San Mateo 14

Juan Bautista uuníi

(Mr 6.14-29; Lk 9.7-9)

1Txãa ensu' Herodesa' Galilea kiwetek ne'jwe'sx yu', sa' Jesus kĩjkĩhwa ew yũuni's jiyuçxa', 2txãa yakh ũssawe'sxtxi na'wẽk we'we:

—Txãa piçthẽ'ja' Juan Bautistane' ki' ĩtxi yuu. Txãasane' txã'wẽ kim yuhwa ãjanimeesa'swa kaavxya'ja'jya' ãja' jĩk.

3Herodesa' Juan Bautista's na'wẽ yũuçxaga ikh: Juana's tudçxa karcelte ktxaaja'kha, nawa Herodes nyakh Fxelipe nyu Herodias pa'gaçxáane' txã'wẽ karcelte ktxaaja'j. 4Txãa ensu' Juan Bautista' Herodesa's we'weçxa':

—Iidx yakhthẽ'j nyua's kusa'jçxa iidx nyu na'wẽ jxpe'jwa'j ji'phmeeg jĩte', 5Herodesa' Juana's ikhe'nja sũhne'. Nawa nasa jxukaysa Juan ju'guçxaçxáane'ta ũsu', Juana' Dxus yuwe pta'sxsapa'ga. Txãa pa'gane' ũukhçxa ikhmée karcelteçxáa txah. 6Nawa teeçx ente' Herodesa' txajx upxni en anxu ãhte fxiesta vxitte', Herodias niisa' nasa pi'kxnisa dxi'pte wala zhiçxkwe ku'jya' kasehne'. Txãa pa'ga Herodesa' iiméh wala weçxaçxa, 7kĩh pẽjxtewa jxuka ũsu'nja jĩnane' puutx we'we txãa kna'sa's. 8Txajũ' njĩ'j yu'kxpehte', txãa kna'sa' na'wẽga pẽjx Herodesa's:

—Juan Bautista dxikthea's plaatute akhçxa ũsune'ga jĩte', 9ne'jwe'sx Herodesa' wala nxusçxawa, txã'wẽ yã'jne' kĩh pẽjxtewa ũsya' puutx we'we nasa pi'kxnisa dxi'pte, txãa pa'ga kxtey yũuya' neeyũuyã'jçxa', 10Juan dxikthea's spẽ'thkaahne' karcelte. 11Aça' dxikthea's plaatute akhçxa ũste', txãa kna'sa yu' njĩ'ja'sne' dukh.

12Txã'wẽ yũute', Juan Bautista yakh pi'kxna u'jusawe'sxa' pa'jçxa uuníi kakwe's jxũna u'jçxa pedaane'ta. Sa' u'jçxa Jesusa's pta'sxne'ta.

Cinko mil nasatx Jesus sã'jĩni

(Mr 6.30-44; Lk 9.10-17; Jn 6.1-14)

13Txã'wẽ Herodesa' Juan Bautista's ikhku jĩni's Jesusa' jiyuçxa', barkote khẽeçxa u'kh teeçx ahte kim yuhwa u'pnimeesate pa'jya'. Nawa Jesus mtee pa'jya' u'thewa jiyuçxa nasa' çxhabu kasehçxa Jesus pa'jwa'the pakwena u'jtx çxidaçxáa. 14Aça' Jesusa' barkoju kasejeççxa' uyku nasa wala kuh ũste, sa' txãawe'sxtxi peeygãhçxa nuykatxhik ãça'satx pe'jçxa nuypa'jnisatxi'. 15Txajũ' kusna kĩjaçte', txãa yakh u'jusawe'sxa' Jesus tasxte utxaaçxa na'wẽtx we'we:

—Kusuçyã'ja', naapkaçxha' aysu' kim yuhwa u'pnimeesa'. Aça' nasatxi' mkaah çxhabsu pa'jçxa kĩhçxáawa weyçxa ũ'kahn jĩte', 16Jesusa' na'wẽk pas:

—Txãawe'sxa' ũ' weyya' u'jwa'j peejxmeena. I'kwe'sx mpuuçwe jĩte', 17na'wẽtx pas:

—Kwe'sxa' kĩhwa wala yu' ji'phmeetha'w. Tahç pan e'z wedxçxáa ji'phtha'w jĩte', 18Jesusa':

—Txãatxi' mneejxũhwe jĩnak jxkaah.

