Amatie 5

Nẽr-sɛba n tarɩ Nawẽnnɛ yel-sõnnɛ

(Aluki 6:20-23)

1Tɩ Azezi yẽ nẽr-kʋʋŋɔ la, zom tãŋa zuo zĩ'ire. Tɩ a karẽnbiisi la lagsɛ a zẽ'am. 2Tɩ a yãŋa zãsʋm ba yetɩ:

3«Nẽr-sɛba n mi tɩ ba ka masɛ Nawẽnnɛ nẽŋam tarɩ zu-yẽlga,

se'ere n soe la, Nawẽnnɛ so'olʋm de la ba bõnɔ.

4Sũ-sã'aŋɔ dõma tarɩ zu-yẽlga,

se'ere n soe la, Nawẽnnɛ wʋn botɩ ba sũure mã'agɛ.

5Sũ-bʋgsʋm dõma tarɩ zu-yẽlga,

se'ere n soe la, Nawẽnnɛ wʋn bɔ ba dũnia tɩ ba sɔna.

6Sɛba n boorɩ sɛla n masɛ Nawẽnnɛ yɛm la ba sũure wuu tarɩ zu-yẽlga,

se'ere n soe la, Nawẽnnɛ wʋn bɔ ba sɛla tɩ ba boorɩ la tɩ la seke.

7Ninbãal-zɔtba tarɩ zu-yẽlga,

se'ere n soe la, Nawẽnnɛ wʋn zoe ba ninbãalga.

8Pʋpeelem dõma tarɩ zu-yẽlga,

se'ere n soe la, ba wʋn yẽ Nawẽnnɛ.

9Sɛba n botɩ sũ-mã'asʋm bɔna nẽrba tẽŋasʋka tarɩ zu-yẽlga,

se'ere n soe la, Nawẽnnɛ wʋn wi'ira ba tɩ a kɔma.

10Sɛba n ɩtɩ sɛla n masɛ, tɩ ba nãmsra ba tarɩ zu-yẽlga,

se'ere n soe la, Nawẽnnɛ so'olʋm de la ba bõnɔ.

11Yãma sɛba tɩ ba tʋʋrɩ ya, nãmsra ya, tɔgra ya tɔg-be'ero dee parna bɔ'ɔra ya, yan dolɩ mam na ĩyã, tarɩ zu-yẽlga. 12Ẽŋɛ-ya sũ-yẽlga sɩrʋm, ya yɔɔrɔ n wʋn zo'oge Nawẽnnɛ yire la ĩyã. Ba mẽ daan nãmsɛ Nawẽnnɛ nõtɔ'ɔsrɩba n dẽŋɛ yãma la bɛla.»

Yaarʋm, la peelem makrɛ

(Amarkɩ 9:50, Aluki 14:34-35)

13Azezi daan le yetɩ: «Wʋ yaarʋm n botɩ dia zã'asʋm na, yãma mẽ masɛ tɩ ya ãna wʋ yaarʋm dũnia wã pʋam. La yaarʋm sãn sabgɛ, bẽm n wʋn basɛ tɩ a le zã'asʋm? A lebge la zãŋa, a ka le tara yõorɔ, a de la ba lobe ẽ basɛ yẽŋa, tɩ nẽrba nẽ ẽ la nãma.

14Yãma de la dũnia wã peelem. Tẽŋa n boe tãŋa zuo ka tã wʋn sʋgɛ. 15La ba ka yõ'orɩ fɩtla vugra la pɩ'ɩgɔ, ba wʋn zoole ẽ na fɩtla zoolgo zẽ'a, tɩ a nẽegɛ peelem bɔ'ɔra nẽr-sɛba wuu n boe yire la pʋam na. 16Bɛla, basɛ-ya tɩ ya peelem nẽegɛ nẽrba tẽŋasʋka, tɩ ba yẽ ya tõon-sõma nã'asɛ ya Sɔ Nawẽnnɛ n boe saazuum.»

