San Mateo 17

Jesusa' zhiçxkwe yu'pthehçxa vxyaani

(Mr 9.2-13; Lk 9.28-36)

1Seis en skhẽwniite', Jesusa' pe'jna u'kh Pedro vxite' pxakhsa Jakobo Juan txãawe'sxtxi teeçx vxiç walate. 2Sa' kxtee pa'jçxa', txãawe'sx dxi'pte Jesusa' wala zhiçxkwe yu'pthehçxak vxyaa. Txajx dxi'pa' sek na'wẽk eena' khi'khi', aça' txajx athni ropa' seena' zhiçxkwe çxihme yuuk. 3Naapkaçxha' Moises vxite' Elias txãawe'sxa' Jesus yakh puutx we'wenatx vxyaa. 4Txã'wẽ uyçxa', Jesusna na'wẽk we'we Pedro':

—Ayte' kwe'sx ũswa'j wala ewa'. Aça' idx ewna jĩte', tekh wa'kuẽ txaja'nja'w, vxite' iidx jĩi vxite' Moises jĩi vxite' Elias jĩi.

5Txã'jĩna Pedro' we'wena ũsiyna, tãaph seena' zhiçxkwe çxihmesa kũhçxa aphku. Aça' txãa tãaphte na'jĩnak we'weni pthũuse:

—Na' adx Nçxi'k wala wedxnisa', txãa pa'ga wala weçxana ũsthu. Txã'sa' nwẽese'jna kxtey myuuwe jĩni's 6Pedrowe'sxa' wẽse'jçxa', wala ũukhçxa kiwega pkipha wetetx. 7Aça' Jesusa' txãawe'sxtxi jxa'dxçxa na'wẽk we'we:

—Ũukhmée mkiitewe jĩte', 8kiiteçxa' Moiseswe'sxtxi' uymeeyã'tha', naasáa Jesusçxáa yã'kh ũs yu'.

9Txajũ' thã'ju sa'jna u'jweççxa', Jesusa' na'jĩnak jxkaah:

—Kim yuhtxwa pta'sxmeene'kwe txã'wẽ uyni's, Dxus Nçxi'k Nasa Yuusáa uuçxawa ki' ĩtxi yuupkaçx jĩte', 10Pedrowe'sxa' Jesusna na'wẽtx pẽjx:

—Dxus leya's kaapiya'jsawe'sx pta'sxçxa', Elias khuẽ'y yaçte pa'jana jĩ'tx, sa' ¿ma'wẽ yuuwa'jsakx açki'tx txã'jĩ'? jĩte', 11Jesusa' na'wẽk pta'sx:

—Isa, Elias khuẽ'y yuh yaçte pa'jwa'jsa yu'k, aça' isa yuh pta'sxi'ne'ta. 12Adxa' na'jĩ'th na', Eliasa' yaçte pa'jyujk. Txã'wẽtewa nasa' jiyumeeçxa, txã'sa' kĩjkĩhwa yũutx. Aça' Dxus Nçxi'k Nasa Yuusáawa wala pkxuuni yuuna txãawe'sx kusetey jĩk. 13Aça' Pedrowe'sxa' jiyutx Jesusa' Juan Bautistana yajkxçxa we'weçtewa.

Teeçx luuçx wẽeçxpa'jsa's Jesus nuykatxhini

(Mr 9.14-29; Lk 9.37-43)

14Txajũ' txãawe'sxa' sxawedna kĩjaçte', nasa wala pkhaakhena ũsu'tx. Aça' teeçx piçthẽ'j Jesus tasxte peejxũkwena kũhçxa', na'wẽk pxthaa we'we:

15—Adx nçxi'ka's meen peeygãh, wẽeçxpa'jçxa iiméh seena' pxthaa yuuna ũsa'. Maa enteya' ipxkhẽwa khẽje'k, sa' yu'khẽwa khẽje'k. 16Aça' idx yakh u'jusawe'sx tasxte jxũna kũhtewa, nuykatxhiya' ãjameeta' jĩte', 17Jesusa' na'jĩnak pas:

—Dxusa' pu'çxhina sũhwa'j yu'sa' ji'phmeesata' naa nasa'. ¿Bagaçxpkaçx i'kwe'sx yakh pu'çxna ũs ya'watka? ¿Bagaçxpkaçx ãjamée fxi'ze ya'wakwe? Luuçxa's ayte mneejxũhwe jĩte', 18jxũna kũjuçpkaçxha', Jesusa' eçxa's juuna' we'weçxa kutxi'kh luuçx ũusu, aça' txãa dudtey katxhinik neeyũu.