19Txajũ' nasatx kaçxkaakh txaksũ. Sa' tahç pan e'z wedxtxi jxpa'gaçxa, cielute pagayçxa Dxusa's weçxaçxa pantxi pe'ltedek. Txã'wẽ yũuçxak txãa yakh u'jusawe'sxtxi ũs, aça' txãawe'sxa' ũsu'stxi nasatx. 20Aça' jxukaysa ũ'çxa txikte', doce kanastate utatx kijxasaatx pkhakh. 21Ũ'sawe'sxa' cinko mil piçthẽ'jtx yu', u'ywe'sx vxite' luuçxwe'sxtxi yu'.

Ĩkh kajkwega Jesus u'juni

(Mr 6.45-52; Jn 6.16-21)

22Txajũ' Jesusa' txãa yakh u'jusawe'sxtxi barkote yaçte kaakh, sa' txãa yu' kxtee neeyũuk nasa txuteena u'jsatx weçxana. 23Txajũ' nasa jxuka txuteena u'the', thã'j vxiçna u'kh txãaçxáa Dxus yakh puutx we'weya'. Jxuka çxhi'dxni yã'thewa, Jesusa' kxtee nee ũsíiçxáak yu'. 24Naapkaçxha' barko' ĩkh pxãjũy u'jweçku yu'. Aça' wejxaa wala kiiteçxa, dxi'puh sẽhçxa barko's yupku. 25Aça' khikhyna sẽjxa'wate', Jesusa' utxaana kũjk ĩkh kajkwega çxidaçxáa. 26Aça' ĩkh kajkwega txã'wẽ yuhte uyçxa', barkote u'jsawe'sxa' ũukhna na'jĩnatx sus we'we:

—Eçxa'stha'w uy jĩte', 27Jesusa' na'wẽk we'we:

—Ũukhnuwe, adxthu jĩte', 28Pedro we'weçxa' na'jĩk:

—Adxthu jĩ'g na' txãa dxihçxa', adxwa txã'wẽy ĩkh kajkwesu çxidaçxáa yujxa' ãjakahn mkaah jĩte', 29Jesusa':

—Txã'wẽçxa' myuh jĩnak we'we.

Aça' Pedro' barkojũ sa'jçxa, Jesus tasxte pa'j u'jya' u'jweçku yu' ĩkh kajkwesu. 30Nawa wejxa seena' çxhãçxha ũste', ũukhku. Sa' txã'wẽ ũukhpa'gaçxáa ĩkh dxiikhẽ khẽjeççxa', susku we'we:

—Meen nwe'we jĩçpkaçxha', 31Jesusa' pu'kisçxa na'jĩk:

—¿Kĩjxa'ga Dxusa's yu' yajkxmée, ũukhwa'jçxá's yajkx? jĩçxa', 32Jesusa' barkote Pedro yakh khẽjeçpkaçxha', wejxaa wala' jxuka yujuk. 33Aça' barkote ũssa' Jesus tasxte peejxũkweçxa na'wẽtx we'we:

—Isa, idxa' Dxus Nçxi'k yuh yu'ga jĩtx.

Genesarettewe'sxtxi Jesus nuykatxhini

(Mr 6.53-56)

34Ĩkhuy ktejkaçxa', Genesaret kiwete pa'jtx. 35Aça' kxsũ nasa' Jesus pa'jni's jiyuçxa txãa kiwesu nasatx jxuka pta'sxte', nasa' ãça'satx jxuka Jesus tasxte nuypa'jtx, 36na'jĩna pxthaa we'wena:

—Iidx atxh vxiçteçxáawa makhya'dxi'j jĩçxa, txã'wẽ jxa'dxsa' jxuka katxhiçxatx neeyũ'.

Tällä hetkellä valittuna:

San Mateo 14: pbbNNT

Korostus

Jaa

Kopioi