Azezi zãsʋm lɔɔ yelle

17«Da tẽ'esɛ-ya tɩ mam wa'am tɩ m sã'am na Nawẽnnɛ lɔɔ, bɩɩ a nõtɔ'ɔsrɩba yetɔga la. Mam ka wa'am tɩ m sã'am ba, mam wa'am tɩ m pa'alɛ la ba võorɛ ba'asɛ, dee ẽŋɛ ban yele se'em na. 18Mam yetɩ ya la sɩra sɩra, tɩ saazuum la tẽŋa n wʋn yuuge se'em, sɛla sɛla kãn yese Nawẽnnɛ lɔɔ la pʋam baa fẽfẽe, halɩ tɩ sɛla woo wa ẽŋɛ ba'asɛ. 19Bɛla, nẽr-sɛka n ka sakɛ Nawẽnnɛ lɔɔ ayɩla, baa a sãn ãna pɩka gãnna wuu, dee zãsna nẽrba basɛba tɩ ba da sakɛ, a wʋn dɛna nẽr-pɩka Nawẽnnɛ so'olʋm pʋam. La sɛka n sakɛ Nawẽnnɛ lɔɔ, dee zãsna nẽrba tɩ ba ɩta bɛla, a wʋn dɛna nẽr-kãtɛ Nawẽnnɛ so'olʋm pʋam. 20Mam yetɩ ya la sɩra sɩra, tɩ ya sãn ka ɩta Nawẽnnɛ n boorɩ se'em na gãnna lɔɔ karẽnsãandõma, la Farisi dõma, ya kãn tã'agɛ kẽ Nawẽnnɛ so'olʋm pʋam.»

Azezi zãsʋm sũ-isgre yelle

(Aluki 12:57-59)

21«Yãma wõm tɩ ba daan yele kʋrʋm dõma yetɩ: ‹Da kʋ nẽra, la nẽra sãn kʋ nẽra, ba di a sarɩya.› 22La mam yetɩ ya tɩ nẽr-sɛka woo sũure n isge la a sɔbia, la masɛ tɩ ba di a sarɩya. La sɛka n yele a sɔbia yetɩ: ‹Yalma›, la masɛ tɩ sarɩyaditba nẽŋadõma di a sarɩya. La sɛka n yele a sɔbia yetɩ: ‹Fʋ ka tarɩ võorɛ›, ẽŋa dãana masɛ mɛ tɩ a kẽ bug-tẽŋa. 23Bɛla, fʋ sãn tarɩ fʋ bɔ'a wa'am kãabgɔ bĩmbĩnne zẽ'a tɩ fʋ bɔ Nawẽnnɛ, sãn tẽegɛ tɩ fõn tarɩ la yelle la fʋ sɔbia, 24fʋ basɛ fʋ bɔ'a la kãabgɔ bĩmbĩnne la nẽŋam, dee dẽŋɛ sẽŋɛ ka malgɛ fʋ yelle la, la fʋ sɔbia la, dee yãŋa leme wa'am wa dɩkɛ fʋ bɔ'a la bɔ Nawẽnnɛ.

25Fʋ sãn tara yelle la nẽra, tɩ a tara fʋ wɛ'ɛsa sarɩyadia zẽ'am, malgɛ fʋ yelle la tɔtɔ, yãma n nãn boe sore la, tɩ a da dɩkɛ fʋ bɔ sarɩyadita, tɩ a tɔgɛ fʋ yetɔga la dɩkɛ fʋ bɔ gu'ura, tɩ a kẽ'esɛ fɔ yʋ'a deem. 26Mam yetɩ fʋ la asɩra, tɩ fʋ kãn yẽ sore yese yʋ'a deem na, halɩ tɩ fʋ wʋn wa yɔ fʋ sãnnɛ na wuu ba'asɛ.»

Azezi zãsʋm yalsɩ yelle

27«Yãma wõm tɩ ba daan yetɩ: ‹Da gã'arɛ la fʋ tadãana pɔga.› 28La mam yetɩ ya tɩ, sɛka n bɩsɛ pɔka tɩ a yɛm bɔɔra ẽ, a põn gã'arɛ la ẽ mɛ a sũure pʋam. 29Fʋ zʋʋgɔ nifo sãn yetɩ a botɩ fʋ basɛ Nawẽnnɛ sore, fʋ kɩrgɛ ẽ lobe basɛ zãazãarɛ, se'ere n soe la, fʋ ĩyã sɛla ayɩla sãn ka bɔna mĩ sõɩ ba wʋn lobe fʋ ĩyã wuu bug-tẽŋa. 30La fʋ zʋʋgɔ nu'ugo sãn yetɩ a botɩ fʋ basɛ Nawẽnnɛ sore, fʋ wike ẽ lobe basɛ zãazãarɛ, se'ere n soe la, fʋ ĩyã sɛla ayɩla sãn ka bɔna mĩ sõɩ ban wʋn lobe fʋ ĩyã wuu bug-tẽŋa.»

Azezi zãsʋm pɔka lebsgo yelle

(Amatie 19:9, Amarkɩ 10:11-12, Aluki 16:18)

31«Ba yʋʋn yetɩ: ‹Nẽr-sɛka n lebse a pɔga, a bɔ ẽ gõŋɔ n pa'alɛ tɩ a lebse ẽ mɛ.› 32La mam yetɩ ya mɛ tɩ, nẽr-sɛka woo n lebse a pɔga, tɩ la sãn dagna tɩ a gã la bʋraasɩ, a wʋn botɩ pɔka la sã'am mɛ, a sãn ele sɩra ayẽma. La nẽr-sɛka n di pɔg-sɛka tɩ ba lebse la, ẽŋɛ la be'em wʋ nẽra n gã'arɛ la a tadãana pɔga.»

