey tangkewbi sawan amukun? Sawan iyan gunane paginumanne duk pagpayam-payamanne isab. Laꞌat hininangbi iyan.’ ”
6Pag taꞌabutne si siye, sā miyaꞌan bissā daraꞌakan pangandelan Yusupin si siyehin. 7Manjari paꞌinde si iye, “Weꞌey kew, Tuwan, missā sā iyan? Bugtuꞌ gaꞌi makajari bang kami maghinang laꞌat sā miyaꞌan. 8Pikilun, meꞌ sīn bakas takesuwaꞌ kami dem karut kamihin tūranan kami balik si kaꞌam amban lahat Kanaꞌan. Weꞌey pe tangkew kami pilak atawa bulawan amban lumaꞌ amunun? 9Bang takasuwaꞌnu sawanin dem karut kami, sine-sine ne kami meꞌ daraꞌakannun palaꞌihan sawan miyaꞌan, ambat iye matey duk kami sinduwehin manjari meꞌ banyagaꞌnu ne, Tuwan.” 10Nambung iye, paꞌinne, “Sā pinaꞌinbin ne. Saguwaꞌ iye hadja palaꞌihan sawanin mamanjari banyagaꞌkun. Kaꞌam sinduwehin gaꞌ niyaꞌ sāꞌbi.” 11Ubus dangan-dangan siye magdayiꞌ-dayiꞌ maduwaꞌi duwaꞌanden duk keniya-keniya ngaluka karutnen. 12Ubus pinagturul-turul weꞌ ne piniha sawanin dem karutde dehellu sakahin tamanan dambuli salihin. Takasuwaꞌ sawanin dem karut Binyamin. 13Manjari ginaret weꞌ de badjuꞌden peggeꞌ suse siye manamal duk magpaduwaꞌ siye balik duk balik siye pī si puweblo.
14Pag tekka disi Yahud duk meꞌ pungtinaꞌinen laꞌi si lumaꞌ si Yusup, laꞌi pe iye si lumaꞌ. Manjari pasujud siye si iye. 15Tilew si Yusup siye, paꞌinne, “Ine teꞌ bakas tahinangbi inin? Gaꞌi ke kataꞌuhanbi weꞌ aꞌa kuweꞌ aku inin asal taꞌu magpayam hangkan asal kataꞌuhanku du meꞌ tinapukanin?” 16Paꞌin si Yahud, “Ine sambung kamihin, Tuwan? Ine paꞌin kami duk kataꞌuhannu weꞌ gaꞌ niyaꞌ duse kami si inin. Asal inin panumbas Tuhan duse kami metuꞌuhin. Tiyaꞌ ne kami magpabanyagaꞌ si kaꞌu, Tuwan, kami kēmon sampay iye bakas pangesuwaꞌan sawan dem karutnen.” 17Saguwaꞌ nambung si Yusup, paꞌinne, “Gaꞌi makajari, gaꞌi ku mabayaꞌ sā iyan. Iye bakas pangesuwaꞌan sawan dem karutnen, iye hadja dendangan banyagaꞌkun. Kaꞌam sinduwehin hap lumaꞌ ne kaꞌam balik pī si samabin karayaw gaꞌ niyaꞌ baya-bayabi.”
18Manjari patapit si Yahud pu si Yusup duk paꞌinne, “O, Tuwan, ampunun ku weꞌ niyaꞌ akaku si kaꞌu, Tuwan, niyaꞌ batang bissāku papastiꞌ. Daꞌa kew astel si aku. Kaꞌu, Tuwan, kuweꞌ ne kew sultan Misirin. 19Bakas tilewnu kami, meꞌ daraꞌakannun, bang ellum pe ke sama kamihin duk bang niyaꞌ pe ke pungtinaꞌi kami seddili. 20Duk paꞌin kami si kaꞌu, ‘Aweꞌ, ellum pe sama kamihin. Bahiꞌ ne iye duk niyaꞌ isab anakne dambuwaꞌ si kabahiꞌnen, iye sali kamihin. Na, sakanen, iye saweꞌne magdambuwaꞌ saꞌihin, ubus ne matey. Hangkan hep iye saꞌ dendangan talebbihin duk kinalasahan iye manamal weꞌ sama kamihin.’ 21Ubus paꞌinnu si kami, ‘Boꞌohun bi iye pitu si aku duk iye kiteku.’ 22Paꞌin kami si kaꞌu, ‘Gaꞌi makajari bang tahalaꞌ si Totoꞌ amban sama kamihin peggeꞌ bang tahalaꞌ iye, sudda matey sama kamihin.’ 23Ubus paꞌinnu hep si kami, ‘Bang gaꞌi nuhut salibin pitu gaꞌi ku takitebi balik.’
24“Na, pag balik kami pī si sama kamihin akahan kami iye bakas pinaꞌinnun. 25Manjari sakaliꞌ kami daꞌakne balik pitu melli meꞌ kapamangan bisan kuꞌahat, 26nambung kami, paꞌin kami, ‘Gaꞌi kami makajari padurul balik pī si Misir bang gaꞌi makatuhut sali kamihin. Peggeꞌ gaꞌi kami tapaharap si aꞌa miyaꞌan bang gaꞌi nuhut sali kamihin.’ 27Ubus paꞌin sama kamihin si kami, ‘Kataꞌuhanbi weꞌ niyaꞌ anak kami duk andaku tugguhin duwe lella. 28Dambuwaꞌin gaꞌ ne kuweꞌitu, ubus paꞌinku weꞌ bakas takakan hayep ne iye peggeꞌ sampay kuweꞌitu gaꞌ iye kiteku.’ 29Paꞌinne pe, ‘Bang boꞌobi pe isab salibin tahalaꞌ amban aku bu niyaꞌ umantag si iye, sudda matey ku weꞌ dukkakun,’ paꞌinne. 30Hangkan hep, Tuwan, bang tekka ku balik si sama kamihin bu gaꞌi nuhut sali kamihin, 31iye makamatey iyehin bang kitene weꞌ gaꞌ makatuhut kami anaknen peggeꞌ hadje teꞌed lasane pu Binyaminin. 32Aku maggarantolin weꞌ asal tūrananku teꞌed iye. Paꞌinku, ‘Bang gaꞌi iye tūrananku si kaꞌu, dusehan ku si kaꞌu, Ammaꞌ, gaꞌ niyaꞌ tamananne puwas.’ 33Hangkan pākuku si kaꞌu weꞌ aku ne hadja mapaꞌambanin duk manjari banyagaꞌnun gantiꞌ si Totoꞌ. Saguwaꞌ sali kamihin duk meꞌ sakane sinduwehin subey du tapoleꞌ. 34Inumey saꞌ tapabalikku pī si sama kamihin bang gaꞌi makatuhut si Totoꞌ? Gaꞌi tasandalku si Ammaꞌ mayaman bang niyaꞌ umantag si iye sabab dukkanen.”
Tällä hetkellä valittuna:
Panagnaꞌan 44: yakV
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2019, Wycliffe Bible Translators, Inc. All rights reserved.