19Jesus yakh u'jusawe'sxa' Jesusa'sçxáa fxii pa'yaçxa, na'jĩnatx pẽjx:

—Kwe'sxa' ¿kĩh yũuçxakxtha'w eçxa's kutxi'jya' ãjamée? jĩte', 20Jesusa' pta'sxku:

—Dxusa' pu'çxhina sũhwa'j yuuçxá's yaakxpa'gamée i'kwe ãjamée. Isath we'we', Dxusa' pu'çxhina sũhwa'ja's mostasa fxiw na'wẽ le'çxkuẽesaçxáawa ji'phwaça', naa vxiç wala's we'weni yakhçxáa fxiite ki'pxa' ãjane'kwe. Dxusa' pu'çxhina sũhwa'j yuuçxá's yajkxwaça', i'kwe'sx yakha' kĩh yuhwa thẽysameena. 21Na'wẽsa eçxa' thẽymée yu' kasehmeena, wala yũunaana Dxus yakh puutx we'wete yuuçxáa kasejena jĩk.

Jesusa' txajx uuwa'ja's ki' pta'sxni

(Mr 9.30-32; Lk 9.43-45)

22Txajũ' Galilea kiwete ũsçxa', Jesusa' txãa yakh u'jusawe'sxtxi' pta'sxku:

—Dxus Nçxi'k Nasa Yuusa's nasa ewmeesa kusete dukhni yuuwa'ja'. 23Aça' ikhetxna, nawa tekh ente' ki' ĩtxi yuuna jĩna pta'sxte', txãawe'sxa' wala nxustxi.

Dxuus yatpa'ga vxyu dukhni

24Jesusa' txãa yakh u'jusawe'sx yakh Kapernaum çxhabte pa'the', dxuus yattewe'sx vxyuu pkhakhsawe'sxa' Pedro's thegya' u'jçxa na'wẽtx pẽjx:

—I'kwe'sxtxi kaapiya'jsa' ¿dukheçmeewá' dxuus yattewe'sx vxyu's? jĩte', 25Pedro we'weçxa':

—Dukhe'íik jĩnak pas. Sa' Pedro' Jesus ũsni yatte kũjuçpkaçxha', Jesusa' na'jĩnak we'we:

—Simon, idxa' ¿maa sũju'ga? Naa kiwete jxkaahsawe'sxa' vxyu kaapkhakhe'jçxa', ¿kimtxi pẽywa'ja' jĩ'ta? ¿Jxkaahsa ji'jwe'sxwa dukhe'ta', meeçxa' txãa ji'jmée ekajuwe'sxçxáa wá'nta dukhe'? jĩte', 26Pedro' na'wẽk pas:

—Ekajuwe'sxçxáatx dukhe' jĩk. Aça' Jesusa' na'wẽk we'we:

—Txã'wẽyã'the', jxkaahsa ji'jwe'sxa' dukhwa'jsameeta'. 27Nawa kim yuhtxwa kaaũusçxa'jya'mée idxa' u'jçxa ĩkhwalate wedx yũhza's akhene'ga, sa' nyafxte wedx kãasa's kaawayi'jçxa uyuune'ga teeçx vxyu ji'phna. Txãa yakh dukhene'ga adx pa'gate vxite' iidx pa'gate yã'jçxa jĩk.

Tällä hetkellä valittuna:

San Mateo 17: pbbNNT

Korostus

Jaa

Kopioi