Azezi zãsʋm pɔrɛ yelle

33«Ya ken wõm tɩ ba yʋʋn yele kʋrʋm dõma yetɩ: ‹Da viige ya pɔrɛ. Fʋ sãn bĩŋe nõorɛ pɔɩ tɩ fʋ ẽŋɛ sɛla bɔ Zuudãana Nawẽnnɛ, dẽnɩ tɩ fʋ ẽŋɛ bɛla.› 34La mam yetɩ ya tɩ, ya põn da pɔɩ. Da pɔɩ saazuum, bẽm ĩyã, a de la Nawẽnnɛ na'am bĩmbĩnne. 35Da pɔɩ tẽŋa, bẽm ĩyã, a de la a nãma dɔglgɔ zẽ'a. Da pɔɩ Zerizalɛm, bẽm ĩyã, a de la Nawẽnnɛ n de na-kãtɛ la tẽŋa. 36Da pɔɩ fʋ zuugo, bẽm ĩyã, fʋ ka tã wʋn basɛ tɩ fʋ zomto baa ayɩla lebge pɛɛlga bɩɩ sabga. 37Basɛ-ya tɩ ya ‹ẽe› dɛna ‹ẽe›, tɩ ya ‹ayɛɩ› dɛna ‹ayɛɩ›. La sãn gãŋɛ bɛla, sɛla n pa'asɛ la de la be'em dãana bõnɔ.»

Da lebse be'em be'em ĩyã

(Aluki 6:29-30)

38«Ya wõm tɩ ba daan yetɩ: ‹Nẽra sãn pusge a tadãana nifo, ba mẽ pusge a nifo, nẽra sãn vike a tadãana yẽnnɛ, ba mẽ vike a yẽnnɛ.› 39La mam yetɩ ya mɛ tɩ, nẽra sãn ẽŋɛ ya be'em, ya da ẽŋɛ be'em lebse. La nẽra sãn wẽ fʋ zʋʋgɔ pɛka, fʋ basɛ tɩ a wẽ fʋ gɔbga pɛka pa'asɛ. 40La nẽra sãn sãm fɔ tɩ a to'oge fʋ fu-pɩka, fʋ basɛ tɩ a to'oge fʋ fu-kãtɛ pa'asɛ. 41La nẽra sãn pẽrgɛ fɔ tɩ fʋ kɔlgɛ ẽ kilomẽtrɩ ayɩla, fʋ kɔlgɛ ẽ kilomẽtrɩ bayi. 42Nẽra sãn sose fʋ sɛla, fʋ bɔ ẽ. La nẽra sãn bɔɔra tɩ a peŋe sɛla fʋ zẽ'am, da mõŋɛ ẽ.»

Nõŋɛ-ya ya bɛ'ɛba

(Aluki 6:27-28,32-36)

43«Ya wõm tɩ ba daan yetɩ: ‹Fʋ nõŋɛ fʋ tadãana, dee sise fʋ bɛ.› 44La mam yetɩ ya mɛ tɩ, ya nõŋɛ ya bɛ'ɛba, dee pʋ'ʋsra Nawẽnnɛ bɔ'ɔra sɛba n nãmsrɩ ya la. 45Ya sãn ẽŋɛ bɛla, ya wʋn dɛna ya Sɔ Nawẽnnɛ n boe saazuum na kɔma, se'ere n soe la, ẽŋa n botɩ wʋntɛɛŋa yẽkra bɔ'ɔra nẽr-sõma la nẽr-be'ero, dee botɩ saaga niira bɔ'ɔra sɛba ɩrgɔ n masɛ, la sɛba ɩrgɔ n ka masɛ. 46Yãma sãn nõŋɛ sɛba n nõŋɛ ya la mã'a, bẽm yɔɔrɔ tɩ ya wʋn yẽ Nawẽnnɛ zẽ'am? Lampo-tɔ'ɔsrɩba mẽ ɩtɩ la bɛla. 47La yãma sãn pʋ'ʋsra la ya sɔbiisi mã'a, bẽm tɩ yãma ɩtɩ gãnna ya taaba la? Nẽr-sɛba n ka dolɩ Nawẽnnɛ na mẽ ɩtɩ la bɛla. 48Bɛla, dɛna-ya nẽrba tɩ ya ɩrgɔ wuu wʋn masɛ, wʋ ya Sɔ Nawẽnnɛ n boe saazuum ɩrgɔ wuu n masɛ se'em na.»

Tällä hetkellä valittuna:

Amatie 5: gurDBL

Korostus

Jaa

Kopioi